Juan 3:36 - Kashibo-Kakataibo Biblia

³⁶ Axa aín Bëchicëmi catamëcë uni, ax ca ainan ꞌaish Nucën Papa Diosbë nëtë́timoi ꞌia. Usa ꞌaínbi ca axa Nucën Papa Diosan Bëchicëmi sinántisama tancë uni, ax ainanma ꞌaish Nucën Papa Diosbë nëtë́timoi ꞌima. A uni ca Nucën Papa Diosan aín ꞌucha cupí ꞌaisamaira oquin castícancë ꞌiti ꞌicën.

Nukën 'Ibu Diosan ain unikama 'inan ain bana

³⁶ Axa aín Bëchicëmi catamëcë uni, ax ca ainan 'aish Nucën Papa Diosbë nëtë́timoi 'ia. Usa 'aínbi ca axa Nucën Papa Diosan Bëchicëmi sinántisama tancë uni, ax ainanma 'aish Nucën Papa Diosbë nëtë́timoi 'ima. A uni ca Nucën Papa Diosan aín 'ucha cupí 'aisamaira oquin castícancë 'iti 'icën.

Juan 3:36 ပူးပေါင်းရင်းမြစ်များ

Salmos 2:12

usa ꞌain kamina Dios ax nishkima mitsu, ꞌaisama okin tëmëramia usa ꞌain rabikanti ꞌain. ¡Diosan ka axa ami katamëkë unikama chuámarua tania ami sinani kuëënun ꞌimia ësai ka Diosan kaískë unikama kiakëxa!

Habacuc 2:4

Ënë bana kamina kuënëoti ꞌain, an ñu ꞌatima ꞌakë unikamax ka ax isa usaira ꞌikë kiax kikanti ꞌikën, ꞌaínbi ka an ñu upí ꞌakë unikama atux ꞌëx kikësokin ꞌai tsóti ꞌikën.

Mateo 25:46

Usaquin ꞌën cacëx ca acamax anuxuan xënibua ꞌaínbi tëmërati anu cuanti ꞌicën. Cuancëbë ca ꞌën unicamax Nucën Papa Diosan nëtënu xënibua ꞌaínbi ꞌëbë ꞌi cuanti ꞌicën.

Marcos 16:16

Ñuixuncëxun cuatia ꞌëmi catamëtia nashimicë ax ca Nucën Papa Diosan ainan ꞌinun ië́micë ꞌiti ꞌicën. Usa ꞌaínbi ca axa ꞌëmi catamëisama tancë uni ax aín ꞌucha cupí xënibua ꞌaínbi Nucën Papa Diosbëma ꞌiti ꞌicën.

Lucas 2:30

An camabi uni aín ꞌuchacama tërë́nquin minan ꞌinun ië́miti a cana ꞌën bërúnbi isin.

Lucas 3:6

Usoquian ꞌan ca ax uti ꞌicën. Axira ucëbëtan ca camabi unin, uisaira oquin cara Nucën Papa Diosan, unicama ꞌaquinquin ainan ꞌinun ië́miti ꞌicë quixun isti ꞌicën.

Juan 1:12

Usa ꞌixunbi ca uicamax cara ami sinánan ami catamëtia, acama Nucën Papa Diosan bëchicëa ꞌinun ꞌimiacëxa.

Juan 10:28

Acama cana nëtë́timoi Nucën Papa Diosnan ꞌinun ꞌimiti ꞌain. ꞌImia ca uínbi atu ꞌë bicuantima ꞌicën.

Juan 3:3

Cacëxun ca Jesusan cacëxa: —Asérabi cana ꞌën mi cain, axa aín cushin bacë́ntëcëncëma uni ax ca Nucën Papa Diosnan ꞌitima ꞌicën.

Juan 4:36

An uni ꞌëmi catamënun ꞌaquincë uni an ca aín cupí bitsia. A unin ꞌaquincëxa ꞌëmi catamëcë unicama ax ca xënibua ꞌaínbi Nucën Papa Diosnan ꞌia. Usa ꞌain ca an paían ꞌën bana uni ñuixuncë unicamabë an ꞌëmi catamënun uni ꞌaquincë unicamaxribi cuëënti ꞌicën, atúan ꞌënan ꞌinun uni ꞌaquincë cupí.

Juan 5:24

Asérabi cana ꞌën mitsu cain, axa ꞌën bana cuati an ꞌë xuá ami sináncë uni, ax ca ainan ꞌaish nëtë́timoi Nucën Papa Diosnan ꞌia. A cupía Nucën Papa Diosnan ꞌitima ꞌicëbi aín ꞌuchacama tërë́ncë cupí ꞌuchañuma ꞌaish ca bamatancëxbi nëtë́timoi Nucën Papa Diosbë ꞌiti ꞌicën.

Juan 6:58

ꞌËx cana naínuaxa uá pitisa ꞌai quiax cana ꞌëx quin. ꞌËx cana mitsun raracaman piá manásama ꞌain. Mitsun raracamax ca maná cacë ñu pibi bamatimoi tsoóma ꞌicën. Usa ꞌaínbi ca an ꞌëmi catamëquin ꞌë picësa uni ax ainan ꞌaish xënibua ꞌaínbi Nucën Papa Diosbë ꞌiti ꞌicën.

Juan 8:51

Asérabi cana ꞌën mitsu cain, an ꞌën bana cuacë uni ax ca xënibua ꞌaínbi Nucën Papa Diosbë ꞌia.

Hechos 14:2

Catamëcëbëtanbi ca Jesucristomi sinántisama tancë judíos unicaman, judíosma unicama ꞌatimaquin sinánmiquin axa Jesucristomi catamëcë unicamami nishnun quixun tsuáquirumiacëxa.

Romanos 4:15

Cananuna ꞌunanin, usai ca uni ꞌiti ꞌicë quicë bana atúan cuati, a ꞌaíma ꞌain ca anun uni ꞌuchoti bana ꞌaíma ꞌicën. Usa ꞌaínbi ca usai ca uni ꞌiti ꞌicë quicë bana ꞌunáncë ꞌixunbi axa quicësabi oquin ꞌacëma ꞌaish uni ꞌuchocë ꞌiti ꞌicën.

Romanos 5:9

Cristo bama cupí nun ꞌucha tërë́ncë ꞌaish cananuna Nucën Papa Diosan iscëx upí ꞌain. Usa ꞌaish cananuna anúan Nucën Papa Diosan camabi unin ñu ꞌacë isti nëtën an iscëx upí ꞌaish asérabi ꞌuchocëma ꞌiti ꞌain.

Romanos 8:1

Usa ꞌain ca uicamax cara Cristo Jesús abë ꞌicë, acama Nucën Papa Diosan ꞌuchoima. Usa unicamax ca Cristonanma uni ꞌicësai ax cuëëncësarishi ꞌima, Nucën Papa Diosan Bëru Ñunshin Upitan sinánmicësabi oi ꞌia.

Gálatas 3:10

Usa ꞌaínbi ca ësairibi a bana usai ca judíos unicama ꞌiti ꞌicë quixun cuënëo ax quia: “Ui unicaman cara camabi cuënëo bana quicësabi oquinra ꞌacëma a ca Nucën Papa Diosan uisa cara oti ꞌicë usoquin ꞌati ꞌicën”. A bana asérabi ꞌain cananuna ꞌunanin, a bana quicësabi oquin ꞌacë ꞌaish cana Nucën Papa Diosan iscëx ꞌuchañuma ꞌai quixun sináncë unix ca a banacama quicësabi oquinra ꞌacëma ꞌicë Nucën Papa Diosan uisa cara oti ꞌicë usoquin ꞌacë ꞌiti ꞌicën.

Efesios 5:6

Uni raírinëan —ñu ꞌatima ꞌacë ꞌaíshbi camina Nucën Papa Diosan nëtënu ꞌiti ꞌai —quixun cacëxunbi camina mitsun, —cëmëi ca quia —quixun sinánti ꞌain. An aín bana cuaisama tanquin usa ñu ꞌacë unicama a ca ami nishquin Nucën Papa Diosan castícanti ꞌicën.

1 Tesalonicenses 1:10

Acama ñuianan ca mitsun camina Nucën Papa Diosan Bëchicë Jesús bamacëbia anbi baísquimia, axa naínuax uti caini quixunribi ñuia. Ax ca an Nucën Papa Diosan, uni aín ꞌucha cupí castícancëbëtanbi, ainan ꞌicë nu ië́miti a ꞌicën.

1 Tesalonicenses 5:9

Nucën Papa Diosan ca nun ꞌucha cupí numi nishquin castícanuxun nu caíscëma ꞌicën. An ca Nucën ꞌIbu Jesucristo cupíshi upí ꞌinun ië́minuxun nu caísaxa.

Hebreos 10:29

A unia usoquin ꞌásamaira oquin ca axa aín Bëchicë ꞌimainun aín Bëru Ñunshin Upími ꞌatimati banacë uni a Nucën Papa Diosan castícanti ꞌicën. Nucën Papa Diosan Bëchicë, axa unicama ꞌuchañu ꞌicëbi ië́minux aín imi ꞌapati bama, a ami ꞌatimati bananan Nucën Papa Diosan Bëru Ñunshin Upí an uni nuibaquin ꞌaquincë ami ꞌatimati banacë, a unicamax ca an Moisésnën cuënëo bana ꞌacëma unia ꞌacësamaira oquian Nucën Papa Diosan castícancë ꞌiti ꞌicën.

Hebreos 2:3

¿Asérabi usa ꞌain caranuna nux —Jesucristomi catamëtia uni Nucën Papa Diosnan ꞌinun ië́ti bana a cuatíbi, a bana quicësabi oi ꞌicëma ꞌaish uisa tancëx ië́ti ꞌain? A bana anun nun ꞌucha tërë́ncë ꞌaish Nucën Papa Diosnan ꞌinux ië́ti, a ca Nucën ꞌIbu Jesucristonën pain unicama ñuixuancëxa. Usa ꞌain ca an cuacë uni raírinën, a bana ca asérabi ꞌicë quixun ꞌunánquin, nuribi ꞌunánmiacëxa.

Hebreos 3:18

¿ꞌImainun cara uicamaribi Nucën Papa Diosan sinántëcëntimoquin, an atu ñuixuncë menu ca chuámarua tani bucunux bëbatima ꞌicë quixun cacëx? An a timaquin aín bana cuaisama tancë unicama ca Nucën Papa Diosan usaquin cacëxa.

Hebreos 3:19

Usa ꞌain cananuna a ñucama sinánquin ꞌunanin, atúan aín bana ca asérabi ꞌicë quixun sináncëma ꞌianan ami catamëcëma cupí ca Nucën Papa Diosan a unicama anua chuámarua tani ꞌitia ñuixuncë menu bëbamiama ꞌicën.

Apocalipsis 21:8

Usa ꞌaínbi ca racuë́quian an ꞌëmi sinánti ëncë unicama, ꞌimainun an ꞌëmi catamëcëma unicama, ꞌimainun an ñu ꞌatima ꞌacë unicama, ꞌimainun an uni ꞌacëcama, ꞌimainun aín xanuma ꞌicëbi bëtsi xanu cuëëncë unicama ꞌimainun aín bënëma ꞌicëbi bëtsi uni cuëëncë xanucama ꞌimainun ñu xëacë ñubë́ unicama ꞌimainun an Nucën Papa Diosmabi bëtsi ñu rabicë unicama ꞌimainun cëmë unicama, acamax anuaxa ꞌianëmëꞌëosa manë tsi azufrebë rëquirucë anu ꞌiti ꞌicën, anu bamatëcëncë ꞌaish chiquítimoi ꞌinux.