Nehemías 9:32 - Kashibo-Kakataibo Biblia

³² Mix kamina chaiira ꞌianan Dios kushiira ꞌain ꞌimainun ka kamabi unix mimi rakuë́tia, usa ꞌaish kamina Dios ñu ꞌakatsi kiax kana ꞌaima kikínma an ñu asérabi ꞌakë a ꞌain, ꞌimainun kamina uínsaranbi nu nuibakin ënkëma ꞌain, minbi kamina isan uitishi kara nun ꞌapukama ꞌimainun ain kushikama ꞌianan, nun sacerdote ꞌimainun an min bana ñuikë unikamabë nun chaitiokëkama ꞌiásaribiti tëmëraia, a nëtëkaman Asiria ꞌapun aín suntárukamabëtan ꞌakëxnu ꞌia usaibi kananuna bëríbi tëmërai ꞌin.

Nehemías 9:32 ပူးပေါင်းရင်းမြစ်များ

1 Reyes 8:23

munuma banakin Dios ñukákëxa: “Israel unikama nun Dios: naínu ꞌianan ka menubi min ꞌakësaribi okían an ñu ꞌakë dios achúshirabi ꞌaíma ꞌikën, usa ꞌixun kamina mix kiásabiokin an min bana asérabi kuëënkin ꞌakë akamaishi ꞌakinin;

2 Reyes 23:29

A baritiakaman Josías ꞌapu ꞌain ka, Egipto menu ꞌikë ꞌapu faraón Necao kakin anëkë ax, ain suntárukamabë Éufrates baka abu kikiani Asirianu ꞌikë ꞌapu ꞌakini kuankëxa. Kuankëbë ka ꞌapu Josías ain suntárukamabë atubë akananux chikiakëxa, ꞌaínbi ka Meguido kakë ëmanua mërakin Egiptonu ꞌikë ꞌapun ꞌakëxa.

2 Reyes 25:7

usakin ꞌakin ka an ismainunbi aín bakë bëchikë bëbukama rëtënun ꞌamiakëxa. ꞌAmianan ka Sedequías aín bëru rabë́ ëchitankëxuan manë risin tëkërë kabiankin Babilonianu buánun ꞌamiakëxa.

Nehemías 1:5

Ñukákin kana ësokin kakën: “Nun ꞌIbu Dios naínu ꞌikë mix kamina chaiira ꞌianan ax rakuënmianankë a ꞌain, usa ꞌixun kamina mix kia bana kikësabiokin ꞌanan uin kara min bana kikësabiokin ꞌaia akama nuibatin;

Salmos 47:2

Nun ꞌIbu ax ka kushiira ꞌaish manámi ꞌikë ꞌaish ami rakuë́ti ꞌikën; ax ka ꞌapuira ꞌapu ꞌaish kamabi menu ꞌikën,

Salmos 66:3

Rabikin kamina Dios kati ꞌain: ¡Min unio ñukamax ka upíirabu ꞌikën. Mix kushiira ꞌixun kamina, axa mimi nishkë unikama rakuë́tia menu nipakëkësa ꞌitánun ꞌimin;

Salmos 66:5

Diosan chaiirabu ñu ꞌakë kamina isi ukanti ꞌain, aín unikama ꞌaxunkin upíira ñu ꞌakë a kamina iskanti ꞌain:

Isaías 9:6

Usa ꞌain ka nunu achúshi tuá bakënun ꞌimiaxa, Diosan ka nukama achúshi tuá ꞌinánxa, a tuá ka axa ꞌapu ꞌitiokin aín kushi ꞌinánkë ꞌiti ꞌikën. Usa ꞌikë ka ësokin kakë ꞌiti ꞌikën: “An bana ñuixunkin ꞌësëkëxun kuati upitani kuëënti,” “Dios uínbi kanantisama,” “Nukën papa Dios axa këñutima oi tsókë,” “Achúshi ꞌapun rëkuë́n bëchikë chuámarua ꞌinun uni ꞌakinux bakë́an.”

Daniel 9:4

Ñukákin kana ësakin Dios kakën: Nukën ꞌIbu Dios chaiira ꞌianan kushiira min kamina mix kikësabiokin ñu ꞌakin, nuibanankë ꞌixun min kikësabiokin kara min unikama ñu ꞌaia isin, a tanti min bana a kara asérabi ꞌaia kixun isin:

Daniel 9:6

ꞌIanan kananuna an min bana ñuikë min unikama kakëxunbi kuaisamatan, atun ka nun ꞌapukama ꞌimainun nun kushikama ꞌianan nun chaitiokëkama ꞌimainun kamabi Israel unikama min anë ñuikin bana ñuixuankëxa.

Daniel 9:8

Nukën ꞌIbu, nukamaxribi kananuna nun ꞌapukama ꞌianan, nun kushibu, nun chaitiokëkama ꞌiásaribiti mimi ꞌuchakë ꞌixun rabinkësa tanin.

Deuteronomio 7:12

Ësokin ka Moisésnën aín aintsi Israel unikama raíri kakëxa: Asérabi mitsun ꞌën ꞌunánmikë bana ënëkama kikësabiokin ꞌakëbëtan ka Diosan an nun chaitiokëkamabëtan achúshi ñu ꞌakin kásabiokin mitsu ꞌakinti ꞌikën.

Deuteronomio 7:13

ꞌAkin ka an mitsu nuibakin ꞌuakamë ꞌëoimi bëchipanun ꞌimianan mitsun bakë bëchikëkama upíokin sinánxuanan mitsun ñu ꞌapákë bitsia aribi ꞌanan trigo bimi ꞌimainun, uvas baka ꞌakë, ꞌimainun xëni, akëñunbi, ꞌanan mitsun vaca bakëkama ꞌimainun, ovejakama a kamabi a me ꞌinánnuxua nun chaitiokëkama ka a menua upí ꞌinun ꞌimiti ꞌikën.

Deuteronomio 7:21

Usa ꞌain kamina atumi rakuë́tima ꞌain, nukaman ꞌIbu Dios kushiira ax, mitsubë ꞌain ka atux mimi rakuë́ti ꞌikën.

Deuteronomio 7:9

Asérabi kamina ꞌunánkanti ꞌain, Nukën ꞌIbu Dios ax ka asérabi Dios ꞌikë kixun, usa ꞌixun ka an aín chaitiokëkama bërí ꞌama ꞌixun aín rëbúnkikamaribi uikaman kara ax kikësabiokin aín bana ꞌaia a unikama nuibatia;