Jueces 14:19 - Kashibo-Kakataibo Biblia

¹⁹ Usokin atu kaiashi ka Nukën ꞌIbun Bëru Ñunshinan kushiira uni ꞌinun Sansón ꞌimiakëxa; Usakin ꞌimikëx Ascalón kakë ëmanu kuanxun ka filisteo unikama Sansónnën treinta uni anu ꞌikë rëtëakëxa, rëtëxun ka unikaman chupa bibianxun anunbi an kakë bana ñuixunkë unikama a kupíokin ꞌinánkëxa. Usokin ꞌabiani ka aín papan xubunu bëtsi sinánkëshi ꞌaish kuankëxa,

Jueces 14:19 ပူးပေါင်းရင်းမြစ်များ

Jueces 13:25

Achúshi nëtën ka Sansón anua Dan kakë unikama bukukë Sorá ꞌimainun Estaol kakë ëma anuxunbi, Nukën ꞌIbun bëru ñunshinan añu kara ꞌati ꞌikë kixun ismiakëxa.

Jueces 14:18

Ñuixunkëx ka mapai ꞌimainun rabë́ nëtë sënë́nkë anun bari kuabukëma ꞌaínshi filisteo unikama anu rikianxun Sansón kakëxa: “Buna rëpa batasamaira bëtsi ñu ka ꞌaíma ꞌikën, ꞌimainun ka paru ꞌinúanën kushisamaira bëtsi ñuina ꞌaíma ꞌikën.” Kia kuakin ka Sansónnën atu kakëxa: “ꞌËn kakëxuan ꞌën xanun mitsu ñuixunkë kupinshi kamina uisai kikë kara a bana ꞌikë kixun ꞌunanin.”

Jueces 14:6

ꞌAiabi ka Nukën ꞌIbun aín bëru ñunshinan Sansón kushiira ꞌinun ꞌimiakëxa, ꞌimikëxun ka anun ꞌati ñu tuinkë ꞌixunmabi aín kushínbi achúshi cabranën tuára ꞌakësokinshi an pikatsikiax ukë ꞌinuan tëtsëkakin bikëxa bamaia tukapakëxa. Usakin ꞌaxunbi ka aín papa usakian ꞌakë a ñuixuanma ꞌikën.

Jueces 15:14

Chikin bëtsinkin bëkëxa Lehi anu bëbakëbë ka filisteo unikama abë mëranani ꞌitsaira kuëëni kuënkëni chikiakëxa. ꞌAínbi ka Diosan bëruñunshinan ꞌamikëxun Sansónan anúan aín pëñan këñun aín mëkën tëkërëkakë itsikama a tëkapakëxa, tsin xarokë lino risikama ꞌakësokinshi;

1 Samuel 11:6

Kakëxun kuakëbëshia Diosan bëru ñunshin anu ꞌirukëbë ka; ꞌaisamairai Saúl nishakëxa.

1 Samuel 6:17

Mapai achúshi okin kuri ku tankin ꞌakë ax ka filisteo unikaman Nukën ꞌIbun atun ëma Asdod, Gaza, Ascalón, Gat, ꞌimainun Ecrón akama ꞌatimokin tëmëramitima kupí ꞌakë ꞌiakëxa;

1 Samuel 6:4

Kakëxun ka atun kakëxa. —¿Añu karanuna nua nishkin ꞌatima oxunma ꞌanun ꞌaxúnti ꞌain? —kixun ka filisteo unikaman ñukákëxa. —Ñukákëxun ka mapai achúshi kuri ku tankin ꞌaxúnun —kixun sacerdote unikama kakëxa—, kanan ka achúshi achúshi mitsun ꞌapu ꞌaxuanan ka mapai achúshi makún tankinribi a manëbi ꞌati ꞌain, mitsux kamina a ꞌinsínan mitsun ꞌapubëbi tëmërakani kixun kakëxa.