Miqueas 6:8 - Kashibo-Kakataibo Biblia

⁸ Ënë ñukama ꞌaxunti ka Dios kuëënima, an ka nukama kaxa uisa ñux kara upí ꞌikën, ꞌimainun uisa ñu nun ꞌaxunti kara ax kuëënia: ax ka ësa ꞌikën, bëtsi unikamabë upí ꞌiti, uisa ñu ꞌakatsi karanuna kia usakinbi ꞌati, ꞌimainun an kakësabiokin ꞌanan ax kikësabiokin ñu ꞌati.

Miqueas 6:8 ပူးပေါင်းရင်းမြစ်များ

Génesis 18:19

ꞌËn kana mi kaísan usa ꞌain kamina min bëchikëkama ꞌinánan, min rëbúnkikama mi ꞌunánmikë bana upíokin kuakin ꞌunánkin uinu ꞌikëx kara ꞌaisa ꞌimainun upí ꞌikë a ꞌati ꞌikën, usakin ꞌakëbëtan kana ꞌën usakin ꞌaxunuxun kakë usakinbi ꞌaxúnti ꞌain.”

Génesis 5:22

Henoc ax ka Nukën ꞌIbu Dios kuëënkësabi oi tsóakëxa. Usa ꞌain ka aín rëkuën bëchikë Matusalén bëchitankëx, Henoc ax tsóakëxa trescientos baritia, ꞌimikin ka bëbu ꞌimainun xanuribiokin bakë bëchipatëkëankëxa;

Nehemías 9:13

Usokin ꞌatankëxun kamina aín bashi Sinaí kakë, anuax nun chaitiokëkamabë naínuaxëshi banakin min bana upíirabu a ꞌunámikin asérabi a tanti banakama ꞌimainun ax kikësabi oi ꞌiti akama upíokian ꞌunánun min banakama ꞌinánkën.

Salmos 37:26

Usa ꞌixun ka kamabi nëtën nuibakin bëtsi aín ñu na ꞌinántëkënun ꞌinania; usakin ꞌakëbë ka aín bakë bëchikëkama ax upíokin sinánxunkë ꞌia.

Salmos 73:28

ꞌAínbi kana ꞌëx Dios ꞌurama ꞌiti ꞌain, ax ka ꞌënan asábira ꞌikën. Mix kamina ꞌën ꞌIbu ꞌianan ꞌën Dios ꞌain, usa ꞌaish kamina an ꞌë bërúankë a ꞌain, usa ꞌain kana kamabi ñumi ꞌakë akama ñuiti ꞌain.

Isaías 66:2

¡ꞌËnbi kana kamabi a ñukama ꞌakën, usakin ꞌakëx ka asérabi ñu mërati ꞌiakëxa! ꞌËx min ꞌIbu ꞌaish kana usai kin. Uni ñuñuma ꞌianan axa tëmërai tsókë uni ami kana ꞌëx sinanin, usa ꞌain a unikaman ꞌën bana kikësabiokin upíokin ꞌati ꞌikën.”

Jeremías 9:23

Ësai ka Nukën ꞌIbu kiaxa: Uixi ka rabiakati an ñu ꞌunairakë anun ꞌëx kana ñu ꞌunánkë ꞌai kiax rabiakatima ꞌikën, ꞌimainun ka kushiira uni axi ꞌëx kana kushiira ꞌai kiax rabiakatima ꞌikën, uix kara ñuñuira ꞌikë axi ka ꞌëx kana ñuñuira ꞌai kiax anun rabiakatima ꞌikën.

Ezequiel 33:14

Usa ꞌain kana ꞌëx uni achúshi an ñu ꞌatima ꞌai ꞌuchakë ax ka bamati ꞌikë kiti ꞌain, ꞌaínbi aín ꞌuchakë a ënkin ñu upí ꞌakin,

Daniel 4:37

Usa ꞌain kana ꞌëx Nabucodonosor ꞌixun bërí Dios naínua ꞌapu ꞌikë a rabin, an ꞌakë ñukama ax ka asérabi ꞌianan upíira ꞌikën, an ka ax isa usaira ꞌikë kixun sinani rabiakakë unikama aín kuëënkësa okin ꞌati ꞌikën.

Oseas 6:6

Usa ꞌain kana mitsunmi ꞌë nuibati a kuëënin, ꞌën kana mitsunmi ñuina rëtankëxun xaroxunti a kuëënima, usa ꞌain kamina ax ka Dios ꞌikë kixun ꞌë ꞌunánkanti ꞌain, usakin ꞌunánkin kamina ꞌë ñuina rëtankëxun ꞌaímai këñutanun xaroxunkantima ꞌain.”

Amós 5:24

ꞌAínbi ka bëtsi uni ꞌatima oima upiti tsóanan nuibanankë ax kuni ꞌumpax shióbukë usaribi ꞌiti ꞌikën, ꞌimainun ka nuibanankë ax kuni ꞌumpax upíira këñúkëma usaribi ꞌiti ꞌikën.

Mateo 5:3

An —ꞌënbi cana ꞌën nuitu upí ꞌimitima ꞌai —quixun ꞌunáncë uni, ax ca ꞌëmi catamëtia Nucën Papa Diosan aín nuitu upí ꞌimianan ainan ꞌimicë cupí, chuámarua tani cuëënia.

Mateo 5:7

An ꞌaquinsa ꞌicë uni itsi nuibaquin ꞌaquincë uni a ca Nucën Papa Diosanribi nuibaquin ꞌaquinti ꞌicën. Usai ca ꞌiti ꞌicë quixun ꞌunani ca chuámarua tani cuëënia.

Lucas 10:42

Usa ñucama ꞌati asábi ꞌaínbi ca ꞌën bana cuati, ax bëtsi ñu ꞌati sináncësamaira oquin sinánti asábiira ꞌicën. Maríanën ca usaquin ꞌati sinánxa. Usa ꞌain cana ꞌën a ꞌaxunma ꞌanun catima ꞌain.

Lucas 11:42

Catancëxun ca ësaquinribi Jesusan atu cacëxa: —Fariseo unicama, mitsu ca Nucën Papa Diosan uisa cara oti ꞌicë usoquin ꞌati ꞌicën. Mitsun camina Nucën Papa Dios anuxun rabiti xubunuxun ñu ꞌacë unicama mitsun pitimi anun nëish ocë robi mësú ꞌinanin, Moisés quiásabi oquin. Usa ꞌixunbi camina a bana itsi, axa quicësabi oi ꞌiti, axa quicësa oquin ꞌaiman. Nucën Papa Diosmi upiti sinánan upí sinánñu ꞌixun uni ꞌaquinti, acama camina ꞌaiman. Usaquinmi mitsun ꞌacëx ca asábiira ꞌitsíanxa. Usoquin ꞌaquinmi mitsun ro mësúribi ꞌinánti ca asábi ꞌitsíanxa.

Lucas 12:14

Cacëxun ca Jesusan cacëxa: —Usai ca mibë min xucën ꞌiti ꞌicë quixun cana ꞌën mëníotima ꞌain. Ax ca ꞌën ꞌatima ꞌicën.

Lucas 6:36

Nucën Papa Diosan unicama ꞌaquinsa tanquin nuibacësaribi oquin camina mitsúnribi unicama mitsua nuibacëxunmabi nuibati ꞌain.

Romanos 7:16

Ñu ꞌaisama ꞌacë ꞌixunbi, usaquin ñu ꞌati ca ꞌaisama ꞌicë quicë bana ꞌunánquin, ꞌën usa ñu ꞌaisama tania isquin ca unin ꞌunánti ꞌicën, ꞌën sináncëx ca a bana upí ꞌaish cuati ꞌicë quixun.

Romanos 9:20

Mitsúnmi ꞌë usaquin cacëxunbi cana mitsu cain, ¿Mitsux unishi ꞌaíshbi caramina Nucën Papa Diosbë cuëbicanánti ꞌain? ¿Ñutë banati ꞌunan ꞌixun cara —¿uisoti caramina ësoquin ꞌë ꞌai? —quixun an ꞌacë xanu cati ꞌic? Ca catima ꞌicën.

1 Corintios 7:16

Camina ꞌunaniman, mix xanu ꞌixunmi ami sinánmisa tancëx cara min bënë Jesucristomi sinánti ꞌicë quixun. Camina ꞌunaniman, mix bëbu ꞌixunmi ami sinánmisa tancëx cara min xanu Jesucristomi sinánti ꞌicë quixun.

Efesios 4:32

Usai ꞌima camina abë nuibanani uni itsibë ꞌaquiananti ꞌain. Mitsumi nishquian unin ꞌatimocëxbi camina abë tanánantima ꞌain. Usai ꞌima camina uisa cara mi ocëxbi a manui abë upí ꞌiti ꞌain. Mitsun ñu ꞌaisama ꞌacëcama manuia, Nucën Papa Dios Cristo cupí mitsubë upí ꞌain, camina usaribiti uni itsibë ꞌiti ꞌain.

Deuteronomio 30:15

Ka kuat, bërí kamina kuati ꞌain, ꞌën kana añu karamina ꞌati ꞌai kixun mitsu kaiman, ꞌaínbi kamina uisai kaina bukuti ꞌai kixun isanan, uisa upí ñu ꞌai kaina upiti tsóti ꞌai isanan uisa ñu ꞌai kaina mitsúxbi ñuti ꞌain kixun ꞌunánti ꞌain.

Colosenses 3:12

ꞌItsaira nuibaquin ca Nucën Papa Diosan ainan ꞌaish an iscëx upí ꞌinun mitsu caísacëxa. Usa ꞌixun camina mitsúnribi bëtsi uni nuibaquin upíoti ꞌain. Usoquin ꞌanan camina —ꞌëx cana bëtsi unisamaira ꞌaish upí ꞌai —quixun sinántima ꞌain, masáquin sinani camina bënëtishi unimi nishtima ꞌain.

2 Tesalonicenses 2:16

Usa ꞌain cana Nucën ꞌIbu Jesucristo ꞌimainun Nucën Papa Dios an nuibaquin nux chuámashi tani cuëënun ꞌimianan xënibua ꞌaínbi abë ꞌinun nu ꞌimicë,

Santiago 2:20

¿Mix sinánñumasa ꞌixun caramina ꞌunaniman, Jesucristomi cana catamëti quiquinbi uni itsi nuibaquin ꞌaquincëma ꞌaish ca a uni Jesucristomi catamëcëmasa ꞌicën?

Josué 24:14

—Ësokian kamabi ñu an a kupín kamina mitsun Nukën ꞌIbu asérabira ami sinánkin rabiti ꞌain. Rabikin kamina mitsun chaitiokëkaman Éufrates kakë baka kuëbí tsókin rabianan Egipto menuxun rabia dios a ënkin Nukën ꞌIbuira ashi rabiti ꞌain.

1 Pedro 3:8

Ënë banaribi cana mitsu cain, axa Jesucristomi catamëcë uni raírinën sináncësaribi oquin sinani camina atubë nuibananti ꞌain, atúxa mitsun xucë́nsaribi ꞌain. Camina bëtsibë camáxbi nuibanani ꞌaquianani rabítima ꞌain.

1 Samuel 12:23

ꞌËn kana mitsu Nukën ꞌIbu ñukaxunkin ëntima ꞌain, mitsu ñukáxunima kana ami ꞌuchakë ꞌiti ꞌain. ꞌIanan kana uisai kaina mitsux an kuëënkësabi ꞌoíshi tsóti ꞌain akama ꞌunánmiti ꞌain.

1 Samuel 15:22

Usokin kakëxunbi ka Samuelnën kakëxa: Nukën ꞌIbun ka kuëënia ax kikësokinshi ꞌaxúnti, usa ꞌain ka ñuina xaroxuntishi kuëënima; ax kikësabi okinshi ꞌati ax ka ñuina xaroxuanan carnero aín xëni xaroxunkë usamaira ꞌikën.