Josué 5:1 - Kashibo-Kakataibo Biblia

¹ Kamabi amorreo unibunën ꞌapukaman ka amia bari kuabúkë Jordán kakë baka a ꞌurama ꞌikë ꞌimainun kamabi cananeo unikaman ꞌapu axa parúmpapa Mediterráneo kakë a ꞌurama ꞌikë, akamanbi ka Nukën ꞌIbun Jordán kakë baka anúan Israelkama sikarakënun ëskinun ꞌimikë kuakëxa, kuati ka ꞌaisamaira israel unibumi rakuë́ti abë ꞌakánanti sinánma ꞌikën.

Josué 5:1 ပူးပေါင်းရင်းမြစ်များ

Génesis 12:6

bëbakiani kuani ka Abram a mekama inubiani kuanx Siquem, anua i chaiira nikë Moré kakë anu bëbakëxa. A menu ka cananeo unikamax tsóakëxa.

Génesis 48:22

Usa ꞌain kana min xukë́nkama ꞌinánkësamaira okin mi ꞌinan: Siquem kakë me a mi ꞌinánti ꞌain, ax ka abë ꞌakanantankëxun Amorreo unikama ꞌën bikuan ꞌikën.

1 Reyes 10:5

aín piti ñukama bata ꞌinun mëtuakin ꞌamixun anuxun pikë ñu upiranu nankë isakëxa, isanan ka anua aín suntárunën kushikama ꞌikë, aribi upí isanan aín unikaman chupa upíbu pañumainun, an ꞌapu aín xëati ꞌaxunkë unikamaribi chupa upí pañukë isanan, anuxun Dios rabiti xubunubi ꞌakë anuxuan ñuina rëxun sacerdotekaman Dios xaroxunkë a kamabi isi ratúkin ka ꞌapu xanu an,

Isaías 41:5

Axa parúmpapa nasínu ꞌikë ëmakamanu tsókë unikama ax ka a isi ꞌitsaira rakuë́kankëxa; usai ꞌimainun ka mekama shaíki kamabi mex shaíkiakëxa. Usai ꞌikëbë timë́xun ka ꞌaia kixun iskanti ꞌikën.”

Daniel 5:6

ratuti bëpëki bërëi saki ꞌikë anunbi aín xo rabë́ bëtsimi ratíkai aín maxkámibiki ꞌitsaira rakuë́ti bërëakëxa.

Amós 2:9

Usa ꞌaínbi kana ꞌën mitsúxmi anun unun, amorreo unikama kamabi këñukin ꞌakën; atux ka kushiirabu ꞌaishi kunxantibu atun chaxkë́ ꞌianan roble kakë i chaxkë́ tëmú ꞌiakëxa.

Números 13:29

Négueb kakë me sënënakëkë anu ka amalecita unibu tsótia, ꞌimainun ka ain bashi niñu me anu hitita, jebuseo ꞌimainun amorreo, unibu tsómainun ka parúmpapa kuëbí Jordán kakë anu cananeo uniburibi tsótia.

Josué 24:15

Usa ꞌain kamina mitsun Nukën ꞌIbu rabitisama tani, bëríbi uisa dios kaina mitsun rabitisatani kiax kiti ꞌain: Kaina mitsun chaitiokëkaman Éufrates kakë baka kuëbí pain tsókë ꞌixun rabia dios, a rabiti ꞌain ꞌakima karamina anumi bërí tsókë amorreo unibunën me anu ꞌikë dios akama rabiti ꞌai kiax kamina kiti ꞌain. ꞌAínbi kana ꞌën, xanu ꞌën bakë bëchikëkamabëbi Nukën ꞌIbu kuëënkësa oíshi ꞌiti ꞌain.

Josué 3:16

Ënëx ka anua israel unibu ꞌikë a ꞌurakëoxa ꞌiá ꞌikën, ax ka anua Adam kakë ëma ꞌurama, Saretán ꞌikë a ꞌuramabi ꞌiakëxa, usa ꞌain ka ꞌumpax ax kuabuti parúmpapa bamakë kakë anubi timë́kë ꞌiakëxa. Usakin ka Diosan anúan Israelkama Jericó kakë ëmanu kuani sikarakënun bakanu ꞌikë ꞌumpax tëa rabëti ëskinun ꞌimiakëxa.

Josué 3:17

Usakian Jordán kakë baka ëskinun ꞌimikëbë Israel unibu sikarakëmainun ka sacerdote unikama anua a tanti Diosan bana ꞌikë bunántisa okin ꞌakë, kurin ratakakakë buánkë unikama ax Jordán kakë baka ë́skia me rakákë a nëbëtsi kamabi uníxa sikarakëmainun nirakëakëxa.

Apocalipsis 18:10

Ianan ca racuëti ꞌuracëox quiti icën: —Usai ꞌimari ꞌitibi camina ꞌin. Babilonia chaira, mix bëtsi ëmasama ꞌiá ꞌaíshbi camina bënëtishi Nucën Papa Diosan ꞌuchoquin castícancë ꞌain. Usai ca ꞌapucama quiti ꞌicën.

Jueces 4:2

usokin ꞌaia iskin ka Nukën ꞌIbun achúshi cananeo uni Jabín kakë ꞌapu ax ka Hasor kakë ëmanu ꞌain, abë ꞌakanankin ꞌanun ꞌamiakëxa. A unin suntárunën kushi ka Sísara kakë uni ꞌiakëxa, ax ka Haróset-goím kakë ëma anu tsókë ꞌiakëxa.