Jeremías 31:9 - Kashibo-Kakataibo Biblia

⁹ Ka kuat, abë banakin ñukánan inkuatsini ka ukanti ꞌikën. Inkuatsini aia kana ꞌën anua ꞌumpax ꞌitsaira ꞌikë me anu bëkin, bai upí anun kuani uisaibi ñumi tuaxkitima anun uanti ꞌain. Usa ꞌain kana ꞌëx Israel unikaman papa ꞌain, ꞌimainun ka Efraínëx ꞌën bakë bëchikë apansa ꞌikën, kiax ka kiakëxa.

Jeremías 31:9 ပူးပေါင်းရင်းမြစ်များ

Salmos 107:7

Usokin pain ꞌatankëxun ka bai puntë ëma achúshi anu tsóti kuanti a mëramiakëxa.

Salmos 23:2

an ka unin basi paxa upíira pimitankëxun aín ñuinakama tantimikësa usaribi okin ka Diosan ꞌë ꞌimia, ꞌimianan ka ꞌumpax bëchuni pakaxkikëma a xëakin ꞌën shima tërënun ꞌë ꞌimia,

Salmos 89:27

ꞌËn kana unían aín bëchikë apan aín biti ñu a ꞌinánkësaribi okin ꞌinánkin, axa kamabi menu ꞌikë unikaman ꞌapu kamasamaira ꞌaish chaiira ꞌinun ꞌimiti ꞌain.

Éxodo 4:22

Usa ꞌain kamina ꞌë ñuikin, faraón kati ꞌain: Ësai ka Nukën ꞌIbu kiaxa: Israel unibunëx ka ꞌën rëkuë́n bëchikësa ꞌikën, usa ꞌikë kana atu nuibatin.

Isaías 42:16

Usakin ꞌanan kana bëxuñu unikama aribi atun ꞌunánkëma bain, buánkin anua niama bain buánti ꞌain. Uankin kana bëánbëankibukë aribi atun ismainubia xabá ꞌinun ꞌimiti ꞌain, ꞌimianan kana me nankë́kë axribia mëníokati upiti rakanun ꞌimiti ꞌain. Ënë ñukama kana, kana ꞌaíma kikínma asérabi ꞌati ꞌain.

Isaías 43:20

Usakin ꞌaia ka ñuina raëkëma, an ñuina bamakë ꞌain nami pikë ñuina chabu a ꞌimainun, ñuina pëchiñu avestrus kakë akamanribi ꞌë rabiti ꞌikën, usa ꞌain kana ꞌën anu uni ꞌikëma menu ꞌumpax kushiira chikiti manámi ki ꞌinun ꞌimin, ꞌimianan kana me anu ñu ꞌirukëmanu bakakama ꞌimin, ꞌimia ka ꞌën kaískë unikaman a ꞌumpax xëati ꞌikën,

Isaías 45:11

Ësai ka aín Israel unikama ꞌIbu Dios upíira an unio ax kia: “¿Mitsun kaina uisai kara ꞌën bakë bëchikëkama ꞌinuxun ꞌaia ꞌë ñuixuanan, uisakin karana ꞌën ñu ꞌati ꞌai kixun ꞌë ꞌunánmiti ꞌain?

Isaías 63:13

¿Uinu kara parúmpapa panárabëti me ëskikë anun inuti raíshkima, caballokama anu uni ꞌikëma me kuankë usaribi kiani kuanun ꞌimianan,

Isaías 63:16

¡Mix kamina nukaman papa ꞌain! Abrahamnëa nukama ꞌunanima ꞌimainuan Israel unikama numi sinánkëbëmabi kamina, Nun ꞌIbu ꞌianan nukaman papa ꞌain; usa ꞌixun kamina ënënsaran nëtëma ꞌa ꞌixunma min ꞌakësabi okin nu bitëkënin.

Isaías 64:8

Usa ꞌaínbi kamina mix Nun ꞌIbu ꞌaish nun papa ꞌain; nukamax kananuna me uniokë ꞌain, usa ꞌain kamina mix an me bëtsi bëtsi ñu tankin ꞌakë usaribi ꞌain; ¡usa ꞌain kananuna kamabi nukamax minbi me unío ꞌain!

Jeremías 31:20

Efraínnu ꞌikë unikama ax ka, ꞌëx amira sinánkë bakë bëchikë usaribi ꞌikën; usa ꞌaish ka ax ꞌën kuëëinrakë ꞌën bakë bëchikë ꞌikën. Usa ꞌikë kana ñu ꞌatima ꞌaia usakin kamina ꞌatima ꞌai kixun kan, ꞌaínbi kana ami manukima usakin kamina ꞌatima ꞌain kixun kain; usa ꞌain kana ꞌën nuitunën upitani kuëënkin, atu ꞌitsaira nuibatin. ꞌËx min ꞌIbu ꞌaish kana asérabi ësai kin.

Oseas 3:5

Usai pain ënë ñukama ꞌikë ꞌain ka Israelkaman ami sinanatëkënkin, Nukën ꞌIbu Dios rabiti sinántëkënti ꞌikën, ꞌimainun ka atun ꞌapu ꞌia David aín rëbúnki achúshi atun ꞌapu ꞌiti ꞌikën. Anuan ënë nëtëkama këñuti a nëtë ꞌikëbëtan ka ami rakuë́kin Dios upíokin a ꞌakinun kixun ñukáti ꞌikën.

Malaquías 2:10

¿Kamabi nukamax karanuna achúshi papañushima ꞌain, ax kara Dios an nu kamabi unio ꞌama ꞌik? ¿Uisa kupín karanuna nukamax bëtsi bëtsibë paránankin, nun chaitiokë kamabëtan Diosan ꞌa achúshi ñu a ꞌaisama oin?

Mateo 3:3

Juan ax ca a Isaíasnën Nucën Papa Diosan sinánmicëxun ñuiá a ꞌicën. Ësai ca a bana quia: Anu uni ꞌicëma menuxun munuma bana ñui ca a unix ësai quia: Nucën ꞌIbu ca aia, camina axa anun uti bai mëníoquin racanati ꞌain.

Mateo 5:4

Axa masá nuitucë uni a ca Nucën Papa Diosanbi aín masáquin sináncë nëtë́miti ꞌicën. Usai ca ꞌiti ꞌicë quixun ꞌunani ca chuámarua tani cuëënia.

Mateo 6:9

Usa ꞌain camina ësaquin cai Nucën Papa Diosbë banati ꞌain: Nucën Papa Dios, naínu ꞌicë, mix camina asérabi min sinan upíira ꞌain. Usa camina mix ꞌai quixun ca camabi uni mi ñui upí banáinshi banati ꞌicën.

Lucas 6:21

Mitsux ꞌacëñuma pananquinbi camina ꞌunánti ꞌain, mitsúxmi panani bënë́axma ꞌinun ca Nucën Papa Diosan mitsu ꞌinánti ꞌicën. Usai ca ꞌiti ꞌicë quixun ꞌunani camina chuámarua tani cuëënti ꞌain. Masá nuituti iníbi camina Nucën Papa Diosanbi ca ꞌë cuëënun ꞌimiti ꞌicë quixun ꞌunani chuámarua tani cuëënti ꞌain.

Romanos 8:26

Uisa caranuna ꞌiti ꞌai quixun isnuxun cainia ca Nucën Papa Diosan Bëru Ñunshin Upí an nuxnu tëmëraiabi nu ꞌaquinia. An nu ꞌaquinun quixun caquinbi cananuna uisaquin cai carana Nucën Papa Diosbë banati ꞌai quixun upí oquin ꞌunaniman. Usa ꞌaínbi ca Nucën Papa Diosan Bëru Ñunshin Upí anbi nu Nucën Papa Dios ñucáxunia. Usoquin nu ꞌaquinquin ca nun nu a Nucën Papa Dios ñucácëma banacama a nu ñucáxunia.

2 Corintios 6:18

ꞌImianan cana mitsun Papa ꞌiti ꞌain. ꞌIcëbë camina mitsux, bëbu ꞌimainun xanucamaxribi, ꞌën bëchicë ꞌiti ꞌain. Usai cana mitsun ꞌIbu Dios, cushiira, ꞌëx quin.

Deuteronomio 32:6

¿Mitsun kaina usakin Nukën ꞌIbu ꞌati ꞌain? Mitsux kamina ñu ꞌunánkëma ꞌain, usa ꞌaish kamina ñu ꞌunánkëmabu ꞌain. ¿Ax kara min papa ꞌianan an mitsu unio ama ꞌik? ¡An ka mi uniotankëxun mi anun tsóti ꞌinánkëxa!

Hebreos 12:13

Usa ꞌixunmi mitsun aín cuëëncësa oquin ꞌaia isquin ca raíri uniribi ami catamëti upí oquin ꞌunáncëma ꞌaíshbi a ëníma mitsux ꞌicësaribiti ꞌiti ꞌicën. Usaía atux ꞌinun camina Jesucristomi catamëquin aín cuëëncësa oquin ꞌati ꞌain.

Hebreos 12:23

Anuribi uicamax cara ainan ꞌicë, aín anë ꞌacë, acamanribi ca a rabia. Anu ca ax ꞌApuira ꞌixuan an camabi unin ꞌacë ñu iscë, Nucën Papa Dios, ax ꞌicën. Anuribi ca Nucën Papa Diosan ainan ꞌicë upí ꞌimicë ꞌaísha bamacë unicama aín bëru ñunshin ꞌicën.

Hebreos 5:7

Jesusan ca ënë menu ꞌaish abë banaquin aín Papa ñu ñucácëxa. Ñucáquin ca axa bamatimoquin a ië́miti cushiñu ꞌicë ꞌunánquin, munuma banaquin cacëxa. Usaquian ax cuëëncësabi oquin ꞌaquinun quixun ñucácë cupí ca Nucën Papa Diosan Jesucristo ꞌaquiancëxa.