Oseas 2:2 - Kashibo-Kakataibo Biblia

² Ësai ka Israel unikama ñui Dios kiaxa: “¡Mitsun tita kamina min ꞌuchoti ꞌain, ax ka bërí ꞌën xanuma ꞌikën, ꞌimainun kana ꞌëx aín bënëma ꞌain! ¡ꞌIanan ka aín nami ꞌakë xanusa ꞌikëa unin ꞌunánkë a ënti ꞌikën! ¡ꞌIanan ka an ꞌain nami ꞌakë unikamabëa ꞌikë a ënti ꞌikën!

Oseas 2:2 ပူးပေါင်းရင်းမြစ်များ

Isaías 50:1

Ësai ka Nukën ꞌIbu kia: “¡ꞌËn kana Israel unikama mitsun tita ꞌikëbi rakankë kixun kamina sinánkantima ꞌain, achúshi unin aín xanu ënkin rakankë usaribi okin, usokin ꞌanan karana mitsu ñu mëmikë uni ꞌakësokin ama ꞌain bëtsi uni ribinxun akësokin ꞌama ꞌain! Mitsux kamina mitsun ꞌuchakë kupín marukë ꞌiakën; Israel unikama mitsun titax ka timakin rakankësa ꞌiakëxa, mitsun kakëxunbi ꞌën bana kuaisama tankë kupín.

Isaías 58:1

Nukën ꞌIbun ka ësokin ꞌë kaxa: “Rakuëtimaishi kamina munuma banai kiti ꞌain, usai ꞌi kamina manë banañu banokëx ꞌikësa min bana ꞌinun kushin banati ꞌain; usai ꞌikin kamina ꞌën kaísa unikama atun ꞌakë ꞌatima ñukama ñuikin kati ꞌain, ax ka Jacobnën rëbúnkikama ꞌikën atun ꞌuchakëkamaribi ñuikin kati ꞌain.

Jeremías 19:3

Ënë bana: Ka Judá menu tsókë ꞌapukama ꞌimainun Jerusalén ëmanu tsókë unikaman kuati ꞌikën, ësokin mitsu kakëxunmi kuakanun ka Nukën ꞌIbu kamabi kushiñu, Israel kaman Dios ax kiaxa: ꞌËn kana ñu ꞌaisama chaiira ënë menu, tsókë unikamaxa a ñuia kuati ꞌitsaira rakuë́kantanun ꞌimiti ꞌain.

Jeremías 2:2

Anu kuanxun kamina Jerusalén ëmanua ꞌikë unikama; munuma kuëníshkin upíokian kuanun kati ꞌain: ¡Ësakin mitsu kanun ka Nukën ꞌIbu kiaxa! ꞌËn kana bëná pain ꞌixunmi ꞌën kakësabiokin ꞌá a sinanin, usa ꞌixun kamina an biti unían mëratiokëxun xanun nuikësa ꞌinun mitsun ꞌë nuibakën, ꞌimainun kamina anu uni ꞌikëma me anu ñu ꞌapátisama anuxunbi ꞌë ꞌakiankën.

Oseas 1:2

Ësai ka uisai kara Israel unikama ꞌiti ꞌikë kixun ñuixunkin Oseas kai Dios kiakëxa: “Kamabi Israel menu ꞌikë unikama ka bëtsi bëtsi ñu ꞌai ꞌëmi manuti xanu aín nami mëakakënëx ꞌikësai ꞌiaxa. Usa ꞌain kamina minribi anu kuantankëxun achúshi xanu bëtsi bëtsi unibë ꞌikë min xanu ꞌinun biti ꞌain, bitankëxun kamina ami bakë bëchiti ꞌain, bëchikëx ka akamax achúshi xanu aín nami mëakakënën tuá ꞌiti ꞌikën.”

Oseas 2:1

Usa ꞌain kamina mitsun rarëbakëkama kati ꞌain: “Mitsux kamina Diosan unikama ꞌain.” ꞌImainun ka atun chirabakëkamax “Nuibakin kakë ꞌiti ꞌikën.”

Oseas 2:5

Aín titax ka bëtsi bëtsi uni aín nami ꞌamikë ꞌiakëxa; usa ꞌaínbi ka upí sinánñu xanu ꞌikë a nëtë́ti kiakëxa: Abë ꞌëx ꞌikë unikama a kana bari kuanti ꞌain, atun ka ꞌën piti ꞌimainun ꞌumpax, ꞌianan ꞌën pañuti chupa lino ꞌakë a ꞌianan, xëni ꞌimainun a ꞌën xëati akama ꞌë ꞌinania.

Oseas 4:5

Mix kamina nëtëinra ꞌianan imë́ ñu ꞌatima ꞌai pakëti ꞌain, usai ꞌikëbë ka mibë an Dios kikë bana ñuikë uníxribi pakëti ꞌikën, ꞌimainun kana min titaribi ꞌën këñunun ꞌimiti ꞌain.

Miqueas 2:13

Usai ꞌikëbë rëkuë́nkiani kuania ka atun Dios nuibiankanti ꞌikën, nuibiani ka anun ëmanu atsínti xëputi anun chikikanti ꞌikën. Usai ꞌikankëbë ka Dios aín ꞌapu ax kamaxunbi atun ismainun kuanti ꞌikën.

2 Corintios 5:16

Bëráma uni isquin, ax ca unishi ꞌicë quixun sinan ꞌixunbi cananuna bërí, uisa uni cara, —axribi ca Jesucristonan ꞌiti ꞌicë —quixun sinanin. Usaribi oquin —Cristo ax ca unishi ꞌicë quixun sinan ꞌixunbi cananuna bërí Cristo ax ca asérabi Nucën Papa Diosan Bëchicë, an nu ainan ꞌinun ië́micë, a ꞌicë quixun ꞌunanin.