Miqueas 2:11 - Kashibo-Kakataibo Biblia

¹¹ Bëtsi unix ka këmëkin abi sinanx ësai kia: ꞌËn kana uvas baka ꞌakë ꞌimainun bëxnan ñui kin, ësaia an bana ñuikë unikama këmëi kikë ax ka ënë ëmanuxun mitsun kuakëx asábi ꞌikën.

Miqueas 2:11 ပူးပေါင်းရင်းမြစ်များ

1 Reyes 22:6

Ësakin kakëxun ka Ahab Israel unikaman ꞌapu an Dios kikë bana uni ñuixunkë unikama cuatrocientos ꞌiti ꞌurama a timëtankëxun ñukákëxa: —¿Ramot ëmanu ꞌikë suntárukama an Galaad me bërúankë atubë karana ꞌakánanti ꞌain karana ꞌakanantima ꞌain? Kakëxun ka atun kakëxa kamina ꞌakánanti ꞌain, Nukën ꞌIbun ka mi ꞌaia ꞌakinti ꞌikën.

Job 31:5

ꞌËx kana asérabi kian uínsaranbi kana ñu ꞌatima ꞌanan uni kana, paránti ꞌai kixun sinánxun paránkëma ꞌain.

Isaías 28:7

ꞌImainun ka raíri unikamaxribi uvas baka vino ꞌakë xëatankëx amá aman kuani nitsia, ꞌimainun ka sacerdote unikama ꞌianan an Dios kikë bana ñuikë unikama atúxribi paë bata kushi a xëatankëx amá aman kuani nitsi kushiñumasa ꞌaish sinanima ꞌatimati banaia; ꞌianan ka namákësokian Diosan ismikëxbi amá aman kuani nikësai ꞌia, ꞌianan ka paën irakë ꞌixun uisakin kara bana mëníoti ꞌikë kixunbi ꞌunanima.

Jeremías 14:14

Ësokin kakëxunbi ka Nukën ꞌIbu Diosan ꞌë kakëxa: Asabi ka usaika ꞌën anë ñui ꞌën kakëxmabi, an bana ñuikë unikama këmëi kia. ꞌËn kana usakian ñu ꞌanun a unikama kaiskëma ꞌain, ꞌimainun kana uisa banabi kakëma ꞌain. Akamax ka ꞌën usakin anun namákësokin ismikëxumabi këmëkinshi ꞌanan atúnbi usakin ꞌati sinanx kikë ꞌikën. Ësai ka ënë ñukama ñui an bana ñuikë unikamax kia.

Jeremías 23:14

ꞌËn kana Jerusalénnu ꞌikë an ꞌën bana uni ñuixunkë unikama ꞌatima ñu an ꞌë ꞌaisama ꞌimikë ñuira ꞌaia isan: usakin ka atun aín xanuma bëtsi xanu aín nami ꞌanan, bëtsi unikama këmëkin paránia, usakin ꞌakin ka uni ꞌatima sinánñukama, a uínbia ꞌain ñu ꞌatima ꞌakë ënxuma ꞌanun kixun sinánmia. Usa ꞌain ka atu ꞌimainun a ëmanu tsókë unikamax Sodoma ꞌimainun Gomorranu ꞌikë uni tsóasaribi ꞌën iskëx ꞌikën.

Jeremías 23:17

Uikaman kara ꞌën bana kikësabiokin ꞌaisama tankin timaia, atun ka mitsu kati ꞌikën: Kamabi mitsun ꞌakë ñukama ax upí ꞌia. ꞌImainun ka ꞌain sinánkësa okinshia, an ñu ꞌakë unikamanribi mitsu kaia: Uisa ñu ꞌatimabi ka mitsunu ꞌitima ꞌikën.”

Jeremías 23:25

Ësai ka Nukën ꞌIbu kiakëxa: ꞌËn kana kuan an bana ñuikë unikamax ka atúnbi namátankëx këmëi ꞌën isana namámikin atu ká kiax kia.

Jeremías 23:32

ꞌËx kana an bana ñuikë unikama an këmëkinshi namákë ñuixunkin ꞌën unikama; bëtsiokin sinánmia. ꞌËn kana xukin uisa bananbi kakëma ꞌain, usa ꞌaish ka ꞌën unikama ꞌakinsama ꞌikën. ꞌËx min ꞌIbu ꞌaish kana asérabi ësai kin.”

Miqueas 3:11

Axa Jerusalén ëmanu ꞌikë an bana mëníokë unikama an ka uin kara kupíoia a ëanan an kupíokë a ꞌatima oti sinania, ꞌimainun ka sacerdotekaman kupíokëxunshi uni ꞌunánmiti kuëënia, ꞌianan ka an Dios kikë bana ñuikë unikamanribi kuríki kupíshi abi sinántankëx ësai kia: Nukën ꞌIbu ka nubë ꞌikën usa ꞌixun ka ñu ꞌatima inútima rabanan Nukën ꞌIbun nu bërúaia.

Miqueas 3:5

Ësai ka Dios an aín unikama këmëkin bana ñuixunkë unikama ñui kiaxa, a unikamax ka upiti kananuna bukuti ꞌai kiax mitsun piti ꞌinánkëxun pi kia, ꞌaínbi ka uin kara piti ꞌinanima a unikama ꞌakánanti ka ꞌiti ꞌikë kixun kaia. Usa ꞌain ka an bana ñuikë unikama a Diosan ësakin kaia:

Romanos 16:18

Usa unin ca Nucën ꞌIbu Jesucristo cuëëncësabi oquin ꞌaquinma aín cuëëncësa oquinshi ꞌaia. Atux ca an Nucën Papa Diosan bana upí oquin ꞌunáncëma unicamabë upiti banaibi cëmëia. Usaquin paránquin ca aín bana cuanun uni sinánmia.

Filipenses 3:19

Atúan ñunshínquin aín cuëëncësabi oquinshi ñu ꞌaia isquian unin —ñu ꞌaisama ca ꞌaia —quixun ñuicëxbi rabínquinma an ꞌacësabi oquin ꞌai ca rabitia. Jesucristomi sinánquinma ca ënë menu ꞌicë ñuishi sinania. Usaía ꞌicë cupí ca ainanma ꞌaish xënibua ꞌaínbi Nucën Papa Diosbë ꞌitima ꞌicën.

1 Juan 4:1

ꞌËn nuibacë xucë́antu, ënë nëtënuxun ca ꞌitsa unin —Nucën Papa Diosan sinánmicëxun cana uni bana ñuixuni —quiquinbi an sinánmicëxunmabi anbia sináncë bana uni ñuixunia. Usa ꞌain camina —Nucën Papa Diosan ca ꞌë sinánmia —quiquian unin ñuicë bana acamaira cuatima ꞌain. Upí oquin pain camina asérabi cara Nucën Papa Diosan sinánmicëxun uni ñuixunia quixun cuati ꞌain.