Oseas 1:2 - Kashibo-Kakataibo Biblia

² Ësai ka uisai kara Israel unikama ꞌiti ꞌikë kixun ñuixunkin Oseas kai Dios kiakëxa: “Kamabi Israel menu ꞌikë unikama ka bëtsi bëtsi ñu ꞌai ꞌëmi manuti xanu aín nami mëakakënëx ꞌikësai ꞌiaxa. Usa ꞌain kamina minribi anu kuantankëxun achúshi xanu bëtsi bëtsi unibë ꞌikë min xanu ꞌinun biti ꞌain, bitankëxun kamina ami bakë bëchiti ꞌain, bëchikëx ka akamax achúshi xanu aín nami mëakakënën tuá ꞌiti ꞌikën.”

Oseas 1:2 ပူးပေါင်းရင်းမြစ်များ

Salmos 73:27

Uikamax kara minan ꞌisamatania, akamax ka bamakë ꞌiti ꞌikën; ꞌimainun kamina uikaman kara min bana kikësabiokin ꞌaisama tania akama këñunun ꞌimiti ꞌain.

Jeremías 2:13

ꞌËn unikama ka ꞌiásamaira ꞌinun chaiira ꞌuchaxa: Usai ꞌikin ka ꞌën bana kikësama oi ꞌikin ꞌë manukankëxa, anua ꞌumpax ꞌikë nëminra usaribi ꞌixun na tsónun ꞌakinkëxunbi ꞌë manúakëxa, usakin ꞌë manuika anua ꞌumpax biti nëminra ꞌumpaxñuma ꞌinun ëskikë usai atux ꞌiakëxa.

Jeremías 2:20

Bërí ka ꞌitsabaritia anun mitsun ꞌën bana kuaisamatani ꞌikan ꞌikën, usai ꞌi kamina ꞌëbë ënanankësa ꞌiakën, ꞌianan kamina ꞌë rabitisama tani ꞌikankën. Usai ꞌikin kamina ꞌë kakën: Bërí kananuna min kakësokin ꞌatima ꞌai kixunribi ꞌë kakankën. ꞌIanan ka kamabi aín bashi manámi ꞌikë ꞌimainun i pëñanakëkëkama tëmúxun, xanun uni aín nami ꞌami ꞌikësaishi niakën.

Jeremías 2:23

¿Uisa ꞌaish kaina mitsux: Nux kananuna mimi ñu ꞌatima ꞌai ꞌuchanan bëtsi dioskamaribi rabi ꞌuchakëma ꞌai kiax kikanti ꞌain? Kamina sinánkanti ꞌain, uisai kaina mitsux me sapan Ben-hinom kakë anuax bëtsi dios rabi ꞌikankë kixun. Usa ꞌain kamina upíokin pain añu kaina mitsun ꞌakë kixun iskanti ꞌain, mitsux kamina camello aín xanuxa bëtsi bari bënëti kuani amami amami nikë usaribi ꞌikanin;

Oseas 2:7

Usai ꞌikin ka ꞌain mërati ꞌikë unikama nuiti ꞌikën, ꞌaínbi ka nukutima ꞌikën; ꞌianan ka barikinbi mëratima ꞌikën. Usakin mërakima tani ka kiti ꞌikën: Ax paían ꞌën bënë ꞌia uni anubi kana kuantëkënti ꞌain, abë kana bërí ꞌëx ꞌikësamai upiti tsóakën.

Oseas 3:1

Ësokin ka Diosan amiribishi ꞌë katëkëankëxa: “Min xanu min ꞌunánkë unibëa ꞌikë a kamina nuibatëkënti ꞌain. Ax ka bëtsi bëtsi uni kuëënkë xanu ꞌikën. Usaribi okin kana ꞌën kamabi Israel unikama nuibatin, atúxa bëtsi bëtsi ñu rabikë ꞌikëbi, ꞌimainun ka batokin pán uvas ë́skakë këñun mëskukin chookin atun dios ꞌaxunkë ꞌikëbi pia.

Oseas 5:3

ꞌËn kana Efraín ꞌunán; usa ꞌain kana uisai kara Israel ꞌia a ꞌën ꞌunán. Efraín ax ka aín nami bëtsi bëtsi uni ꞌakë xanusa ꞌikën; usa ꞌixun ka Israel unikama ꞌitsaira ñu ꞌatima ꞌakin ꞌuchamiaxa.”

Marcos 1:1

Ënëx ca upí bana, Nucën Papa Diosan Bëchicë, Jesucristo, a ñui uisai cara axa uti ꞌiacëxa quiax quicë ꞌicën.

Deuteronomio 31:16

Usai nirakëan ka anuxun Nukën ꞌIbun Moisés kakëxa: Ënuax ꞌitsama nëtë ꞌikëbë kamina mix ñuti ꞌain, usaími ꞌikëbëtan ka ënë unikaman ꞌën bana kikësabiokin ꞌakima atúan biti me anu ꞌikë unikaman rabikë dios a rabikin ꞌë rabiti ënkin achúshi ñu ꞌën manutima okin atu ꞌaxunkëkama manukin bëtsi ñu ꞌati ꞌikën.

2 Pedro 2:14

Usa ꞌaish ca xanu isíma isímashi anun cuëënia, aín ꞌucha ëníma ca amiribi amiribi ꞌuchaia. Atúxa ꞌicësaribitia ꞌinun ca axa Jesucristomi upiti sináncëma xanu ꞌimainun bëburibi sinánmia. Ax ñun cuëën ꞌaish ca ꞌitsa ñuñu ꞌiti cuëënia. A unicama ca Nucën Papa Diosan aín ꞌucha cupí uisoquin cara ꞌati ꞌicë, usoquin ꞌati ꞌicën.

Apocalipsis 17:5

Usa ꞌaish ca aín bëmánanu achúshi anë unin ꞌunáncëma ꞌaíshbi ësai quicë ꞌiaxa: “Ënë ëma cha, Babilonia, ax ca ꞌaisama xanusaribi ꞌicën. Usa ꞌaish ca a an ꞌunánmicë ꞌaish camabi uni ꞌimainun xanu, an nu ꞌaisama ꞌacë aín titasa ꞌicën”.