Josué 1:7 - Kashibo-Kakataibo Biblia

⁷ Usa ꞌain kamina ꞌën kakësabi oí rakuë́ti sinanima kushiti ꞌain, ꞌimainun kamina ꞌën uni Moisésnëan ꞌën kakëxun mitsu kuënëoxuan bana ashi tanti ꞌain. A banakama kikësokinbi ꞌakëbë ka kamabi min ꞌakë ñukamax upí ꞌiti ꞌikën.

Josué 1:7 ပူးပေါင်းရင်းမြစ်များ

1 Reyes 2:2

Kamabi uni axa ënë menu tsókë unikamax ka aín nëtë ꞌikëbë ñuia, usa ꞌain kana ꞌitsama nëtë́ishi ꞌitankëx ñuti ꞌain. Usai ꞌëx ꞌikëbëbi kamina mix kushi sinánñu ꞌaish añubimi rakuëma ꞌiti ꞌain.

1 Reyes 2:3

Usai ꞌikin kamina añu ꞌanun kara Dios kiakëxa ax kiásabiokin ꞌanan Moisésnën Diosan ꞌamikëxun kuënëo banakama kikësabiokin ꞌati ꞌain, usokinmi ꞌakëbëtan ka Diosan kamabi min ꞌakë ñukamaxa uinu kaina kuani anuxunmi ꞌakëxbi upí ꞌinun ꞌimiti ꞌikën.

2 Reyes 22:2

Usa ꞌain ka Josíasnën ꞌakë ñukama Diosan upí isakëxa, an ka aín chaitiokë Davidtan ꞌasaribiokin bëtsiokin sinánkinma upíokin ñu ꞌakëxa.

Job 1:8

Kakëxun ka Diosan kakëxa: —¿Uisa uni kara ꞌën uni Job ꞌikë kixun kaina ꞌunan? Asaribi uni ka ënë menu ꞌaíma ꞌikën, an ka ꞌën kuëënkësabi okin ꞌakin ñu upíshi ꞌai tsókin ñu ꞌatima ꞌati sinanan, uibi ꞌatimoti sinanima upí ñuishi ꞌai tsotia.

Salmos 80:19

Nun ꞌIbu Dios kamabi kushiñuira, ¡Bëráma nux ꞌiásabi tsónun kamina, nu ꞌakinti ꞌain! ¡Usokin nu ꞌakinkin kamina nu ië́miti ꞌain!

Proverbios 8:20

ꞌËn kana ñu upí ꞌati sinani bai puntëtan nikësa ꞌixun, upí ñushi ꞌati sinanin.

Números 27:23

Unamikin ka axa ꞌapu ꞌinun aín maxkánu mëkën nankin Nukën ꞌIbun Moisés kásabiokin ꞌakëxa.

Deuteronomio 12:32

Usa ꞌain kamina mitsun ꞌën kakë banakama ënëx kikësabiokin ꞌanan; uisaxunbi mëskukin ꞌën nankë banakama nantima ꞌain, kixun ka atu Moisésnën kakëxa.

Deuteronomio 31:7

Usakin pain atu katankëxun ka Moisésnën Josué kuënxun kamabi Israel unibunën kuamainun ësokin kakëxa: Min kamina rakuë́tima kushikin ënë unikama a ꞌinánuxuan sinántëkëntima okin Nukën ꞌIbun nun chaitiokëkama ka me a binun ꞌakinti ꞌain.

Deuteronomio 4:2

Kamina ënë banakama iskinbi ax kikësama okin bëtsi banakëñun mëskukima ꞌanan achúshi banarabi bikuankima ax kikësabiokin ꞌakin ëntima ꞌain, ꞌën mitsu kakësabiokin; ꞌanan kamina ax kikësaibi oí ꞌiti Dios kia bana usaibi a menu tsókanti ꞌain.

Josué 1:1

Usa ꞌain ka Moisés Nukën ꞌIbun uni ax ñukë ꞌain, Josué an Moisés ꞌakinkë Nunnën bëchikë a Nukën ꞌIbun ësokin kakëxa:

Josué 1:8

ꞌImainun kamina uinsaranbi ënkinma a tanti bana ꞌën ꞌamikëxun Moisésnën kuënëo bana nëtën isanan imë́ribi isti ꞌain, usakin ꞌakin kamina ënkinma ënë bana kikësabiokin ꞌati ꞌain. Usakin mi ꞌakëbë ka kamabi ñu mitsun ꞌakë ñukamax upí ꞌiti ꞌikën.

Josué 1:9

ꞌËn kana mi kain usa ꞌain kamina kushi sinani rakuë́tima ꞌain. Usa ꞌain kamina rakuë́kin kana ꞌaíma kixun sinántima ꞌain, min ꞌIbu Dios ꞌëx kana mibë uinu karamina kuani anubi ꞌiti ꞌain.