Mateo 4:23 - Kashibo-Kakataibo Biblia

²³ Usa ꞌain ca Jesusan Capernaúm anuax cuanxun Galilea mecamanuxun anua judíos unicama timë́ti xubucamanuxun bana ñuixuancëxa. —Nucën Papa Diosan ca ami catamëcë unicama abë ꞌinun ainan ꞌimiti ꞌicë —quixun caquin upí bana unicama ñuixuanan ca uni ñucëcama pëxcüacëxa.

Nukën 'Ibu Diosan ain unikama 'inan ain bana

²³ Usa 'ain ca Jesusan Capernaúm anuax cuanxun Galilea mecamanuxun anua judíos unicama timë́ti xubucamanuxun bana ñuixuancëxa. —Nucën Papa Diosan ca ami catamëcë unicama abë 'inun ainan 'imiti 'icë —quixun caquin upí bana unicama ñuixuanan ca uni ñucëcama pëxcüacëxa.

Mateo 4:23 ပူးပေါင်းရင်းမြစ်များ

Salmos 103:3

An ka ꞌën ꞌatima ñu ꞌakëkama tërënxunkin ꞌë mëníoxuanan, kamabi ꞌën ꞌinsínkëkama ꞌë pëxkuxunia,

Mateo 11:5

Cuanxun camina cati ꞌain: Bëxuñu unínbi ca bërí isia, aín niti bëtsicë uníxribi ca bërí upiti nitsia, an aín nami chëquímicë ꞌinsínñu unix ca pëxcutia, pabë unin ca bana cuatia, bamacë uníxbi ca baísquia, ñuñuma unínribi ca anun Nucën Papa Diosnan ꞌinux ië́ti bana cuatia.

Mateo 12:9

Anuax cuanx ca Jesús anua judíos unicama timë́ti xubunu cuani atsíancëxa.

Mateo 13:19

Anúan uni Nucën Papa Diosnan ꞌiti ënë bana aín pabitan cuaquinbia uisai qui quicë cara quixun upí oquin ꞌunáncëbëma uxun ca ñunshin ꞌatimanën ꞌapun bënë́nquinshi uni manumia. Usa banax ca anúan uni niti me iru anua nipacëcë ñu bëru asaribi ꞌicën.

Mateo 13:54

Bëbatancëxun ca anua judíos unicama timë́ti xubunu atsínxun bana ñuixunquin ꞌunánmiacëxa. Usoquian bana ñuia cuati ca anu ꞌicë unicamax ratuti canancëxa: —¿Uin cara ënë uni usaquian bana ñuiti ꞌunánmiax? ¿Uin cushin cara ënë menuxuan unin ꞌacëma ñu ꞌain?

Mateo 14:14

Usaía ꞌitsa unia riquiancëbë manë nuntinuax ꞌibúquianquin ca unicama timë́cë isquin Jesusan atu nuibacëxa. Nuibaquin ca ꞌinsíncë unicama pëxcüacëxa.

Mateo 24:14

Uicamax cara ꞌëmi catamëtia acamax ca Nucën Papa Diosan nëtënu ꞌëbë ꞌiti ꞌicë quixun ꞌën mitsu cacë bana ënë ca ꞌën unicaman camabi menu ꞌicë unicaman cuanun ñuixunti ꞌicën. Usaquian camabi menu ꞌicë unicama ñuixuncëbë ca ꞌëx utëcëncëbë ënë mecama cëñúnuxun ꞌaia.

Mateo 3:2

Bana ñuixunquin ca cacëxa: —Anun Nucën Papa Diosan abë upí ꞌinun mitsu ainan ꞌimiti nëtë ca ꞌurama ꞌicën. Usa ꞌain ca Nucën Papa Diosmi sináncë ꞌaíshmabi sinanati ami sinan.

Mateo 9:35

Usotancëxun ca ëma chacamanu ꞌimainun ëma chucúmaracamanuribi cuanquin anua judíos unicama timë́ti xubucamanu atsínquin anu timëtia Jesusan bana ñuixuancëxa. Bana ñuixunquin ca —ꞌëmi catamëcë unicama ca Nucën Papa Diosan ainan ꞌimiti ꞌicë —quixun caquin upí bana unicama ñuixuancëxa. Ñuixuanan ca uni ñucëcamaribi pëxcuquin an paëocëcama tërë́caxuancëxa.

Marcos 1:14

Juan, an uni nashimicë, a sipuacë ꞌain ca Jesusan Galilea menu cuantëcënquin —aín ꞌucha tërë́ncë ꞌaish ca uni Nucën Papa Diosnan ꞌiti ꞌicë —quixun upí bana ñuibiancëxa.

Marcos 1:21

Cuanx ca abëa nicë unicamabë Jesús Capernaúm ëmanu bëbacëxa. Bëbaxun ca anun ñu mëëtima nëtë ꞌain anua judíos unicama timë́ti xubunu atsínxun, anu ꞌicë unicama bana ꞌunánmiacëxa.

Marcos 1:39

Usaquin cabiani cuanxun ca Galileanu ꞌicë ëmacamanu ꞌicë anua judíos unicama timë́ti xubucamanuxun bana ñuixuancëxa, ñuixuanan ca ñunshin ꞌatimacama uninua chiquíancëxa.

Marcos 3:10

An ꞌitsa uni pëxcucë cupía —ꞌën ticacëxuinshi ca ꞌëribi pëxcuti ꞌicë —quixun sinani, ꞌinsíncë unicamax anuxun a ticanux tsitsírucëbëtan ca usaquin Jesusan aín ꞌunánmicë unicama cacëxa. Cacëxun ca ꞌaxúancëxa.

Marcos 6:2

Cuanx bëbaxun ca anun ñu mëëtima nëtë ꞌain, anua judíos unicama timë́ti xubunu atsínxun bana ñuixunquin ꞌunánmiacëxa. Usoquian bana ñuia cuati ca unicama aín patsanëx ratuti canancëxa: —¿Uin cara ënë uni usaquian bana ñuiti ꞌunánmiax? ¿Uisai quicë cara a ñuicë bana ënëx ꞌic? ¿Uisoquin cara uni itsin ꞌacëma ñu ꞌain?

Marcos 6:6

An ca asérabi Nucën Papa Diosan cushínbi ñu ꞌaia quixuan sinaniama isi ca Jesús —¿uisa ꞌaish cara ënë unicama ësa ꞌicë? —quixun sinani ratúacëxa. Usai ꞌitancëx ca aín nëtënuax ëma chucúmaracamanu cuanquin Jesusan unicama bana ñuixuancëxa.

Lucas 10:9

Camina anua ꞌicë ꞌinsíncë unicama pëxcuquin, ꞌëmi catamëtia Nucën Papa Diosan anun a ainan ꞌimiti nëtë ca ꞌurama ꞌicë quixun cati ꞌain.

Lucas 13:10

Anun ñu mëëtima nëtën ca anu judíos unibu timë́ti xubunuxun Jesusan bana ñuixuancëxa.

Lucas 16:16

Ësaquinribi ca Jesusan cacëxa: —Juan ucëma pan ꞌain ca Moisés ꞌimainun an Nucën Papa Dios quicë bana uni ñuixuncë unicaman ꞌë ñuiquin unicama ñuixuancëxa. A unicama caxu uquin ca Juanën ꞌë ñuiquin, axa utia judíos unicaman caíncë, ax ca uaxa quiquin unicama ñuixuanxa. Usa ꞌain ca ꞌënribi, ꞌëmi catamëcë unicama ca Nucën Papa Diosnan ꞌiti ꞌicë quixun ñuixunia cuanan ꞌën ñu ꞌaia isi ꞌaisamaira unix Nucën Papa Diosnan ꞌiti sinania.

Lucas 20:1

Achúshi nëtën anuxun Nucën Papa Dios rabiti xubunuxun unicama bana ꞌunánmianan upí bana anúan uni Nucën Papa Diosnan ꞌiti ñuixunmainun ca judíos sacerdotenën cushicama ꞌimainun an Moisésnën cuënëo bana ꞌunáncë unicama ꞌimainun anpan caniacëcë unicama anu cuanxun

Lucas 4:14

Usaquian ꞌacëx ca Jesús, bëtsi ñu sinanima Nucën Papa Diosan Bëru Ñunshin Upitan cushioquin sinánmicëxëshi, Galilea menu cuantëcëancëxa. Cuanxa bëbaia ca Galilea ꞌimainun a ꞌurama ꞌicë mecamanu ꞌicë unicamanribi a ñuiquin chaniocëxa.

Lucas 5:17

Nëtë itsían xubunuxun Jesusan bana ñuixuncëbë ca fariseo unicama ꞌimainun an Moisésnën cuënëo bana uni ꞌunánmicë unicamaribi anu tsócë ꞌiacëxa. Acamax ca Galilea menu ꞌicë ëmacama ꞌimainun Judea menu ꞌicë ëmacama ꞌimainun Jerusalénuaxribi ricuatsincë ꞌiacëxa. Usa ꞌain ca bana ñuixuanan ꞌinsíncë unicama pëxcunun Nucën Papa Diosan cushiocë Jesús ꞌiacëxa.

Lucas 6:17

ꞌUnánminuxun a unicama caístancëx ca matánuax taramëcëbutancëx me sapánu ꞌiacëxa. Anu ca ꞌaisamaira uni Jerusalén, ꞌimainun Judea mecamanuaxribia ucë ꞌiacëxa. ꞌImainun ca Tiro, Sidón a ëma rabë́ ꞌurama ꞌicë me parúnpapa rapasu, anu ꞌicë menuaxribia ucë ꞌiacëxa.

Lucas 6:6

Anun ñu mëëtima nëtë itsin, anua judíos unicama timë́ti xubunu atsínxun ca Jesusan anu ꞌicë unicama bana ñuixuancëxa. Ñuixunmainun ca aín mëcën mëqueu bamacë uni achúshi anu ꞌiacëxa.

Lucas 7:21

Juanën xucë unicamaxa anu ꞌain ca Jesusan ꞌitsa uni ñucë pëxcüanan ñunshin ꞌatimanën ubíocë unicamaribi pëxcüanan bëxuñu unicamaribi bëpëxcüacëxa.

Lucas 7:22

Usaquin ꞌaxun ca Juanën a ñucánun quixun xucë unicama Jesusan cacëxa: —Camina ꞌën unicama ñuixuniami cuacë banacama ñuixuanan ꞌën ñu ꞌaiami iscëcama ñuixunquin Juan cai cuanti ꞌain. Cuanxun camina cati ꞌain: Bëxuñu unínbi ca bërí isia, aín niti bëtsicë uníxribi ca bërí upiti nitsia, an aín nami chëquimicë ꞌinsínñu unix ca pëxcutia, pabë unin ca bana cuatia, bamacë uníxbi ca baísquia, ñuñuma unínribi ca anun Nucën Papa Diosnan ꞌinux ië́ti bana cuatia.

Lucas 8:1

Usotancëxun ca Jesusan ëma chacamanu ꞌimainun ëma chucúmaracamanuribi cuanquin, anu ꞌicë unicama bana ñuixunquin ꞌunánmiacëxa. ꞌUnánmiquin ca —anúan Nucën Papa Diosan ꞌëmi catamëtia uni ainan ꞌimiti nëtë ca uaxa —quixun caquin upí bana unicama ñuixuancëxa. Usocëbë ca aín ꞌunánmicë unicama mëcën rabë́ ꞌimainun rabë́, acamax abë niacëxa.

Lucas 9:11

Usa ꞌain ca —anu ca Jesús ꞌicë —quixuan chanioia cuabiani, a nuibiani cuanx ꞌaisamaira uni anua Jesús ꞌicë anu cuancëxa. Usaía ꞌitsa uni riquiania ca Jesusan acama nuibaquin, Nucën Papa Diosan ca axa ꞌëmi catamëcë unicama ainan ꞌimiti ꞌicë quixun ñuixuancëxa. Ñuixuanan ca ꞌinsíncë unicama pëxcüacëxa.

Lucas 9:60

Quia ca Jesusan cacëxa: —Axa Nucën Papa Diosmi sinántisama tancë uni, an bamacë uni maínun ëanan camina min, ꞌëmi catamëtia ca Nucën Papa Diosan uni ainan ꞌimia quixun unicama ñuixuni cuanti ꞌain.

Juan 18:20

Ñucácëxun ca Jesusan cacëxa: —ꞌËn cana camabi unían cuamainun, anua judíos unicama timë́cë xubucamanuxun ñuixuanan anuxun Nucën Papa Dios rabiti xubu anua judíos unicama timë́cë, anuxunribi unë́quinma unicama bana ñuixuan.

Juan 6:59

Capernaúm ëmanuxun ca Jesusan anua judíos unicama timë́ti xubunuxun usai quiquin a banacama ñuixuancëxa.

Juan 7:1

Usaquin bana ñuixuntancëx ca judíos unicamaxa a ꞌacatsi quiax ꞌësë́nania ꞌunanx, Judea nëtënu ꞌicë ëmacamanu cuainsama tani Galilea nëtënu ꞌicë ëmacamanushi nitsi anubi Jesús ꞌiacëxa.

Hechos 10:38

Camina ꞌunanin, Nucën Papa Diosan ca Jesús Nazaretnu ꞌicë a aín Bëru Ñunshin Upí abë ꞌinun ꞌinánquin aín cushiribi ꞌináncëxa. ꞌInáncëxun ca ñu upíshi ꞌanan ñunshin ꞌatimañu unicamaribi pëxcüacëxa, Nucën Papa Dios abë ꞌain.

Hechos 18:4

Usoquin ꞌanan ca anun ñu mëëtima nëtëcaman anua judíos unicama timë́ti xubunu cuanxun —Jesús ax ca asérabi Cristo, axa utia judíos unicaman caíncë, a ꞌicë —quixun bana ñuixuancëxa. Ñuixuncëxun ca judíos unicama raíri ꞌimainun judíosma unicama raírinënribi —Jesús ax ca asérabia Nucën Papa Diosan xuá a ꞌicë —quixun ꞌunánquin sináncëxa.

Hechos 20:25

Usaquin sinánquinbi cana ꞌunanin, uicama carana Nucën Papa Diosan uni ꞌinun bana ñuixuan acaman ca ꞌë istëcënuxunma ꞌaia quixun.

Hechos 28:31

Biquin ca uisari cara uni Nucën Papa Diosnan ꞌiti ꞌicë quixun ñuixuanan uisai cara Nucën ꞌIbu Jesucristomi catamëti ꞌiti ꞌicë quixun ñuixuancëxa, uinu ꞌicë unínbia ubíocëma ꞌixun.

Romanos 10:15

¿Uisaxun cara unin uni itsin xucëma ꞌixun uni raíri bana ñuixunti ꞌic? Ca ꞌatima ꞌicën. An aín bana ñuixuncë unicama ñui ca Nucën Papa Diosan bana cuënëo ësai quia: “ꞌËn unibunëxa upí bana, —Nucën Papa Diosan ca aín ꞌucha tërë́nquin abëa upí ꞌinun uni ꞌimia —quicë, a ñui aia unin iscëx ca upíira upí ꞌicën”.