Jeremías 9:19 - Kashibo-Kakataibo Biblia

¹⁹ Kamabi Jerusalénnu ꞌikë unikama sharati masá nuituti inkë ax ka kamaxunbi kuakë ꞌiti ꞌikën: ¡Axa numi nishkë unikaman ka nun ëma masókin rurupaxa!, ¡usa ꞌain kananuna ꞌitsaira ꞌatimokëx tëmëran! Usa ꞌain kananuna nun xubukamaribi chánkapakë ꞌikë axa numi nishkë unikaman ka nun me ënun kixun nu bënëia, usa ꞌain kananuna nun me ënti ꞌain.

Jeremías 9:19 ပူးပေါင်းရင်းမြစ်များ

Isaías 32:9

Xanukama a ñubi ꞌati sinanima bukukë mitsun, kamina ësokin ꞌën mitsu kakëxun kuati ꞌain. Xanukama axa ñu ꞌaíma bukukë mitsun kamina ꞌën bana kuati ꞌain.

Jeremías 15:1

Ësakin ka Nukën ꞌIbun ꞌë kakëxa: Mitsun chaitiokë Moisés ꞌimainun Samuelnën ꞌë bëtánain nirakëxun usakin kamina ꞌatima ꞌai kixun kakëxunbi kana ënë unikama nuibatima ꞌain. Usa ꞌain kamina anu ꞌëx ꞌikë ënuax chikíkiania kuantanun ënë unikama kati ꞌain.

Jeremías 2:14

Israel unikama ax ka unin ñu mëëmikëma; ꞌianan ka atux tëmërakin ñu mëëmikë anuax bakë́ama ꞌikën. ¿Uisa kupín kara usa ꞌikëbi usakin ꞌakanin?

Jeremías 7:15

Usa ꞌain kana anu ꞌiti ꞌën mikama ꞌinan me ënua min xukë́nkama Efraínën rëbúnkikama ꞌasaribiokin mitsu chikínti ꞌain.

Jeremías 7:19

ꞌAínbi ka ꞌëa aín banan nishmikë usamaira oi atúxa kikë bana anunbi nishia, usai ꞌika aín bana anunbi katë́ti ꞌikania. ꞌËx Min ꞌIbu ꞌaish kana ësai kin.

Jeremías 7:29

¡Judá menu tsókë unikama mitsun bu tëatankëx kamina ka masánuitukan kixuan ꞌunántanun niti ꞌain! ¡Nianan kamina aín bashi matákama anu uni ꞌikëma anuax masánuituti kantati ꞌain! Diosan ka mikaman nishmikëxun rakankësa ꞌinun mitsu ëanxa.

Miqueas 2:10

¡Usa ꞌain kamina bërí nirukiani ënuax kuankanti ꞌain! Ënë mex ka anumi mitsux tantikanti ama ꞌikën. ꞌËn kana anuxumi mitsun ꞌatima ñuishi ꞌai ꞌëmi manukankë kupí, asérabi ꞌatimokin ënë me masóti ꞌain.

Miqueas 2:4

A nëtën ka mitsu raíri unikaman ꞌatima okëx masá nuitutia kantaxunkin. Ësakin mitsumi kuaikin kakanti ꞌikën: Nukamax kananuna ꞌaisamaira masokin këñúkë ꞌian; nun ëmax ka Diosnan ꞌikën, ꞌaínbi ka Nukën ꞌIbunan ꞌikëbi axa numi nishkë unikaman ꞌibuaxa usa ꞌikë ka uínbi usakin ꞌaxuma ka ꞌa kixun kati ꞌaíma ꞌikën; usa ꞌain ka nun mekama nu bikuantankëx bëtsi unikamabë ꞌinánanxa.