Jeremías 2:20 - Kashibo-Kakataibo Biblia

²⁰ Bërí ka ꞌitsabaritia anun mitsun ꞌën bana kuaisamatani ꞌikan ꞌikën, usai ꞌi kamina ꞌëbë ënanankësa ꞌiakën, ꞌianan kamina ꞌë rabitisama tani ꞌikankën. Usai ꞌikin kamina ꞌë kakën: Bërí kananuna min kakësokin ꞌatima ꞌai kixunribi ꞌë kakankën. ꞌIanan ka kamabi aín bashi manámi ꞌikë ꞌimainun i pëñanakëkëkama tëmúxun, xanun uni aín nami ꞌami ꞌikësaishi niakën.

Jeremías 2:20 ပူးပေါင်းရင်းမြစ်များ

1 Reyes 12:32

ꞌAnan ka anbi ꞌati kuëënxun anun bëtsi ñu rabikin fiesta ꞌati nëtë nankëxa, a ka mapai achúshi ꞌimainun rabë́ ꞌuxë ꞌirukë axa mapai rabë́ nëtë ꞌikë a nëtë nankëxa, nankë ꞌain ka anuxun Judánu ꞌikë unikaman fiesta ꞌakëxa, ꞌakin ka anuxun xaroti ꞌakë anuxun ñuina xarokëxa. Ësokin Betelnuxun ꞌakin ka vaca bakë tankin ꞌakë a ñuina xaroxuankëxa, ꞌanan ka an vaca bakë tankin ꞌakë rabikin ñuina xaroxunti sacerdote anëakëxa.

Salmos 107:14

ꞌakinkin ka bë́anbëan kikësanu ꞌikëbi chikíanan manë risin tëkërëkakësa ꞌinua atux tëmërakë anua chikíankëxa.

Salmos 2:3

Sinani ka atuxi munuma banai kikania: ¡Usakin ꞌakin kananuna atun kushian an kuëënkësokin nu ꞌanun ꞌamitima ꞌain! ¡Usai ꞌikananuna atun ubiokëma bukuti ꞌain!

Éxodo 19:8

Ñuixunkëxun kuati ka Israel unikama kamáxbi sharati kikankëxa: —Uisai ꞌinun kara Nukën ꞌIbu kiaxa usaibi kananuna ꞌiti ꞌain. Ësaia unikama kikëbëtan ka Moisésnën usaía unikama kikë a ñuikin Nukën ꞌIbu kai kuankëxa,

Éxodo 24:3

Ësakin Diosan kakëx kuanxun ka Moisésnën kamabi Israel unikama Nukën ꞌIbu kakë banakama ñuixuankëxa: —Ñuixunkëx ka asábi ka usa ꞌain kananuna kamaxunbi Nukën ꞌIbun kikësabiokin ꞌati ꞌain, kiax kikankëxa.

Éxodo 3:8

Usa ꞌain kana ꞌënbi a isi ubuan, egipcio unikaman ꞌaisamaira okin tëmëramia kana chikinuxun ꞌain. Ënë menua chikínbiankin kana atu me chaiira ꞌimainun upíira anua ꞌaisamaira ñuina xuma ꞌianan a piti ꞌitsaira ꞌimainun buna rëpa ꞌumpax iskësaira ꞌikë anu buánti aín. A mex ka anua cananeobë, hititas, amorreos, ferezeos, heveos ꞌimainun jebuseos unikama ꞌikë anu kana buánti ꞌain.

Isaías 1:21

¡Jerusalén ëmanu ꞌikë unikamax ka upiti buküakëxa, ꞌaínbi ka bërí bëtsi bëtsi unibë ꞌikë xanusa ꞌikën! Bëráma kamina mitsux upiti tsókin upíokin ñu ꞌakë ꞌiakën, ꞌanan kamina upiti tsóakën, ꞌaínbi kamina bërí an uni ꞌakë unikamasaribi ꞌikanin.

Isaías 9:4

Min kamina tëmëramikin ñu mëëmikëx atsankin bëtsi sinaniabi ꞌapukamanua, tëmërakin ñu mëxuma ꞌanun nu chikiankën. Usabi okin kamina mix Dios ꞌixun Madiánu ꞌikë unikamami ꞌasaribiokin nukama ꞌakën.

Jeremías 2:31

(Axa bërí tsókë mitsun kamina ꞌën bana upíokin kuati ꞌain, ꞌëx kana Dios ꞌain.) Israel unikama, ¿ꞌëx karana anu uni ꞌikëma mesa mitsunan ꞌian? ¿ꞌianan karana anua me ꞌitsaira bëánkibukë chichabiantisama usaribi mitsunan ꞌian? ꞌËn unikama, ¿uisa kupín kaina: bërí kananuna uisa ñu ꞌatimabi inútima ꞌai kianan, uínsaranbi kananuna mi sinántëkëntima ꞌai kikanin?

Oseas 1:2

Ësai ka uisai kara Israel unikama ꞌiti ꞌikë kixun ñuixunkin Oseas kai Dios kiakëxa: “Kamabi Israel menu ꞌikë unikama ka bëtsi bëtsi ñu ꞌai ꞌëmi manuti xanu aín nami mëakakënëx ꞌikësai ꞌiaxa. Usa ꞌain kamina minribi anu kuantankëxun achúshi xanu bëtsi bëtsi unibë ꞌikë min xanu ꞌinun biti ꞌain, bitankëxun kamina ami bakë bëchiti ꞌain, bëchikëx ka akamax achúshi xanu aín nami mëakakënën tuá ꞌiti ꞌikën.”

Oseas 2:5

Aín titax ka bëtsi bëtsi uni aín nami ꞌamikë ꞌiakëxa; usa ꞌaínbi ka upí sinánñu xanu ꞌikë a nëtë́ti kiakëxa: Abë ꞌëx ꞌikë unikama a kana bari kuanti ꞌain, atun ka ꞌën piti ꞌimainun ꞌumpax, ꞌianan ꞌën pañuti chupa lino ꞌakë a ꞌianan, xëni ꞌimainun a ꞌën xëati akama ꞌë ꞌinania.

Oseas 3:3

Usakin ꞌaxun kana ꞌën kan: ꞌitsa nëtën kamina ꞌën xubunu ꞌëbë ꞌiti ꞌain; usa ꞌain kamina bërí bëtsi bëtsi uni min nami ꞌamima ꞌianan uni itsibë ꞌitima ꞌain. Usa ꞌain kana ꞌënribi anun nun ñu ꞌati nëtë ꞌitámainun uisa ñubi ꞌatima ꞌain, kiax ka kiakëxa.”

Oseas 4:13

Usa ꞌain ka aín bashi manan kuaruxun aín rëbu anuxun sanuira ro a xaronan ꞌaímai këñutanun ñuinaribi xaroia, ꞌimainun ka i roble kakë pëñanakëkë ꞌianan álamos kakë i ꞌimainun muxañu ikama aín tupën tëmúxun ñuina xaroia. Usa ꞌain ka mitsun ini bëchikëkaman bëtsi bëtsi uni aín nami ꞌamia, ꞌimainun ka mitsun bakë bëchikënën xanu min piakakamaribi atun bënë ëanx bëtsi unibë ꞌia.

Deuteronomio 12:2

Usa ꞌain kamina a menu ꞌikë unikama abë ꞌakanankin këñutankëxun anuxuan atun dios a rabikë, ain bashi, matá me ꞌimainun in papa pëñanakëkë a tëmúxuan atun, dios rabikë akama këñuti ꞌain.

Deuteronomio 26:17

Mitsux kamina bërí Dios ax isa mitsun ꞌIbu ꞌikë kiax kian, kianan kamina ax kikësabi oi ꞌiti bana ꞌimainun a tanti bana kuënëo akamax kikësabiokin tanti ꞌai kian.

Deuteronomio 4:20

Usokin a ñukama unio ꞌixun ka Nukën ꞌIbun mitsu Egipto menuax ꞌaisamaira ñu mëëi anuxun manë xaroti ꞌakë anuax ꞌikësai tëmëraiabi Diosan chikínxun ain uni ꞌinun mitsu ꞌimiakëxa, usa ꞌikë ka ain uni ꞌinun nu ꞌimiaxa.

Deuteronomio 4:34

¿Anu kara bëtsi dios an ëma achúshi kaískin bëtsi ëmakama nëbë́tsinuxun, ꞌitsaira ñu ꞌanan atun iskëma, bëtsi bëtsi ñu ꞌakin atu rakuëmikin aín kushínbi Egipto menuxun nukama chikínbëtsinkin Diosan bëa usaribi okin ꞌakë ꞌiti ꞌik?

Josué 1:16

Ësokin kakëxun ka atúnribi Josué kakëxa: —Asabi ka min nu kakësabiokin ꞌai kananuna uinu karamina nu xuti anubi kuanti ꞌain.

Josué 24:24

Ësokin kakëxunbi ka Israelkaman amiribishi Josué kakëxa: —Nukaman kananuna Nukën ꞌIbu Dios rabiti ꞌain, ꞌimainun kananuna uisai ꞌinun kara ax kia usaibi ꞌiti ꞌain.

Josué 24:26

a bana ka Josuénën anua a tanti Diosan bana ꞌikë anubi kuënëokëxa. Kuënëotankëxun ka mapara pará bixun xubusa okin chupa ꞌakë anuxun Nukën ꞌIbu rabiti a ꞌurama ꞌikë i pëñanakëkë tëmú anu nitsíankëxa,

Apocalipsis 17:1

Usai ꞌicëbëtan ca xanpañu mëcën achúshi ꞌimainun rabë́ ángelcama, a achúshinëx ꞌënu uquin, xanu ñuicësoquinbi Babilonia ñuiquin ësaquin ꞌë caxa: —ꞌAisama ꞌaish ca Babilonia ëmanu ꞌicë unicamax ënë xanusa ꞌicën. Ca ut. Mi cana xanu ꞌatima, axa parúnpapa camánan tsócë, a cara aín ꞌucha cupí uisoquin Nucën Papa Diosan castícanti ꞌicë quixun mi ismiti ꞌain.

Jueces 2:11

Usa ꞌaish ka Israel unibunën ꞌakë ñukama Nukën ꞌIbun iskëx Baal rabikin atun pëukin bëtsi bëtsi ñukamaribi rabikë ka ax ꞌaisama ꞌiakëxa.

Jueces 2:13

Nukën ꞌIbu rabiti a ënkin ka Baal kakë dios akëñun bëtsi ñukama Astarté kakë dios an isa ꞌakinia kixun sinánkin aribi rabikin pëuxun bëtsi ñukamaribi rabiakëxa,

1 Samuel 12:10

Usokian ꞌakëx ka atúxbi sinanati Nukën ꞌIbumi ꞌuchakin kananuna ami manutankëxun bëtsi unikaman rabikë Baal ꞌimainun Astarté tankin ꞌakë atun dios a rabi ꞌucha kixun ñukákin, axa numi nishkë unikaman mëkënua kamina, mi rabikin añu ꞌanun kaina nu kai ashi mi ꞌaxúnun chikínti ꞌai kixun kakëxa.