Miqueas 4:10 - Kashibo-Kakataibo Biblia

¹⁰ Kuënkëni katsati ka Sión ëmanu tsókë unikama ꞌiti ꞌikën, usai ꞌika achúshi xanu bakënun ꞌain tuákën paëokëx ꞌikësai ꞌiti ꞌikën, usa ꞌain ka minuax chikíkiani kuani unikama ëman ꞌiti ꞌikën, usai ꞌikiani kuani ka unikama Babilonia menu bëbakanti ꞌikën. ꞌAínbi ka anuabi Nukën ꞌIbun aín unikama; ië́mikin axa atumi nishkë unikamanuabi bëtëkënti ꞌikën.

Miqueas 4:10 ပူးပေါင်းရင်းမြစ်များ

2 Reyes 25:4

Usa ꞌain ka a nëtënbi ꞌapu Sedequíasnën kamikëxun ain unikaman anun ëma kënëara kënë anun chikiti kini achúshi ꞌakëxa, anun ka ꞌapu Sedequías a imë́ abánëakëxa. Babilonia kama atu ꞌurama ꞌaínbi, usai abáti ka amo rabë́bi kënëkian xëkuëokë anun kuani ꞌapun xubu ꞌurama ñu ꞌapákë a ratanbiani kuankin bai bibiani Jordán kakë baka me sapan ꞌikë ami kikiani kuankëxa.

Isaías 43:14

Israel unikaman ꞌIbu Dios ꞌupíira, an atu ië́mikë ax ka ësai kiaxa: mitsu ië́mikin ꞌakinuxun kana Babilonianu suntárukama xuti ꞌain, ꞌakian anun ëmanu atsínti ain xëkuëkama rurupanun xuti ꞌain, usokin atun ëma masókin ꞌaia isi ka caldeo unikamax masánuituti inkanti ꞌikën.

Isaías 45:13

ꞌËn kana Ciro kakë uni ꞌapu ꞌixun abë ꞌakanankin uni ñusma okin anun ꞌamiakën, usa ꞌixun kana ꞌën ñu ꞌakian tëmërakimaishi ꞌanun ꞌamiti ꞌain; ꞌamikëxun ka an ꞌën ëma birutëkënun ꞌamianan axa ami nishkë unikaman bibiankin uan akamaribi chikínti ꞌikën, ꞌaínbi ka ꞌë kamina kupíoti ꞌai kiax kitima ꞌikën.” Nukën ꞌIbu kamabi kushiñuira ax ka ësai banai kiaxa.

Jeremías 15:21

ꞌËn kana ꞌatima unikaman mi ꞌibuakëx atubë ꞌikëbi mi anua chikíanan, ¡an bënë́kinshi ñu ꞌati kuëënkë unikamanua ꞌën mitsu ië́miti ꞌain!

Oseas 1:10

“Usa ꞌain ka Israel unikama achúshi nëtën parúmpapa masi iskësaira ꞌaish, uínbi uiti ꞌitsaira kara kixun tupuntisama ꞌiti ꞌikën. Usa ꞌikë ka mitsux kamina ꞌën unima ꞌain kakima Diosan mitsu kati ꞌikën, mitsux kamina axa bamatima oi tsókë Dios ain bëchikë ꞌai kixun kati ꞌikën.”

Oseas 13:13

Xanu aín tuákën paëokëx upiti bakënkë, ꞌaínbi túa bana kuakëma usarabi ka Israel unikama ꞌikën,

Oseas 2:14

ꞌËn kana Israel unikama mëratiokësa obiankin: anu uni ꞌikëma menu buántënkënti ꞌain, anuxun kana upíokin kakin atu sinánmitëkënti ꞌain, kiax ka Dios kiakëxa.

Miqueas 5:2

ꞌAínbi kana: Belén Efrata, mi Judánu ꞌikë ëmakamanu ꞌikë ëma chukúma anuax achúshi uni Israel unikaman ꞌapu ꞌinux chikiti ꞌikën, ax ka uni achúshi bërámaira ax tsóa aín rëbúnki ꞌiti ꞌikën.

Miqueas 5:3

Usa ꞌain ka bërí Diosan aín unikama ënia, ꞌaínbi ka xanun aín tuá achúshi bakënuxun kainkë usa ꞌiti ꞌikën. Usa ꞌain ka a tuá aín aintsi Israelkama ñatanbiankin buánkama abë birananti ꞌikën.

Apocalipsis 12:14

Nuicëxbi ca a xanux Nucën Papa Diosan ꞌimicëx, tëtëcamëꞌëon pëchisa rabë́ ꞌaish aín pëchi chaira ꞌiaxa. Anun anu uni ꞌicëma me, anu a ñuina chaira capë́sa ax cuantima, anu nuánti cupí ca usaquin Nucën Papa Diosan ꞌimiaxa, anuxun an mëníosabi oquin rabë́ ꞌimainun achúshi baritia ꞌimainun mëcën achúshi ꞌimainun achúshi ꞌuxën piti ꞌinánuxun.