Miqueas 2:10 - Kashibo-Kakataibo Biblia

¹⁰ ¡Usa ꞌain kamina bërí nirukiani ënuax kuankanti ꞌain! Ënë mex ka anumi mitsux tantikanti ama ꞌikën. ꞌËn kana anuxumi mitsun ꞌatima ñuishi ꞌai ꞌëmi manukankë kupí, asérabi ꞌatimokin ënë me masóti ꞌain.

Miqueas 2:10 ပူးပေါင်းရင်းမြစ်များ

1 Reyes 9:7

ꞌën atu ꞌinan me anua Israelkama chikínti ꞌain, chikíanan anuxun ꞌë rabiti xubu ꞌamikë a ënun ëmikëbë ka Israel kamami bëtsi menu ꞌikë unikama kuaiti ꞌikën.

Salmos 95:11

Usai ꞌia atu isi nishi kana kiakën, ꞌën kana a ꞌinánuxun atu ká me anu tsónuxa atsínun ꞌimitima ꞌain.

Jeremías 9:19

Kamabi Jerusalénnu ꞌikë unikama sharati masá nuituti inkë ax ka kamaxunbi kuakë ꞌiti ꞌikën: ¡Axa numi nishkë unikaman ka nun ëma masókin rurupaxa!, ¡usa ꞌain kananuna ꞌitsaira ꞌatimokëx tëmëran! Usa ꞌain kananuna nun xubukamaribi chánkapakë ꞌikë axa numi nishkë unikaman ka nun me ënun kixun nu bënëia, usa ꞌain kananuna nun me ënti ꞌain.

Ezequiel 36:17

“Israel unikaman ka aín menu tsókin anuxun ñu ꞌaisama ꞌati ꞌaímabi bëtsi ñukama ꞌakin atun me ꞌatimokëxa, usai ꞌia atux tsókë ax ka ꞌën iskëx ñu chuarukësa ꞌianan, xanuxun aín nëtë sënë́nkëbëtan pëi machakë usaribi ꞌiakëxa.

Ezequiel 36:19

nishkin kana atun ñu ꞌatima ꞌakë kupín ꞌatimokin bëtsi ëmakamanu kuani abístanun ꞌimiakën.

Deuteronomio 12:9

Usa ꞌaínbi kamina anu mitsux upitax bukukanti Nukën ꞌIbu Diosan mitsu ꞌinánti me anu bëbakëmapain ꞌikanin.

Deuteronomio 30:18

bëríbi kana ꞌën mitsu ësokin kain ax mimi nishkë unikaman ka asérabi mitsu ꞌati ꞌikën, ꞌakëx kamina ꞌitsa baritiaira tsótima Jordán kakë baka shitátankëxunmi bikë me anu tsókantima ꞌain.

Deuteronomio 4:26

ꞌën kana bërí mitsu naíkamë ꞌëo ꞌimainun men unin kuakësa ꞌitanua kuamainun kain, ꞌaínbi kamina mitsux ꞌën kakë bana kikësabiokin ꞌaíma anumi tsókankë me Jordán kakë baka ꞌukëmanan ꞌitsama baritia tsókanti ꞌain. Anuax ka ꞌitsama baritiashi tsótankëx raírinëx ñuti ꞌikën.