Miqueas 7:18 - Kashibo-Kakataibo Biblia

¹⁸ Misaribi bëtsi Dios ka ꞌaíma ꞌikën, min kamina nux kuëënkësa oí ꞌikë a mëníokin, nuxnu ꞌuchakëkama a manuin, nukamax kananuna min unikama ꞌitsamashi tikikë a ꞌain. Min kamina nukama nuibatin usa ꞌain kamina mix xënibua ꞌaish nishkëma a ꞌain.

Miqueas 7:18 ပူးပေါင်းရင်းမြစ်များ

Génesis 4:7

Min upíokin ñu ꞌakin kamina upíokin sinántsian, ꞌaínbi kamina ꞌaiman, usa ꞌain ka min ꞌuchati ꞌuramara ꞌikën. Usa ꞌaínbi kamina min abi tënëkin ꞌatima ꞌain.

1 Reyes 8:23

munuma banakin Dios ñukákëxa: “Israel unikama nun Dios: naínu ꞌianan ka menubi min ꞌakësaribi okían an ñu ꞌakë dios achúshirabi ꞌaíma ꞌikën, usa ꞌixun kamina mix kiásabiokin an min bana asérabi kuëënkin ꞌakë akamaishi ꞌakinin;

Nehemías 9:17

Usai ꞌikin ka min kakëxun kuaisama tanan minmi chaiira ñu atu ꞌaxuan abi sinánkama ꞌikën. Usai ꞌikin ka min bana kuaisama tankin achúshi ꞌapu an isa anuaxa tëmërakë Egipto me anubi uantëkënun kixun anëakëxa. ꞌAínbi kamina mix Dios an ꞌuchaiabi uni nuibakë a ꞌixun uisabi okinma, nuibairakin ꞌatimokinma ꞌakinkin ñu ꞌatima ꞌaiabi atu ëanma ꞌain.

Salmos 103:13

Uikaman kara a nuibakin ax kikësabiokin ꞌaia, a unikama ka Diosan unían aín bakë bëchikëkama ꞌakësaribi okin nuibatia;

Salmos 130:4

ꞌAínbi kamina min nux ꞌuchakëkama nu mëníoxunin, usa ꞌixun kananuna nun mi rabiti kuëënin.

Salmos 65:3

Nun ñu ꞌatima ꞌakëkama an ka nu ꞌatimakin sinánmia, ꞌaínbi kamina min nun ꞌuchakama nu mëníoxunin.

Salmos 65:4

Chuámarua ka ami kaískë unikama an tania usa ꞌikë kamina mi ꞌurama ꞌinun atu ꞌimin, ꞌimikëx ka anuxun mi rabiti xubunu ꞌia. ¡Usa ꞌain ka min xubunu ꞌikë unikama min bana ꞌaiami ꞌakinkëx piti pi anun puchacë usa ꞌikën!

Salmos 89:6

¡Uinubi ka naínu misaribi, dios ꞌaíma ꞌikën ꞌën ꞌibun!

Salmos 89:8

Nukën ꞌIbu Dios kamabi kushiñuira misaribi axa kamabi kushiñu ka ꞌaíma ꞌikën; usa ꞌain ka min nan banakama ax asérabi ꞌikën; ¡uinubi ka misaribi bëtsi Dios ꞌaíma ꞌikën!

Éxodo 15:11

ꞌËn ꞌIbu, ¡uinu ꞌikë bëtsi diosaxbi ka mibë sënënima! ¡Uixi ka misaribi chaiira ꞌianan upíira ꞌixun ñu ꞌatima ꞌai ꞌuchakëma ꞌaíma ꞌikën! ¡Min kamina a iskëma ñu ꞌanan ami rakuë́ti ñuribi ꞌain! ¡Usa ꞌikë kananuna mishi rabiti ꞌain!

Éxodo 34:9

ësakin kakëxa: —¡ꞌËn ꞌIbu! ¡ꞌËn ꞌIbu! Asérabi nu nuibati kamina nu kuankëbë nubë kuanti ꞌain. Ënë unikaman ka asérabi aín sinan iruarakin bana kuakëma ꞌikën, ꞌaínbi kamina nux mimi ꞌuchakë a tërënkin minan ꞌinun nu ꞌimiti ꞌain.

Isaías 1:18

Ësai ka Dios kiaxa: “Bërí kamina uisai kaina ꞌikanti ꞌai kiax ënë bana mëníonanti timë́ti ꞌuti ꞌain: Mitsun ꞌuchakamaxa uvas baka chininkë chëxëira iskësa ꞌikëbi kana, axa matsi irukë uxuira uxu iskësa ꞌitánun mitsu mëníoxunti ꞌain; atun ꞌuchakamaxa chupa bëtsi bëtsi ñun pukukë iskësaribi ꞌikëbi kana, ꞌën xapu uxuira uxu iskësa ꞌitánun mëníokin tërënxunti ꞌain.

Isaías 33:24

Usa ꞌain ka anu ꞌikë unikama: “Kana ꞌinsían kitima ꞌikën.” Diosan ka Jerusalénnu ꞌikë unikama ꞌimainun Judá menu tsókë unikama atun ꞌuchakama mëníoxunti ꞌikën.

Isaías 40:18

¿Uinu ꞌikë bëtsi uni kamabëtan sënën kara Dios ꞌikë kixun kaina mitsun kati ꞌain? ¿Uisa ñu mitsúnbi uniokë ax kara asaribi ꞌiti ꞌik?

Isaías 40:25

Usa ꞌain ka Dios upíira ax ësokin ñukati kiaxa: “¿Mitsun kaina uibë sënën karana ꞌai kixun ꞌë kati ꞌain? ¿Uix kara ꞌësaribi ꞌiti ꞌik?”

Isaías 43:25

ꞌAínbi kana ꞌëx mitsun Dios ꞌixun, uni ꞌaimi ꞌuchakëkama a tërënxunkin uinsaranbi sinántëkëntima ꞌain.

Isaías 44:22

ꞌËn kana ꞌatima ñu ꞌaimi mitsux ꞌuchakëkama a nëtënxuan mitsun ꞌuchakama tërënxunkin naínu ꞌikë nëtë kuin ꞌikësaia nëtë́nun ꞌimian. Usa ꞌain kamina ꞌëmi sinanatëkënti ꞌain ꞌën kana mi ië́mian.”

Isaías 55:7

Uni ꞌatimakama an ñu ꞌatima ꞌati sinánkin ꞌakë an ka ñu ꞌatima ꞌakë a ënti ꞌikën, ꞌimainun ka uni bana kuakëmakama atúnribi ꞌatimakian sinánkë akama ënti ꞌikën; ëni ami katamëtia ka Nukën ꞌIbun mitsu nuibati ꞌikën, ꞌimainun kamina Diosan nuibanankëira ꞌixun an mitsun ñu ꞌatima ꞌakëkama mëníoxunun ami sinánkin rabikanti ꞌain.’

Isaías 64:9

Nukën ꞌIbu ꞌaisamairai kamina nishtima ꞌain, ꞌianan kamina nun ꞌatima ñuira ꞌakin a tanti bana kikësokin ꞌakinma uni ꞌakëkama a sinántima ꞌain. ¡Kamina isti ꞌain, nux kananuna min unikama ꞌain!

Isaías 65:19

ꞌËxbi kana Jerusalén kupí kuëënti ꞌain, ꞌianan kana ꞌën unikamami sinani kuëënti ꞌain. Usa ꞌain ka a ëmanu ꞌikë uni masá nuituti kuënkëni inia kuatëkënti ꞌaíma ꞌinuxun ꞌaia.

Jeremías 31:20

Efraínnu ꞌikë unikama ax ka, ꞌëx amira sinánkë bakë bëchikë usaribi ꞌikën; usa ꞌaish ka ax ꞌën kuëëinrakë ꞌën bakë bëchikë ꞌikën. Usa ꞌikë kana ñu ꞌatima ꞌaia usakin kamina ꞌatima ꞌai kixun kan, ꞌaínbi kana ami manukima usakin kamina ꞌatima ꞌain kixun kain; usa ꞌain kana ꞌën nuitunën upitani kuëënkin, atu ꞌitsaira nuibatin. ꞌËx min ꞌIbu ꞌaish kana asérabi ësai kin.

Jeremías 31:34

Usa ꞌain ka uínsaranbi uínbi bëtsi uni usa ka Nukën ꞌIbu ꞌikë kixun ꞌunámitima ꞌikën, an ꞌunánkë unikama ꞌimainun aín aintsikama ꞌëa ꞌunánun ꞌunánmitëkëinsama ꞌiti ꞌikën, atun ka kamaxunbi uni apanbu ꞌimainun tuáxura kamanbi ka Dios ꞌikë ꞌë ꞌunánkë ꞌiti ꞌikën. ꞌËn kana atun ñu ꞌatima ꞌakëkama mëníoxunkin, atun ꞌuchakëkama a amiribishi sinántëkëntima ꞌain. ꞌËx mitsun ꞌIbu ꞌaish kana asérabi ësai kiakën.

Jeremías 38:8

Usa ꞌain ka Ébed-mélec ꞌapun xubunuax chikíkiani ꞌapu kai kuankëxa, kuanxun ka Benjamínën xëkuë kakë anu tsókë mërakëxa, mërakin ka ësokin kakëxa:

Jeremías 9:24

Usa ꞌain ka uikamax kara rabiakatia, abi rabiakatima ꞌëmi sinani ꞌën kakësabiokin ꞌakë ax ka Dios an ꞌën ꞌunánmikë ꞌikë kixun sinánti ꞌikën, usa ꞌain ka ꞌën ënë menu upíokin ñu ꞌakëbëtan an ka uni nuibatia kixun unin ꞌunánti ꞌikën, usa ꞌain ka unínribi upíoki ñu ꞌati ꞌikën. Ësai ka Nukën ꞌIbu asérabi kiakëxa.

Ezequiel 18:23

ꞌËx kana an ñu ꞌatima ꞌakë uni ax ñuti kuëënima, usa ꞌain ka an ꞌakë ñu ꞌatimakama ëntankëx upitax tsóti ꞌikën. ꞌËx Dios ꞌaish kana ësai kin.

Ezequiel 33:11

Usa ꞌaínbi kana ꞌëx Dios ꞌaish atun tsóti ñui ësai kin, ꞌatima sinánñu unikama ñuti kana ꞌëx kuëëniman usa ꞌain ka atun ꞌakë ñu ëni upitax tsóti ꞌikën. Israel unikama ꞌatima ñu ꞌaimi tsókankë akamina ënti ꞌain. ¿Uisa ꞌaish kara usakin ñu ꞌai ñukanti ꞌik?

Ezequiel 33:16

Usakin ñu upí ꞌai bërí upiti tsókëbëtan kana, an ñu ꞌatima ꞌai ꞌuchakama achúshirabi sinántëkëntima ꞌain.

Daniel 9:9

ꞌAínbi kamina mix Dios ꞌixun nu nuibanan usai karanuna ꞌiisa tani uisai ꞌiabi nu nuibakë ax kuni asábi ꞌikën. Nukamax kananuna min kakësoi ꞌikëma ꞌain,

Oseas 14:2

Usa ꞌain kamina Diosmi sinanatëkënkin ësokin mitsun a ñukáti ꞌain: “Nukaman ꞌuchakama kamina nu mëníoxunti ꞌain, mëníoxunkin kamina mix upí ixun nun mi rabikëxun upíokin kuati ꞌain.

Oseas 14:5

ꞌËx kana Israel kama nibitan ꞌibúkin chabókë usaribi ꞌiti ꞌain, usa ꞌain ka atux ro ꞌapákëxa uábukësa usaribi ꞌiti ꞌikën. Usai ꞌika aín tapunkama Líbano menu ꞌikë i aín tapun menu takáshkikë usaribi ꞌiti ꞌikën;

Joel 2:32

ꞌAínbi ka kamabi unikama an Nukën ꞌIbun anë rabikë atun bamatinuax ië́ti tanti ꞌikën, usa ꞌain ka aín bashi Sión kakë Jerusalénnu ꞌikë anu ka anua atux ië́ti ꞌiti ꞌikën. Nukën ꞌIbu usai ka ꞌiti ꞌikë kiax kiásabi oi. Usa ꞌain ka an kaískë unikamax bamanuxbi tsókëpan ꞌiti ꞌikën.

Amós 1:11

Ësai ka Nukën ꞌIbu kia: “Edomnu ꞌikë unikaman ka ꞌitsaira ꞌaisama ñu axa, usa ꞌikë kana ꞌaimama ꞌikima atu tëmëramiti ꞌain; atun ka nuibakinma aín manë xëtokë tuínxun aín xukë́n Israel unikama nuibianxun ꞌakëxa. Usakin ꞌai ka kana nuibati ꞌai kixun sinanima atumi nishakëxa.

Amós 7:8

Anuxun ka ꞌë ñukáxa: —¿Añu kaina isin Amós? An xubu ꞌati ꞌunánkë unían tuinkë manë tumua achúshi kana isin, —kixun kana ꞌën kakën. Kakëxun ka an ësokin ꞌë kakëxa: —Manë tumua an xubu ꞌati ꞌunán unin tuinkë ꞌën tuinkë ënën kana, ꞌën uisai kara ꞌën uni Israelkama ꞌuchaxa kara ꞌuchakëma ꞌikë kixun tanti ꞌain. Usokin tantankëxun kana, kana nuibati ꞌai kixun sinántëkënkima ꞌatimoti ꞌain.

Amós 8:2

usa ꞌain ka an ꞌë ñukákëxa: —¿Amós añu kaina isin? —Achúshi tasánu ñu bimi pëkë́kë purukë —kana isi kixun kana ꞌën kakën. Kakëxun ka Diosan ësokin ꞌë kakëxa: —Israel unikamax ka ñu bimi pëkë́kë usaribi ꞌikën usa ꞌain ka anun ꞌën ꞌatimoti nëtë ꞌiaxa.

Jonás 4:2

Usa ꞌain ka abë banakin Dios ësokin kakëxa: —ꞌËn ꞌIbu Dios ësa ñu ka ꞌiti ꞌikë, kiax kana ꞌën menuaxi ꞌëx kian. Usa ꞌain kana bënëtishi Tarsis menu abáti sinánkë ꞌian, ꞌën kana mix kamina achúshi Dios nuibanairakë ꞌaish bënëtishi nishkëma a ꞌai kixun ꞌunánkë ꞌian, usa ꞌain kamina ꞌën sinánkëxun ꞌitsaira uni nuibakin ꞌatimokin tëmëramikatsi kixunbi mimia sinanatia ꞌakëma ꞌain kixun ka munuma banai ami nishkin Dios kakëxa.

Miqueas 2:12

Usa ꞌain ka ësai Dios kia: ꞌËn unikama kana bëtsi unikaman buan ꞌikëbi amiribishi Jacobnën rëbúnkikama kamabi timë́nun ꞌimiti ꞌain; usokin ꞌakin kana Israel unikama ꞌitsamara ꞌikëbi atu timë́nun ꞌimiti ꞌain ꞌimikin kana ñuina ꞌarakakë aín kënënu ꞌikësa ꞌinun ꞌimianan carnerokaman pasto pia ꞌikësa ꞌinun ꞌimiti ꞌain, usokin ꞌimikëx ka Israel unikamax ꞌuakamë ꞌëoi ꞌitsaira ñuina ꞌarakakëx ꞌikësai sharákanti ꞌikën.

Miqueas 5:3

Usa ꞌain ka bërí Diosan aín unikama ënia, ꞌaínbi ka xanun aín tuá achúshi bakënuxun kainkë usa ꞌiti ꞌikën. Usa ꞌain ka a tuá aín aintsi Israelkama ñatanbiankin buánkama abë birananti ꞌikën.

Números 23:21

Uínbi ka paránani ꞌatimonania Israel unibu Jacobnën rëbúnkikama iskëma ꞌikën. Usa ꞌain ka Dios atubë ꞌikën, usa ꞌikë ka atun ꞌapusa ꞌikë rabia.

Lucas 15:32

Min xucën —ca bamaxa —quixun ꞌën sináncëbëbi ca ꞌëmi bëbaxa. Usa ꞌaish ca nëtë́a ꞌaíshbi bërí nubë ꞌicën. Usa ꞌaían cuëënquin picánti ca asábi ꞌicën.

Lucas 24:47

Usa ꞌain ca aín unicaman Jerusalénuxun pain aín bana ñuitancëxun camabi menu cuanquin ësoquin caquin unicama ñuixunti ꞌicën, Nucën Papa Diosan atun ꞌatima ñu ꞌacëcama tërë́ncë ꞌinuxun ca sinanaquin bëtsi oquin sinánti ꞌicë quixun. Ësaía a ñui cuënëo bana quicë a ñuixuntancëxun ca Jesusan atu cacëxa:

Romanos 11:4

Usaquian cacëxunbi ca Nucën Papa Diosan Elías cacëxa: “Mishima, siete mil uníxribi ca ꞌën bërúancëx ꞌëmi sinania. Baal ax isa dios ꞌicë quixuan uni raírinën rabíabi ca atun a rabicëma ꞌicë” —quixun.

Deuteronomio 33:26

Usa ꞌain ka anuishi sënë́nkin Moisésnën Israelkama ësokin kakëxa, nun Diosaribi bëtsi dios ka ꞌaíma ꞌikën, nun Dios ax ka kushiira ꞌaish raíri dios kamasamaira ꞌikën, ax ka naínu ꞌikë nëtë kuin mëu kushiira ꞌaish mitsu ꞌakini ꞌuti ꞌikën.

Santiago 2:13

Anúan an camabi unin ñu ꞌacë isti nëtë anun ca Nucën Papa Diosan, an bëtsi uni nuibaquin ꞌaquincëma unicama a aín ꞌucha cupí uisa cara oti ꞌicë usoquin ꞌati ꞌicën. Usonan ca an bëtsi uni nuibaquin ꞌaquincë unicama ashi uisabi otima ꞌicën.