Levítico 16:15 - Kashibo-Kakataibo Biblia

¹⁵ usakin ꞌatankëx anuax chikítankëxun ka chibu aribi Israel unibunën ꞌucha kupí rëti ꞌikën, rëkin aín imi ꞌitsamashi xampami bitankëxun ka kata itsi upíira a ꞌukëmëu ꞌikë chupan bëpankë a kaxú uantakëxun; anun bunántisa okin kurin ratakakakin ꞌakë aín mapúti kaxú ꞌanan aín rëbu vaca bëna imin ꞌakësaribi okin anun ánskati ꞌikën.

Levítico 16:15 ပူးပေါင်းရင်းမြစ်များ

Levítico 16:2

Usa ꞌain ka Nukën ꞌIbun Moisés kakëxa: —Min xukë́n Aarón kamina ësokin kati ꞌain, bëtsi nëtë́an uisaxi anu ꞌëx ꞌikë upíira kakë chupa bëpankë a kaxú atsíaxma ꞌinun kanan kamina, bunántisa okin ꞌakë anun mapukë a ꞌurama oxuma ꞌanun kati ꞌain, anu kuaníbi ka bamati ꞌikën; ꞌëx kana aín mapúti ꞌikë anu kuin mëu mërati ꞌain.

Hebreos 2:17

Ësaquin nu ꞌaquinti cupí ax nusaribi uni ꞌixun, ñunshin ꞌatimanën ꞌapun tancëxun ꞌunánan paë tani tëmërati ꞌunan ꞌixun ca Jesusan aín unicama Nucën Papa Dios upí oquin ñucáxunia. Usa ꞌaish ca nun ꞌucha tërë́nux bamati cupí nusaribi uni ꞌiacëxa.

Hebreos 5:3

Axribi ñu ꞌatima ꞌacë ꞌixun ca judíos sacerdotenën cushicaman ꞌapun judíos uni raírinën ꞌuchacama ꞌimainun aín ꞌuchacamaribi tërë́ncë ꞌinun quixun ꞌaracacë ñuina ꞌaia.

Hebreos 6:19

Ënëx ca ësaribi ꞌicën. An manë nunti niquincë unicaman ca aín manë nuntia bëchunan tucáncaquin amami amami buánti rabanan, manë cha manë risin tëcërëcaxun, an cushioquin tuínun quixun baca nëbë́tsi nipatia. A manë chan tuíncë cupí ca nunti amanu amanu cuanima. Usaribiti cananuna Cristo anu Nucën Papa Dios ꞌicë anu cupí nun amanu amanu sinánbëquínquinma Jesucristomi sinánti ëntima ꞌain.

Hebreos 7:27

Ax ca Levitan rëbúnqui ꞌicësai ꞌiáma ꞌicën. Atun ca camabi nëtën aín ꞌucha pain tërë́anan judíos unicaman ꞌuchacamaribi tërë́nun Nucën Papa Dios ñucáxunia, ñuina rëtancëxun xaroquin. Usama ca Jesús ꞌicën. Axbi ca camabi unin ꞌucha cupí ñuina rëxun xarocësa ꞌitánun bamatsianxmabi achúshitishi bamacëxa.

Hebreos 9:12

Tabernáculonu ꞌicë cata Upíira cacë, anua sacerdotenën cushicaman ꞌapun chivo ꞌimainun vaca bacë rëxun aín imi buan ꞌaínbi ca Jesucristo aín imi ꞌapati bamatancëx baísquiax, anuira Nucën Papa Dios ꞌicë anu cuancëxa. Anu ashiti cuan ꞌixun ca nun ꞌuchacama tërë́ncë ꞌaíshnu xënibua ꞌaínbi Nucën Papa Diosnan ꞌinun nu ꞌimia.

Hebreos 9:13

Judíos unicaman ca aín ꞌucha cupí chivo ímainun vaca bacë, tabernáculo xubunu buánxun rëxun judíos sacerdotenën a xaroxúnun ꞌinánia. ꞌInáncëxun ca sacerdotenën a ñuinacan imi bianan aín nami xaroxun aín chimapu bixun a unicamanu sácaia. Usoquian ꞌacëx aín ꞌucha tërë́ncë ꞌaishbi ca ꞌuchatëcënima ꞌinúan ꞌacëma ꞌicën.

Hebreos 9:3

Cata Upí a ꞌucë ca bëtsi cata ꞌiacëxa. Ax ca Cata Upíira cacë, ꞌiacëxa.

Hebreos 9:7

Acamax ca tabernáculo cata, anu pain atsínti, anuishi atsinia. Usa ꞌaínbi ca cata itsi, Upíira cacë, anu judíos sacerdotenën cushicaman ꞌapu axëshi camabi baritian achúshi oíshi atsinia. Anu atsínquin ca ꞌaracacë ñuinanën imi buania, aín ꞌuchacëñuan judíos unicaman ꞌuchacamaribi Nucën Papa Diosan tërë́nun quixun ánscaquin.