Jeremías 31:7 - Kashibo-Kakataibo Biblia

⁷ Ësai ka Nukën ꞌIbu kiaxa: “Israel unikama Jacobnën rëbúnki, mitsux kamina munuma kantai kuëëni ësai kikanti ꞌain, nux kananuna bëtsi ëma kamasamaira ꞌain. Usa ꞌain kamina ësaiki kantakin mitsun bana kuami ësai kikanti ꞌain. Nukën ꞌIbun ka aín unikama ꞌakinkin ië́miakëxa, nukamax kananuna bëtsi menu bua ꞌaíshbi ñukëma amiribishi utëkëan.

Jeremías 31:7 ပူးပေါင်းရင်းမြစ်များ

Salmos 126:2

Usa ꞌain kananuna ꞌitsaira kuëëni munuma kuai kuëëankën; usai ꞌia isi ka bëtsi menu ꞌikë unikama kánani kikankëxa: ¡Nukën ꞌIbun ka ñu chaiirabu atu ꞌaxuanxa!

Salmos 14:7

¡Uisati kara Diosan ꞌain bashi Sión kakë anuxunbi an Israel unikama ꞌakinkin ië́minun xutima ꞌik! Uínsaran kara Diosan an kaískë unikama aín menubi utëkënun ꞌimia anun ka, Jacobnën rëbúnkikamax kamabi Israel ëmakamanuax kuëënti ꞌikën.

Salmos 69:35

Diosan ka Jerusalénnu ꞌikë unikama ië́mianan Judá ëmakama amiribishi birutëkënkin ꞌanun ꞌamiti ꞌikën. Usakin ꞌakë ꞌain ka min unikamax a ëma ꞌibuai anu tsóti ꞌikën; usai ꞌikin ka min unikaman rëbúnkinën atunanbi ꞌinun a ëmakama biti ꞌikën, ¡Ui unikaman kara min anën mi rabikin mix kikësabiokin ꞌaia atun ka anu tsókin a ëmakama ꞌatëkënti ꞌikën!

Isaías 1:9

Nukën ꞌIbu Dios ax kamabi kushiñu ꞌixun ka nun chaitiokëkama ië́miama ꞌain sapi kananuna, nukamax bëríbi Sodoma ꞌimainun Gomorra ꞌiásai ꞌaíma ꞌitánun këñúkë ꞌitsían.

Isaías 44:23

¡Naíkamë ꞌëo ax ka munuma kuëëni kuënkënti ꞌikën, usakian Nukën ꞌIbun ñu ꞌakë a isi! ¡Munuma kuënkëni ka me chaiira nankë́kë kamax unix ꞌikësaribiti ꞌiti ꞌikën! ¡Aín bashikama ꞌimainun ninu ꞌikë ikama axribi ka munuma unix ꞌikësai kuëënti ꞌikën, Nukën ꞌIbun ka aín kushi chaiira ismikin Israel unikama Jacobnën rëbúnkikama ië́miaxa usa ꞌain!

Isaías 52:8

¡An bërúankë! Unikama mitsux kamina munuma banai kiti ꞌain, kimainun ka bëtsíxribi ñusmokin bëtsi ꞌatankëx anun kiti bana anun kiti ꞌikën, atun ka aín bërúnbi uisa kuatsini kara utëkëni Nukën ꞌIbu Jerusalénnu aia isti ꞌikën.

Isaías 61:9

Usa ꞌain ka aín rëbúnkikamax bëtsi bëtsi menu ꞌikë unikaman upíokin ꞌunánkë ꞌiti ꞌikën; usokin ꞌunánkë ka an iskë unikaman, atux ka Nukën ꞌIbunbia aín uni ꞌikë upíokin sinánxukin ꞌakinkë ꞌikë kixun ꞌunánkanti ꞌikën.

Jeremías 20:13

¡Nukën ꞌIbumi ka kantakan Nukën ꞌIbu ka rabikan!, an ka ꞌatima ñu ꞌakë unikaman tëmëramikëx bënëtiabi uni ië́mia.

Jeremías 23:3

ꞌËnbi kana ꞌën unin raírikama anuaxa abánun ꞌën ꞌimia anubi utëkënun ꞌimiti ꞌain, ꞌimikëx ka aín ëmanubi ꞌutëkënti ꞌikën, usai ika ovejakama ꞌain pastonu kuantëkënkë usairibi ꞌiti ꞌikën, anuax ka bakë bëchipati ꞌuakamë ꞌëoti ꞌikën.

Jeremías 31:12

Usakian chikinkëx utankëx ka kuëëni kantai Jerusalénnu ꞌikë matákamanuax kuëënti ꞌikën, usai ꞌia Nukën ꞌIbun ꞌakinkin ñu ꞌinánkëx ka: ꞌitsaira kuëënkanti ꞌikën kuëënika, trigo ꞌimainun uvas baka ꞌakë vino ꞌimainun xëni ꞌianan, ovejakama ꞌimainun vacakamañu ꞌiti ꞌikën. Usa ꞌain ka a unikamax an ië́mikëx amiribishi ꞌain ꞌIbu Diosmi katamëti aín menu tsókë ꞌaish unin aín xubu rapasu ꞌapáxun ꞌupiokin ñu bërúankësa usaribi ꞌaish, amiribishi ñusmatëkënima kushi ꞌikanti ꞌikën.

Oseas 1:7

ꞌAínbi kana Judánu ꞌikë unikaman ꞌapu atumi ꞌatimakin sinanima ꞌikima nuibati ꞌain: usakin nuibakin kana ꞌëxbi ꞌain Dios ꞌixun ië́miti ꞌain. ꞌAínbi kana ꞌakanankë ꞌianan, kantiñu ꞌianan, manë xëtokëñu ꞌianan, caballo an nikinkë uniñu ꞌikëbi a kupín ꞌimikima ꞌënbi ië́miti ꞌain.”

Joel 2:32

ꞌAínbi ka kamabi unikama an Nukën ꞌIbun anë rabikë atun bamatinuax ië́ti tanti ꞌikën, usa ꞌain ka aín bashi Sión kakë Jerusalénnu ꞌikë anu ka anua atux ië́ti ꞌiti ꞌikën. Nukën ꞌIbu usai ka ꞌiti ꞌikë kiax kiásabi oi. Usa ꞌain ka an kaískë unikamax bamanuxbi tsókëpan ꞌiti ꞌikën.

Amós 5:15

¡ꞌAtima ñu a timakin kamina! ¡Upí ñuishi ꞌati ꞌain! anuxun bana mëníoti anuxun kamabi upíokin ꞌakinkëbë; sapi ka Dios, kamabi kushiñu ax mitsubë ꞌiti ꞌikën, usai ꞌikin ka axa raíri këñumainun tsókëpan Israel unikama a nuibati ꞌikën.

Miqueas 2:12

Usa ꞌain ka ësai Dios kia: ꞌËn unikama kana bëtsi unikaman buan ꞌikëbi amiribishi Jacobnën rëbúnkikama kamabi timë́nun ꞌimiti ꞌain; usokin ꞌakin kana Israel unikama ꞌitsamara ꞌikëbi atu timë́nun ꞌimiti ꞌain ꞌimikin kana ñuina ꞌarakakë aín kënënu ꞌikësa ꞌinun ꞌimianan carnerokaman pasto pia ꞌikësa ꞌinun ꞌimiti ꞌain, usokin ꞌimikëx ka Israel unikamax ꞌuakamë ꞌëoi ꞌitsaira ñuina ꞌarakakëx ꞌikësai sharákanti ꞌikën.

Miqueas 7:18

Misaribi bëtsi Dios ka ꞌaíma ꞌikën, min kamina nux kuëënkësa oí ꞌikë a mëníokin, nuxnu ꞌuchakëkama a manuin, nukamax kananuna min unikama ꞌitsamashi tikikë a ꞌain. Min kamina nukama nuibatin usa ꞌain kamina mix xënibua ꞌaish nishkëma a ꞌain.

Romanos 11:5

Usaía bëráma uni ꞌiásaribiti ca bëríribi judíos unicama aín patsan Nucën Papa Diosmi sináncëma ꞌaínbi raírinëx ainan ꞌinúan caíscë ꞌaish Nucën Papa Diosmi sinania.

Romanos 9:27

Isaíasnënribi ca Nucën Papa Diosan ꞌamicëxun judíos unibu ñuiquin ësaquin cacëxa: “Israelnën rëbúnqui ꞌaisamaira, parúnpapa cuëbí ꞌicë masisa, ꞌaíshbi ca acama ꞌitsamanëxëshi asérabi Nucën Papa Diosnan ꞌinux ië́ti ꞌicën.

Deuteronomio 32:43

Usa ꞌain ka Moisés Nukën ꞌIbu rabi kantatankëx sënënishi ësai ki kantakëxa: ¡Kamabi menu ꞌikë unikamaxribi ka Diosan kaískë ꞌaíshmabi aín unikamabë a rabi kantai kuëënti ꞌikën! ¡Usa ꞌain ka Diosan aín unikama an ꞌakë uni a ꞌanan, ain ëmanubi tsókë aín uni Israelkama nuibakin ꞌakinti ꞌikën usakin ꞌakin ka axa aín unikamami nishkë unikamaribi ꞌati ꞌikën!