Marcos 13:27 - Kashibo-Kakataibo Biblia

²⁷ ꞌËx uquin cana ꞌën ángelcama xuquin ꞌënan ꞌinun ꞌën caíscë unicama camabi menua, naínuaribi ꞌëbëa ꞌinun timë́minuxun ꞌain.

Nukën 'Ibu Diosan ain unikama 'inan ain bana

²⁷ 'Ëx uquin cana 'ën ángelcama xuquin 'ënan 'inun 'ën caíscë unicama camabi menua, naínuaribi 'ëbëa 'inun timë́minuxun 'ain.

Marcos 13:27 ပူးပေါင်းရင်းမြစ်များ

Génesis 49:10

Uínbi ka aín kushi Judá bikuantima ꞌikën, ꞌimainun ka aín manë tsati ꞌapun tuinkë ꞌikëa tuinkë a bikuantima ꞌikën, a manë tsatin ꞌibuka unuxun ꞌaia usa ꞌain ka kamabi menu ꞌikë unikaman ax kikësabiokin ꞌanuxun ꞌaia.

Mateo 12:42

Salomón cacë uni, axa ꞌapu ꞌianan ꞌitsa ñu ꞌunáncë ꞌain, ca ꞌura menu ꞌicë ꞌapu xanu ax aín bana cuati cuancëxa. Cuanx bëbatancëxun ca cuëënquin aín bana cuacëxa. Salomón ꞌiásamaira cana ꞌëx ꞌain. ꞌËx usa ꞌicëbi ca ënë nëtënua bucucë unicaman ꞌën bana cuaisama tania. Usa ꞌain ca anúan Nucën Papa Diosan camabi unin ñu ꞌacë isti nëtën, a xanu ꞌapu an Salomonën bana cuacë ꞌixun, ënë nëtënu bucucë unicaman ꞌën bana ñuixuncëxunbia cuacëma ꞌicë, ꞌuchoti ꞌicën.

Mateo 13:41

ꞌËx uni ꞌinux Nucën Papa Diosnuax uá ꞌixun ꞌën ángelcama xucëxun ca an ñu ꞌaisama ꞌacë unicama ꞌimainun an bëtsi uni ñu ꞌaisama ꞌanun ꞌamicë unicamaribi bitancëxun

Mateo 13:49

Usaribi ca anun ꞌëx utëcënti nëtë ꞌinuxun ꞌaia. ꞌËx utëcëncëbë uquin ca ángelcaman unicama Nucën Papa Diosan iscëx upí ꞌicë acama abë ꞌinun bianan an iscëxa upíma ꞌicë unicama bixun,

Mateo 24:22

Anúan paë tani nëtë́xa cëñúcëbëma ca usabi ꞌi camabi unix bamati ꞌicën. Usa ꞌaínbi ca Nucën Papa Diosan, ainan ꞌinun an caíscë unicama nuibaquin, atu cupí anúan unin paë tanquin tëmërati nëtëcama sënë́nmiti ꞌicën.

Mateo 24:24

Anúan usoquin unicaman tëmërati nëtë ucëbëtan ca unin ax asérabi ama ꞌixunbi —ꞌëx cana Cristo ꞌai —quixun paránti sinánquin unicama canuxun ꞌaia. Usaribiquin ca uni raírinën cëmëquin —ꞌën cana Nucën Papa Dios quicë bana unicama ñuixunin —quixun unicama canuxun ꞌaia. Cana ca unicama paránti sinánquin, uni itsían ꞌacëma ñu ꞌanuxun ꞌaia. ꞌAquin ca Nucën Papa Diosan ainan ꞌinun caíscë unicamaribi paránti sinánuxun ꞌaia.

Mateo 24:31

Manë banañu bana ocëbë uquin cana ꞌën ángelcama xuti ꞌain, ꞌënan ꞌinun ꞌën caíscë unicama camabi menua ꞌëbëa ꞌinun ꞌë timëxunun.

Marcos 13:20

Anúan paë tanquin tëmërati nëtë́xa cëñúcëbëma ca usabi ꞌi camabi uni bamati ꞌicën. Usa ꞌaínbi ca Nucën Papa Diosan, ainan ꞌinun an caíscë unicama nuibaquin, atu cupí anúan unin paë tanquin tëmërati nëtëcama sënë́nmiti ꞌicën.

Marcos 13:22

Anúan usoquin unicaman tëmërati nëtë ucëbëtan ca unin ax asérabi ama ꞌixunbi —ꞌëx cana Cristo ꞌai —quixun paránti sinánquin unicama canuxun ꞌaia. Usaribiquin ca uni raírinën cëmëquin —ꞌën cana Nucën Papa Dios quicë bana unicama ñuixunin —quixun unicama canuxun ꞌaia. Canan ca unicama paránti sinánquin, uni itsían ꞌacëma ñu ꞌanuxun ꞌaia. ꞌAquin ca Nucën Papa Diosan unicamaribi paránti sinánuxun ꞌaia.

Marcos 13:28

Ënë ñu camina ꞌunanin, higuera i ax ca baricuatsincëbë aín pëchi rëucubutancëx amiribishi corutëcënia. Usaría ꞌia isquin camina —ca baritiacuatsinia —quixun ꞌunanin.

Lucas 16:22

A ñuñuma uníxa bamaia ca ángelcaman anu Abraham ꞌicë anu buáncëxa, buáncëx ca Abrahambë ꞌiacëxa. Usa ꞌain ca ñuñu uni axribi bamacëxa, bamacë ca maíncancëxa.

Lucas 18:7

¿An usaquin ꞌacë ꞌain cara Nucën Papa Diosan axa ainan ꞌinúan an caíscë aín unicama an nëtë́nbi, imë́bi a ñucácë, acama bërúanquin ꞌaquintima ꞌic? ¿Cara ꞌaquinquinma tënánpati ꞌic? Usama ca.

Juan 10:16

Bëtsi carneroñuribi cana ꞌain. A ꞌaíshbi ca ënë cënënu ꞌicëma ꞌicën. Aribi cana ënë cënënua ꞌinun bëti ꞌain. Acamanribi ca ꞌën bana cuati ꞌicën. Usaquin ꞌën ꞌacëx ca ꞌën carnerocamax achúshi cënënushi ꞌiti ꞌicën, achúshishi ca an a bërúancë ꞌiti ꞌicën.

Juan 11:52

Judíos unicamaxëshima bëtsi bëtsi nëtënuaxa ax Nucën Papa Diosmi sináncë unicamaxribia ainan ꞌaish achúshisa ꞌinúan Jesús bamati ñuiquin ca usaquin cacëxa.

Romanos 8:33

¿An ainan ꞌinun caíscë unicamaxa an iscëx upí ꞌain cara uin Nucën Papa Dios —min unix ca ꞌuchaxa —quixun cati ꞌic? Usaquin cacëxunbia an —ax ca ꞌuchañuma ꞌicë —quixun cati ca Nucën Papa Dios ꞌicën.

Deuteronomio 30:4

ꞌimainun ka ami nishkë unikaman uinu ꞌikë menubi kara uankëx amanu amanu kuankë ꞌikëbi anuabi Nukën ꞌIbu Diosan mitsun aintsikama ꞌain menubi unun ꞌimiti ꞌikën.

Colosenses 3:12

ꞌItsaira nuibaquin ca Nucën Papa Diosan ainan ꞌaish an iscëx upí ꞌinun mitsu caísacëxa. Usa ꞌixun camina mitsúnribi bëtsi uni nuibaquin upíoti ꞌain. Usoquin ꞌanan camina —ꞌëx cana bëtsi unisamaira ꞌaish upí ꞌai —quixun sinántima ꞌain, masáquin sinani camina bënëtishi unimi nishtima ꞌain.

2 Tesalonicenses 2:1

Nucën xucë́antu, Nucën ꞌIbu Jesucristo uti ꞌimainun nux abë biranani timë́ti ñuiquin cananuna ënë bana mitsu cain.

2 Timoteo 2:10

An sinánmicëx ca ꞌitsa uni Nucën Papa Diosnan ꞌinux Cristo Jesúsmi sinánti ꞌicën. Acamaxa aín ꞌuchacama tërë́ncë ꞌianan Cristo Jesúsbë ꞌaish xënibua ꞌaínbi Nucën Papa Diosnan ꞌinun cana unían tëmëramicëxunbi tanshiti cuëënquin a bana ñuin.

1 Pedro 1:2

An sinánsabi oquin ainan ꞌinun ca Nucën Papa Diosan mitsu caísacëxa. Aín Bëru Ñunshin Upitan ꞌimicëxmi ainanshi ꞌaish ax quicësabi oi ꞌinun mitsu ꞌimianan ca Jesucristo bama cupí mitsun ꞌuchacama tërë́nquin mitsun nuitu upí ꞌimiaxa. Usaími mitsux Nucën Papa Diosan nuibacëx ꞌicësamaira oi chuámarua ꞌaish bucucanti cana cuëënin.