Mateo 5:22 - Kashibo-Kakataibo Biblia

²² Usaía quiá ꞌaínbi cana ꞌën mitsu cain, axa uni itsi, aín xucë́nsa ꞌicëbi ami nishcë uni ax ca ꞌuchocë ꞌaish castꞌicancë ꞌiti ꞌicën. Axa uni itsi ñu cai ꞌatimati banacë uni a ca mitsun cushibunën ꞌapucaman ꞌuchoti ꞌicën. ꞌImainun ca an ami nishquin uni itsi —ñunshin bacë camina ꞌai —quixun cacë uni ax, axa manë tsinu ꞌiti uníxa ꞌuchacësaribi ꞌicën.

Nukën 'Ibu Diosan ain unikama 'inan ain bana

²² Usaía quiá 'aínbi cana 'ën mitsu cain, axa uni itsi, aín xucë́nsa 'icëbi ami nishcë uni ax ca 'uchocë 'aish cast'icancë 'iti 'icën. Axa uni itsi ñu cai 'atimati banacë uni a ca mitsun cushibunën 'apucaman 'uchoti 'icën. 'Imainun ca an ami nishquin uni itsi —ñunshin bacë camina 'ai —quixun cacë uni ax, axa manë tsinu 'iti uníxa 'uchacësaribi 'icën.

Mateo 5:22 ပူးပေါင်းရင်းမြစ်များ

Génesis 37:4

Aín papan atu ꞌakësamaira okin kuëënia ꞌunani ka aín xukë́n apankamax Josémi xuamati nishi nutsi a istisama tani abëbi banatisama tankëxa.

Génesis 37:8

Ësokian ñuixunkëxun ka aín xukën apan achúshinën kakëxa: —¿Usa ꞌain karamina mix nukaman ꞌapuira ꞌianan an nu ñumëmikë uni ꞌiti ꞌain? Usakian ain namákë ñuixunkëx ka atiaira ami xuamati aín xukë́nkama nishakëxa.

2 Samuel 16:7

Simí kakë an ꞌatimokin ꞌichakin kakëxa: —¡Ënuax kamina ꞌura kuanti ꞌain, mix kamina an uni ꞌakë ꞌaish ꞌatima uni ꞌain!

2 Samuel 6:20

Usai kuankantámainun ka David aín xubunu aín xanu isi kuankëxa; kuankin aín xubunu nukúkin iskëxbi ka aín xanu Mical Saúlnën ꞌini bëchikë, ax kuania isbëtsini ukin kakëxa: —¡Bërí kamina mix Israelkaman ꞌapu ꞌaíshbi usai ꞌiax asábi bërúan, min kamina an ꞌë ñu ꞌaxunkë xanukaman ka isia kixun sinanimaishi uni nishkë ꞌikësaira rabinima usai ꞌian!

1 Reyes 21:4

Ësokia kakëx ka Ahab amo nishananbi masánuitu kiani aín xubunu kuankëxa, Nabotnëan ꞌën papa ꞌimainun ꞌën titan ñukin ꞌë ënxua me kana mi ꞌinanima kixuan kakë a bana sinani. Usai kuantankëx ka aín xubunu nukuti ain chikën ami bësui rakakëxa, rakaxun ka añubi piti sinánma ꞌikën masá nuitukin.

Salmos 14:1

An ꞌunántisa ꞌikëbi ñu ꞌunánkëma unikaman ka Dios isa ꞌaíma ꞌikë kixun sinania: kamaxunbi ka ñu ꞌatimashi ꞌaia; usakin ꞌakin ka ñu ꞌatimaira ꞌakania; ¡an upí ñu ꞌakë uinu ꞌikë uni achúshirabi ka ꞌaíma ꞌikën!

Salmos 37:8

Mix nishkë a ëni kamina nishkësa ꞌitima ꞌain; nishkë an ka nun sinánkëkama ꞌatima oia.

Salmos 69:4

Añu ñu ꞌën ꞌakë ꞌaímabi ka ax ꞌëmi nishkë unikamax ꞌitsaira ꞌaish ꞌën maxkánu ꞌikë bun ꞌitsasamaira ꞌikën; axa ꞌëmi nishkë unikamax ka ꞌitsaira ꞌikën, usa ꞌixun ka bëtsi ñu ꞌakëmabi ꞌë ꞌaisa tankania, ꞌimainun ka atun ñu mëkamakë ꞌikëmabi ꞌë ñu ꞌinánun kixun ubioia.

Daniel 3:13

Usokin kakëxun kuati ka Nabucodonosor xuamati nishakëxa, nishkin ka aín suntáru raíri anua ꞌikë anua bitsinkian Sadrac, Mesac ꞌimainun Abed-negó. Anu bënun kixun xuakëxa, xukëx kuanxuan bëkë ka

Daniel 3:19

Usokian rabë́ ꞌimainun achúshi uni bënákama an kakëxun kuati ka ꞌapu Nabucodonosor aín bëmánanbi panshínkuatsini ꞌitsaira nishakëxa. Usai ꞌikin ka an ñu mëëxunkë unikama anba tsi rëkarukin anu sënën xanatanua tikakë a inumikian ꞌaisamaira xana ꞌitanuan ꞌanun ꞌamiakëxa;

Mateo 10:17

Axa mitsumi nishcë unicaman ca judíos unibunën ꞌapucamanu mitsua ꞌatimonun buánti ꞌicën. Usonan ca anua judíos unicama timë́ti xubucamanuxun mitsu rishquiti ꞌicën. Usa ca uni ꞌicë quixun ꞌunani camina ami catamëtima bërúancati ꞌain.

Mateo 10:28

An uni bëtsi bëtsi oquin bamamicë unicamami camina racuë́tima ꞌain. Usoquin ꞌaquinbi ca unin bëru ñunshin bamamitima ꞌicën. Usa ꞌain camina usa unimi racuëtima Nucën Papa Dios, an uni aín cushínbi bamamianan aín bëru ñunshínribi manë tsi anuaxa xënibua ꞌaínbi tëmërati anua ꞌinun ꞌimiti amishi racuë́ti ꞌain.

Mateo 12:24

Jesusan usoquin ñu ꞌaia ñuicania cuati ca fariseo unibunëx quiacëxa: —Ñunshin ꞌatimanën ꞌapu, Beelzebú, an ꞌamicëxuinshi ca ënë unin ñunshin ꞌatima chiquinia.

Mateo 17:5

Usaquian Pedronën cacëbëtainshi ca acama cuin pëquicësanën tupë́oncëxa. Usocëxun ca Pedro, Jacobo, Juan acaman nëtë cuin mëucüaxa ësai banaia cuacëxa: —Ënëx ca ꞌëx amiira sinani cuëëncë, ꞌën bacë bëchicë ꞌicën. Aín bana ca cuacan.

Mateo 18:21

Ësaquian aín ꞌunánmicë uni raíricëñun cacëxun ca Pedronën Jesús cacëxa: —¿Min uni itsíxa ꞌëmi nishi ꞌuchaia carana uiti oquin aín ꞌucha abë mëníonanquin manumiti ꞌain? ¿Carana mëcën achúshi ꞌimainun rabë́ oi abë mëníonanti ꞌain?

Mateo 18:35

Usaribi oquin ca ꞌën Papa Dios naínu ꞌicë, an axa mimi ꞌuchacë unimi aín ꞌuchacama abë mëníonanquin manumicëma ꞌicë, mitsun ꞌuchacama manuquinma uisoquin cara ꞌati ꞌicë usoquin ꞌati ꞌicën.

Mateo 23:15

An Moisésnën cuënëo bana ꞌunáncë unicama ꞌimainun fariseo unicama, mitsux camina an unicama paráncë a ꞌain. ꞌUra cuanquin ui caramina ꞌunánmiti ꞌai quixun bariquin mëraxun camina Nucën Papa Diosmi sinánun ꞌunánmiquinma mitsun sináncësaribi oquin sinánun ꞌunánmin. Usaquinmi mitsun ꞌunánmicëx ca a unicamax mitsúxmi ꞌicësamaira oi ꞌaisama ꞌia. Mitsúxmi anuaxmi tëmërati manë tsi rëquirucë anu ꞌiti ꞌaínbi ca atux mitsúxmi ꞌicësamaira oi anuax tëmërai anu ꞌiti ꞌicën. Mitsúxmi usa ꞌicë ca Nucën Papa Diosan uisa cara mitsu oti ꞌicë usoquin ꞌati ꞌicën.

Mateo 23:33

ꞌAtima ꞌixun uni paráncë ꞌaish camina mitsux runu an uni picë asa ꞌain, mitsun raracama ꞌiásaribiti camina ꞌin. Mitsúxmi usai ꞌicë cupí ca Nucën Papa Diosan asérabi mitsux bamaia anuaxmi tëmërati manë tsinu mitsu ꞌimiti ꞌicën.

Mateo 25:41

Usaquin catancëxun cana axa ꞌën mëmiu ꞌicë unicama cati ꞌain: Mitsux ꞌën unibuma ꞌaish ca ꞌë ꞌura cuantan. Cuanx ca manë tsi anua aín ꞌapubë ñunshin ꞌatimacama ꞌinun mënío anu ꞌitan.

Mateo 26:59

Usa ꞌain ca judíos sacerdotenën cushicamabë caniacëcë unicama ꞌimainun camabi judíos unibunën ꞌapucama anu timë́xun, uix caraisa asérabia usai ꞌiánmabi, cëmëi atúan ꞌanun Jesúsmi manánti ꞌicë quixun cuaisa tancëxa.

Mateo 3:17

Usai ꞌicëbëtan ca Jesusan naínuaxa banaia cuacëxa, ësai qui: “Ënëx ca ꞌëx amiira sináncë bacë bëchicë ꞌicën. Ami sinani cana chuámarua tani cuëënin”.

Mateo 5:34

Usa ꞌaínbi cana ꞌën mitsu cain, —Nucën Papa Diosan ismainun cana mi cain —qui camina banatima ꞌain. ꞌImainun camina —naitan cuamainun cana cëmëquinma asérabi mi cain —qui banatima ꞌain, naínu ca Nucën Papa Dios ꞌicë, usa ꞌain.

Mateo 5:44

Usai quiá ꞌaínbi cana ꞌën mitsu cain, axa mimi nishcë unicama nuibaquin ꞌaquianan camina axa mimi ꞌatimati banacë unicama ꞌimainun an mi bëtsi bëtsi ocë unicama Nucën Papa Dios ñucáxunti ꞌain.

Marcos 14:55

Usa ꞌain ca judíos sacerdotenën cushicamabë camabi judíos unibunën ꞌapucama anu timë́xun, uix caraisa atúan ꞌanun Jesúsmi manánti ꞌicë quixun cuaisa tancëxa. Cuaisa tancëbëa ꞌitsa uni cëmëi Jesúsmi manáncëxbi ca ꞌatima bana anúan Jesús ꞌacánun quixun Jesús ꞌuchoti ꞌaíma ꞌiacëxa. Bëtsi bëtsi uníxa cëmëi quicëxbi ca bana mëscú ꞌiacëxa.

Marcos 15:1

Pëcaracuatsíncëbë ca judíos sacerdotenën cushicamabë caniacëcë unicama ꞌimainun an Moisésnën cuënëo bana ꞌunáncë unicama ꞌimainun judíos cushicaman ꞌapucamaribi timë́acëxa. Timë́xun nëaxun ca Jesús Pilatonu buáncëxa.

Lucas 12:5

A unicamamimi racuë́tima ꞌaínbi cana uimi caramina racuë́ti ꞌai quixun mitsu cati ꞌain. Nucën Papa Dios, an uni aín cushínbi bamamianan uni manë tsi anua ꞌinun ꞌimiti, amishi camina racuë́ti ꞌain. ꞌËn cana mitsu cain, camina asérabi ami racuë́ti ꞌain.

Lucas 22:66

Pëcaracuatsincëbë ca anpan caniacëcë unicama ꞌimainun judíos sacerdotenën cushicama ꞌimainun an Moisésnën cuënëo bana ꞌunáncë unicamax anu timë́acëxa. Timë́cëbëtan ca anu atun cushibunën ꞌapucama timë́cë anu Jesús buáncëxa. Usoquian buáncëxa bëbaia ca ꞌapucaman Jesús cacëxa:

Juan 11:47

Ñuixuncëx abë timë́xun ca sacerdotenën cushicama ꞌimainun fariseo unicaman judíos cushibunën ꞌapucama cacëxa: —Ënë unin ca uni itsían ꞌacëma ñu ꞌitsaira ꞌaia. ¿Usa ꞌain caranuna uisa oti ꞌain?

Juan 15:25

Nucën Papa Diosan bana cuënëo ax ca ꞌë ñui ësai quia: “ꞌËn ꞌatima ñu ꞌacë ꞌaímabi ca ꞌëmi nishcanxa”. A bana quicësabi oi ca ꞌia.

Juan 7:20

Cacëxun ca judíos unicaman cacëxa: —Mix camina ñunshin ꞌatimañu ꞌain. ¿Uix cara mi ꞌacatsi quin?

Juan 8:48

Usaquian cacëxun ca nishquin judíos unicaman Jesús cacëxa: —Mix camina Samaria menu ꞌicë uni ꞌianan ñunshin ꞌatimañu uni ꞌai quixun nun mi cacë, ënëx ca asérabi ꞌicën.

Hechos 17:18

Cananmainun ca raíri unicama usa isa uni ꞌiti icë quixun epicúreo cacë unicaman bana ñuia cuacë, ꞌimainun estoico cacë unicamanribia bëtsi bana ñuia cuacë, a unicamaxribi uax Pablobë banacëxa. Abë banatancëx ca raírinëx quiacëxa: —¿Añu cara banañuira ꞌixun ënë unin nu ñuixuinsa tanin? Quicëbë ca raírinëx Pablonëan Jesús ñuianan —bama ꞌaish ca uni baísquiti ꞌicë —quixun cacëxun cuax quiacëxa: —Nun rabicë diosma, bëtsi dios ñui sapi ca quia.

Hechos 22:30

Usa ꞌain ca pëcaracëbëtan comandantenën añu cupí cara Pablomi judíos unicama manania quixun ꞌunántisa tanquin, anúan nëacë manë risi tubunun quixun cacëxa. Canan ca sacerdotenën cushicama ꞌimainun judíos unibunën cushicaman ꞌapucama timënun quixun aín unicama cacëxa. Cacëxuan an cacësabi oquin timëan ca comandantenën Pablo axa timë́cë ꞌapucaman isnun chiquímiacëxa.

Hechos 23:1

Usa ꞌain ca suntárucaman bëcëxun isquin Pablonën judíos unibunën ꞌapucama cacëxa: —Mitsux judíos uni ꞌaish camina ꞌën xucë́antu ꞌain. ꞌIcë cana mitsu cain, ꞌën cana ñu ꞌatima ꞌacëma ꞌai quixun ca Nucën Papa Diosan ꞌë isia.

Hechos 24:20

Usa ꞌain ca atúxa ucëma ꞌain, axa Tértulobë ucë ënë unicaman mi cati ꞌicën, Jerusalénuxuan judíos ꞌapucaman ꞌë ñucácëbëtan cara uisa ñu ꞌacë ꞌë isaxa quixun.

Hechos 4:15

Caquinmabi Pedrocëñun Juan ëmánxun caínun quixun chiquíntancëx ca atúxbi ñucacanani ësai canancëxa:

Hechos 5:21

Ësoquian ángelnën cacësabi oquin ca pëcaracëbë cuanxun anuxun Nucën Papa Dios rabiti xubunu atsínxun anu ꞌicë unicama bana ñuixuancëxa. Bana ñuixunmainun ca sacerdotenën cushicaman ꞌapu ꞌimainun abë ꞌicë unicaman, judíos cushibunën ꞌapucama timë́mianan sipuacë unicama bënun quixun policía xuacëxa.

Hechos 5:27

Usobëtsinquian bëcancë ca sacerdotenën cushicaman ꞌapun cacëxa:

Hechos 6:12

Cacëx cuanxun ca camabi uni ñuixuanan caniacëcë unicamaribi ꞌimainun an Moisésnën cuënëo bana ꞌunáncë unicamaribi ñuixunquin tsuácaruacëxa. Tsuácarucëx uxun ca Esteban bibianquin atun cushicaman ꞌapucamanu buáncëxa.

Hechos 6:15

Usaía a unicamax a ñui quicëbëtan atun cushicaman ꞌapucama ꞌimainun anu timë́cëcamanribi iscëxbi ca Estebanën bëmánan ángelnën bëmánansa ꞌiacëxa.

Hechos 7:37

Usaquin caxun ca ësaquinribi Estebanën catëcëancëxa: —Moisés ax ca an Israel unicama ësaquin cá a ꞌicën: “An ꞌë ꞌimicësaribi oquin ca mitsun rëbúnqui achúshi, an ax quicë bana unicama ñuixunti uni Nucën Papa Diosan ꞌimiti ꞌicën. ꞌImicëxuan an atu cacësabi oi ca ꞌicanti ꞌicën”.

Romanos 12:10

Camina bëtsibë bëtsibë ꞌaquianani nuibananti ꞌain, mitsun xucë́nbë ꞌicësaribiti. Asamaira ꞌiisa tanquin ꞌatimoquinma camina bëtsi uni isquin upí oquin ꞌaquinti ꞌain.

1 Corintios 6:10

ꞌimainun an ñu mëcamacë uni ꞌimainun an bëtsi unin ñu cuëëncë uni, ꞌimainun axa ñuianancë uni ꞌimainun paë́ncë uni ꞌimainun an uni paránxun aín ñu bicë uni, acamax ca Nucën Papa Diosan nëtënu ꞌitima ꞌicën.

1 Corintios 6:6

¿Axa Jesucristomi catamëcë uníxa bëtsi ñui ami manani, axa Jesucristomi sináncëma ꞌapunu cuanti cara asábi ꞌic?

1 Tesalonicenses 4:6

ꞌianan aín xanubë ꞌi bëtsi unimi ꞌuchatima. Usaía ax ꞌicë uni a ca aín ꞌucha cupí, Nucën ꞌIbu Jesucristonën uisa cara oti ꞌicë usoquin ꞌati ꞌicën, nun mitsu ñuixuncësabi oquin.

Tito 3:2

Uinu ꞌicë unimibi ca ꞌatimati banatima ꞌicën. Bëtsi unibë cuëbicanancëma ꞌianan ca upí sinánñu uni ꞌaish rabiti cuamianantima ꞌicën.

Hebreos 12:25

Cananuna ꞌunanin, Moisésnëan Nucën Papa Diosan bana ñuixuncëxunbia an a bana timaquin cuaisama tancë, nucën raracamax ca castícancë ꞌiacëxa. Moisésnën ñuiá banasamaira ca Jesucristo ñui quicë bana, Nucën Papa Diosan naínu ꞌixun nu ꞌinan, ax ꞌicën. Usa ꞌain ca nucën raracamaxa ꞌiásamaira oi an Jesucristo ñui quicë bana timaquin cuaisama tancë unicama ië́tima ꞌicën. Usa ꞌain camina asérabi Jesucristo, Nucën Papa Diosan a aín nëtënua xua, a ñui quicë bana timaquinma upí oquin cuati ꞌain.

Hebreos 5:9

Ax tëmëraibi aín Papa Dios cuëëncësabi oi ꞌiá ꞌixun ca an aín bana cuaquin ax quicësabi oquin ꞌacë unicama a aín ꞌucha tërë́nquin Nucën Papa Diosnan ꞌaish xënibua ꞌaínbi abë ꞌinun ië́mia.

Santiago 2:20

¿Mix sinánñumasa ꞌixun caramina ꞌunaniman, Jesucristomi cana catamëti quiquinbi uni itsi nuibaquin ꞌaquincëma ꞌaish ca a uni Jesucristomi catamëcëmasa ꞌicën?

Santiago 3:6

Tsi chamaratsu usaribi ca nun ana, a cupínu nun cuëbitan banacë, ax ꞌicën. Chamaratsu ꞌaínbi cananuna anun ꞌatimati banati ꞌain. Usai banacë cupí nun sinánribi ꞌatima ꞌixun cananuna ñu ꞌatimaribi ꞌain. Usa ꞌixun ca anúnu ꞌatimati banacë ꞌixun nun bamati nëtë utámainun usabi nu ꞌimiti ꞌicën. Ñunshin ꞌatimanën ꞌapu anbi ca uni ꞌatimati banati sinánmia.

1 Pedro 2:23

Unían ami nishquin ñu cacëxunbi ca usaribi oquin cáma ꞌicën. Usa ꞌixun ca unían ꞌatimoquin tëmëramicëxunbi uni —cana mi cupiti ꞌai —quixun cáma ꞌicën. Cupiti sinánquinma ca —ꞌën Papa Diosan cuni ca upí oquin isquin mëníoti ꞌicë —quixun sináncëxa.

1 Pedro 3:9

An mitsu ꞌatimocë unicama camina cupiquin aribi ꞌatimotima ꞌain. Axa mitsumi ꞌatimati banacë unimi camina mitsúxribi ꞌatimati banatima ꞌain. Usai ꞌimi bëtsibë nuibanani upitax bucunun ca Nucën Papa Diosan ainan ꞌinun mitsu caísacëxa.

1 Juan 2:9

Uix cara —ꞌëx cana ainan ꞌaish Nucën Papa Diosbë upí ꞌai —quibi nuibatíma uni itsimi nishia, ax ca Nucën Papa Diosnanma pain ꞌicën.

1 Juan 3:10

Ënëx ca ësa ꞌicën. Ui unin cara ñu upí ꞌaima ax ca Nucën Papa Diosnanma ꞌicën, ui unin cara uni itsiribi nuibatima axribi ca Nucën Papa Diosnanma ꞌicën. Usa ꞌain cananuna uinu ꞌicë unix cara Nucën Papa Diosan bëchicë ꞌicë quixun ꞌunánan uinu ꞌicë unix cara ñunshin ꞌatimanën ꞌapunan ꞌicë quixun ꞌunánti ꞌain.

1 Juan 5:16

Abëa Jesucristomi catamëcë uni itsían ñu ꞌatima ꞌaia ꞌunánquin ca unin —tërë́ntisama ꞌinun ca ꞌuchacëma ꞌicë —quixun sinánquin aín ꞌucha tërë́nquin sinanaminun Nucën Papa Dios ñucáxunti ꞌicën. Ñucáxuncëxun ca Nucën Papa Diosan aín ꞌucha tërë́nquin a uni upí ꞌitëcënun ꞌimiti ꞌicën. Usa ꞌaínbi cana axa tërë́ntisama ꞌinun ꞌuchacë uni a Nucën Papa Dios ñucáxunun quixun mitsu caiman.

Judas 1:9

Usaría a unicamax quicë ꞌaínbi ca usoquin caquinma ángelcaman cushi, Miguel, an abë banaquin ñunshin ꞌatimanën ꞌapu ꞌatima bana ꞌinánquinma, Moisés bamacë rabanan abë cuëbicanancëxunbi, Miguelnën ñunshin ꞌatimanën ꞌapu ësaquinshi cacëxa: “Nucën ꞌIbu Diosan ca mi ꞌuchoquin ñu cati ꞌicë” quixun.

Apocalipsis 20:14

Usaquin ꞌá ꞌain ca bamati ꞌimainun anua uni bamacë ꞌicë ax ꞌianëmëꞌëosa manë tsi rëquirucë anu nicë ꞌiaxa. ꞌImainun ca ui unicamax cara Nucën Papa Diosan nëtënu ꞌinun aín anë cuënëoma ꞌicë, acamaxribi anuax bamatëcëncësa ꞌaish chiquítimoi ꞌinux, ꞌianëmëꞌëosa manë tsinu nicë ꞌiaxa.