Oseas 6:6 - Kashibo-Kakataibo Biblia

⁶ Usa ꞌain kana mitsunmi ꞌë nuibati a kuëënin, ꞌën kana mitsunmi ñuina rëtankëxun xaroxunti a kuëënima, usa ꞌain kamina ax ka Dios ꞌikë kixun ꞌë ꞌunánkanti ꞌain, usakin ꞌunánkin kamina ꞌë ñuina rëtankëxun ꞌaímai këñutanun xaroxunkantima ꞌain.”

Oseas 6:6 ပူးပေါင်းရင်းမြစ်များ

Isaías 1:11

Ësai ka Dios kiaxa: “¿Uisa kupín kaina mitsun ꞌaisamaira ñuina rëxun ꞌë xaroxunin? ꞌËx kana ꞌaisamaira carnero rëxun ꞌaímai këñutanun kixun xarokankë a isi anun atsan, ꞌimainun kana vaca bërí kanikëkama aín xëni abi kuëënima; ꞌianan kana vaca ꞌain bënëkama ꞌianan carnerokama ꞌimainun cabra bërí kanikëkama aín imi bikë akamabi kuëëniman.

Isaías 58:6

ꞌAínbi ka usakin ꞌakë ax ꞌën iskëx usama ꞌikën. ꞌËx a isi kuëëntisabi ꞌitánun piti mëti ax ka ësokin ꞌati ꞌikën, bëtsi unikamax ka upíokin nuibakë ꞌiti ꞌikën, usa ꞌaish ka anun uni ñu ꞌatima ꞌakëmabi tëkërëkakë manë risi të́kakë usa ꞌianan, vaca bënë tëatsimixun i anun tëkërëkakë risi churukë usaribi mitsunan ꞌiti ꞌikën; ꞌianan ka bëtsi unin tëmëramikë axribi ñankáishi ꞌitánun këñúkë ꞌiti ꞌikën, usakin ꞌakëx ka ꞌapukamaxa unimi an kuëënkësa okin ꞌakë ax këñúkë ꞌiti ꞌikën;

Jeremías 7:22

ꞌAínbi kana ꞌën mitsun chaitiokëkama Egipto menua chikíntankëxun, usakin kamina ñuina xarokin ꞌati ꞌai kixun uisakinbi káma ꞌain.

Daniel 4:27

Usa ꞌain kamina ꞌën mi kakësokinbi ꞌati ꞌain, ꞌai kamina amiribishi ꞌuchatëkënkinma ꞌupiokin ñu ꞌati ꞌain, ꞌakin kamina ꞌatima okinmi ñu ꞌakë ënkin uni ñuñumakama ꞌakinti ꞌain, usokin ꞌai kamina ꞌapu ꞌaish uínbi uisabi okëma kuëëni tsóti ꞌain kixun ka Danielnën ꞌapu kakëxa.

Oseas 14:2

Usa ꞌain kamina Diosmi sinanatëkënkin ësokin mitsun a ñukáti ꞌain: “Nukaman ꞌuchakama kamina nu mëníoxunti ꞌain, mëníoxunkin kamina mix upí ixun nun mi rabikëxun upíokin kuati ꞌain.

Oseas 2:20

ꞌËn kana ꞌën xanusami mitsux ꞌain añu ñubi mitsu ꞌaxuntima ꞌain, usa ꞌikë kamina mitsun ꞌë ꞌëx kana Dios ꞌai kixun ꞌunánti ꞌain.

Oseas 4:1

Israel unikaman ka ësai ka Nukën ꞌIbu kia kuati ꞌikën. An ka ënë menu tsókë unikama nishanankë a uisokin kara ꞌati ꞌikë sinánxa, ënë menu ka uni nuibanani tsókë ꞌaíma ꞌianan, bëtsi uni mëëkaskin uisai kara Diosan bana kia abi ꞌunanima.

Amós 5:21

ꞌËn kana mitsunmi timë́xun fiesta ꞌakë a asérabi kuëëniman; ꞌimainun kana ñu rabi timëkankë abi istisama tankin timain.

Miqueas 6:6

¿Uisa ñu uani kuanxun karanuna, Nukën ꞌIbu Dios manámi ꞌikë a rabiti ꞌain? ¿ꞌIanan karana vaca bakë achúshi baritiañukama ꞌaímai këñutanu xaroxunti ꞌain?

Miqueas 6:8

Ënë ñukama ꞌaxunti ka Dios kuëënima, an ka nukama kaxa uisa ñux kara upí ꞌikën, ꞌimainun uisa ñu nun ꞌaxunti kara ax kuëënia: ax ka ësa ꞌikën, bëtsi unikamabë upí ꞌiti, uisa ñu ꞌakatsi karanuna kia usakinbi ꞌati, ꞌimainun an kakësabiokin ꞌanan ax kikësabiokin ñu ꞌati.

Mateo 12:7

Nucën Papa Diosan bana ca ësai quia: “Unían ꞌë rabianan aín ꞌucha tërë́ncë ꞌinuxun ꞌaracacë ñuina rëxun xaroia isi cuëëncësamaira oi cana atun uni itsi nuibaquin axa ꞌaquinsa ꞌicë ꞌaquinia isi cuëënin”. A bana cuacë ꞌaish camina ꞌën ꞌunánmicë unicaman trigo bëru bixun piia isi manáncëma ꞌitsían.

Mateo 5:7

An ꞌaquinsa ꞌicë uni itsi nuibaquin ꞌaquincë uni a ca Nucën Papa Diosanribi nuibaquin ꞌaquinti ꞌicën. Usai ca ꞌiti ꞌicë quixun ꞌunani ca chuámarua tani cuëënia.

Mateo 9:13

Usaribiti cana ꞌën an —ꞌëx cana asábi ꞌai —quixun sináncë unicama a ꞌëmia catamënun cai uáma ꞌain. Ama, an —ꞌën nuitu ꞌaisama ꞌaish cana ꞌëxbi upí ꞌitima ꞌai —quixun sináncë unicama a cuni upí ꞌinúxa ꞌëmi catamënun cai cana ꞌëx uacën. Usa cana ꞌëx ꞌai quixun sinánquin camina ꞌunánti ꞌain, uisai quicë cara Nucën Papa Diosan bana ënëx ꞌicë quixun: “Unían ꞌë rabianan aín ꞌucha tërë́ncë ꞌinuxun ꞌaracacë ñuina rëxun xaroia isi cuëëncësamaira oi cana atun uni itsi nuibaquin ꞌaquinsa ꞌicë ꞌaquinia isi cuëënin”.

Marcos 12:33

Cëmëima asérabi cuëëni, ax cuëëncësabi oi ꞌi ami sinánan unin axa bërúancacësaribi oquin aín aintsicama nuibanan ꞌaquinsa ꞌicë ꞌaquincëbë ca Nucën Papa Dios cuëënia, judíos unían aín ꞌucha cupí ꞌaracacë ñuina rëxun xarocëbëa ꞌicësamaira oi.

Josué 5:5

Kamabi unikama Egipto menuax kuankë axa aín nëtokë ñu rëbu maxaka tëakë aínbi ka kuania anu uni ꞌikëma menuax bakënkiankë akamax aín nëtokë ñu rëbu maxaka tëakëma ꞌiakëxa.

1 Juan 2:3

Aín bana quicësabi oquin ꞌacë ꞌixun cananuna ꞌunanin, nux cananuna asérabi ainan ꞌaish a ꞌunáncë ꞌai quixun.

1 Juan 3:6

Usa ꞌain ca uix cara ainan ꞌaísha, a ëníma abë ꞌicëa Nucën Papa Diosan sinánmicë ꞌicë, a unin ñu ꞌatima amiribi amiribi ꞌaima. An ñu ꞌatima amiribi amiribi ꞌacë uni ax ca ami catamëcëma ꞌianan uisa cara ax ꞌicë quixun Jesucristo ꞌunáncëma ꞌicën.

1 Samuel 15:22

Usokin kakëxunbi ka Samuelnën kakëxa: Nukën ꞌIbun ka kuëënia ax kikësokinshi ꞌaxúnti, usa ꞌain ka ñuina xaroxuntishi kuëënima; ax kikësabi okinshi ꞌati ax ka ñuina xaroxuanan carnero aín xëni xaroxunkë usamaira ꞌikën.