Números 22:12 - Kashibo-Kakataibo Biblia

¹² Ësokin kakëxun ka Diosan Balaam kakëxa: —Atubë kamina a unibu ꞌatima okin sinánxuni kuantima ꞌain, ꞌën kana atu upíokin sinánxunkin upitax bukunun ꞌimin.

Números 22:12 ပူးပေါင်းရင်းမြစ်များ

Génesis 12:2

Min rëbúnki kamabëtan kana achúshi ëma chaiira ꞌanuxun ꞌain; ꞌanan kana upíokin sinánxunti ꞌain, usakin ꞌaia iskin ka bëtsi unikaman a unikamax ka sinánñuira ꞌianan kushiirabu ꞌikë kiax kiti ꞌikën, mi kupín kana kamabi menu ꞌikë unikama upitax bukunun upíokin sinánxunti ꞌain.

Isaías 61:9

Usa ꞌain ka aín rëbúnkikamax bëtsi bëtsi menu ꞌikë unikaman upíokin ꞌunánkë ꞌiti ꞌikën; usokin ꞌunánkë ka an iskë unikaman, atux ka Nukën ꞌIbunbia aín uni ꞌikë upíokin sinánxukin ꞌakinkë ꞌikë kixun ꞌunánkanti ꞌikën.

Miqueas 6:5

ꞌËn unikama bërí kamina sinánkanti ꞌain uisakin kara Balac Moabnu ꞌikë ꞌapu an sinánkëxa kixun, ꞌimainun kara Balaam Beornën bakë bëchikë an uisakin ribi a kamiakëxa kixun. ꞌImainun kamina Sitimnuax, Guilgalnu kuania kara Diosan mitsun ꞌunánun uisokëxa kixun aribi sinánkanti ꞌain.

Números 22:11

Egipto menuax kaisa ꞌaisamaira uni atun me tsitsibëtsi uaxa kiax ami rakuë́kin ka ꞌë binun kixun xuaxa. Usa ꞌain ka bënëti kuanxun a unibu ꞌën ꞌatima okin sinánxunti kuëënia, usokëbëtan karaisa ain suntárukamabëtan ꞌakin ain menua chikínti ꞌikë atun tanun kixun ka ꞌë kamiaxa.

Números 22:13

Usokian Diosan kakëx pë́karakëbë niruxun ka Balacnën xukëxa a kai kuankë unikama a Balaamnën kakëxa: —Mitsun menu kamina rikianti ꞌain. Nukën ꞌIbu ka mitsubë ꞌëx kuanti kuëënima.

Números 22:6

Usa ꞌain kamina bënëti uxun ënë unibu ꞌatima okin sinánxuni uti ꞌain, atux ka nubë sënë́nma kushiirabu ꞌikën. Usakinmi ꞌaia sapi kana abë ꞌakanankin ënë menua ꞌën chikínti ꞌain. ꞌËn kana ꞌunan minmi upíokin sinánxunkëx ka uni upitax bukuia, ꞌimainun min këñutanun sinánxunkëx ka uni mix kikësabi ꞌí këñutia.

Números 23:23

Jacobnën rëbúnki Israel unibukama ka ñunshinan aín kushin ꞌanun ꞌamikëxunbi uisabi otima ꞌikën; Israel unibu ka ñubë́ unikaman uisabi oima. ¡Usa ꞌaish ka bërí Israel unikama ësakin kaisa ꞌikën Uiti ñu upí ishi kara Diosan mitsu ꞌaxuanxa kixun!

Números 23:3

Usakin ꞌaia ka Balaamnën Balac kakëxa: —Anu ñuina xaroti ꞌakë ënuxunbi kamina Nukën ꞌIbun kara ꞌë uisokin kaia kuatamainun kaínti ꞌain. Kuabëtsini uxun kana uisakin kara ꞌë kaxa a mi kati ꞌain. Kaxun anu ëbiani ka Balaam anu uni ꞌikëma matán menu kuankëxa,

Números 23:8

Uisa ¿ixun karana Diosan ꞌatimakin sinánxunkë ꞌikëmabi ꞌën ꞌatimakin sinánxunti aín? ¿Uisaxun karana Nukën ꞌIbun ꞌatima oiamabi ꞌën atu ꞌatima oti ꞌain?

Números 24:9

Ax tanti rakábukë ka paru inuán tanti rakábukë usaribi ꞌiti ꞌikën: usa ꞌikë ka uínbi atu an ꞌakaskëxuma ubíotima ꞌikën. ¡Chúamarua ka uikaman kara atu nuibatia akamax ꞌiti ꞌikën, ꞌimainun kara uin atu uxkë ubioti kuëënti ꞌit! ¡Uin kara mitsu nuibatia ax ka chuámarua ꞌianan upíokin sinánxunkë ꞌiti ꞌikën, ꞌimainun ka uin kara mitsu ꞌatima oia axribi ꞌatima okë ꞌiti ꞌikën!

Mateo 27:19

Pilatoa anuxun uni manania cuati, anu ꞌain ca aín xanun achúshi uni xuquin Pilato ësoquin camiacëxa: —Ënë uni cupí cana masáquin namáan. Ax ca ꞌuchañuma ꞌicën. Usa ꞌain camina a ꞌanun uni ꞌinántima ꞌain. Ësaquian aín xanun camicë banaribi sinánquin ca Pilatonën Jesús chiquíntisa tancëxa.

Romanos 11:29

Bëráma judíos unibu —ꞌënan ca mitsu ꞌimainun mitsun rëbúnqui ꞌiti ꞌicë —quixun Nucën Papa Diosan cá ꞌain ca a banacama usabi ꞌiti ꞌicën. Nucën Papa Diosan ca —mitsux camina ꞌënan ꞌiti ꞌai —quitancëxun bëtsioquin sinántëcënima.

Efesios 1:3

Nucën Papa Dios ax ca Nucën ꞌIbu Jesucristo aín Dios ꞌianan aín Papa ꞌicën. A rabinun ca ꞌacan. Aín nëtënuxun nu sinánxunquin ca nuxnu Cristonan cupí nuibaquin ꞌaisamaira ñu nu ꞌaquinquin upí oquin sinánmianan nu cuëënmia.

Deuteronomio 33:29

Israel unikama mitsux kamina Nukën ꞌIbun ka nu ꞌakinia kixun sinani kuëënti ꞌain, ¿uinu ꞌikë ëmakamax kara mitsun ëmabë sënë́nti ꞌik? Nukën ꞌIbu Diosanbi ka mi ië́miaxa usa ꞌixun ka bërúanan mi ꞌakinia; ¡an ka ax numi nishkë unikamabë ꞌakanania nu ꞌakinti ꞌikën! Usakin ꞌakinkëxun ñusmokin mitsun ꞌakëx ka atun rabiakakë a mitsumi rakuë́ti nëtë́ti ꞌikën.

Deuteronomio 7:14

Mitsux kamina bëtsi unikama akësamaira okin Diosan ꞌakinkë ꞌiti ꞌain; usa ꞌain ka mitsun xanu achúshirabi tuañuma xanu ꞌimainun bëbu uníxribi achúshirabi bëchikëma uni ꞌitima ꞌikën, ꞌimainun ka mitsun ꞌarakakë ñuinakamaxribi ain xanu tuaima ꞌimainun ain bënëribi bëchima ꞌitima ꞌikën.