Miqueas 2:4 - Kashibo-Kakataibo Biblia

⁴ A nëtën ka mitsu raíri unikaman ꞌatima okëx masá nuitutia kantaxunkin. Ësakin mitsumi kuaikin kakanti ꞌikën: Nukamax kananuna ꞌaisamaira masokin këñúkë ꞌian; nun ëmax ka Diosnan ꞌikën, ꞌaínbi ka Nukën ꞌIbunan ꞌikëbi axa numi nishkë unikaman ꞌibuaxa usa ꞌikë ka uínbi usakin ꞌaxuma ka ꞌa kixun kati ꞌaíma ꞌikën; usa ꞌain ka nun mekama nu bikuantankëx bëtsi unikamabë ꞌinánanxa.

Miqueas 2:4 ပူးပေါင်းရင်းမြစ်များ

2 Samuel 1:17

Ësai ki ka David Saúl ꞌimainun ꞌain bëchikë Jonatán bamakë kuatankëx rabiti kantai kiakëxa,

Isaías 6:11

Ësokin kakëxun kana ꞌën ñukákën: “¿ꞌËn ꞌIbu uiti bari ꞌimi kara ënë ñukama min bana kikësai ꞌinux basiti ꞌik?” Kixun kakëxun ka Diosan ꞌë kakëxa: “Ënëx ka ëmakama masókin ꞌatima okëbëa anu ꞌikë unikamax uniñuma ꞌianan; atun xubukamaxribi uniñuma ꞌimainun, anu ñu ꞌapákë me kamaxribi anu uni ꞌikëma mesa bërutamainun anu sënën ꞌiti ꞌikën,

Jeremías 14:18

ꞌImainun kana ninu kuankin, anuaribi ꞌakanania anuax uni ñuia isanan; ëmanu atsínkin anuaribi a piti ꞌaíma ꞌain numin bamaia uni isin. Usaia ꞌikankëbë ka an Dios kikë bana ñuikë unikama ꞌimainun sacerdotekamax an ꞌunánkëma bëtsi ëmakamanu kuani añu kara ꞌati ꞌikë kixun ꞌunánimabi nitsia.

Jeremías 9:10

Aín bashikama ꞌimainun anu uni ꞌikëma menu ꞌikë pastokama ax ka nëmëkë ꞌikën, usa ꞌain kamina inkanti ꞌain, usa ꞌain ka uíxbi anun ꞌinútima ꞌikën, ꞌimainun ka anua vaca manki banaia kuakë ꞌaíma ꞌimainun, ñuina pëchiñu, ñuina raëkëma akama kuani abati nëtë́kë ꞌiti ꞌikën.

Jeremías 9:16

Usakin ꞌanan kana ꞌën mekamanu ꞌikë atun papanbi ꞌunánma ëmakamanu kuani abístanun ꞌiminuxun ꞌain; usakin ꞌanan kana axa ami nishkë unikaman ꞌain manë xëtokë tuínxun anun ꞌanan achirabi nitánuma kamabi binun bimiti ꞌain.

Ezequiel 2:10

Iskëxun ka ꞌën ismainunbi kirika tarankë a sarakaxa. Usa ꞌaish ka a kirikanu amo rabë́bi kuënëokë ꞌiaxa: usa ꞌain ka anua kuënëokë bana ax masánuituti ꞌianan paëtani bënëti ꞌimainun uisa kara oti ꞌikë usokin isa ꞌati ꞌikë kixun ñuikin kuënëokë ꞌiaxa.

Joel 1:13

Usa ꞌain kamina sacerdotekama anuxun ñuina xarotinu tëkë, ꞌain kushibu mitsux chupa xëni pañutankëx paëi masá sinani inkanti ꞌain, anuxun Dios rabiti xubunu ka ñu bimikama ꞌimainun a Dios ꞌinaínshiti uvas baka vino ꞌakë abi ꞌaíma ꞌikën.

Joel 1:8

Achúshi xanux ꞌain mërati an biti uni ñukë ꞌain, inkin uni ñukëbëtan pañuti chupa pañuax inkë,

Amós 5:1

Israelkaman ka ꞌën bana kuati ꞌikën; ꞌëx kana usaími mitsux ñu inuti masá nuituti a ñui kin.

Amós 5:17

Kamabi uvas ꞌapákë naëkamanuax ka ꞌën atu tëmëramiti ukëbë inkanti ꞌikën.” Usai ka Dios kiaxa.

Miqueas 1:15

Ësai ka Nukën ꞌIbu kia: ꞌËn kana an Maresá kakë ëmanua tsókë unikaman mitsu bitëkëntanun uni xuti ꞌain, usakin ꞌakëbë ka Israel unikaman ꞌapu atúxribi aín kërubu axbi abati kuantankëx, aín bashi kini Adulam kakë ëma ꞌurama ꞌikë anu axa ami nishkë unikamami rakuë́ti unëti kuanti ꞌikën.

Miqueas 1:8

Usa ꞌain kana usokin ñu ꞌakankëbë anun ꞌitsaira masá nuituti nitë́xëti inti ꞌain; usai ꞌi kana ꞌën taxakabi ëchiax nianan ꞌën chupa pëaxribi niti ꞌain, ñuina raëkëma an nami paxa pikë axa masánuitukë usaribiti ꞌiti ꞌain, ꞌianan kana ñuina pëchiñu avestruz kakë aín tuakëxa banai sharákësaribi ꞌinun ꞌiti ꞌain.

Miqueas 2:10

¡Usa ꞌain kamina bërí nirukiani ënuax kuankanti ꞌain! Ënë mex ka anumi mitsux tantikanti ama ꞌikën. ꞌËn kana anuxumi mitsun ꞌatima ñuishi ꞌai ꞌëmi manukankë kupí, asérabi ꞌatimokin ënë me masóti ꞌain.

Habacuc 2:6

Usai atux ꞌikëbë ka kamabi menu ꞌikë unikama Babilonianu ꞌikë unikama ñatankin bia akamax kantai ësai kiti ꞌikën: ¡Mitsux kamina minan ꞌaímabi bëtsi unikaman ñu bikë anun ñuñuira ꞌikanin! ¿Uínsaran kaina mitsu ribinxun kupíokëxuma bëtsi unikaman ñu bianan atun chupa bitsimi anun ñuñuira ꞌikankë a ënkanti ꞌain? Usakë ꞌikë ka Diosan mitsu aín kuëënkësokin ꞌati ꞌikën.

Números 23:18

Usakin ñukákëx ka ësai ki Balaam banai kiakëxa: Balac Sipornën bëchikë ꞌën mi kamainun kamina upíokin kuati ꞌain.

Números 23:7

Mërai ka ësai Balaam kiakëxa: “Amiaxa bari urukë matá me Aram kakë anuabi ka Balac Moabnu ꞌikë ꞌapu an unun kixun ꞌë kamiaxa Kamikëx kana uan, israel unikama kamina ꞌë uisai kara ꞌisa tania usaía ꞌitánun ꞌë ꞌatimakin sinánxunti ꞌain, usa min okëx ka Jacobnën rëbúnkikama ꞌatimokë ꞌiti ꞌikën, —kixun ka ꞌë kaxa.

Números 24:15

Usa ꞌain ka Balaam banai usai ꞌiti ñukama ñui kiakëxa: ꞌËx kana Balaam Beornën bëchikë ꞌain, usa ꞌaish kana ënë banakama ki kísatanin ꞌën kana uisai kara ñu ꞌiti ꞌikë isanan upíokin ꞌunánin,

Números 24:3

ꞌai anu ꞌirukëbë ka Balaam ësai kiakëxa: ꞌËx kana Balaam Beornën bëchikë ꞌain, usa ꞌixun kana Diosan kara uisai kinun ꞌë kaia unánan upíokin añu kara ꞌia akama ꞌunánkë uni ꞌëx ꞌain,

Marcos 12:12

An naë bërúancë unicama ñuicëbë ca judíos ꞌapucama atubi ñui isa quia quixun ꞌunani Jesúsmi nishacëxa. Nishquin ꞌatimonuxun biisa tanquinbi —ꞌitsa unin ca aín bana cuatia, usa ꞌain ca a unicamax numi nishti ꞌicë —quixun sinani atumi racuë́quin Jesús ëbiani riquiancëxa.