Josué 24:14 - Kashibo-Kakataibo Biblia

¹⁴ —Ësokian kamabi ñu an a kupín kamina mitsun Nukën ꞌIbu asérabira ami sinánkin rabiti ꞌain. Rabikin kamina mitsun chaitiokëkaman Éufrates kakë baka kuëbí tsókin rabianan Egipto menuxun rabia dios a ënkin Nukën ꞌIbuira ashi rabiti ꞌain.

Josué 24:14 ပူးပေါင်းရင်းမြစ်များ

Génesis 17:1

Usa ꞌain ka Abram axa noventa ꞌimainun nueve baritiañu ꞌikë, Nukën ꞌIbun amiribishi ami mëratëkënkin ësokin kakëxa: —ꞌËx kana min ꞌIbu Dios kamabi kushiñuira a ꞌain, usa ꞌain kamina ꞌëx kuëënkësabi ꞌoíshi tsóanan ꞌëx kikësabiokin kamabi ñu ꞌati ꞌain,

Génesis 35:2

Ësakian kakëxun ka Jacobnën aín aintsikama kanan an ñu mëëxunkë unikama ꞌimainun an ñu ꞌaxunkë xanukamaribi kakëxa: —Kamina mitsun bëtsi dioskama ami rabikëkama a ꞌë bëxunkanti ꞌain, bëanan kamina nashitankëxun mitsun chupa upíbu pañuti ꞌain.

Job 1:1

Anu ka achúshi uni Job kakin anëkë ꞌiakëxa, ax ka Us kakë me anu tsóakëxa, usa ꞌixun ka uisa ñu ꞌatimabi ꞌati sinánkëma ꞌianan, Dios kuëënkësabi okinshi aín nuitu upí ꞌixun ñu ꞌakin bëtsi uni ꞌatima oti sinánkëma ꞌiakëxa.

Salmos 130:4

ꞌAínbi kamina min nux ꞌuchakëkama nu mëníoxunin, usa ꞌixun kananuna nun mi rabiti kuëënin.

Oseas 3:5

Usai pain ënë ñukama ꞌikë ꞌain ka Israelkaman ami sinanatëkënkin, Nukën ꞌIbu Dios rabiti sinántëkënti ꞌikën, ꞌimainun ka atun ꞌapu ꞌia David aín rëbúnki achúshi atun ꞌapu ꞌiti ꞌikën. Anuan ënë nëtëkama këñuti a nëtë ꞌikëbëtan ka ami rakuë́kin Dios upíokin a ꞌakinun kixun ñukáti ꞌikën.

Miqueas 6:8

Ënë ñukama ꞌaxunti ka Dios kuëënima, an ka nukama kaxa uisa ñux kara upí ꞌikën, ꞌimainun uisa ñu nun ꞌaxunti kara ax kuëënia: ax ka ësa ꞌikën, bëtsi unikamabë upí ꞌiti, uisa ñu ꞌakatsi karanuna kia usakinbi ꞌati, ꞌimainun an kakësabiokin ꞌanan ax kikësabiokin ñu ꞌati.

Lucas 8:15

Me upínua ñu bëru nipacëcë, usaribi ca raíri uni ꞌicën. A unicamax ca Nucën Papa Diosan bana asérabi cuacë ꞌixun aín nuitunubi racanaquin upí oquin sinánquin, uisai cara ñu ꞌicëbëtanbi ënquinma a bana quicësabi oquin ꞌaia. Atux ca ñu bëru me upínu nipacëax cotancëx canitancëxun tuaia ꞌaisamaira bimiñu usaribi ꞌicën.

Hechos 9:31

Usa ꞌain ca Judea menu ꞌimainun Galilea menu ꞌimainun Samaria menuribi, axa Jesucristomi catamëcë unicama uínbi ubíocëma ꞌaish chuámarua bucüacëxa, usai ꞌi ca Jesucristomi catamëti ꞌitsarui cushiacëxa. Usaía ꞌicëbë ca raíri uniribi abë timëti Nucën ꞌIbu Diosan bana upí oquin cuati, aín Bëru Ñumshin Upitan ꞌaquincëx ꞌitsarui Jesúsmi sináncëxa.

2 Corintios 1:12

Cananuna asérabi ꞌunanin, Nucën Papa Diosan ꞌimicëx nun nuitu upí ꞌixun cananuna unicama paránquinma ñu upíshi ꞌa quixun. Unicaman ca usaínu ꞌia nu isaxa. Uni itsían nu iscësamaira oquin camina usaínu ꞌia mitsun nu isacën. Usaquin sinani cananuna cuëëinra cuëënin. Nunbi unin sináncësa oquin sinani cananuna usai ꞌicëma ꞌain. Nucën Papa Diosan nu nuibaquin ꞌaquincëxëshi cananuna usai ꞌian.

Efesios 6:24

Mitsúxmi a manutëcëntimoi Nucën ꞌIbu Jesucristomi catamëcë ꞌicëa, Nucën Papa Diosan nuibaquin mitsu ꞌaquinti cana cuëënin. Ashi, Pablo.

Deuteronomio 10:12

Usa ꞌain ka Moisésnën israel unikama kakëxa: ¿añumi mitsun ꞌati kara Diosan kuëënin? An ka kuëënia ax kikësabiokin aín bana kuakin, nun nuitu upí ꞌixun nuibakin ami sinánkin rabiti,

Deuteronomio 6:13

Usa ꞌain kamina Nukën ꞌIbu ashi rabianan ax kuëënkësa okinshi ñu ꞌaxúnti ꞌain, ꞌimainun kamina sinanatëkënkinma asérabi aín anëinshi ñu ꞌati ꞌain.

Filipenses 1:10

An ꞌunánmicëxunmi ñu ꞌatima ꞌaquinma ñu upíshi ꞌati ꞌunánun cana Nucën Papa Dios mitsu ñucáxunin. Usai ꞌiquinmi ax cuëëncësa oquinshi ꞌacë ꞌicë ca Cristonën utëcë́nquin mitsu ꞌuchoquinma upíshi isti ꞌicën.

Josué 24:2

kamikëx rikuatsinkë ka Josuénën kamabi unikama kakëxa: —Ësokin ꞌën mitsu kanun ka Israel unibu nun Dios kiaxa: Bërámaira ka Térah ꞌimainun aín bakë bëchikë rabë́ Abraham kakë ꞌimainun Nahor mitsun chaitiokëkama, atux Éufrates kakë baka kuëbí tsókë ꞌixun bëtsi dioskama rabiakëxa.

Josué 24:23

Kiabi ka Josuénën kakëxa: —Asabi ka, usa ꞌain kamina mitsun dios isa kixun, ꞌarakakë ñukama bitankëxun puti ꞌain, putankëxun kamina Israelkama mitsun nuitunënbi Dios amishi sinánkin rabiti ꞌain.

1 Samuel 12:14

Bërí kamina mitsun añu ꞌanun kara Nukën ꞌIbun mitsu kaia a ꞌanan ashi rabikin ax kikësabiokin ꞌakin aín bana kikë sama oi kamina ꞌitëkënkantima ꞌain, usai ꞌima kamina mikamax an mitsu ꞌakinkë ꞌapu abëbi Nukën ꞌIbu kikësabi ꞌoíshi ꞌikanti ꞌain, usai ꞌikëbë ka mitsun ꞌakë ñukamaxribi upí ꞌiti ꞌikën.

1 Samuel 12:24

Mitsun kamina Nukën ꞌIbun kakësokinshi ꞌakin asérabi kuëënkin ashi rabikanti ꞌain, an ka nu upíokin ꞌitsaira ꞌakinia kixun ami sinánkin.

1 Samuel 7:3

Usa ꞌain ka Samuelnën kamabi israel unikama kakëxa: “Mitsun asérabi mitsun nuitubëtanbi sinánkin a rabikin kamina bëtsi menu tsókë unikaman rabikë diosmi rabikankë a ënkin mitsun ꞌarakakë Astarté tankin ꞌakë a bixun nikanti ꞌain, usakin ꞌatankëxun kamina Nukën ꞌIbu rabikin ax kuëënkësabi okin ꞌakánti ꞌain. Usakin ꞌakëxun ka mitsu filisteo unikama ꞌatima oia chikínti ꞌikën.”