Jeremías 18:21 - Kashibo-Kakataibo Biblia

²¹ ꞌAínbi kamina bërí atun ꞌini bëchikë xanu ꞌimainun bëbukama numin ꞌiananbi manë xëtokën ꞌakëx bamanun ꞌimiti ꞌan, usakin ꞌakëbë ka atun xanukama kasunamëti tuáñuma bërúkanti ꞌikën. ¡ꞌImainun ꞌinsinan atun bënëkamaribi këñuti ꞌikën, ꞌimainun uni bënábukama axribi ꞌakanankënuax manë xëtokën ꞌakëx bamati ꞌikën!

Jeremías 18:21 ပူးပေါင်းရင်းမြစ်များ

Salmos 63:10

¡atux ka manë xëtokën ꞌakëx bamakë ꞌiti ꞌikën, usakin ꞌakë ka an nami paxa pikë raëkëma shórapána akaman aín nami piti ꞌikën!

Salmos 63:11

ꞌaínbi kana ꞌapu ꞌaish Diosmi kuëënti ꞌain; usa ꞌain ka uikamax kara ami sinania ax sinanatëkentima oi ami kantati ꞌikën, ꞌaínbi ka axa këmëishi banakë unikama uisaibi banatima okin aín kuëbí xëpúti ꞌikën.

Jeremías 14:16

ꞌImainun ka unikama an atun bana kuakin atu nuikë akamaxribi ami nishkë unikaman ꞌakëx ñuti ꞌikën, ꞌimainun atún xanukama ꞌianan atun bakë bëchikë bëbukama ꞌimainun ꞌini bëchikë xanukamaribi ka numin bamati ꞌikën. Usa ꞌain ka aminishkë unikaman ꞌakëx uni ñukë Jerusalén ëma anun niti baikama anubi an maínti uni ꞌaíma ꞌain uni ñukë rakati ꞌikën. Usakin kana atun ñu ꞌatima ꞌai ꞌuchakë kupí ꞌati ꞌain.

Jeremías 15:7

Usakin ꞌakin kana min unikaman ñu bëru tákaia, suñun ꞌain chua nuámikësa okin ꞌakën, ꞌakin kana a menua ꞌikë ëmakamanua abisi chikínun ꞌimiakën; usakin ꞌakin kana ꞌën uni ꞌikëbi atu bakë bëchikëñuma ꞌitánun masókin këñuakën, usokin kana atun ñu ꞌatima ꞌakë ëinsama tania ꞌakën.

Jeremías 15:8

Usakin ꞌakin kana atunua ꞌitsaira xanu kasunamëkë, parúmpapa masi bëru iskësaira ꞌinun ꞌimiakën. ꞌImikin kana bari manikëbëa nëtë xabá ꞌain xanukaman aín bakë tuá bënábu ꞌakánanti ꞌunanbu akamaribi bamanun ꞌimiakën; usakin ꞌakin sapi kana a ëmanu ꞌikë xanukama ꞌaisamaira rakuëkënun ꞌimiakën.

Jeremías 9:21

Usai ꞌikëbë ka uni aín xubunu atsínkësa ꞌinun nukamax ñuti axribi nun xubukamanu atsíankëxa, ꞌimainun ka anu ꞌapu ꞌikë ꞌapun xukamanuribi ꞌianan, tuá ëman niabakë akamaribi ñumainun, uni bënábu anu tantiti plazanu bukukë akamaribi këñuti ñuakëxa.

Amós 4:10

“Usa ꞌain kana ñu ꞌatima Egipto menu ꞌimiasaribi okin atunu ꞌimiakën; uni bënábukama anuax ꞌakanankë me anuax bamanun ꞌimiakën, usakin ꞌanan kana atun caballokama axa ami nishkë unikama atunan ꞌinun ꞌibuanun ꞌamiakën, ꞌamianan kana anua atux ꞌikë anuaxa ñukë unin ꞌisha xënun xëmiakën, ¡usa ꞌaínbi kamina mitsux ꞌëmi sinántëkëntisama tankankën!” Usai ka Dios kiaxa.

Deuteronomio 32:25

ꞌImianan ka atun bëchikëkama ëma nëbë́tsibia manë xëtokën ꞌakëx bamanun ꞌimiti aín, usai ꞌikëbë ka xubunuax unikama ꞌitsaira rakuë́ti ꞌikën; usakëbë ka tuá atun bakë bëchikë ꞌimainun xanu chipashkama, uni xëni ꞌimainun tuá xúma akamabëbi rakuë́ti bërëi këñuti ꞌikën.

2 Timoteo 4:14

Alejandro, an manë ñu uniocë uni, an ca ꞌëmi manánxun ꞌitsaira ꞌë tëmëramiaxa. Usa cupí ca uisa cara oti ꞌicë usoquin Nucën ꞌIbu Diosan ꞌati ꞌicën.

1 Samuel 15:33

ꞌAínbi ka Samuelnën kakëxa: —Min kamina min manë xëtokën ꞌakin ꞌën aintsi xanun tuákama këñukin ꞌan. Usaribiti ka min titax tuáñuma bërúti ꞌikën. Ësokin kakinshi ka Samuelnën aín manë xëtokë bikinshi anun ꞌakëxa, Guigal kakë ëma anuxun Nukën ꞌIbun kakësabiokin ꞌaxun ka Agag aín nami chánkapakëxa.