Santiago 5:16 - Kashibo-Kakataibo Biblia

¹⁶ Usa ꞌain camina mitsúnmi min ꞌatimaquin sináncë a ñuixuananquin abëmi Jesucristomi catamëcë uni raíribë mia usa ñucama mëníoxunun Nucën Papa Dios ñucáxuananti ꞌain. Upíira oquin sinánquin ñucácë cupí ca Nucën Papa Diosan upí oquin uni ꞌaquinti ꞌicën.

Nukën 'Ibu Diosan ain unikama 'inan ain bana

¹⁶ Usa 'ain camina mitsúnmi min 'atimaquin sináncë a ñuixuananquin abëmi Jesucristomi catamëcë uni raíribë mia usa ñucama mëníoxunun Nucën Papa Dios ñucáxuananti 'ain. Upíira oquin sinánquin ñucácë cupí ca Nucën Papa Diosan upí oquin uni 'aquinti 'icën.

Santiago 5:16 ပူးပေါင်းရင်းမြစ်များ

Génesis 19:29

Ësokin ka Nukën ꞌIbu Diosan ëma rabë́ anua Lot ꞌikë këñuakëxa, usakin a këñukinbi ka Abrahammi sinánkin aín piaka Lot ashi a ëmanua chikíankëxa.

Génesis 20:17

Usokian kakëxun ka Abrahamnën Nukën ꞌIbu Dios ñukáxuankëxa, ñukáxunkëxun ka Nukën ꞌIbu Diosan Abimélec aín xanukëñunbi pëxkuakëxa. Usokin ꞌanan ka an ñu ꞌaxunkë xanukamaribi tuánun ꞌimiakëxa,

Génesis 20:7

ꞌAínbi kamina bërí, a xanu aín bënë ꞌinántëkënti ꞌain, ax ka an Dios kikë bana ñuixunkë ꞌikën, usa ꞌixun ka an mi ꞌë ñukáxunti ꞌikën, ñukáxunkëx kamina mix upitax tsóti ꞌain; usa ꞌain kamina bëríbi a uni aín xanu ꞌinántëkënti ꞌain, ami ꞌinankëbëma ka min xanu ꞌimainun min xubunu ꞌikë unikamaribi këñuti ꞌikën.

Génesis 32:28

Ësokian kakëxun ka unin kakëxa: —Bërí ka min anë Jacob kakë ꞌitima ꞌikën. Min anë ka Israel kakë bërí ꞌiti ꞌikën, mix kamina Nukën ꞌIbu Diosbë tananan, ꞌimainun kamina bërámabi bëtsi unikamaribi usaribi okin kanánkën.

2 Samuel 19:19

Simín kakëxa: —ꞌËn kana mi ësokin kain, ꞌë kamina uisabi otima ꞌain, ꞌën kana mi ꞌatima banan kakën an mi ñu mëëxunti uni ꞌixunbi kana a nëtën mi Jerusalénnuax chikíkiani kuankin mi ká bana a kamina sinántima ꞌain. ꞌImainun kamina ꞌë istisama tani ꞌëmi nishtima ꞌain,

Job 42:8

Usa ꞌain kamina bërí ꞌëx mitsumi nishkë a nëtë́tanun, mapai achúshi ꞌimainun rabë́ vaca bërí kanikë këñun mapai achúshi ꞌimainun rabë́ carnero bibiani uinu kara ꞌën uni Job ꞌia anu a buani kuanti ꞌain, anuxun kamina a ñuinakama rëxun ꞌaímai këñutanun xaroti ꞌain. Usakin ꞌakëbëtan ka ꞌën uni Jobnën mitsu ꞌë ñukáxunti ꞌikën, ñukákëxun kana an ꞌë kakësabiokin, mitsu uisabi otima ꞌain, mitsun kamina asérabi ꞌë ñui upiti banaiman, ꞌën uni Job ax kikësai.

Salmos 34:15

Nukën ꞌIbun ka aín bana ꞌakë unikama bërúaia, usa ꞌixun ka an ñukákëxun kuakin ꞌakinia.

Éxodo 17:11

Usa ꞌain ka Moisés pënchati nikëbëtan Diosan ꞌakinkëxun israel unibunën amalecitakama abë ꞌakanankin ñusma okëxa; ꞌaínbi ka Moisésnën aín pëñan meu okëbëtan amalecita unibunën abë ꞌakanankin Israel unikama ñusma okëxa.

Éxodo 9:33

Usa ꞌain ka Moisésnën faraónbë banatankëx anuax chikíkiani a ëmanuax kuanxun, aín mëkën manámi okin Nukën ꞌIbu atu ñukáxuankëxa. Ñukákëbëishi ka matsin tita pakëti ꞌuí ꞌibúkë a ꞌimainun, kanákamë ꞌëo sharakirukë ax bukubuti nëtë́akëxa.

Proverbios 15:8

Nukën ꞌIbu Diosan ka uni ꞌatima sinánñukaman ñu ꞌaxunkëxunbi a upí isima, ꞌaínbi ka uni upí sinánñukama an ñukákëxun kuni kuatia.

Jeremías 15:1

Ësakin ka Nukën ꞌIbun ꞌë kakëxa: Mitsun chaitiokë Moisés ꞌimainun Samuelnën ꞌë bëtánain nirakëxun usakin kamina ꞌatima ꞌai kixun kakëxunbi kana ënë unikama nuibatima ꞌain. Usa ꞌain kamina anu ꞌëx ꞌikë ënuax chikíkiania kuantanun ënë unikama kati ꞌain.

Números 11:2

Usai ꞌikëbë sharákin ka unikaman Moisés atua ꞌakinun kixun kakëxa, kakëxun ka Moisésnën Nukën ꞌIbu atu ꞌakinun kixun ñukáxuankëxa. Ñukáxunkëbë ka tsi rëkirukësa ꞌinun ꞌikë ax nëtë́akëxa.

Mateo 21:22

Mitsun —asérabi ca Nucën Papa Diosan ꞌën cacëxun ꞌë ꞌaxunti ꞌicë —quixun sinania ca an mitsúnmi ñucácësabi oquin mitsu ꞌaxúnti ꞌicën.

Mateo 3:6

Cuanxúan atun ꞌuchacama chiquinatia ca Juanën Jordán bacanuxun nashimiacëxa.

Marcos 1:5

Usa ꞌain ca Judea menu ꞌicë unicama ꞌimainun Jerusalénu ꞌicë unicamaxribi Juanën bana ñuixunia cuati cuancëxa. Cuanxuan atun ꞌuchacama chiquinatia ca Juanën Jordán cacë bana anuxun nashimiacëxa.

Lucas 9:6

Usaquin caquian Jesusan xucëx camabi ëmanu cuanquin ca anu ꞌicë unicama upí bana, anúan atux Nucën Papa Diosnan ꞌi cuëënun, ñuixuancëxa. Ñuixuanan ca uni ꞌinsíncëcama pëxcüacëxa.

Juan 9:31

Cananuna ꞌunanin, an ñu ꞌatima ꞌacë unin bana ca Nucën Papa Diosan cuatima. An a ami sinánquin a rabianan axa cuëëncësa oquinshi ꞌacë uni, aín bana cuni ca Nucën Papa Diosan cuatia.

Hechos 10:38

Camina ꞌunanin, Nucën Papa Diosan ca Jesús Nazaretnu ꞌicë a aín Bëru Ñunshin Upí abë ꞌinun ꞌinánquin aín cushiribi ꞌináncëxa. ꞌInáncëxun ca ñu upíshi ꞌanan ñunshin ꞌatimañu unicamaribi pëxcüacëxa, Nucën Papa Dios abë ꞌain.

Hechos 19:18

Usaía ꞌicëbë uxun ca axa Jesúsmi catamëcë ꞌitsa unin —usaribi oquin cana ꞌën ñu ꞌatima ꞌacë —quixun chiquinacëxa.

Hechos 8:24

Cacëxun ca Simonan Pedro cacëxa: —Min ꞌë cacë bana usai ꞌëx ꞌiaxma ꞌinun camina mitsun Nucën ꞌIbu Dios ꞌë ñucáxunti ꞌain.

Romanos 3:10

Nucën Papa Diosan bana cuënëo ca quia: An ñu upíshi ꞌacë uni ca ꞌaíma ꞌicën, achúshirabi.

Romanos 5:19

Achúshi uni, Adán, axa Nucën Papa Dios quicësabi oi ꞌiáma cupí ca ꞌaisamaira uni ꞌuchañu ꞌicën. Usa ꞌaínbi ca bëtsi uni, Jesucristo, axira Nucën Papa Dios quicësabi oi ꞌiá cupí ꞌaisamaira uni Nucën Papa Diosan upí isia.

Colosenses 1:9

Epafrasnëan mitsu ñuiquin nu cacë bana cuaxun cananuna ënquinma Nucën Papa Dios mitsu ñucáxunin. Uisaími ꞌiti cara Nucën Papa Dios cuëënia, a mitsu ꞌunánminun ñucáxuanan cananuna an aín unicama ꞌunánmiti ñucama mitsu ꞌunánminun a ñucatin.

1 Tesalonicenses 5:17

Usai ꞌi camina camabi nëtën Nucën Papa Diosbë banacanti ꞌain.

1 Tesalonicenses 5:23

Nucën Papa Dios, an nu bënëtima chuámarua ꞌimiti, an mitsu upíshi ꞌinun ꞌimianan mitsun sinan, mitsun nuitu ꞌimainun mitsun namíxbia uisa ꞌuchañumabi ꞌinun mitsu ꞌimiti cana cuëënin, utëcënquian Nucën ꞌIbu Jesucristonën usa ꞌicë mitsu isti cupí.

1 Tesalonicenses 5:25

Nucën xucë́antu, camina nu sinánquin Nucën Papa Dios nu ñucáxunti ꞌain.

Hebreos 11:4

Bërí nëtë́nma ca Adanën bëchicë, Abel, an ami sinánquin Nucën Papa Dios quicësabi oquin a rabiquin ꞌaracacë ñuina rëxun xaroxuancëxa. Usomainunbi ca aín xucën Cainan aín cuëëncësa oquinshi aín ñu bimishi Nucën Papa Dios xaroxuancëxa. Cainan usoia isi ca Nucën Papa Dios cuëëanma ꞌicën. Abelnëan ꞌaxuncëxun isi cuni ca cuëëancëxa. Abel bama ꞌaínbi cananuna —Abelnën ca asérabi Nucën Papa Diosmi catamëquin ax quicësabi oquin ꞌacëxa —quixun sinanin.

Hebreos 11:7

Ënë́nsaran nëtë́nmaribi ca Noénën ami catamëquin —Nucën Papa Dios quicësabi oi ca ꞌiti ꞌicë —quixun ꞌunáncëxa. ꞌUnáncë ꞌicë ca Nucën Papa Diosan Noé cacëxa, —camabi uníxa ꞌaisamairai ꞌuchacë cupí cana unían usai ñu ꞌiti sináncëbëtanmabi camabi me baca mapumiquin cëñuti ꞌai —quixun. Nucën Papa Diosan bana ca asérabi ꞌicë quixun ꞌunánquin ca Noénënshi, ꞌitsa ꞌuí ꞌibúcëma pain ꞌaínbi aín manë nunti chaira anua aín aintsi ꞌibucama atsínmiti ꞌacëxa, Nucën Papa Diosan a cacësabi oquin. An usoquin ꞌaia iscë unicama ca —ënë menu ꞌicë unicama ꞌaisamairai ꞌuchacë cupí ca Nucën Papa Diosan cëñuti ꞌicë —quixun Noénën ñuixuancëxa. Nucën Papa Dios quicësabi oi ca ꞌiti ꞌicë quixun sinánquian Noénën, an cacësabi oquin ꞌaia isi ca Nucën Papa Dios cuëëancëxa.

Hebreos 12:13

Usa ꞌixunmi mitsun aín cuëëncësa oquin ꞌaia isquin ca raíri uniribi ami catamëti upí oquin ꞌunáncëma ꞌaíshbi a ëníma mitsux ꞌicësaribiti ꞌiti ꞌicën. Usaía atux ꞌinun camina Jesucristomi catamëquin aín cuëëncësa oquin ꞌati ꞌain.

Hebreos 13:18

Cananuna ꞌunanin, ñu ꞌatima ꞌaquinma upí ñuishi ꞌaisa tania ca Nucën Papa Diosan nu upí isia quixun. Usa ꞌicë camina nu Nucën Papa Dios ñucáxunti ꞌain.

Josué 10:12

A nëtë́an Nukën ꞌIbun ꞌamikëxun israel unibunën amorreo unikama ꞌakë a nëtën ka Josuénën aín suntárukaman kuamainun Nukën ꞌIbun ñukákin ësokin kakëxa: Barix ka Gabaón puntë nirakëti ꞌikën; ꞌimainun ka ꞌuxëribi Aialón kakë me puntë ami nirakëti ꞌikën.

1 Pedro 2:24

Nun ꞌuchacama cëñucë ꞌaíshnu amiribishi ñu ꞌatima ꞌatëcënima, ñu upíshi ꞌai tsónun ca Cristo nun ꞌuchacama bicë cupí i curúsocënu bamacëxa. Mitsúxmi ñu ꞌatima ꞌai ꞌinsíncësa ꞌaíshbi upí ꞌinun ca ax ꞌaisamaira oquin paë tënëi bamacëxa.

1 Juan 3:22

Nun ax quiásabi oquin ꞌanan, ax cuëëncësabi oquin ꞌaia isquin ca an nun ñucácësabi oquin nu ꞌaxunia.

1 Samuel 1:12

Usa ꞌain ka Anan Nukën ꞌIbu basipain ñukatia, Elínën aín kuëbí isakëxa;

1 Samuel 12:17

Mitsúnbi kamina ꞌunan bërí ka anun trigo bimi biti ꞌuxë ꞌikën, ꞌaínbi ka ꞌuñe ꞌibutíma, ¿asérabi kara usa ꞌik? Usa ꞌaínbi ka ꞌën ñukákëxun Nukën ꞌIbun ka kaná banamianan uñeribi ꞌibúnun ꞌimiti ꞌikën, usokin ꞌakëbëtan kamina mitsun sinanakin ꞌunánti ꞌain, nun kananuna Nukën ꞌIbu kuëënkëma ñu ꞌakin achúshi ꞌapu nu ꞌinánun ñukákën kixun.”

1 Samuel 12:18

Usakin atu katankënxun ka Samuelnën Nukën ꞌIbu ñukákëxa, ñukákëxun ka an bënë́kinshi uñe ꞌibúmianan kanáribi banarunun ꞌimiakëxa; usai ꞌia isi ka kamabi uni timë́kë atux ꞌitsaira Nukën ꞌIbumi rakuëanan Samuel mi ribi rakuëkankëxa.