Jeremías 23:5 - Kashibo-Kakataibo Biblia

⁵ Ësai ka Nukën ꞌIbu asérabi kiakëxa: “Ka is achúshi nëtë ka uti ikë, anúan Davidtan rëbúnki ꞌibuira, ax ꞌapu achúshi ñu ꞌunairakë ꞌixun unikama ꞌakinkin, Judá menu ꞌikë unikama ainra upíokin ñu ꞌaia bukunun ꞌakinti ꞌikën, usokëx ka ñu ꞌatima ꞌaíma upiti tsóti ꞌikën.

Jeremías 23:5 ပူးပေါင်းရင်းမြစ်များ

2 Samuel 23:3

Israel kaman Dios ax ka ësai kiaxa: An Israel kama ꞌakinkë Dios an ka ꞌë ësokin kakëxa: An unikama aín ꞌapu ꞌixun ꞌakinti ax ka uisa ñu ꞌatimabi ꞌakëma ꞌiti ꞌikën, usa ꞌixun ka Diosan kuëënkësabi okin unikama ꞌakinti ꞌikën,

Salmos 80:15

minbi kamina uvas ꞌapákësaribi ꞌitánun nu bëakën, usokin ꞌaxun kamina minbi nu bërúankën.

Isaías 33:5

Nukën ꞌIbu ax ka kamabi ñun ꞌibu ꞌaish a manámi ꞌianan naíkamë ꞌëonuribi ꞌia; an ka Jerusalénnu ꞌikë unikama ꞌimainun Judá menu ꞌikë unikama raíri uisai kara ñu upíshi ꞌai upí tsóti ꞌikë kixun ꞌunánmiaxa,

Isaías 42:6

“ꞌËx min ꞌIbu ꞌixun kana ꞌën unimi ꞌinun mi kuëankën, ꞌimainun kana ꞌën mëkënan tuinkësa ꞌixun mi ꞌakinkëxmi, a banamiti ñusa ꞌixunmi, min uni ië́minun mi ꞌimiti ꞌain; ꞌën kana mi uniokën, usa ꞌixun kamina min, ꞌën ꞌa ñukama ñuikin ꞌën unikama kati ꞌain, an ka min tirítan pëkakësa ꞌixun bëtsi menu tsókë unikama asérabi ënkinma upíokin ñu ꞌanun ꞌunánmiti ꞌikën.

Isaías 45:24

kiti ꞌikën: Nukën ꞌIbun ka ax kushiira ꞌixun kamabi axa ami nishkë unikama ꞌati ꞌikën. Usa ꞌain ka uikamax kara ꞌëmi nishi ꞌë istisama tania akamami uni kuaiti ꞌikën.

Isaías 52:13

ꞌËn uni akana an ꞌakë ñukamax ka upí ꞌiakëxa, ꞌikëbëtan ka axa aín kushiira ꞌi manámi ꞌinun ꞌimiti ꞌikën.

Isaías 53:10

Nukën ꞌIbun ka ꞌitsaira a tëmëramisa tankëxa. Usai ax unin ꞌucha kupí ñukë ꞌixun ka ꞌitsaira baritia xënibua, ꞌaínbi tsókin aín rëbúnkikama isti ꞌikën; usa ꞌixun ka Nukën ꞌIbu kakësabiokin an sinánkësa okin ꞌati ꞌikën.

Isaías 53:2

Nukën ꞌIbun ka kuëëankëxa, aín uni axa ñu ꞌapákëx bërí koi kani aín tapunkama me ëskikë ꞌukëmëu kuankë usairibi ꞌiti. Usa ꞌaínbi ka upíma ꞌianan, chabáchabákikë upima ꞌiakëxa, ain namix ka usa ka kixun unin ñachakin istisama ꞌiakëxa;

Isaías 9:5

Min kamina ꞌakanani kuankian suntárukaman aín taxaka pañubiankin anun me banamibiankë a ꞌimainun aín chupa ꞌakanankian imin shikë a kamabi tsin në́nkin xaronun ꞌamiti ꞌain.

Isaías 9:6

Usa ꞌain ka nunu achúshi tuá bakënun ꞌimiaxa, Diosan ka nukama achúshi tuá ꞌinánxa, a tuá ka axa ꞌapu ꞌitiokin aín kushi ꞌinánkë ꞌiti ꞌikën. Usa ꞌikë ka ësokin kakë ꞌiti ꞌikën: “An bana ñuixunkin ꞌësëkëxun kuati upitani kuëënti,” “Dios uínbi kanantisama,” “Nukën papa Dios axa këñutima oi tsókë,” “Achúshi ꞌapun rëkuë́n bëchikë chuámarua ꞌinun uni ꞌakinux bakë́an.”

Isaías 9:7

Ax ka anua David tsóa anubi tsóti ꞌikën; usa ꞌikë ka ax kushiira ꞌixuan ñu ꞌaia kamabi menuxun kuati ꞌikën ꞌimainun ka chuámarua uni tsóti ax këñutima ꞌikën; usa ꞌixun ka uínsaranbi axa ꞌapu ꞌia ax ënkëma anubi ꞌiti ꞌikën, usa ꞌain ka an ꞌakë ñukama ax upíokin ꞌakë ꞌianan, an bërí pëukin ñu ꞌakë ax uínsaranbi nëtë́tima usabi ꞌiti ꞌikën. Ësokin ka Dios kamabi kushiñuira an ꞌitsaira unikama nuibakin ꞌati ꞌikën.

Jeremías 23:6

A nëtëkama ax ꞌapu ꞌain ka, Judá menu ꞌikë unikama ꞌië́mainun, Israel unikamaribi uínbi ubíokëma upitax tsóti ꞌikën. Ësokin anëkë ka ꞌiti ꞌikën: Nukën ꞌIbu ax ka an nu ië́mikë ꞌikën.”

Jeremías 31:27

Ësai ka Nukën ꞌIbu asérabi kiakëxa: “Ka kuat, kamina kuakanti ꞌain, anun ꞌën uni kaikamë ꞌëomainun ñuinakamaribi ꞌaisamaira Israelnu ꞌimainun Judá menu ꞌimiti achúshi nëtë ka ꞌiti ꞌikën.

Ezequiel 34:16

ꞌËnbi kana ꞌën unikama ovejakama ꞌarakakë ꞌikësaia amami amami kuani nëtë́këkama a bëtëkënti ꞌain, bëkin kana axa ꞌinsínkë akamaribi ronkin chupa sanin aín taëmi ñukë tëkërëkaxuanan, axa ñusmakëkamaribi kushinun bërúanti aín, ꞌanan kana xuabu ꞌimainun aín kushibu akamaribi bërúankin. ꞌËn kamabi atu bërúanti ꞌain.

Ezequiel 34:29

Usa ꞌain kana ꞌën atun menuaxa ꞌapákëx ꞌitsaira ñu biminun ꞌimiti ꞌain, usakin ꞌimikëbë a piti ñu ꞌitsa ꞌain numin ꞌi tëmëratëkëntima ꞌikën, ꞌimainun ka bëtsi menu ꞌikë unikama atumi kuai banatëkëntima ꞌikën.

Daniel 9:24

Setenta semana ax ka (cuatrocientos noventa baritia inuti ñui kikë ꞌikën) min unikama ꞌimainun min ëma upí a inuti ꞌikën, inutankëxun ka ax bana kuaisama tani ꞌikëkama ꞌimainun aín ꞌuchakë kamaribi ënti ꞌikën. Usai ꞌia ka Diosan aín ꞌuchakëkama unikama tërënxunti ꞌikën, usakin ꞌakin ka uníxa bëtsibë bëtsibë xënibua ꞌaínbi nuibananti a nanti ꞌikën. Usai ka min namákësokin iskë ꞌimainun an bana ñuikë Jeremías ax kiásabi oi ꞌiti ꞌikën, ꞌianan ka upíira kakë anu ꞌikë ax upíira ꞌitánun mëníokë ꞌiti ꞌikën.

Oseas 1:11

Usa ꞌain ka Judánu ꞌikë unikama ꞌimainun Israel unikama timë́kë ꞌiti ꞌikën, usa ꞌixun ka achúshi ꞌapuishi anëkanti ꞌikën, usokin ꞌan ka kamabi menu ꞌikë Israel unikama Jerusalénnu timë́kanti ꞌikën. Usakin ꞌimikëbë ka a nëtëkaman Jezreel kakë me sapan anuax ꞌitsaira kuëënti ꞌikën.

Oseas 3:5

Usai pain ënë ñukama ꞌikë ꞌain ka Israelkaman ami sinanatëkënkin, Nukën ꞌIbu Dios rabiti sinántëkënti ꞌikën, ꞌimainun ka atun ꞌapu ꞌia David aín rëbúnki achúshi atun ꞌapu ꞌiti ꞌikën. Anuan ënë nëtëkama këñuti a nëtë ꞌikëbëtan ka ami rakuë́kin Dios upíokin a ꞌakinun kixun ñukáti ꞌikën.

Amós 9:11

A nëtë ꞌikëbëtan kana ꞌën David ꞌapu ꞌain ꞌasaribiokin Israel unikama ꞌapuñu ꞌinun ꞌimiti ꞌain. ꞌImikin kana kamabi ñukama anu ꞌikë akama ꞌatëkënun ꞌamiti ꞌain,

Miqueas 5:3

Usa ꞌain ka bërí Diosan aín unikama ënia, ꞌaínbi ka xanun aín tuá achúshi bakënuxun kainkë usa ꞌiti ꞌikën. Usa ꞌain ka a tuá aín aintsi Israelkama ñatanbiankin buánkama abë birananti ꞌikën.

Zacarías 9:9

(Ësai ka Dios kia.) ¡Sión ëmanu tsókë unikamax ka ꞌitsaira kuëënti ꞌikën! ¡ꞌImainun ka Jerusalén ëmanu tsókë unikama atúxribi kuëëni kantati ꞌikën! Mitsun ꞌapu, upí ainra kamabi ñu kananti ax ka aia, ꞌaínbi ka mënin sinaínshi ꞌaish, achúshi burro xanuntuá bërí kanikë a kamanan tsótax aia.

Mateo 2:2

Cuani bëbaquin ca ñucácëxa: —¿Uinu cara axa judíos unibunën ꞌapu ꞌinun bërí bacë́ncë a ꞌic? Aucüaxa bari urucë anuxun cananuna anun a ꞌunánti ꞌispa isbëtsian. A isbëtsini cananuna ꞌunánbëtsini a rabi ain.

Juan 1:45

Usaquian Jesusan cacëx cuanxun ca Felipenën Natanael cacë uni bariquin mëraquin cacëxa: —A ñuiquian Moisés ꞌimainun an Nucën Papa Diosan sinánmicëxun uni bana ñuixuncë unicaman cuënëo, a uni cananuna mëran. Ax ca Jesús, Nazaretnu ꞌicë uni, Josénën bëchicë, a ꞌicën.

Juan 1:49

Cacëxun ca Natanaelnën cacëxa: —Mix camina Nucën Papa Diosan Bëchicë ꞌianan Israel unicaman ꞌapu ꞌain.

1 Corintios 1:30

Nucën Papa Diosan ꞌimicëx camina ami catamëti Cristo Jesúsbë ꞌianan an sinánmicë ꞌain. Usa ꞌaish camina Cristo Jesús cupía, ax cuëëncësabi oquinshimi ꞌanun Nucën Papa Diosan ië́micë ꞌain.

Hebreos 8:8

Nucën Papa Diosan ca judíos unicama an cacësabi oi ꞌiiama isacëxa, aín bana cuënëo ësai quicësabi oquin: Nucën ꞌIbu Dios ca quia, usai ca judíos unicama, Israelnën rëbúnqui ꞌiti ꞌicë quixun Moisés cuënëomia bana ꞌinan, ꞌixunbi cana ꞌitsa bari inúcëbëtan bëtsi bana judíos unicama ꞌinánti ꞌain. Anun ꞌën a bana ꞌinánti nëtë ca uti ꞌicën.

Apocalipsis 19:11

Usaquin ángelnën cacëxun cana naí panárabëcë isan. Anuaxa caballo uxua chiquitia cana isan. Ax a caballonu tsócë, ax ca Aín Quicësabi Oquin ꞌAcë caquin anëcë ꞌianan ca An Uni Paráncëma caquin anëcë ꞌiaxa. Usa ax ꞌixun ca ꞌatima unicama a uisoquin cara ꞌaisa tania usoquin castícanan axa upí sinánñucama a upí oia.