Josué 3:7 - Kashibo-Kakataibo Biblia

⁷ Usokëbëtan ka Nukën ꞌIbun Josué kakëxa: Bërí ka Israel unikaman ësokin ꞌën ꞌakëbëtan mix kamina ꞌën kaískë uni atun ꞌapu ꞌai kixun ꞌunánti ꞌikën. Usa ꞌain ka ꞌën kana Moisés ꞌakiansaribi okin mi ꞌakini kixun ꞌunánti ꞌikën.

Josué 3:7 ပူးပေါင်းရင်းမြစ်များ

Juan 17:1

Usaquin aín ꞌunánmicë unicama caíshi manámi bësui abë banaquin ca Jesusan aín Papa cacëxa: —Papan, unían ꞌë ꞌati nëtë ca uaxa. Min camina ꞌëx, min Bëchicë ꞌicë, bamacëbi ꞌë baísquimiti ꞌain, ꞌë rabiquian camabi unin mix camina asérabi cushiira ꞌai quixun ꞌunánun.

Filipenses 1:20

Usa ꞌain cana ꞌëx Jesucristomishi catamëtia uni ië́ti bana, a ñui rabínquinma, ꞌën ꞌacësabi oquin ñuitisa tanin. Usoquin ꞌai cana nëtë camabi ami catamëti asaribi ꞌiisa tanin, ax ca asérabi upíira ꞌicë quixun ꞌunania camabi uni ami catamënun. Bamacëma ꞌixun ꞌën bana ñuixuncë cupí ꞌiananbia, ꞌëx bamacëbëbi uni ꞌën aín bana ñuixuncë cupí Jesucristomi sinánti cana cuëënin.

Josué 1:17

Usa ꞌain kananuna min kakëxun min bana tankin ꞌanan, Moisésnën kakëxun ꞌásabiokin ꞌati ꞌain. Usa ꞌain kananuna nukaman kuëënin Diosan ka Moisés ꞌakiansaribi okin miribi ꞌakinti ꞌikën.

Josué 1:5

Uínbi ka uisaxunbi mibë ꞌakanankin mitsu kanantima ꞌikën, ꞌën kana Moisés ꞌasaribiokin, ꞌën kushínbi ꞌakianan uínsarabi ënkinma mi ꞌakinti ꞌain.

Josué 1:9

ꞌËn kana mi kain usa ꞌain kamina kushi sinani rakuë́tima ꞌain. Usa ꞌain kamina rakuë́kin kana ꞌaíma kixun sinántima ꞌain, min ꞌIbu Dios ꞌëx kana mibë uinu karamina kuani anubi ꞌiti ꞌain.

Josué 3:6

Kanan ka sacerdotekamaribi kakëxa: Bunántisa okin ꞌakë kurin ratakakakë a ꞌukëmëua a tanti banakama ꞌikë ënë ꞌiarukin bibianx kamina a rëkuë́mibiani kuani unikaman ismainun abë baka sikarakëti ꞌain. Usakin kakëxun ka sacerdote kaman bunántisa okin ꞌakë kurin ratakakakë a unikaman ismainunbi buánkëxa.

Josué 3:8

Minribi kamina sacerdote an bunántisa okin ꞌakë kurin ratakakakë a ꞌukëmëu ꞌikë a tanti banakama buannun kati ꞌain, kuani ka Jordán kakë baka aín kuëtsín amáti nirakëkëbëa ëskikëbë ꞌurira kuani anu nirakëti ꞌikën.

Josué 4:14

A nëtën ka Nukën ꞌIbun kamabi Israel unibu Josuénën usakin ñu ꞌaia isi rakuë́kin aín bana tankin an kakësabiokin ꞌanun ꞌimiakëxa, Moisés ñukëma pain ꞌixun ꞌamikëxua abëtan ñu ꞌasarabi okin ka usokin ꞌakëxa.