Joel 3:1 - Kashibo-Kakataibo Biblia

¹ “Ësai ka Dios kiaxa: Uínsaran nëtën karana axa ami nishkë unikaman tëmëraminuxun ꞌain menu uan ꞌën unikama bëtëkëni anun ka Judá menu ꞌikë ꞌimainun Jerusalén ëmanu tsóti ꞌën unikama utëkënti ꞌikën.

Joel 3:1 ပူးပေါင်းရင်းမြစ်များ

Salmos 14:7

¡Uisati kara Diosan ꞌain bashi Sión kakë anuxunbi an Israel unikama ꞌakinkin ië́minun xutima ꞌik! Uínsaran kara Diosan an kaískë unikama aín menubi utëkënun ꞌimia anun ka, Jacobnën rëbúnkikamax kamabi Israel ëmakamanuax kuëënti ꞌikën.

Proverbios 1:23

Usa ꞌain kamina ꞌën kakëxun ꞌën bana kuati ꞌain, kuatia kana ꞌën mitsu ꞌën ꞌunánkë banakama ꞌunánmianan; ꞌën sinánkë banakama mitsu ñuixunti ꞌain.

Isaías 44:3

ꞌën kana anu uni ꞌikëma menua ꞌumpax ꞌinun ꞌimiti ꞌain, ꞌimianan kana me ëskikë anuribia xëxákama rakanu ꞌimiti ꞌain. ꞌËn kana min rëbúnkikama amiribishi upiti tsókanun ꞌimianan, upíokin sinánxunkin ꞌakinti ꞌain.

Joel 2:29

ꞌImainun kana an mitsu ñu mëëxunkë uni ꞌimainun xanukama atunurubi ꞌën bëru ñunshin a nëtëkaman xuti ꞌain;

Amós 9:14

Usai ꞌikëbëtan kana ñatanbiankin ami nishkë unikaman aín menu buan Israel unikama bëtëkënti ꞌain. Bëkëxun ka amiribishi anuax kaikin atun ëmakama birutëkënkin ꞌatankëx anu tsókin; uvakama ꞌapáti ꞌikën ꞌapáxun ka aín baka xëati ꞌikën; ꞌanan ka aín xubu rapasu ñu ꞌapáxun bimia aín bimi piti ꞌikën.

Números 11:29

Kiabi ka Moisésnën kakëxa: —¿ꞌËn usakin ñu ꞌati kuëënima kaina usai kin? ¡ꞌËn kana kuëënin Nukën ꞌIbun ain bëru ñunshin ꞌinánkëx ka kamabi unix an aín bana ñuikë unikamasaribi ꞌiti ꞌikën!

Números 12:6

kuania ka Nukën ꞌIbun ësokin kakëxa: “Bërí kana mikama ësokin kain: An ꞌëx kikë bana uni ñuixunkë mitsunu ꞌikë kana ꞌën namámikësokin kanan kana namámikinribi kain;

Deuteronomio 30:3

usokinmi ꞌaia ka Diosan mitsu ꞌatima oxunbi mëníokin nuibati ꞌikën. Nuibakin ka amiribishi anua bëtsi menu ꞌikë unikaman bëa me anubi mitsu buántëkënti ꞌikën,