Oseas 2:7 - Kashibo-Kakataibo Biblia

⁷ Usai ꞌikin ka ꞌain mërati ꞌikë unikama nuiti ꞌikën, ꞌaínbi ka nukutima ꞌikën; ꞌianan ka barikinbi mëratima ꞌikën. Usakin mërakima tani ka kiti ꞌikën: Ax paían ꞌën bënë ꞌia uni anubi kana kuantëkënti ꞌain, abë kana bërí ꞌëx ꞌikësamai upiti tsóakën.

Oseas 2:7 ပူးပေါင်းရင်းမြစ်များ

Salmos 116:7

Usa ꞌain kana bërí, kuni chuámarua tanin, min kamina ꞌëbë upí ꞌixun ꞌë,

Isaías 30:16

kuëënima ka kikankëxa: “Usama ka caballonu ꞌirukiani kananuna abáti kuanti ꞌain.” Usai ꞌi nukamax abákë ax ka asábi ꞌiti ꞌikën. ꞌImainun kamina ësairibi kikankën: “Ishtuinshia kuankë caballonën nirinkë anu këñurukiani kananuna abati kuanti ꞌain.” Axa numi nishkë unikaman kuni ka bënëtishi niti ꞌunanxun nukama nuiti ꞌikën.

Jeremías 14:22

¿Anu kara ꞌiti ꞌikë unínbia a rabinuxun ꞌakë dios an ꞌuí ꞌibúmiti ꞌiti ꞌit? ¿ꞌIanan kara naíkamë ꞌëo abi ꞌuí kushiira ꞌibúnun ꞌimiti ꞌik? ¡Usama ka, Nukën ꞌIbu Dios! Mix kamina an ꞌuí ꞌibúnun ꞌimikë a ꞌain. Mix kamina an kamabi ënë ñukama usaía ꞌinun ꞌimikë a ꞌain; ¡usa ꞌain kananuna mimishi katamëti ꞌain!

Jeremías 2:2

Anu kuanxun kamina Jerusalén ëmanua ꞌikë unikama; munuma kuëníshkin upíokian kuanun kati ꞌain: ¡Ësakin mitsu kanun ka Nukën ꞌIbu kiaxa! ꞌËn kana bëná pain ꞌixunmi ꞌën kakësabiokin ꞌá a sinanin, usa ꞌixun kamina an biti unían mëratiokëxun xanun nuikësa ꞌinun mitsun ꞌë nuibakën, ꞌimainun kamina anu uni ꞌikëma me anu ñu ꞌapátisama anuxunbi ꞌë ꞌakiankën.

Jeremías 2:28

Judá menu tsókë unikaman. ¿Uinu kara bërámami mitsúnbi ꞌa dioskama ax ꞌik? ¡Mitsun dios ax ka ꞌitsaira ꞌaish ëma kamabëtan sënë́maira ꞌikën! ¡Usa ꞌain ka atux ꞌatima ñu inutia uisakin, ië́misakara kixun mitsu isi uti ꞌikën!

Jeremías 2:36

¿Uisa kupín kaina bëtsi unikamabë biranankatsi kixun bënë́kinshi sinanin? Usa ꞌaínbi ka Egipto menu tsókë unikaman ka mitsu ꞌakintima ꞌikën, Asiria menu tsókë unikaman mitsu ꞌakianmasa okin.

Jeremías 31:18

ꞌËn kana Efraínën rëbúnkikama ꞌitsaira masá nuituti ësai kikania kuan: ꞌËx kana bana kuakëma ꞌaish achúshi vaca tuá raëmisama usaribi ꞌiakën, usa ꞌikëbi kamina min ꞌë ꞌunánmamiakën; usa ꞌain kamina amiribishi mi rabitëkënun ꞌë ꞌimiti ꞌain, mix kamina ꞌën ꞌIbu Dios ꞌain.

Jeremías 31:32

Ënë achúshi ñu ꞌati ax ꞌën aín chaitiokëkamabëtan ꞌasa usama ꞌiti ꞌikën, atun ka Egipto menua ꞌën mëkënan tuínxun ꞌakësokin chikinkëxunbi; ꞌëx atun bënësa ꞌaínbi ka ꞌën atubëtan ꞌën ꞌakë achúshi ñu ax kikësabiokin ꞌaisama tankëxa. ꞌËx mitsun ꞌIbu ꞌaish kana asérabi ësai kiakën.

Daniel 4:17

Ënëx ka usai ka ꞌiti ꞌikë kiaxa an bërúanti nankë ángelkama ax kikë ꞌikën, usa ꞌikë ka kamabi unikaman ꞌunánti ꞌikë, ax ka manámi ꞌikë Dios kamabi kushiñu a ꞌikën, an ka uikara ꞌapu ꞌimitisatania a ꞌapu ꞌimianan uix kara ñuumasara ꞌikë a unikamaribi aín kushia aín menubi ꞌinun ꞌimia.

Daniel 4:25

ꞌImainun kamina mix ꞌapu ꞌaíshbi chikiti unikamabë ënanantankëx chikítankëx ñuina kamabë niti ꞌain; usai ꞌikin kamina vaca bënëkamasa ꞌixun pasto pinuxun ꞌain, usai ꞌia ka pëkarakuatsínkëbëtan nibí ꞌibúkin min nami chabóti ꞌikën. Usai kamina mix ꞌapu ꞌaish mapai achúshi ꞌimainun rabë́ baritia anúnmi Dios an ka kamabi kushiñu ꞌixun axa aín kushi ꞌiti unikama ax kuëënxun aín kushi ꞌinun ꞌimia, kixun ꞌunánti nëtë ꞌitámainun niti ꞌain, an ka uikara ꞌapu ꞌimitisatania a ꞌapu ꞌimia.

Daniel 4:32

ꞌën kana unikamabë ꞌimami ñuinakamabë ꞌinun mi ꞌimiti ꞌain; anuxun kamina pasto vaca bënëkaman ꞌakësaribi okin mapai achúshi ꞌimainun rabë́ baritia anúnmi, Dios ax ka ënë menu ꞌikë ëmakama aín kushi ꞌianan ui kara aín kushi ꞌimitisatania a aín kushi ꞌimia kixun min ꞌunánti nëtë sënë́ntamainun ꞌiti ꞌain.

Daniel 5:21

Usakin ꞌatankëxun ka uni ꞌikëbi unikamanua chikinkin achúshi ñuinasa ꞌinun ꞌimiakëxa; usokëx ka ñuina raëkëma ꞌimainun vaca bënëkamabëtan pasto pi nitsia ka, nibítan ꞌibúkin aín nami chabókëxa, usa ꞌain ka Dios manámi ꞌikë an kushiira ꞌixun kamabi menu ꞌikë unikama ꞌakianan, ui kara ꞌapu ꞌimitisa tania a ꞌapu ꞌimia kixuan anun ꞌunánti nëtë ꞌitámainun ꞌakëxa.

Oseas 1:2

Ësai ka uisai kara Israel unikama ꞌiti ꞌikë kixun ñuixunkin Oseas kai Dios kiakëxa: “Kamabi Israel menu ꞌikë unikama ka bëtsi bëtsi ñu ꞌai ꞌëmi manuti xanu aín nami mëakakënëx ꞌikësai ꞌiaxa. Usa ꞌain kamina minribi anu kuantankëxun achúshi xanu bëtsi bëtsi unibë ꞌikë min xanu ꞌinun biti ꞌain, bitankëxun kamina ami bakë bëchiti ꞌain, bëchikëx ka akamax achúshi xanu aín nami mëakakënën tuá ꞌiti ꞌikën.”

Oseas 13:6

“Usa ꞌaínbi kamina mitsux piti ꞌitsairañu ꞌikin tani nukamax kananuna usa ira ꞌai kixun sinani ꞌëmi manúkankën.

Oseas 14:1

Israel unikama Nukën ꞌIbu Diosmi kamina sinanatëkënti ꞌain, mitsúxmi ꞌuchakë a kupí kamina ꞌaisama kan.

Oseas 2:16

Usa ꞌain ka anuxun mix kamina ꞌën bënë ꞌai kixun ꞌë kati ꞌikin, kakin ka Baal mix kamina ꞌën ꞌibu ꞌai kixun katima ꞌikën. ꞌËx Dios ꞌaish kana ësai kin.

Oseas 5:13

Uínsaran kara Efraínën ain ꞌinsínkë ismainun, Judánu ꞌikë unikaman atun naminu ñukë isia, anun ka Efraín Asirianu ꞌikë ꞌapu ꞌakinun kixun ñukáti kuanti ꞌikën, ꞌaínbi ka atu ain ñukëkama mëníokati pëxkunun ꞌakintima ꞌikën.

Oseas 5:15

Usakin ꞌatankëx kana anu ꞌëx ꞌikë anu, atunbia sinanakin kana ꞌucha kixun ꞌë baritamainun kuanti ꞌain. Tëmërai bënë́kin ka atun ꞌë bariti ꞌikën.”