Jeremías 18:15 - Kashibo-Kakataibo Biblia

¹⁵ Usa ꞌaínbi ka ꞌën kaískë unikaman ꞌë manutankëxun, ro sanuira aribi xarokin, atunbia ꞌakë ñukama ashi rabikin ꞌë manukanxa. Usai ꞌika anua nia bai xëni a ëni, ꞌën usai ꞌiti kakë banakama a manui, atun ꞌunánkëma bain kuankësa ꞌinun ꞌëx kia banakama a manukankëxa.

Jeremías 18:15 ပူးပေါင်းရင်းမြစ်များ

Nehemías 9:17

Usai ꞌikin ka min kakëxun kuaisama tanan minmi chaiira ñu atu ꞌaxuan abi sinánkama ꞌikën. Usai ꞌikin ka min bana kuaisama tankin achúshi ꞌapu an isa anuaxa tëmërakë Egipto me anubi uantëkënun kixun anëakëxa. ꞌAínbi kamina mix Dios an ꞌuchaiabi uni nuibakë a ꞌixun uisabi okinma, nuibairakin ꞌatimokinma ꞌakinkin ñu ꞌatima ꞌaiabi atu ëanma ꞌain.

Isaías 41:29

¡Akama achúshinëxbi ka añumabi ꞌikën! Usa ꞌixun ka añu ñubi ꞌaima; usa ꞌain ka unin a rabinuxun uniokë ñu usaribi ꞌaish ñankáishi ꞌikën.

Jeremías 1:16

Ënëx ka usakin kana an ꞌuchakin ꞌë rakan unikama a tëmëramiti ꞌain kiti ꞌikën, atúnbi rabinuxun bëtsi menu ꞌikë unikaman uniokë ñu ꞌatankëxun, rabikin sanuira ro a xaroxunkin rabiakëxa,

Jeremías 18:14

¿Líbano bashinu ꞌikë maparakama anua ꞌikë matsin tita ax kara uínsaran nëtë́ti ꞌik? ¿ꞌUmpax matsira bashinuax shióbukë ax kara ꞌain bashi kamanuax ëskiti ꞌik?

Jeremías 19:5

ꞌAnan ka anuxun atun bakë bëchikëkama Baal kakë atun dios a ꞌaímai këñutanun xaroxunti ꞌakëxa, ꞌaínbi kana usakia ñu ꞌanun káma ꞌain, ꞌianan kana ꞌënbi usakin ka ñu ꞌati ꞌikë kixun sinánma ꞌain.

Jeremías 2:13

ꞌËn unikama ka ꞌiásamaira ꞌinun chaiira ꞌuchaxa: Usai ꞌikin ka ꞌën bana kikësama oi ꞌikin ꞌë manukankëxa, anua ꞌumpax ꞌikë nëminra usaribi ꞌixun na tsónun ꞌakinkëxunbi ꞌë manúakëxa, usakin ꞌë manuika anua ꞌumpax biti nëminra ꞌumpaxñuma ꞌinun ëskikë usai atux ꞌiakëxa.

Jeremías 2:19

Min ñu ꞌatima ꞌai ꞌuchakë anbi mi ꞌatima oti ꞌikën, mix ꞌatimakë anbi mi ꞌatima oti ꞌikën. Usa ꞌain kamina min sinánti ꞌain, ꞌëmi ënkin rabikëma ax ka ꞌaisama ñu ꞌikë kixun isti ꞌain, ꞌëx kana min ꞌIbu Dios a ꞌain. ꞌËx Dios kamabi kushiñu ꞌaish kana usai kin.

Jeremías 2:32

¿Achúshi xanun kara unibë mëranankia bikë ꞌain mëñusutikama manukin rakanti ꞌik? Usa ꞌaínbi ka ꞌën unikama, ꞌitsaira baritia ꞌimi ꞌëmi manúakëxa.

Jeremías 6:16

Nukën ꞌIbun ka ꞌain unikama ësakin kakëxa: Bainu nirakëxun isi kamina, uisai kara mitsun chaitiokëkama ꞌën ꞌinánkë ꞌën bana ꞌai tsóakëxa kiax ñukákananti ꞌain, uisai kara uni upitax tsóti ꞌikë kiax; usakin ꞌai kamina a ꞌunánkin ax kikësokin ꞌai ꞌupitax tsókanti ꞌain. ꞌAínbi ka atux kia: Nux kananuna usai i tsótisama tanin.

Jeremías 7:9

Mitsun kamina ñu mëkamanan uni ꞌanan, bëtsi unin xanubë ꞌianan, këmëishi anuxun bana mëníokë anuxun bëtsi uni ꞌuchonan, asérabi ñu ꞌakatsi kianan a rabikankë Baal rabikin sanuira ro xaroxuanan, mitsun usakin ꞌati ꞌikëmabi unínbia a rabinuxun ꞌakë dioskama a rabikanin,

Oseas 11:2

ꞌaínbi ka usakin kuënkëxi, ꞌatiaira ꞌëmi ꞌurakankëxa. Usai ꞌikin ka ꞌën unikaman këmëkinshia rabikë dioskama a ñuina xaroxuankëxa, usakin ꞌanan ka sanuira ro aribi ñu tankin ꞌakëkama a xaroxuankëxa.

Oseas 2:13

Usa ꞌain kana bëráma nëtë inumikin atun bëtsi dioskama rabia a kupín tëmëramiti ꞌain, atun ka bëtsi dioskama a rabikin, mëñusuti ꞌimainun aín tëñuti akama ꞌamiakëxa, usakin ꞌai ka bëtsi ñu diosmabi rabi ꞌëmi manúkankëxa ꞌëx Dios ꞌaish kana ësai kin, kiax Dios Israel unikama ñui kiakëxa.

Oseas 2:6

Usa ꞌain kana muxan atun bai bëaranan anu bukukë a bëararamikin achúshi kënë ꞌati ꞌain, usakin ꞌakëxun ka aín baikama a mëratëkënkantima ꞌikën.

Malaquías 2:8

ꞌAínbi kamina sacerdotekama mitsun upí ñu ꞌati a manukin ꞌë ënkan; usa ꞌain ka mitsun ꞌatimakin ꞌunánmikëx ꞌitsaira uni ꞌatimati tsotia. Usakin kamina mitsun ꞌën Levítan rëbúnki kamabëtan achúshi ñu ꞌa ax kikësabiokin ꞌakaniman.

Mateo 15:6

Axa usai quicë uni an aín papa aín tita ñu ꞌaquintima ca asábi ꞌicë quiax camina mitsux quin. Usai quiquin camina mitsun raran ñuiá bana ashi sinánquin Nucën Papa Diosan bana quicësabi oquin ꞌaiman.

Romanos 14:21

—Usaquin ñu ꞌati ca ꞌaisama ꞌicë —quixun sinánquinbi usa ñu ꞌai ca uni ꞌuchanan Cristomi cushicëma ꞌia. Usa ꞌain camina nami piti, ñu xëati, uisa ñu ꞌati cara, a mitsun ꞌaia isía uni itsi ꞌuchati rabanan usa ñu ꞌatima ꞌain. Usaquinmi ꞌatima ca Nucën Papa Dios cuëënia.

Deuteronomio 32:21

ꞌË kamina diosmabi bëtsi dios rabikin nishmian, usa ꞌain kana ꞌënribi mitsu nishmikin ꞌën uni ꞌikëmabi bëtsi uni ꞌën uni ꞌimiti ꞌain, ꞌimikëbë ka atux ꞌatima okin sinani nishti ꞌikën, ¡usa ꞌain kana ꞌën bana kuaisama tankë unikama ꞌën uni ꞌimiti ꞌain, ꞌimikëbë ka ꞌën unikama atumi nishti ꞌikën!