Santiago 1:12 - Kashibo-Kakataibo Biblia

¹² An uisa ñu cara ꞌicëbëbi bënë́quinma tanshiquin Jesucristomi catamëti ëncëma unicama a ca usaía ax ami sináncë unicama ꞌiti ñuia quiásabi oquin Nucën Papa Diosan aín nëtënu abë ꞌaish chuámarua ꞌaish cuëënun ꞌimiti ꞌicën.

Nukën 'Ibu Diosan ain unikama 'inan ain bana

¹² An uisa ñu cara 'icëbëbi bënë́quinma tanshiquin Jesucristomi catamëti ëncëma unicama a ca usaía ax ami sináncë unicama 'iti ñuia quiásabi oquin Nucën Papa Diosan aín nëtënu abë 'aish chuámarua 'aish cuëënun 'imiti 'icën.

Santiago 1:12 ပူးပေါင်းရင်းမြစ်များ

Génesis 22:1

Usa ꞌain ka Nukën ꞌIbu Diosan ꞌitsa baritia ami panatankëxun, Abraham karaisa ënima ami manutima asérabi sinania kixun tankin. Aín anën kuëankëxa, usakin kuënkëxun ka Abrahamnën kakëxa: —Ënu kana ꞌain ꞌën ꞌIbu.

Nehemías 1:5

Ñukákin kana ësokin kakën: “Nun ꞌIbu Dios naínu ꞌikë mix kamina chaiira ꞌianan ax rakuënmianankë a ꞌain, usa ꞌixun kamina mix kia bana kikësabiokin ꞌanan uin kara min bana kikësabiokin ꞌaia akama nuibatin;

Job 2:10

Ësakian kakëxun ka Jobnën aín xanu kakëxa: —¡ꞌËn xanu usai kamina ꞌatimai banatima ꞌain! Kamabi ñunu Diosan ꞌinánkëxun bikë ax ka asábi ꞌikën, ¿usaribi okin karanuna nua kamabi ñu ꞌatima inúnun ꞌimikëx inúkin tënëtima ꞌain? Usai kamabi ñu inutibi ka Job ꞌuchanan achúshi banabi Dios ñui ꞌatimati ami banama ꞌikën.

Job 5:17

Usa ꞌain ka chuámarua ꞌiti ꞌikë ui uni kara Diosan ꞌunánmisatankin ꞌatima ñu inúnun ꞌimia ax; usai ꞌikinbi ka Dios kushiira ꞌixuan usai ꞌiti ꞌimikëxunbi ami ꞌatimakin sinánkinma abi tënëkë uni ax ꞌiti ꞌikën.

Éxodo 20:6

ꞌaínbi kana an ꞌëx kikësabiokin ꞌakë unikama a xënibua ꞌaínbia aín rëbúnki kamax ax kikësabira oi ꞌiti bana a ꞌaia nuibati ꞌain.

Isaías 64:4

Uinsaranbi ka uinu ꞌikë unínbi, anu ka misaribi bëtsi dios ꞌikë kixun ñuia unin kuananbi ꞌisama ꞌikën, usa ꞌain ka bëtsi dios an min ꞌakësokin an ñu ꞌakin, axa ami katamëkë unikama ꞌakinkin ꞌakë ꞌaíma ꞌiakëxa.

Mateo 10:22

Mitsúxmi ꞌëmi sináncëbë ca axa ꞌëmi sináncëma unicamax mitsumi nishti ꞌicën. Usa ꞌaínbi ca an uisa ñu cara ꞌicëbëtanbi ꞌëmi sinánquin ëncëma unicamax Nucën Papa Diosan nëtënu ꞌëbë ꞌiti ꞌicën.

Mateo 25:34

Usai ꞌitancëxun cana ꞌëx ꞌApuira ꞌixun axa ꞌën mëqueu ꞌicë unicama cati ꞌain: ꞌËn Papa Diosan ca mitsu upí oquin sinánxunia. Mecama ꞌimainun anu ꞌicë ñucama unioquin ca an mitsu sinánxunquin anu mitsux abë ꞌiti mëníocëxa. Ax quiásabi oi camina bërí anu ꞌiti ꞌain.

Lucas 6:22

Uni ꞌinux Nucën Papa Diosnuax uá ꞌën bana cuacë cupí unin mitsumi nishanan, mitsu cuëënquinma ꞌatimaquin ñuianan, mitsun anëmibi ꞌatimati banacëxbi camina chuámarua tani cuëënti ꞌain.

Romanos 5:4

Tëmëraíbi an ꞌimicëx masá nuitutima ami catamëcë ꞌaish cananuna Nucën Papa Diosan iscëx upí ꞌain. An iscëx upí ꞌixun cananuna ꞌunánti ꞌain, asérabi cananuna aín nëtënu abë ꞌiti ꞌai quixun.

Romanos 8:28

Cananuna ꞌunanin, Nucën Papa Diosan ca uisa ñu cara ꞌia abi, ax ami sináncë unicamaxa an ꞌaquincëx, upí ꞌinun mëníoxunia, atúan ax cuëëncësabi oquin ñu ꞌamainun. A unicama ax cuëëncësabi oquin ainan ꞌinun sinánmicë ꞌixun ca Nucën Papa Diosan usoquin ꞌaia.

1 Corintios 2:9

Nun nu ñuicë banax ca Nucën Papa Diosan bana cuënëosaribi ꞌicën. A banax ca ësai quia: Uinu ꞌicë unínbi ca iscëma ꞌicën, uinu ꞌicë unínbi ca a ñui quia cuacëma ꞌicën, uinu ꞌicë unínbi ca aín sinanën sináncëma ꞌicën, uisairai cara an a nuibacë uni abë ꞌaish ꞌiti ꞌicë quixun, Nucën Papa Diosan mëníosabi oi.

1 Corintios 8:3

Usa ꞌaínbi ca axa asérabi ami sináncë uni a Nucën Papa Diosan ainan ꞌicë ꞌunania.

1 Corintios 9:25

Uni axa cuaiticama ax ca aín nami cushi ꞌinux bachuaquin tania. Aín namia cushi ꞌiti cupí ca ñu ꞌatima ꞌaima. Usai ꞌitancëx abati ax pain bëbaquin ca ñu bitsia. Usai ꞌiquian bicëxbi ca a ñu chëqui ꞌatimatia. Usa ꞌaínbi cananuna nux Jesús cuëëncësabi oi ꞌinux camabi nëtën upí ꞌiti ꞌain. Usai ꞌitancëx cananuna an ꞌimicëx asaribi upí ꞌaish uinsaranbi nëtë́timoi abë tsóti ꞌain.

Deuteronomio 13:3

kixuan kakëxunbi kamina mitsun aín bana kuatima ꞌain. Nukën ꞌIbu Diosan ka asérabi karamina mitsun a nuibati ax kikësabiokin ꞌai ami sinani isnuxun mitsu tankin usakin ꞌati ꞌikën.

Deuteronomio 7:9

Asérabi kamina ꞌunánkanti ꞌain, Nukën ꞌIbu Dios ax ka asérabi Dios ꞌikë kixun, usa ꞌixun ka an aín chaitiokëkama bërí ꞌama ꞌixun aín rëbúnkikamaribi uikaman kara ax kikësabiokin aín bana ꞌaia a unikama nuibatia;

Deuteronomio 8:2

Usa ꞌain kamina sinánkanti ꞌain, Diosan ka anu uni ꞌikëma menu cuarenta baritia ꞌimi tëmërai ninun nu ꞌimiakëxa akamina manukinma sinánkanti ꞌain, usakin ka mitsu tankin ꞌanan ami karamina asérabi sinanatëkëni isti ꞌanan ax kikësabiokin aín bana ꞌai ꞌisnuxun mitsu ꞌakëxa.

2 Timoteo 2:15

Nucën Papa Diosan iscëxun camina aín bana upí oquin ꞌunáncë ꞌixun rabínquinma unicama ñuixunti ꞌain.

2 Timoteo 4:8

Usa ꞌixun cana Nucën ꞌIbu Jesucristonën utancëxun, upí oquin ax cuëëncësabi oquin ꞌën ꞌacë cupí cara uisaira ꞌë ꞌimiti ꞌicë quixun isti ꞌain. An ca asérabi aín quicësabi oquin ꞌati ꞌicën. Usa ꞌixun ca ꞌëishima, an axa uti cuëënquin caíncë unicamaribi, utancëxun uisaira oquin cara aturibi ꞌimiti ꞌicë usoquin ꞌimiti ꞌicën.

Hebreos 10:32

Jesucristomi catamëtabatia, unin mitsu bëtsi bëtsi oquin tëmëramicëxunbi camina bënë́quinma tanshiacën. Usaími mitsux ꞌia a camina sinánti ꞌain.

Hebreos 11:17

Abraham ca —asérabi ca Nucën Papa Diosan aín quicësabi ꞌoquin ꞌati ꞌicë —quixun ꞌunani ami catamëacëxa. Ësai ca ꞌiacëxa. Nucën Papa Diosan ca Abraham cacëxa: “Min bëchicë Isaacnën rëbúnqui ca asérabi ꞌitsaira ꞌianan ꞌënan ꞌiti ꞌicë” quixun. Usa ꞌaínbi ca Nucën Papa Diosan —asérabi cara Abrahamnën ꞌën cacësabi oquin ꞌati ꞌicë —quixun ꞌunántisa tanquin, Abraham cacëxa —min camina ꞌaracacë ñuina ꞌaxunquinma, min bëchicë Isaac abi ꞌë rabiquin ꞌë ꞌaxunti ꞌai —quixun. Cacëxun ca usoquin anuxun ꞌatinu Isaac buáncëxa.

Hebreos 12:5

¿A bana mitsúxmi aín bëchicë ꞌicëa ꞌësëquin Nucën Papa Diosan cacë a caramina manuan? ësai quicë: ꞌËn bëchicë ꞌicë cana mi cain, Nucën ꞌIbu Diosan ca an nuibacë unicama ꞌixunbia ñu ꞌatima ꞌaia oquin amiribishi ꞌatëcënxunma ꞌanun quixun ꞌunánmiquin uisoquin cara ꞌati ꞌicë usoquin ꞌaia. Uicama cara aín bëchicë ꞌinun ꞌimiaxa acama ca usoquin ꞌaia. Usa ꞌain camina ñu ꞌaisama ꞌaia Nucën ꞌIbu Diosan mi uisa cara mi ocëxbi aín bana cuaisama tani bënë́tima ꞌain. ꞌIanan camina masá nuituti sináncasmaquin, uisai carana ꞌiti ꞌai quixun sinántima ꞌain.

Hebreos 6:15

Usaquian cacëxun ca Abrahamnën —Nucën Papa Dios quicësabi oi ca ꞌiti ꞌicë —quixun sinánquin bënë́quinma, caíancëxa. Caíncëbë ca Nucën Papa Dios quicësabi oi Abrahamnën xanu tuutancëx Isaac bacë́ancëxa.

Santiago 2:5

ꞌËn nuibacë xucë́antu, ꞌën mitsu camainun ca cuat. Nucën Papa Diosan ca axa ënë menuax ñuñuirama unicama a caísia, atúxa ami upiti catamëcë ꞌianan aín nëtënu abë ꞌinun, an nuibacë unicamax ca usai ꞌiti ꞌicë quiáxa aín bana quicësabi oquin.

Santiago 5:11

Uicaman cara tëmëraquinbi bënë́quinma tanshitia ax ca upí oquinshi sinani cuëënia quixun cananuna ꞌunanin. Mitsun camina Jobnëxa ꞌaisamaira tëmëraibi Nucën ꞌIbu Diosmi catamëa a bana ñuia cuan. Cuacë ꞌixun camina ꞌunáncanin, uisaira oquin cara Nucën ꞌIbu Dios an nuibaquin uni ꞌaquincë ꞌixun a uni ꞌaquiancëxa quixun.

1 Pedro 3:14

Mitsúnmi ñu upí ꞌacë cupí tëmëraibi camina Nucën Papa Diosan ꞌaquincëx cuëënti ꞌain. Mimia uni ꞌicë́xbi camina racuëti masá nuitutima ꞌain.

1 Pedro 4:13

Bënë́quinma camina sinánti ꞌain, ami nishquian unin bëtsi bëtsi ocë́xa Cristo tëmërasaribi oquin cananuna nunribi tëmërai quixun. Usaquin sinani camina tëmëraibi cuëënti ꞌain, usaribiti ꞌApuira ꞌaísha Cristo aia isi cuëënux.

1 Pedro 4:14

Cristonan cupía unin mitsumi nishquin ꞌatimaquin ñuicëxbi camina Nucën Papa Diosan Bëru Ñunshin Upí cushiira, axa mitsubë ꞌain, cuëënti ꞌain. Unían ꞌatimaquin ñuiabi camina mitsun Cristo rabin.

1 Pedro 5:10

Usabi ꞌinúxmabimi tëmëracë ca Nucën Papa Diosan mitsu cushioquin Jesucristosaribi upí ꞌinun mitsu ꞌimianan —aín bana quicësabi oi cana asérabi ꞌiti ꞌai —quixun ꞌunani ami cushinun mitsu ꞌimiti ꞌicën. Ax ca an mitsu nuibaquin ꞌaquincë ꞌianan Jesucristonan cupí abë́mi xënibua ꞌaínbi upitax ꞌinun caíscë a ꞌicën.

1 Pedro 5:4

Usoquin ꞌaia ca Jesucristo, unin ꞌacësamaira oquian an aín unicama bërúancë, an utëcënquin mitsu —asábi ca —quixun catancëxun aín nëtënuaxmi xënibua ꞌaínbi abë cuëënun mitsu ꞌimiti ꞌicën. Ënë nëtënuax cuaiquin canania uisa ñu cara ꞌináncëxun bitsia uni cuëëncëbëbi ca an bicë ñu chëquia. Usaía uni ꞌicë ꞌaínbi camina mitsux xënibua ꞌaínbi Nucën Papa Diosbë ꞌaish cuëënti ꞌain.

1 Juan 4:19

An paían nu nuiba ꞌain cananuna nuxribi Nucën Papa Diosmi sinani ami catamëtin.

Apocalipsis 2:10

Unían bëtsi bëtsi oquin ꞌatimocëxbi camina racuë́tima ꞌain. Ñunshin ꞌatimanën ꞌamicëxun ca raíri unin mitsu sipuati ꞌicën, caramina ꞌëmi sinánti ënti ꞌai quixun isnuxun. Mëcën rabë́ nëtën camina paë tani tëmërati ꞌain. Uisai cara ñu ꞌicëbëtanbi camina anúnmi mitsux bamati nëtë utámainun ꞌëmi sinánti ëntima ꞌain. Usaími ꞌia cana mitsu ꞌën nëtënuaxmi nëtë́timoi ꞌëbë cuëënun ꞌimiti ꞌain.

Apocalipsis 3:19

Uicama carana nuibatin, acama cana ñu ꞌatima ꞌatëcënxunma ꞌanun ꞌësëanan uisoquin carana ꞌati ꞌai usoquin ꞌain. Usoquin ꞌën ꞌacëxmashi camina sinanati ꞌëx cuëëncësabi oi asérabi ꞌiti ꞌain.

Apocalipsis 3:21

ꞌAnan cana axa ꞌëmi catamëquin ꞌëx cuëëncësabi oi ꞌiti ëncëma unicamax ꞌëbë ꞌapu ꞌinun ꞌimiti ꞌain, ꞌëx tëmëraibi ax cuëëncësabi oi ꞌiti ëncëma ꞌicëa ꞌën Papan ꞌë abë ꞌapu ꞌinun ꞌimicësaribi oquin.