Juan 16:33 - Kashibo-Kakataibo Biblia

³³ ꞌËmi catamëtími chuámashirua ꞌaish upitax ꞌicánun cana ënë banacama mitsu ñuixuan. Ënë nëtënuax camina mitsux ꞌënan cupía mitsumi nishquin unin ꞌatimocë ꞌinuxun ꞌain. Usai ꞌibi camina bënëtima ꞌëmi cushicanti ꞌain. An ënë menu ꞌicë unicama ꞌibuacë ꞌicëbi cana ꞌën ñunshin ꞌatimanën ꞌapu ñusmon.

Nukën 'Ibu Diosan ain unikama 'inan ain bana

³³ 'Ëmi catamëtími chuámashirua 'aish upitax 'icánun cana ënë banacama mitsu ñuixuan. Ënë nëtënuax camina mitsux 'ënan cupía mitsumi nishquin unin 'atimocë 'inuxun 'ain. Usai 'ibi camina bënëtima 'ëmi cushicanti 'ain. An ënë menu 'icë unicama 'ibuacë 'icëbi cana 'ën ñunshin 'atimanën 'apu ñusmon.

Juan 16:33 ပူးပေါင်းရင်းမြစ်များ

Miqueas 5:5

An ka kamabi uníxa upiti tsónun ꞌimiti ꞌikën. Uínsaran kara asirio unikama nun menu bëbai nun ꞌapun xubukamanu atsinia, anun ka a ꞌapunbi mapai achúshi ꞌimainun rabë́ aín kushibu a këñun mapai ꞌimainun rabë́këñun achúshi ꞌapukama atu ꞌanun xuti ꞌikën.

Mateo 9:2

Bëbacëbëa ꞌitsa uni timë́cëbëtan ca raírinën uni achúshi ñucë nirucuaínquinbi tancëma bacë́tinu racánxun bëacëxa. Bëquin ca —Jesusan ca ënë uni pëxcuti ꞌicë —quixun aín nuitu mëu sináncëxa. Sinania atun sinan ꞌunánquin ca Jesusan ñucë uni cacëxa: —Chuámashi ca ꞌit. Min ꞌuchacama ca tërë́ncë ꞌicën.

Lucas 19:38

Rabi ca quiacëxa: —Nucën ꞌIbu Diosan xucëxa ucë, ënë ꞌApux ca bërí aia. A ca camabi unin rabiti ꞌicën. Naínu ꞌicë Nucën Papa Diosaxribi ca cuëënia. Aribi ca camabi unin rabiti ꞌicën.

Lucas 2:14

—¡Naínu ꞌicë Nucën Papa Dios rabinun ca ꞌat! ¡Ënë nëtënuaxa Nucën Papa Diosbë upí ꞌicë unicamax ca chuámashirua ꞌican!

Juan 12:31

Bërí ca ënë nëtënu ꞌicë unicama, cara ꞌëmi sinania, cara ꞌëmi sinanima quixun Nucën Papa Diosan isti ꞌicën. Isanan ca an ꞌëmi sináncëma unicaman ꞌapu, ñunshin ꞌatimanën ꞌapuribi ax cushi ꞌicëbi ꞌën unicama ꞌibuatimoquin ñusmoti ꞌicën.

Juan 14:1

Usaquin catancëxun ca ësaquinribi Jesusan aín ꞌunánmicë unicama cacëxa: —Masá nuituaxma ca ꞌican. Nucën Papa Diosmi camina catamëti ꞌain. Nucën Papa Diosmi catamëti ca ꞌëmiribi catamët.

Juan 14:27

ꞌËx cuancëbëbi camina chuámashirua bucucanti ꞌain. ꞌËn ꞌimicëx camina ënë menu ꞌicë ñu sinani cuëëncësamaira oi ꞌënan ꞌaish cuëëni chuámarua ꞌiti ꞌain. Usa ꞌain ca masá nuituaxma ꞌianan racuë́axma ꞌican.

Juan 16:11

An ënë nëtënu ꞌicë unicama ꞌibuacë ñunshin ꞌatimanën ꞌapu ca castícanuxun ꞌuchocë ꞌicën. Usa ꞌain ca axa ꞌëmi catamëcëma unicamanribi, usaribiti ca atux castícancë ꞌiti ꞌicë quixun ꞌunánti ꞌicën.

Hechos 14:22

A ëmacamanu ꞌiquiani cuanquin ca axa Jesucristomi catamëcë unicama cushioquin Jesucristomi catamëti ënxunma ꞌanun ꞌësëanan nux Nucën Papa Diosnan ꞌaish cananuna uni itsían bëtsi bëtsi ocë ꞌiti ꞌai quixun cacëxa.

Hechos 23:11

Usaquian ꞌoon ñantánbucëbëtan ca Nucën ꞌIbu Jesusan a rapasu niracëquin Pablo cacëxa: —Masá nuituti bënë́axma ca ꞌit. Jerusalén ënuxunmi ꞌë ñuiquin cacësaribi oquin camina Roma ëmanuxunribi ꞌë ñuiquin unicama bana ñuixunti ꞌain.

Hechos 27:22

ꞌAínbi camina masá nuitutima chuámashi ꞌicanti ꞌain. Achúshi uníxbi cananuna bamatima ꞌain, manë nuntíxëshi ca nanë́ti ꞌicën.

Hechos 27:25

Angelnën ꞌë cacë sinani camina chuámarua ꞌicanti ꞌain. ꞌËn cana ꞌunanin, Nucën Papa Diosan ꞌimicëx ca ángelnën ꞌë cacësabi oi ꞌiti ꞌicën.

Hechos 9:31

Usa ꞌain ca Judea menu ꞌimainun Galilea menu ꞌimainun Samaria menuribi, axa Jesucristomi catamëcë unicama uínbi ubíocëma ꞌaish chuámarua bucüacëxa, usai ꞌi ca Jesucristomi catamëti ꞌitsarui cushiacëxa. Usaía ꞌicëbë ca raíri uniribi abë timëti Nucën ꞌIbu Diosan bana upí oquin cuati, aín Bëru Ñumshin Upitan ꞌaquincëx ꞌitsarui Jesúsmi sináncëxa.

2 Corintios 1:3

Nucën Papa Dios ax ca Nucën ꞌIbu Jesucristo aín Dios ꞌianan aín Papa ꞌicën. Camabi unin ca a rabiti ꞌicën. Ax ca Nucën Papa Dios ꞌicën. Ax ca an nuibaquin upí ꞌinun nu ꞌimianan nu masá nuitutiabi upí oquin sinánmiti, a ꞌicën.

2 Corintios 13:11

ꞌËn xucë́antu, chuámashi camina ꞌicanti ꞌain. Añu ñucama cara ꞌaisama ꞌicë camina mëníoquin sinántëcëntima ꞌain, ꞌën mitsu cacë banacama cuati camina bëtsin sináncësabi oquin sinani nishananíma nuibananishi ꞌicanti ꞌain. Usai ꞌia ca Nucën Papa Dios, an aín unicama nuibaquin bënëtima chuámarua ꞌinun ꞌimicë, ax mitsubë ꞌiti ꞌicën.

2 Corintios 2:14

Ñunshin ꞌatimanëan nu ꞌatimaquin sinánmisa tanan aín bana ñuixunxunma ꞌanun ꞌimitisa taniabi ca Nucën Papa Diosan, Cristo Jesús cupí, nun ꞌacësabi oquinu aín bana ñuixunun nu ꞌimia. An ca aín ꞌacësabi oquin nu ꞌaquinia quixun ꞌunánquin cananuna —asábi ca —quixun caquin a rabin. Uinu caranuna cuani, anuxun ca nun nu Cristo Jesús ñuiquin aín bana ñuixunia, a banax ca asérabi upíira ꞌicë quixun unin sinania.

2 Corintios 4:7

Nun cushínbi ꞌatsínxunmabi cananuna an ꞌamicëxuinshi ax cuëëncësabi oquin ꞌati ꞌai quixuan unicaman ꞌunánun ca Jesucristo cupí Nucën Papa Diosan nux abë upí ꞌixúnu aín cushínbi ñu ꞌanun nu ꞌimia.

2 Corintios 6:4

Bëtsi bëtsi onan numi nishquin unin tëmëramicë ꞌianan uisa ñu cara ꞌicëbëbi bënë́quinma tanshiquin Nucën Papa Diosan bana ñuixunia isquin ca camabi unin ꞌunánti ꞌicën, nux cananuna asérabi Nucën Papa Diosan uni ꞌai quixun.

2 Corintios 7:4

Mitsun camina upí oquin ꞌai quixun sinani cana cuëënin. Usa ꞌaish cana, nux tëmëraquinbi mitsun upí oquin ꞌaia cuati, chuámarua tani cuëënin.

Gálatas 1:4

Ënë menu ꞌicë ñuishi ꞌatia an sináncë unicaman ꞌacësaribi oquin ñu ꞌatima ꞌati rabanan nu ië́mi ca ax bamatsianxmabi nun ꞌucha cupí bamacëxa, Nucën Papa Dios cuëëncësabi oi.

Gálatas 6:14

Usa ꞌaínbi cana ꞌëxbi rabiacaquinma, i curúsocënua ax bama ꞌaían a cupí uni ië́ti, Nucën ꞌIbu Jesucristo, ashi rabin. Cristo i curúsocënu bama cupí cana a ꞌën ꞌatia Nucën Papa Dios cuëëncëma ñucama ëni, usa ñu ꞌatëcënti cuëëniman. ꞌImainun ca unin a ꞌatia Nucën Papa Dios cuëëncëma ñu ꞌë ꞌamitima ꞌicën.

Filipenses 4:7

Usaquinmi cacëxun cuaquin ca Nucën Papa Diosan mitsu nuibaquin bënëtima chuámarua ꞌinun mitsu ꞌimiti ꞌicën, uisa ꞌaish cara aín uni usai ꞌia quixuan uni raírinën ꞌunáncëbëtanmabi. Usaquin ꞌimianan ca Jesucristobë ꞌicë mitsun sinan ꞌimainun mitsun nuitu upí ꞌinun bërúanti ꞌicën.

Colosenses 1:20

Aín nuitu ꞌaisama ꞌaísha uni abë upꞌi ꞌitima ꞌaínbi ca Nucën Papa Dios cuëëncësabi oquin Cristonën i curúsocënu bamaquin ënë menu ꞌicë ñucama ꞌimainun naínu ꞌicë ñucamaribi an iscë́xa upí ꞌinun mëníocëxa.

1 Tesalonicenses 3:4

ꞌAnan cananuna mitsubë ꞌixun, unin ca nu bëtsi bëtsi oti ꞌicë quixun mitsu can. Usai cananuna ꞌia quixun camina ꞌunáncanin.

1 Tesalonicenses 3:7

Nun xucë́antu, usaími mitsux asérabi Jesucristomi catamëtia cuaquin cananuna unin nu bëtsi bëtsi omainun raíri ñu cupíribi tëmëraquinbi masá nuituquinma upí oquinshi sinani cuëënin.

2 Tesalonicenses 3:16

Nucën ꞌIbu Jesucristo, an aín unicama bënëtima chuámarua ꞌinun ꞌimicë, anbia mitsúxribimi uisa ñu cara ꞌicëbëbi camabi nëtë chuámarua ꞌinun mitsu ꞌimiti cana cuëënin, axbi mitsubë ꞌiquin mitsu bërúanti cana cuëënin.

2 Timoteo 3:12

Asérabi ca axa Cristo Jesús quicësabi oi ꞌiisa tancë unicama unin bëtsi bëtsiocëx tëmërati ꞌicën.

Hebreos 11:25

Ca sináncëxa, Egiptonu ꞌicë ꞌapu ënëbë ꞌaish cana aín xutasa ꞌaish ꞌëx camabi ñuñu ꞌiti ꞌain. Usa ꞌaínbi ca Egipto menu ꞌicë unicama ënën Nucën Papa Dios cuëëncësama oquin ñu ꞌatimashi ꞌati cuënënia. Usaquin ꞌanan ca axa Nucën Papa Diosmi sináncë unicamaribi ꞌatimoia. Usaquin sinani ca ax Egiptonu ꞌicë ꞌapun xutasa ꞌitsíanxbi aín aintsi judíos unicama, a Nucën Papa Diosan ainan ꞌinun caíscë, acamabë tëmëraibi ꞌiti cuëëancëxa.

Hebreos 7:2

Usaquin cacëxun ca Abrahamnën an bëcë ñucama mësú Melquisedec ꞌináncëxa. Melquisedec quicë bana ax ca “upí ꞌapu ca ax ꞌicë” qui quicë bana ꞌicën. Melquisedec ax ca Salem cacë menu ꞌicë unibu aín ꞌapu ꞌiacëxa. Salem quicë bana ax ca “bëtsi unibubë ꞌacananima ca chuámarua bucuia” qui quicë bana ꞌicën. Usa ꞌain ca Melquisedec ꞌacánanti sináncëma ꞌapu ꞌiacëxa.

1 Pedro 5:9

Usa ꞌixun camina ñunshin ꞌatimanën ꞌapúan ñu ꞌatima ꞌamitisa tancëxunbi Jesucristomi catamëquin usa ñu ꞌatima ꞌain. Camina ꞌunánti ꞌain, mitsu ꞌacësaribi oquin ca ñunshin ꞌatimanën ꞌapun, camabi menu ꞌicë axa Jesucristomi catamëcë unicama tania quixun.

1 Juan 2:13

Uni apáncama, mitsúnmi axa ënë mecama unioisama pain ꞌaíshbi ꞌiá, Nucën Papa Dios, a ainan ꞌixun ꞌunáncë cupí cana mitsu quirica cuënëoxunin. Bëná unicama, mitsuribishi cana ñunshin ꞌatimanën ꞌapúan ñu ꞌatima ꞌamitisa tancëxunbimi ꞌacëma cupí quirica cuënëoxunin. ꞌËn bëchicësa ꞌaíshmi ainan ꞌixun Nucën Papa Dios ꞌunáncë cupí cana mitsuribi quirica cuënëoxuan.

1 Juan 4:4

ꞌËn bëchicësa unicama, mitsux camina Nucën Papa Diosnan ꞌain. Nucën Papa Dios axa mitsubë ꞌicë aín cushibëtan sënë́nma ca an ënë nëtënu ꞌicë ñuishi sináncë unicaman cushi ꞌicën. Usa ꞌain ca an Cristo ꞌatimaquin ñuicë unicaman sinanëx mitsun sinánbëtan sënë́nmara ꞌicën.

1 Juan 5:4

—Ax quicësabi oquin ꞌanun ca Nucën Papa Diosan ꞌë ꞌaquinia —quixun ꞌunani ami catamëcë ꞌixun ca aín bëchicëcaman, an ënë menu ꞌicë ñuishi sináncë unicaman ꞌacësaribi oquin ꞌaquin ñu ꞌatima ꞌati ashiquin ënia.

Apocalipsis 12:11

Aín unicama, nucën xucë́antu, ax ca Carnero ꞌicësaribitia unin ꞌucha cupí bama, ami catamëcë cupí atun ꞌucha tërë́ncë ꞌianan aín bana ënquinma sináncë ꞌaish, ñunshin ꞌatimanën ꞌapúan ꞌatima ñu ꞌamicëma ꞌiaxa. Atun ca axa ami nishcë unin bëtsi bëtsi ocëx bamatisa ꞌixunbi Nucën Papa Diosmi sinánti ëncëma ꞌicën.

Apocalipsis 3:21

ꞌAnan cana axa ꞌëmi catamëquin ꞌëx cuëëncësabi oi ꞌiti ëncëma unicamax ꞌëbë ꞌapu ꞌinun ꞌimiti ꞌain, ꞌëx tëmëraibi ax cuëëncësabi oi ꞌiti ëncëma ꞌicëa ꞌën Papan ꞌë abë ꞌapu ꞌinun ꞌimicësaribi oquin.

Apocalipsis 7:14

Cacëxun cana can: —ꞌËn cana ꞌunaniman. Min camina ꞌunanin. Cacëxun ca ꞌë caxa: —ꞌËnë unicaman ca ami sináncë cupí ꞌaisamaira tëmëraquinbi Nucën Papa Diosmi catamëti ëncëma ꞌicën. Atux ca Carnero ꞌicësaribitia unin ꞌucha cupí aín imi ꞌapati bama, ami catamëti aín ꞌuchacama tërë́ncë ꞌaish aín nuitu upí ꞌaish chucacësa ꞌicën, aín chupa uxuira axa chuañumasa ꞌinun.