Jueces 16:17 - Kashibo-Kakataibo Biblia

¹⁷ usakin urainra ubíokin ñukákëxun ka Sansónnën Dalila uisa ꞌaish kara ax usai ꞌia kixun ñuixuankëxa: —Uínbi ka uínsaranbi ꞌën bu tëama ꞌikën, ꞌëx kana ꞌën titan tuakëma pain ꞌaish Diosan kaískë uni a ꞌain. Aín uni ꞌain ka Nukën ꞌIbu kikësabiokin uínbi ꞌën bu tëatima ꞌikën. Usa ꞌain kana ꞌën bumi tëakëbë kushiñuma ꞌi ꞌën kushi nëtë́ti bëtsi unikamasaribi ꞌiti ꞌain.

Jueces 16:17 ပူးပေါင်းရင်းမြစ်များ

Proverbios 13:3

Uix kara sinaínrax banaia an ka aín tsóti bërúaia; usai ꞌimainun ka axa sinanima ꞌatimati banakë uni ax aín banakënënbi ꞌatimorakatia.

Hechos 18:18

Usocëx ꞌitsa nëtën pain Corintonu ꞌitancëx ca Pablo Siria menu cuanti sinani axa Jesucristomi catamëcë unicama —cana cuanin —cabiani, Priscila ꞌimainun Aquílabë manë nuntin cuancëxa. Cuanx Cencrea ëmanu bëbaxun ca Pablonën, —ꞌën Nucën Papa Dios cacësabi oi ꞌi cana sënëni —quixun sinánquin aín bu tëamiacëxa.

Jueces 13:5

ësokin kamina ꞌati ꞌain, ami bakënti tuá ax ka Diosan uni achúshi ꞌikën kixun unikaman ꞌunánun ka kania uínbi ain bu tëatima ꞌikën, an pain ka filisteo unikaman ꞌatima oia israel unibu ꞌakinti ꞌikën, ainanshi ꞌinun ka Diosan bakënkë ꞌikëmabi kaisaxa.

Jueces 16:16

Usakian Dalilanën nëtë́tibi kamabi hora ꞌurainra ubíokin an kakësabiokin ñukákëx, ka Sansón atsanx a kuaisama tani anunbi bamatisa tankëxa;

Jueces 16:18

Usakian kakëxun ka bëríra kana ꞌunanin, uisa ꞌaish kara usa kushiñuira ꞌikë kixun ꞌunánkin ka Dalilanën filisteo ꞌapukama anua unun kixun ësokin kamiakëxa: —¡Bërí kamina ukanti ꞌain mitsu ñuixunun, Sansónnën ka uisa ꞌaish kara usa kushiñuira ꞌikë kixun ꞌë ñuixuanxa! Usakian kamikëx ka anúan Dalila kupíoti kuríki bëi rikuatsiankëxa.