Marcos 8:34 - Kashibo-Kakataibo Biblia

³⁴ Catancëxun ca anu ꞌicë unicamacëñun aín ꞌunánmicë unicamaribi cuënxun Jesusan cacëxa: —Uix cara ꞌën uni ꞌiisa tania an ca a ꞌai bamanuxunbi ꞌëmi catamëti quicë bana ënquinma ꞌati ꞌicën.

Nukën 'Ibu Diosan ain unikama 'inan ain bana

³⁴ Catancëxun ca anu 'icë unicamacëñun aín 'unánmicë unicamaribi cuënxun Jesusan cacëxa: —Uix cara 'ën uni 'iisa tania an ca a 'ai bamanuxunbi 'ëmi catamëti quicë bana ënquinma 'ati 'icën.

Marcos 8:34 ပူးပေါင်းရင်းမြစ်များ

Números 14:24

ꞌAínbi ka ꞌën uni Caleb ax raírinëxa usai ꞌikëbëbi usai ꞌikinma aín sinan upí ꞌixun ꞌën bana kuaxa. Usa ꞌain kana kuanxuan isbëtsinkë me anu atsínun ashi ꞌimianan, ain rëbúnkikamaribi a menubi tsónun ꞌimiti ꞌain.

Mateo 10:38

—A ꞌai bamanuxunbi cana Jesúsmi catamëti bana ënquinma ꞌai —quixuan an sináncëma uni ax ca ꞌën uni ꞌitima ꞌicën.

Mateo 16:24

Catancëxun ca aín ꞌunánmicë unicama ësaquin Jesusan cacëxa: —Uix cara ꞌën uni ꞌiisa tania an ca a ꞌai bamanuxunbi ꞌëmi catamëti quicë bana ënquinma ꞌati ꞌicën.

Mateo 27:32

Jesús buani cuanquinbi ca suntárunën Cirene cacë ëmanu ꞌicë uni, Simón cacë, a mëraquin cacëxa: —Min camina anu Jesús matásti i curúsocë ënë ꞌiábianti ꞌain. Cacëxun ca a unin buánxuancëxa.

Marcos 10:21

Cacëxun ca Jesúsan a isquin nuibaquin cacëxa: —Usari camina ꞌin. ꞌIxunbi camina achúshi ñuishi ꞌacëma ꞌain. Ca cuantan. Cuanxun camina min ñucama maruquin curíqui bixun ñuñuma unicama ꞌinánti ꞌain. Usotancëx camina ñuñushi ꞌiti sinanima ꞌëmi sinani ꞌënan cupí bamanuxbi ꞌëbë cuani uti ꞌain. Usaquin ꞌatancëx camina Nucën Papa Diosan nëtënu ꞌianan usaquin ꞌacë cupí anuax cuëëinra cuëënti ꞌain.

Marcos 7:14

Catancëxun ca ësaquinribi Jesusan cuënxun unicama cacëxa: —Camaxunbi ca ꞌën bana ñuimainun upí oquin cuat.

Lucas 13:24

—Bai chucúma anun atsínti ca sinan. Cana asérabi mitsu cain, ꞌitsa unix ca anun atsínti sinanibi anun atsíntima ꞌicën.

Lucas 14:33

Usaquin ñuiquin cana ësaquin mitsu ꞌunánmin, an ax cuëëncësari ꞌiti ëinsama tanan aín ñucama cuëënquin ëinsama tancë uni ax ca ꞌën uni ꞌitima ꞌicën.

Lucas 18:22

Cacëxun cuaquin ca Jesusan cacëxa: —Usari camina ꞌin. ꞌIxunbi camina achúshi ñuishi ꞌacëma ꞌain. Cuanxun camina min ñucama maruquin curíqui bixun ñuñuma unicama ꞌinánti ꞌain. Usotancëx camina ñuñushi ꞌiti sinanima ꞌëmi sinani ꞌëbë cuani uti ꞌain. Usaquin ꞌatancëx camina Nucën Papa Diosan nëtënu ꞌianan usaquin ꞌacë cupí anuax cuëëinra cuëënti ꞌain.

Lucas 20:45

Usoquin canan ca anu ꞌicë unicaman cuanun, Jesusan ësaquin aín ꞌunánmicë unicama cacëxa:

Lucas 9:23

Usa ꞌain ca anu ꞌicë unicama Jesusan ësaquin cacëxa: —Uix cara ꞌën uni ꞌiisa tania an ca a ꞌai bamanuxunbi ꞌëmi catamëti quicë bana ënquinma ꞌati ꞌicën.

Juan 10:27

Carneronëan an bërúancë unin bana cuacësaribi oquin ca axa ꞌëmi catamëcë unin ꞌën bana cuatia. Cuatia cana acama ꞌën ꞌunanin. Usa ꞌixun ca ꞌën bana cuaquin a bana quicësabi oquin ꞌaia.

Juan 19:17

Buáncëxun ca Jesusan abi anua matáscanti i curúsocë ꞌiábianquin Calvario cacë matá, hebreo banan Gólgota cacë, anu buáncëxa.

Hechos 14:22

A ëmacamanu ꞌiquiani cuanquin ca axa Jesucristomi catamëcë unicama cushioquin Jesucristomi catamëti ënxunma ꞌanun ꞌësëanan nux Nucën Papa Diosnan ꞌaish cananuna uni itsían bëtsi bëtsi ocë ꞌiti ꞌai quixun cacëxa.

Romanos 6:6

Cananuna ꞌunanin, Cristonanma pain ꞌixun cananuna ënquinma nux cuëëncësa oquinshi ñu ꞌatima ꞌacën. Usa ñu sinántëcënuxunma cananuna Cristobë bamacësa ꞌixun ꞌuchati sinántëcëntima ꞌain. Uni bamacë an ca ñu ꞌaisama ꞌati sinántëcënima. Usaribi oquin cananuna nux Cristobë bamacësa ꞌixun ñu ꞌatima ꞌatëcënti sinántima ꞌain.

Romanos 8:17

Aín bëchicë ꞌicë ca Nucën Papa Diosan ax quicësabi oquin nu ꞌaquianan aín nëtënu abë ꞌinun nu ꞌimiti ꞌicën. Ainan ꞌicë ca Nucën Papa Diosan Cristosaribi nu ꞌimiti ꞌicën. Cristonan ꞌixúnu tëmëraquinbi ax cuëëncësabi oquin ꞌati ëncëma ꞌicë ca Nucën Papa Diosan nuribi aín quicësabi oquin aín nëtënu Cristobë ꞌinun nu ꞌimiti ꞌicën.

1 Corintios 15:31

ꞌËn xucë́antu, Nucën ꞌIbu Jesucristonën ꞌamicëxun ꞌën micama a ñuiquin bana ñuixuncëx camina ami sinan. Mitsúxmi ami sináncë cupí cana cuëëinra cuëënin. Usa cupí cana cuëëni quixun ꞌunáncësaribi oquin cana ꞌunanin, ꞌëx Jesucristonan cupí cana uinu carana ꞌai, uinu carana cuani anuax sapi cana bamati ꞌai quixun.

1 Corintios 8:13

Usaquin ꞌën a nami piquin axa Jesúsmi sináncë uni itsi ꞌuchamiti rabanan cana xënibua ꞌaínbi unin ꞌacë ñu rabiquin pitia ꞌacë ñu a pitima ꞌain.

1 Corintios 9:19

ꞌËa unin ñu mëëmicëma, ꞌaíshbi Nucën Papa Dios cuëëncësabi oíshi ꞌiquin cana an camabi uni ñu mëëxuncë unisa ꞌixun, Cristomi catamënun unicama aín bana ñuixunin.

Gálatas 2:20

ꞌUchatëcënuxunma ashiquin ꞌën ꞌuchacama ëni cana Cristobë bamacësa ꞌain. Usa ꞌaish cana ꞌëshima, Cristo ax ꞌëbë ꞌain, aín cushínbi ax cuëëncësa oíshi ꞌin. Nucën Papa Diosan Bëchicë, axa ꞌë nuibati bamatsianxmabi ꞌën ꞌucha cupí bama, ami catamëti cana ax ꞌëbë ꞌain, ax cuëëncësabi oi ꞌin.

Gálatas 5:24

Cristo nun ꞌucha cupí i curúsocënu bama ꞌain cananuna nun nu ñunshínquin ꞌasaribi oquin ꞌatëcënuxunma ñu ꞌatimacama ëan.

Gálatas 6:14

Usa ꞌaínbi cana ꞌëxbi rabiacaquinma, i curúsocënua ax bama ꞌaían a cupí uni ië́ti, Nucën ꞌIbu Jesucristo, ashi rabin. Cristo i curúsocënu bama cupí cana a ꞌën ꞌatia Nucën Papa Dios cuëëncëma ñucama ëni, usa ñu ꞌatëcënti cuëëniman. ꞌImainun ca unin a ꞌatia Nucën Papa Dios cuëëncëma ñu ꞌë ꞌamitima ꞌicën.

Filipenses 3:10

Usa ꞌixun cana Jesucristonën sináncësaribi oquin sinánan, anun Jesucristo baísquimia aín cushi anúan Nucën Papa Diosan ꞌë cushiocë ꞌiti cuëënin. Nucën Papa Dios cuëëncësabi oi tëmëratancëx ca Jesucristo bamacëxa. Axa tëmërasa usaribiti ꞌëxribi ainan cupí tëmërati ca asábi ꞌicën. Cristo bamasaribi oquin ꞌën ꞌuchacama ꞌatëcëntimoquin ëncë ꞌiti cana cuëënin.

Filipenses 3:7

—Usa ñucama ꞌacë cupí cana Nucën Papa Diosan iscëx upí ꞌai —quixun sinan ꞌixunbi cana bërí Cristo ꞌunánquin usai ꞌëx ꞌiá ax ca ñancáishi ꞌicë quixun ꞌunanin.

Colosenses 1:24

Mitsux ainan ꞌinun ꞌëx tëmëracë cupí cana cuëënin. Usai ꞌi cana Cristonëan camabi uni ainan ꞌinun tëmëra ꞌain, ꞌëxribi camabi menu ꞌicë unicama a ꞌunánti cupí tëmëraíbi cuëëinra cuëënin.

Colosenses 3:5

Usa ꞌain camina bërámami ꞌacansa oquin Nucën Papa Diosnanma unicaman ꞌacësa oquin ënë menu ꞌicë ñuishi ꞌati sinántëcëntima ꞌain. Unix ca aín xanuma ꞌaínbi bëtsi xanubë ꞌitima ꞌicën. Usaribiti ca xanu aín bënëma ꞌaínbi bëtsi unibë ꞌitima ꞌicën. ꞌImainun ca uni xanúxmabi bëtsi unibë ꞌitima ꞌicën. ꞌImainun camina ñunshinacëquin ꞌatima ñu ꞌati cuëëntima ꞌain. Camina ñuñu ꞌitishi sinántima ꞌain. Ñuñu ꞌitishi cuëëncë unix ca Nucën Papa Dios rabima, a cuëëncë ñuishi rabicësa ꞌicën.

2 Tesalonicenses 3:11

Ësaquian mitsu ñuicania cananuna cuan, micama raírinëx ismina ñu mëëimabi bana ñuibëquinishi nitsi quixun.

Tito 2:12

Nucën Papa Diosan ca nu ꞌunánmia, nux aín uni ꞌaish cananuna abë upí ꞌaish ax cuëëncëma ñu ꞌati ëni, upíshi ꞌianan axa ami sináncëma unicamaxa ꞌicësai ꞌiti sinanima, ꞌianan ami cushicë ꞌixun, añu ñucama nun ꞌati cara cuëënia ashi ꞌati ꞌai quixun.

Hebreos 13:13

Usa ꞌain cananuna Jesús, axa ëma ꞌuracëox ꞌuchañuira uni ꞌicësari bama, a nuxnu ainan ꞌicëa uni itsin tëmëramianan ꞌusáncëxunbi, ainan ꞌiti ëntima ꞌain.

1 Pedro 4:1

Uni ꞌixun ca Cristonën tëmëraquin paë tancëxa. Usa ꞌain camina ꞌunánti ꞌain, mitsúnribi camina —sapi cana tëmëraquin paë tanti ꞌai —quixun sinánti ꞌain. Uin cara Jesucristonan cupí tëmëraquin paë tanxa an ca ñu ꞌatima ꞌai ꞌuchati ëanxa.

1 Pedro 4:13

Bënë́quinma camina sinánti ꞌain, ami nishquian unin bëtsi bëtsi ocë́xa Cristo tëmërasaribi oquin cananuna nunribi tëmërai quixun. Usaquin sinani camina tëmëraibi cuëënti ꞌain, usaribiti ꞌApuira ꞌaísha Cristo aia isi cuëënux.

1 Juan 3:16

Jesucristo nu nuibati bama cupí cananuna ꞌunanin, usari ca uni nuibati ꞌiti ꞌicë quixun. Usaquin ꞌunánquin cananuna ꞌunanin, Jesucristonën ꞌásaribi oquin cananuna nunribi a ꞌaquincë cupí bamanuxunbi ꞌaquinquin bëtsi uni nuibati ꞌai quixun.

Apocalipsis 2:10

Unían bëtsi bëtsi oquin ꞌatimocëxbi camina racuë́tima ꞌain. Ñunshin ꞌatimanën ꞌamicëxun ca raíri unin mitsu sipuati ꞌicën, caramina ꞌëmi sinánti ënti ꞌai quixun isnuxun. Mëcën rabë́ nëtën camina paë tani tëmërati ꞌain. Uisai cara ñu ꞌicëbëtanbi camina anúnmi mitsux bamati nëtë utámainun ꞌëmi sinánti ëntima ꞌain. Usaími ꞌia cana mitsu ꞌën nëtënuaxmi nëtë́timoi ꞌëbë cuëënun ꞌimiti ꞌain.