Miqueas 5:2 - Kashibo-Kakataibo Biblia

² ꞌAínbi kana: Belén Efrata, mi Judánu ꞌikë ëmakamanu ꞌikë ëma chukúma anuax achúshi uni Israel unikaman ꞌapu ꞌinux chikiti ꞌikën, ax ka uni achúshi bërámaira ax tsóa aín rëbúnki ꞌiti ꞌikën.

Miqueas 5:2 ပူးပေါင်းရင်းမြစ်များ

Génesis 35:16

Usai anu ꞌitankëx ka Betelnuax kuankëxa; ꞌaínbi ka Efrata ꞌurapain ꞌaínbi Raquel tëmërai aín tuá bakë́ankëxa.

Génesis 35:19

Anuax kuaníbi ka Raquel ñuakëxa, ñukë ka anun Efratanu kuanti bai ꞌipítinu maíankëxa ax ka bërí Belén kakin anëkë ëma ꞌikën.

Génesis 48:7

ꞌËn kana ësokin mi kain, ꞌëx Padán-aram anu kuantëkënkëbë ka Canaán kakë me anuaxa ka min tita Raquel ñuakëxa, ax ka Efrata kakë me urama ꞌiakëxa, Efrata ëma anun kuanti bai ꞌipitiu kana maíankën, ax ka Belén kakë ëma bërí ꞌikën.

Génesis 49:10

Uínbi ka aín kushi Judá bikuantima ꞌikën, ꞌimainun ka aín manë tsati ꞌapun tuinkë ꞌikëa tuinkë a bikuantima ꞌikën, a manë tsatin ꞌibuka unuxun ꞌaia usa ꞌain ka kamabi menu ꞌikë unikaman ax kikësabiokin ꞌanuxun ꞌaia.

Salmos 90:2

Anun bashikama ꞌimainun me ꞌianan ënë, nëtëkama unitisama ꞌaínbi ꞌiá ꞌaish, kamina ënë nëtëkamanbi bëríbi mix Dios aira ꞌain.

Isaías 11:1

Ësai ka Dios kiakëxa, Jesénën rëbúnki achúshinuax ka i mo kótëkëni kanikë usaribi ꞌitánun achúshi uni mërati ꞌikën, usa ꞌi ka aín tapunuaxi kookësa ꞌi mërati ka ax ꞌapu ꞌiti ꞌikën.

Isaías 53:2

Nukën ꞌIbun ka kuëëankëxa, aín uni axa ñu ꞌapákëx bërí koi kani aín tapunkama me ëskikë ꞌukëmëu kuankë usairibi ꞌiti. Usa ꞌaínbi ka upíma ꞌianan, chabáchabákikë upima ꞌiakëxa, ain namix ka usa ka kixun unin ñachakin istisama ꞌiakëxa;

Isaías 55:4

Mitsun kamina ꞌunánti ꞌain ꞌën kana, bëtsi bëtsi menu kuankian aín ꞌapu ꞌixun ñu ꞌunánmikin ꞌën ꞌunánmikë banakama ñuixunun xuakën.

Isaías 7:14

Diosan ka unibë ꞌikintankëma xanu: Xuntaku achúshi tuuñu ꞌinun ꞌimiti ꞌikën, ꞌimikëx bakëntankëxun ka Emanuel kakin anëti ꞌikën. Emanuel kikë ax ka, ‘Dios ka nubë ꞌikë ki kikë ꞌikën’.

Oseas 6:3

¡A mi kushikin kananuna Dios ꞌunántëkënti ꞌain! Usakin ꞌakëbë ka Dios nukamanu ꞌi ꞌutëkëni barin urukin pë́kabëtsinkë usa ꞌianan, ka me chabóia mitakuatsinkëbë ꞌuí ꞌibúkësa usaribiti ꞌuti ꞌikën.

Amós 9:11

A nëtë ꞌikëbëtan kana ꞌën David ꞌapu ꞌain ꞌasaribiokin Israel unikama ꞌapuñu ꞌinun ꞌimiti ꞌain. ꞌImikin kana kamabi ñukama anu ꞌikë akama ꞌatëkënun ꞌamiti ꞌain,

Miqueas 4:10

Kuënkëni katsati ka Sión ëmanu tsókë unikama ꞌiti ꞌikën, usai ꞌika achúshi xanu bakënun ꞌain tuákën paëokëx ꞌikësai ꞌiti ꞌikën, usa ꞌain ka minuax chikíkiani kuani unikama ëman ꞌiti ꞌikën, usai ꞌikiani kuani ka unikama Babilonia menu bëbakanti ꞌikën. ꞌAínbi ka anuabi Nukën ꞌIbun aín unikama; ië́mikin axa atumi nishkë unikamanuabi bëtëkënti ꞌikën.

Zacarías 9:9

(Ësai ka Dios kia.) ¡Sión ëmanu tsókë unikamax ka ꞌitsaira kuëënti ꞌikën! ¡ꞌImainun ka Jerusalén ëmanu tsókë unikama atúxribi kuëëni kantati ꞌikën! Mitsun ꞌapu, upí ainra kamabi ñu kananti ax ka aia, ꞌaínbi ka mënin sinaínshi ꞌaish, achúshi burro xanuntuá bërí kanikë a kamanan tsótax aia.

Mateo 2:1

Herodes axa Judea cacë menu ꞌicë unicaman ꞌapu ꞌaish Jerusalénu ꞌain ca a menu ꞌicë ëma, Belén cacë, anuax Jesús bacë́ancëxa. Belénuaxa Jesús bacë́an ca aucüaxa bari urucë anuax an ñu ꞌunáncë unicama, Belén ꞌurama ꞌicë Jerusalén ëmanu cuancëxa.

Mateo 2:6

Belén, Judá menu ꞌicë ëma, anu ꞌicë uni achúshi ax ꞌapu ꞌixun ca ꞌën unibu, Israelnën rëbúnquicama, a bërúanquin ꞌaquinuxun ꞌaia. Usa ꞌain ca Belén ax bëtsi ëmacamasama ꞌicën.

Mateo 28:18

Usoquian rabicëxun ca Jesusan a rapasu cuanquin atu cacëxa: —ꞌËn Papa Diosan ca naínuxun ꞌanan menuxunribi añu ñu carana ꞌaisa tani a ꞌëx cuëëncësa oquin ꞌanun aín cushi ꞌë ꞌinánxa.

Lucas 23:2

Buanx bëbax aín bëmánon ꞌixun ca Jesús ñuiquin ësaquin Pilato cacëxa: —Ënë unían judíos unicama nun caibu bëtsi oquian sinánun quixun ꞌunánmia cananuna nunbi cuan. Nun nu a César buánmiti curíqui ꞌinánxunma ꞌanun nu canan ca ax isa Cristo ꞌaish ꞌapu ꞌicë quiaxa.

Lucas 23:38

Anua a matáscancë i curúsocënu ca Jesús manámi ësaquin cuënëocë bana matáscë ꞌiacëxa: “Ënëx ca judíos unicaman ꞌapu ꞌicën”. A banax ca griego banan cuënëocë ꞌianan Romanu ꞌicë unin bana, latín cacë, anun cuënëocë ꞌianan judíos unibunën bana, hebreo cacë, anúnribi cuënëocë ꞌiacëxa.

Juan 7:42

Nucën Papa Diosan bana cuënëo ca quia, ax ca Davidnën rëbúnqui ꞌiti ꞌicën. Usa ꞌaish ca anuaxa David bacë́an, Belén, anu ꞌicë uni ax ꞌiti ꞌicën.

Colosenses 1:17

Ñucama uniocëma pan ꞌaish ca axira pain ꞌiacëxa. ꞌIxun ca uniotancëxun, usabia ꞌinun camabi ñu mëníocëxa.

Hebreos 13:8

Jesucristo ax ca usabi ꞌiá ꞌaish bëríribi usabi ꞌaish, usabi ꞌiti ꞌicën.

Hebreos 7:14

Camabi unin ca ꞌunania, Nucën ꞌIbu Jesús ax ca Judanën rëbúnqui ꞌiacëxa quixun. Usa ꞌaínbi ca Moisés sacerdote ñui, Judanën rëbúnquinëx ca sacerdote ꞌiti ꞌicë quiax quiáma ꞌicën. Levitan rëbúnquishi ca usai ꞌiti ꞌiacëxa.

1 Juan 1:1

Ënë mecama unioisama ꞌaínbia aín Papabë ꞌiá axa ënë menu uá, a ñuiquin cananuna ënë quirica mitsu cuënëoxunin. A cananuna aín bana cuanan nun bërúnbi isacën. Nun bërúnbi ñachaquin isanan cananuna nun mëcënanribi ramëacën. Ax bamatimoi tsócë ꞌixuan aín unicamaribi abë ꞌinun ꞌimicë, a ñuiquin cananuna mitsu cain.

Apocalipsis 19:16

Aín chupanu ꞌimainun ca aín quisinuribi ësaquin cuënëocë ꞌiaxa: “ꞌApucaman ꞌApu ꞌianan ꞌibucaman ꞌIbu”.

Apocalipsis 2:8

Usaquin catancëxun ca ësaquinribi cuënëonun ꞌë caxa: —An axa Esmiranuax ꞌëmi catamëcë unicama ꞌë ñui quicë bana ñuixuncë uni, a buánminuxun camina ësoquin cuënëoti ꞌain: Axa ñu ꞌaíma pan ꞌain ꞌiá ꞌaish camabi ñu cëñúcëbë usabi ꞌiti, axa bamaxbi bamatëcëntimoi baísquicë, Jesús, an ca ësaquin mi caia:

Apocalipsis 21:6

Caxun ca ꞌë caxa: —Anuishi sënë́nquin cana ꞌan. ꞌËx cana uisa ñubia ꞌaíma ꞌaínbi ꞌiacën, usa ꞌaish cana ënë menu ꞌicë ñucama cëñúcëbë usabi ꞌiti ꞌain. Usa ꞌaish cana a pain ꞌunánti bana “A” ꞌimainun tsiánquinribi ꞌunánti bana “Z” asaribi ꞌain. Shimaia uni ꞌunpax ꞌacatsi bënë́cësa, usaribitia ꞌënan ꞌiisa tani bënëtia, cana ꞌënan ꞌaísha ꞌën Bëru Ñunshin Upíñu ꞌinun, cupí ñuixunquinma, ꞌimiti ꞌain.

Rut 1:1

A baritian Israelkama atun ꞌapuñuma ꞌain ka bëtsi uni raírinëx atun ꞌapu ꞌiakëxa, a baritiakaman ka a menu a piti ñu ꞌaíma ꞌain numi ꞌiakëxa. Usa ꞌain ka achúshi uni Judá kakë menua ꞌikë Belén kakë ëma anuax Elimélec ax Moab kakë me anu ꞌitsama baritia tsóti kuankëxa. Kuankin ka ain xanu Noimí ꞌimainun aín bakë bëchikë bëbu rabë́ Mahlón kakë a ꞌimainun Quilión a buánkëxa. A unikamax ka efrateo ꞌaíshbi Belén menu tsókë unibi ꞌiakëxa. Usa ꞌain ka anuax kuantankëx Moab kakë me anu tsóti bërúakëxa.

Rut 4:11

Ësai kia ka anu ꞌikë ꞌapukama ꞌimainun anua timë́kë unikama atúnribi kakëxa: —Usa ka nunbi kananuna ꞌunanin. ¡Usa ꞌain ka min xanu ꞌiti Rut a Nukën ꞌIbun Raquel ꞌimainun Lía ꞌasaribiokin ꞌakinti ꞌikën, ꞌakinkëxun ka ꞌitsaira tuapakëxa usa ꞌain kananuna israel unibu ain rëbúnki nux ꞌain! ꞌImainun kananuna mixmi bëtsi uni kamasamaira ꞌianan upí sinánñu ꞌain Efrata kakë ꞌikëbi Belén kakë ëma ënu ꞌiti kuëënin.

1 Samuel 10:19

ꞌAínbi kamina mikaman bërí Diosma ꞌikë ꞌakësa okinra kuëënkima rakan, an kamabi ñu ꞌaisama ꞌanan tëmërakin ñu mëi atsánkë ꞌikë chikían ꞌixunbi. ꞌImainun kamina ami manúkin a rakani axa mitsun ꞌapu ꞌiti achúshi uni anëxunun kikan. Usa ꞌain kamina bërí Nukën ꞌIbu rabi anu ukanti ꞌain, ꞌaínbi kamina, atun bananbi banakë akama abiribi ñaká, umainun ka ñakátibi aín aintsibë aintsibë uti ꞌikën.

1 Samuel 17:12

Jesé ax ka Belén kakë ëma anu tsókë uni ꞌiakëxa, usa ꞌain ka Saúl axa ꞌapu ꞌain a uni kaniakëti uni ꞌikësabi apan ꞌiakëxa. A unix ka ocho bakë bëchikëñu ꞌiakëxa, aín bakë bëchikë achúshinëx ka David ꞌiakëxa.

1 Samuel 17:18

ꞌImainun kamina mapai rabë́ queso ënë suntárukaman kushi comandante a buánxun ꞌinánti ꞌain. ꞌInánan kamina uisa kara min xukë́nkama ꞌikë ꞌëmi kaiunun isi kuanti ꞌain.

1 Samuel 8:12

ꞌImainun ka raírinëxribi aín ꞌapu ꞌixun an mil suntáru ꞌimainun cincuenta suntárunën kushi ꞌinun ꞌimiti ꞌikën. Usakin ꞌanan ka raíri mikama an me manë paránën tukaxun anu ñu ꞌapákë aín bimi binun bimiti ꞌikën, bimianan ka anun ꞌakanankë ñu caballonën nikinkë anun mëníoti ñukama aribi unionun ꞌamiti ꞌikën.