Nehemías 9:8 - Kashibo-Kakataibo Biblia

⁸ Min iskëx ka ax achúshi uni mimira sinani katamëkë ꞌiakëxa, usa ꞌixun kamina abëtan achúshi ñu ꞌakinmi min rëbúnkikama kana anua cananeos unibu ꞌimainun hititas, amorreos, ferezeos, jebuseos ꞌimainun gergeseos; ¡a unikaman me ꞌinánuxun ꞌai kixunmi kásabiokin ꞌakën, min kamina asérabi mix kikësabiokin ñu ꞌain!

Nehemías 9:8 ပူးပေါင်းရင်းမြစ်များ

Génesis 12:7

A menuax ami mërakin ka Nukën ꞌIbun Abram kakëxa: Ënë me kana min rëbúnkikama ꞌinánti ꞌain. Usakian kakëxun ka Abramnën achúshi anuxun Nukën ꞌIbu asábi ka kixun kati maxax bukunrukin ꞌakëxa, anuaxa ami mërakë kupí.

Génesis 15:6

Usakian kakëxun ka Abramnën usa ka asérabi Nukën ꞌIbu ꞌikë kixun sinánkëxa, sinánkëbë ka ax ꞌëx kikësabiokin ka ꞌaia kiax ami sinánkëxa.

Génesis 22:12

Kakëxun ka Nukën ꞌIbu Diosan ángelnën amiribishi kakëxa: —Min bëchikë uisabi oxuma ka ꞌat, bërí ka Nukën ꞌIbu Diosan mixmi asérabi ami sinánkëxun, min nuitu ꞌunánxa min kamina min bëchikë ñuñakima achúshira ꞌikëbi nuibakinma a rabikin ꞌakatsi ꞌian.

2 Samuel 22:31

ꞌËn ꞌIbu Dios min akë kamabi ñux ka upíira ꞌikën; minmi ꞌë ꞌakinkë an ka ꞌë kuëëmia, min kamina uix kara mimi katamëtia a unikama upíokin ꞌakinin suntárunëxa aín manë pará ami katamëkë usaribi ꞌitánun.

Nehemías 9:33

ꞌAínbi kamina nuxnu nun ñu ꞌatima ꞌakë kupí usa ñukama ꞌinúkëbëbi uisa karamina mix ꞌain usabi kamabi ñu ꞌinúkëbë ꞌin; min kamina upíokin ñu ꞌain, ꞌaínbi kananuna nukama ꞌatimakin ñu ꞌai mimi ꞌuchakën.

Salmos 116:5

Usa ꞌaish ka Dios ax upí ꞌianan nuibanairakë ꞌikën; nun Dios an ka kamabi uni nuibairaia.

Éxodo 3:17

ꞌImainun ka ësokinribi ꞌë kaxa, an isa Egipto me anuaxmi tëmërakankë ënua mitsu chikínbiankin anua cananeos, hititas, amorreos, ferezeos, heveos ꞌimainun jebuseos; unikama ꞌikë me anu mitsu buánti ꞌikën, ax ka me achúshi anua ñuinanën xumañukama a ꞌimainun a piti ñu ꞌitsaira ꞌianan ñu ꞌaisamaira ꞌikë a ꞌikën.

Éxodo 3:8

Usa ꞌain kana ꞌënbi a isi ubuan, egipcio unikaman ꞌaisamaira okin tëmëramia kana chikinuxun ꞌain. Ënë menua chikínbiankin kana atu me chaiira ꞌimainun upíira anua ꞌaisamaira ñuina xuma ꞌianan a piti ꞌitsaira ꞌimainun buna rëpa ꞌumpax iskësaira ꞌikë anu buánti aín. A mex ka anua cananeobë, hititas, amorreos, ferezeos, heveos ꞌimainun jebuseos unikama ꞌikë anu kana buánti ꞌain.

Ezequiel 33:24

“Axa ami nishkë unikaman rurupakin ꞌatimokë Israel ëmakamanu tsókë unikama ax ka ësai ki nitsia: ꞌAbraham ax ka achúshi unishi ꞌiakëxa, usa ꞌixunbi ka an ënë me ꞌibuakëxa; usa ꞌaínbi kananuna nuxira ꞌitsa ꞌixun ënë me ꞌibuati ꞌain kiax ka atux kikania.

Números 13:29

Négueb kakë me sënënakëkë anu ka amalecita unibu tsótia, ꞌimainun ka ain bashi niñu me anu hitita, jebuseo ꞌimainun amorreo, unibu tsómainun ka parúmpapa kuëbí Jordán kakë anu cananeo uniburibi tsótia.

Números 23:19

Dios ax ka nusama ꞌikën: ax ka këmëi bananan bëtsi okin sinántëkëkini kima. Uisa ñu ꞌakatsi kara ax kia a ka asérabi ꞌaia. Uisa ñu ꞌanux kara kiáxa a ka asérabi ax kikësabiokin ꞌaia.

Hechos 13:22

Cuarenta baritia ꞌicëbëtan Saúl chiquíntancëxun ca Nucën Papa Diosan David Israel unicaman ꞌapu ꞌimiacëxa. David ñui ca Nucën Papa Dios quiacëxa: “ꞌËn iscëx ca Isaínën bëchicë, David, ax ꞌën sinánsaribi ꞌicën. Usa ꞌixun ca ꞌëx cuëëncësabi oquin ꞌati ꞌicën”.

Deuteronomio 26:3

Anuxun ka Sacerdotekaman mitsu kati ꞌikën: ꞌËx kana ësai bërí kin a me ꞌinánkatsi kixuan nun chaitiokëkama Nukën ꞌIbun ka me anu kananuna bërí ꞌain kiax ka kiti ꞌikën.

Deuteronomio 32:4

Ax ka an nu bërúankë ꞌikën; an ꞌakë ñux ka upíira upí ꞌikën, an ꞌakë ñux ka asérabi upí ꞌikën. Ax ka Dios ꞌaish këmëima asérabi banaia, ¡an ka uínsaranbi an ñu ꞌatima ꞌakë uni abi ꞌatima oima ꞌaínbi ka ënkinma a unikama ꞌatima onuxun ꞌaia!

Deuteronomio 7:1

Nukën ꞌIbu Dios an ka a ꞌinánkatsia kia me anu mitsux bëbai kuankëbëtan, mapai achúshi ꞌimainun rabë́ ëmakama mitsubëtan sënë́nma kushiirabu a mitsun ismainunbi chikínti ꞌikën: Ax ka hititas, gergeseos, amorreos, cananeos, ferezeos, heveos ꞌimainun jebuseos, akama ꞌikën.

Deuteronomio 9:5

Usa ꞌain ka mitsun upí ꞌixun biti kupíma a memi binun; atun ꞌucha kupín mitsun ismainunbi atun menua a unikama Nukën ꞌIbun chikínti ꞌikën, ꞌimainun ka anbia nun chaitiokë Abraham Isaac ꞌimainun Jacob akama kásabiokin ꞌati ꞌikën.

Tito 1:2

Usa ꞌixun cana ainan ꞌaish ca uni xënibua ꞌaínbi aín nëtënu abë ꞌiti ꞌicë quixun unicama ꞌunánmin. Ax asérabi cëmëma ꞌaish ca Nucën Papa Dios bëráma, me ꞌimainun camabi ñu uniosama pain ꞌaíshbi, ësai ca ꞌën unicama ꞌën nëtënu ꞌëbë ꞌiti ꞌicë quiax quiacëxa.

Hebreos 11:17

Abraham ca —asérabi ca Nucën Papa Diosan aín quicësabi ꞌoquin ꞌati ꞌicë —quixun ꞌunani ami catamëacëxa. Ësai ca ꞌiacëxa. Nucën Papa Diosan ca Abraham cacëxa: “Min bëchicë Isaacnën rëbúnqui ca asérabi ꞌitsaira ꞌianan ꞌënan ꞌiti ꞌicë” quixun. Usa ꞌaínbi ca Nucën Papa Diosan —asérabi cara Abrahamnën ꞌën cacësabi oquin ꞌati ꞌicë —quixun ꞌunántisa tanquin, Abraham cacëxa —min camina ꞌaracacë ñuina ꞌaxunquinma, min bëchicë Isaac abi ꞌë rabiquin ꞌë ꞌaxunti ꞌai —quixun. Cacëxun ca usoquin anuxun ꞌatinu Isaac buáncëxa.

Hebreos 6:18

Usa ꞌain cananuna an ca ax quicësabi oquin ꞌaia quixun ꞌunánan, axa —sinanatëcëntimoquin cana mitsu cai —quicë cupí ca an asérabi usoquin ꞌati ꞌicë quixun ꞌunanin. Usaquin ꞌunánquin cananuna ꞌunanin, nun nu an nu ꞌaquinun ñucácë ꞌixun ca nu asérabi ꞌaquinti ꞌicë quixun. ꞌUnánan cananuna ami catamëquin —aín bana quicësabi oi cana asérabi ainan ꞌaish aín nëtënu abë ꞌiti ꞌai —quixun ꞌunanin.

1 Juan 1:9

Usa ꞌaínbi cananuna ꞌunánti ꞌain, nun nu nun ꞌuchacama chiquinaxuncëxun ca Nucën Papa Diosan, ax upí ꞌixun ax quicësabi oquin ꞌaquin, nun ꞌuchacama nu tërë́nxunquin upí ꞌinun nu ꞌimiti ꞌicën.