Miqueas 4:3 - Kashibo-Kakataibo Biblia

³ Usa ꞌain ka Nukën ꞌIbun bëtsi bëtsi menu tsókë unikama uix kara ꞌuchaxa kixun istankëxun uisa kara okatsia usakin ꞌati ꞌikën, ꞌakin ka ꞌura men tsókë unikama ꞌakanankë a mëníoxunti ꞌikën. Usakin ꞌakëxun ka atúnbi atun manë xëtokëkama a anun me tukati ꞌanan, ꞌain paka piakama anun ñu bimi biti tëntuñu ꞌitánun xëtokin ꞌati ꞌikën. Usa ꞌain ka uinu ꞌikë ëmanu ꞌikë unínbi anun bëtsibë ꞌakánanti sinánxun amiribishi anuan ꞌakanankë a bitëkëntima ꞌikën, ꞌianan ka uínbi usai ꞌakánanti ka kixun bëtsi ꞌunánmitëkëntima ꞌikën.

Miqueas 4:3 ပူးပေါင်းရင်းမြစ်များ

Salmos 46:10

¡Usakin ꞌamikëxun ka! “¡ꞌËx kana Dios ꞌai kixun ꞌunánkanti ꞌikën, kamabi menu ꞌikë unikama manámi kana ꞌëx ꞌain! ¡ꞌËx kana kamabi me manánmira ꞌain!”

Salmos 46:9

an ka kamabi menu ꞌikë unikama ꞌakánantëkënia, anuishi sënë́nmikin aín manë pará ꞌianan aín piakama ꞌimainun, anuaxa ꞌakanankë caballonën nirinkë manë ꞌakë akama mëníonun ꞌamia.

Salmos 72:3

ꞌImainun kamina aín bashi kamakëñun, matá mekama atunan ꞌain uínbi ubíokëma upitax anu bukukanti ꞌikën.

Salmos 72:7

¡Usakin ꞌanan ka ax ꞌapu ꞌixun ñu upíokin ꞌakëbë, a nëtëkaman uni upitax bukuti ꞌikën, anúan ꞌuxë nëtë́ti nëtë ꞌitámainun!

Salmos 96:13

usai ꞌika Diosan ꞌismainun kantati ꞌikën! ¡Ax ukin ka ënë menu ꞌikë ꞌapu ꞌixun ꞌakinti ꞌikën, ꞌakianan ka kamabi menu ꞌikë ëmakamanu ꞌikë unikamaribi ꞌakinkin asérabi an ñu upíokin ꞌati ꞌikën!

Isaías 2:4

Diosan ka bëtsi bëtsi menu ꞌikë unikama ꞌakanantëkënima upitax bukunun ꞌitsaira uni uinu kara tsotia anuabi ꞌimiti ꞌikën. Usakin ꞌimikëxun ka atun manë xëtokë anua ꞌakanankë a anun ñu mëëkin me anun naëti ꞌanan, aín paka pia akamaribi anun bimia ñu ꞌapákë tëakin biti taxuñu okin ꞌati ꞌikën. Usokin ꞌaxun ka uinu ꞌikë ëma kamanuxunbi bëtsibë ꞌakananuxun anúan ꞌakanankë a bitëkëntima ꞌikën. Usonan ka uisai ꞌakánanti kara kixun uínbi bëtsi ꞌunámitima ꞌikën.

Isaías 60:12

Uinu ꞌikë menu ꞌikë ꞌapun kara aín unikamabëtan ꞌakinsama tania ax ka; aín ëmakama këñunbi ꞌatima okin masókin këñúkë ꞌiti ꞌikën.

Isaías 65:25

ꞌIanan ka shórapánanën carnerobë timë́xun, pimainun paru ꞌinúanën vaca bënën ꞌakësaribi okin pasto piti ꞌikën, ꞌimainun ka rununribi me putu piti ꞌikën. Usa ꞌain ka an kamabi ꞌën bashikamanu ꞌikë, unikama ꞌatima oti uinu ꞌikë unibi ꞌaíma ꞌiti ꞌikën.” Usai ka Nun ꞌIbu kiaxa.

Isaías 9:7

Ax ka anua David tsóa anubi tsóti ꞌikën; usa ꞌikë ka ax kushiira ꞌixuan ñu ꞌaia kamabi menuxun kuati ꞌikën ꞌimainun ka chuámarua uni tsóti ax këñutima ꞌikën; usa ꞌixun ka uínsaranbi axa ꞌapu ꞌia ax ënkëma anubi ꞌiti ꞌikën, usa ꞌain ka an ꞌakë ñukama ax upíokin ꞌakë ꞌianan, an bërí pëukin ñu ꞌakë ax uínsaranbi nëtë́tima usabi ꞌiti ꞌikën. Ësokin ka Dios kamabi kushiñuira an ꞌitsaira unikama nuibakin ꞌati ꞌikën.

Daniel 2:44

Usa ꞌain ka ënë ꞌapukaman, tsókëpan aín unikama ꞌapu ꞌixun ꞌakinkëbëtan Dios naínu ꞌikë an achúshi me anu ꞌapu ꞌikë uinsaranbia bëtsi menu ꞌikë ꞌapukaman masókin atun sinánkësa okin ꞌanun ꞌimitima ꞌikën, usa ꞌixun ka ainra kamabi këñukin bëtsi menu ꞌikë ꞌapukama ꞌatankëx axira uínsarabi këñútimoi ꞌapu ꞌiti ꞌikën.

Oseas 2:18

Usa ꞌain kana ꞌën a nëtën Israelkama uisabi oxuma ꞌanun achúshi ñu ñuina raëkëma kamabëtan ꞌakin, manan nuánkë ꞌimainun men niríkë runukama abëtan ꞌati ꞌain. ꞌAnan kana ꞌën unikama upiti bukunun, ënë menua aín kanti ꞌimainun aín manë xëtokë, ꞌianan ꞌakanankë aribi këñuti ꞌain.

Oseas 2:20

ꞌËn kana ꞌën xanusami mitsux ꞌain añu ñubi mitsu ꞌaxuntima ꞌain, usa ꞌikë kamina mitsun ꞌë ꞌëx kana Dios ꞌai kixun ꞌunánti ꞌain.

Joel 3:2

Usakin ꞌanan kana axa atumi nishkë bëtsi menu ꞌikë unikama, timëbiankin Josafat kakë me sapan anu uanti ꞌain, anuxun kana uisakin karana ꞌaisatani usakin ꞌën unikama Israel ꞌasaribiokin ꞌati ꞌain. (Josafat kikë bana ax ka Diosan uisa kara oisatania usakin ꞌati kikë bana ꞌikën.) Atun ka ꞌën uni Israelkama bëtsi bëtsi menu abístanun ꞌimianan, ꞌën atu ꞌinánkë me ꞌinánankin bikankëxa.

Miqueas 5:15

ꞌËx ꞌitsaira nishkin kana, axa ꞌëmi sinántisama tankë, ꞌën kakëxun kuaisamatankë unikama uisokin karana ꞌaisatani usokin ꞌati ꞌai kiax ka Dios kiakëxa.

Zacarías 9:10

An ka anuaxa suntárukama Israelnën, menuax ꞌakanankë caballonën nirinkë akama ꞌimainun anuaxa Jerusalénnu ꞌikë suntárukama ꞌakanankë caballokama ꞌanan anúan ꞌakanankë aín kantikama aribi këñuti ꞌikën. An ka Israel kama ꞌimainun kamabi menu ꞌikë unikamax upiti tsónun ꞌimiti ꞌikën, an ka parúmpapa Mediterráneo kakë anuaxi parúmpapa itsi parúmpapa itsi anu ꞌikë unikama upiti bukunun ꞌimiti ꞌikën, ꞌimianan ka Éufrates baka anuxunbi uinu kara me sënënakëakëxa anu sënë́nbi unikama ꞌakinti ꞌikën.

Hechos 17:31

Nucën Papa Diosan ca mëníocëxa, anúan achúshi uni, Jesucristonën camabi uni, aín nuitu cara upí ꞌicë, cara upíma ꞌicë quixun isti nëtë. Usaquian ꞌanun ca an caísacëxa quixuan camabi unin ꞌunánun, ca Nucën Papa Diosan Jesús bamacëbi baísquimiacëxa.

Apocalipsis 19:11

Usaquin ángelnën cacëxun cana naí panárabëcë isan. Anuaxa caballo uxua chiquitia cana isan. Ax a caballonu tsócë, ax ca Aín Quicësabi Oquin ꞌAcë caquin anëcë ꞌianan ca An Uni Paráncëma caquin anëcë ꞌiaxa. Usa ax ꞌixun ca ꞌatima unicama a uisoquin cara ꞌaisa tania usoquin castícanan axa upí sinánñucama a upí oia.

1 Samuel 2:10

Nukën ꞌIbun ka axa ami nishkë unikama këñunun ꞌimiti ꞌikën, ꞌimikin ka naíkamë ꞌëonuax kanákamë ꞌëo banarui ꞌikin atunu ꞌibúkin këñunun ꞌimiti ꞌikën. Usakin ka Nukën ꞌIbun kamabi menu ꞌikë unikama ꞌati ꞌikën; ꞌanan ka anbia ꞌapu ꞌinun kaiskë ꞌapu a kamabi nëtëan kushiñu ꞌinun ꞌimiti ꞌikën.