Jeremías 9:18 - Kashibo-Kakataibo Biblia

¹⁸ ¡Kamikëx bënëkuatsini ꞌishtun aia atux nukama kupín inkëbë; ka kamaxi bëunan mëskúkanti ꞌikën; usai ꞌi kananuna a nëtëkaman masá nuituti nun bëun purupurukai inti ꞌain!

Jeremías 9:18 ပူးပေါင်းရင်းမြစ်များ

Salmos 119:136

Unin min banakama kikësokin ꞌaiama isi, ꞌitsaira anun masá nuitukëbë ka ꞌën bëunkë ax ꞌumpax ꞌikësaira ꞌinun ꞌibuaxa.

Jeremías 14:17

Usa ꞌain kamina ënë bana ñuikin unikama kati ꞌain: Nëtë ꞌimainun ꞌimë́bi kana ꞌëx ënimaira bëunan mëskuti masánuituti, ꞌën kaískë unikamax ka ꞌain ꞌatima ñuira ꞌakë anunbi ꞌain nami tëakësa ꞌinun ꞌatimaxa.

Jeremías 6:26

¡ꞌËn unikaman ꞌini bëchikë xanukama mitsun kamina anun paë masá nuitukin, pañukë anun chupa xëni pañutankëx, chimapunuax kuainakë bëkini anun chuati ꞌain. Usai ꞌi kamina masánuituti nishi inkanti ꞌain, usai ꞌi kamina ꞌain bakë bëchikë achúshira ꞌaíshbi ñukëbëa uni ꞌikë usaribiti ꞌikanti ꞌain; an nu ꞌatima okin masóti unikama ka basirakëma ꞌaínshi ukanti ꞌikën!

Jeremías 7:29

¡Judá menu tsókë unikama mitsun bu tëatankëx kamina ka masánuitukan kixuan ꞌunántanun niti ꞌain! ¡Nianan kamina aín bashi matákama anu uni ꞌikëma anuax masánuituti kantati ꞌain! Diosan ka mikaman nishmikëxun rakankësa ꞌinun mitsu ëanxa.

Jeremías 9:10

Aín bashikama ꞌimainun anu uni ꞌikëma menu ꞌikë pastokama ax ka nëmëkë ꞌikën, usa ꞌain kamina inkanti ꞌain, usa ꞌain ka uíxbi anun ꞌinútima ꞌikën, ꞌimainun ka anua vaca manki banaia kuakë ꞌaíma ꞌimainun, ñuina pëchiñu, ñuina raëkëma akama kuani abati nëtë́kë ꞌiti ꞌikën.

Jeremías 9:20

Xanu kamanribi ka Nukën ꞌIbu Dios kikë bana kuati ꞌikën, kuakin ka ain bana upíokin ꞌati ꞌikën. ꞌAnan ka aín tuákamaribi usai kara inti ꞌikë aribi ꞌunámianan, usaía masá nuituti ini kiti ꞌunamiti ꞌikën:

Amós 5:16

Ësai ka Dios kamabi kushiñuira ax kia: “Kamabi ëmanu anu bukuti mëníokë anuax bëunan mëskuti ꞌimainun ka anun ëmanu niti baikamanuax kuënkëni paëtani ꞌiti ꞌikën. ꞌImainun ka axa naënu tëëkë unikama atux anuaxbi inkanti ꞌikën, inkëbë ka inkëntapunkama axribi anua inkë anuaxbi inti ꞌikën.

Lucas 19:41

Usai quiquianquin rarobianquin, Jerusalén isi ca Jesús nitë́xëti bëunan mëscuti Jerusalénu ꞌicë unicama cai quicësai quiacëxa: