Jeremías 14:22 - Kashibo-Kakataibo Biblia

²² ¿Anu kara ꞌiti ꞌikë unínbia a rabinuxun ꞌakë dios an ꞌuí ꞌibúmiti ꞌiti ꞌit? ¿ꞌIanan kara naíkamë ꞌëo abi ꞌuí kushiira ꞌibúnun ꞌimiti ꞌik? ¡Usama ka, Nukën ꞌIbu Dios! Mix kamina an ꞌuí ꞌibúnun ꞌimikë a ꞌain. Mix kamina an kamabi ënë ñukama usaía ꞌinun ꞌimikë a ꞌain; ¡usa ꞌain kananuna mimishi katamëti ꞌain!

Jeremías 14:22 ပူးပေါင်းရင်းမြစ်များ

1 Reyes 17:1

Aín bana unikama ñuixunua Diosan kaískë Elías, Tisbé kakë ëma Galaad, menua ꞌikë anu tsókë an ka ësokin Ahab kakëxa: “¡Diosan kuamainunbi kana ami sinánun mi kain, Israel unibunën Dios an kakësabiokin aín bana tankin ꞌën ñu ꞌaxunkë ax ka ꞌëx kikëbë ꞌibunux ka ënë barikaman ꞌuí ꞌibutíma ꞌimainun imë́bi nibí ꞌibutima ꞌikën!”

1 Reyes 17:14

Nukën ꞌIbu, Israel unibunën Dios ax ka ësai kiaxa, ami chumunu ꞌaruxun nankë harina a ꞌimainun, xëni anu ꞌaruti ꞌakë ñunu ꞌaruxun nankë ax ka anuan Diosan menu ꞌuí ꞌibúmitëkënti nëtë ꞌitámainun këñutima ꞌikën.

1 Reyes 18:1

Nëtë itsin ka rabë́ ꞌimainun achúshi baritia inúkëbëtan Diosan Elías ësokin kakëxa: “Anu kuanxun kamina Ahab isi kuanti ꞌain, ꞌën kana amiribishi ꞌuí an me chabóti ꞌibúmitëkënti ꞌain.”

1 Reyes 8:36

usokin ꞌakëxun atun bana kuakin kamina min kaisa Israel kama atúxa mimi ꞌuchakë a anumi ꞌikë naíkamë ꞌëo anuxunbi kuakin atun ꞌucha tërënxunti ꞌain, usakin ꞌaxun kamina añu ꞌai kara atux tsóti ꞌikë kixun ꞌunámianan, uisai kara bukukanti ꞌikë kixunribi ꞌunánmiti ꞌain. Usokin ꞌaxun kamina amiribishi ënë menu ꞌuí ꞌibumitëkënti ꞌain, atun papakama kia bana ꞌaia atun bakë bëchikë min unikama atux tsónun.

Job 5:10

An ka ꞌuí ꞌibúkin me chabónun ꞌimia, usakin ꞌimikëx ꞌibúkin ka menu ñu ꞌapákë koonun chabóia.

Salmos 130:5

ꞌËn bëru ñunshin bëtanbi kana Dios kainin, usakin ꞌai kana ain bana kuati ami katamëtin.

Salmos 27:14

¡Nukën ꞌIbumishi ka uni katamëti ꞌikën! ¡Katamëkin kamina kushikin ꞌatimakin sinántima ꞌain! ¡ꞌImainun kamina Nukën ꞌIbumishi katamëkanti ꞌain!

Isaías 30:18

ꞌAínbi ka Nukën ꞌIbu an upiokin ñu ꞌakë ꞌixun mitsumi sinania, usa ꞌixun ka an kamabi ñu upiokin mitsu nuibakin ꞌaia; an ka ax nuibanankëira ꞌikë kixun mitsun ꞌitsaira ꞌunánti kuëënia, Nukën ꞌIbu an ka ax xëshi Dios ꞌixun ñukama upiokin ꞌaia. ¡Usa ꞌain ka ami katamëtia ꞌakinti kuëënkë unikama kuëëinra kuëënti ꞌikën!

Isaías 41:29

¡Akama achúshinëxbi ka añumabi ꞌikën! Usa ꞌixun ka añu ñubi ꞌaima; usa ꞌain ka unin a rabinuxun uniokë ñu usaribi ꞌaish ñankáishi ꞌikën.

Oseas 2:7

Usai ꞌikin ka ꞌain mërati ꞌikë unikama nuiti ꞌikën, ꞌaínbi ka nukutima ꞌikën; ꞌianan ka barikinbi mëratima ꞌikën. Usakin mërakima tani ka kiti ꞌikën: Ax paían ꞌën bënë ꞌia uni anubi kana kuantëkënti ꞌain, abë kana bërí ꞌëx ꞌikësamai upiti tsóakën.

Joel 2:23

¡Axa Jerusalén kakë ꞌikëbi Sión kakëribi ëmanu tsókë unikama mitsux kamina kuëënkanti ꞌain, usai ꞌi kamina Diosmiribi sinani kuëënkanti ꞌain! An ka bëráma ꞌasabiokin anúan ꞌibúti nëtë ꞌikëbëtan ꞌuñe ꞌibúmiaxa, a ꞌuñe ka mitañu ꞌianan anun ñu ꞌapákëxa pëkëtia biti ꞌuxë anun ꞌasaribiokin ꞌibúmikë ꞌiti ꞌikën.

Amós 4:7

ꞌImainun kana mitsun ñu ꞌapákë pëkë́misa tankëbëtanbi ꞌuí ꞌibúnun ꞌimiama ꞌain. “ꞌImianan kana bëtsi ëmanu ꞌuí ꞌibúmianan bëtsinu uí ꞌibúnun ꞌimiama ꞌain; usokin ꞌakëbë ka anua ꞌuñe ꞌibúkë ni ax chabá ꞌimainun anua ꞌibúkëma ni ax ꞌumpax ꞌaíma ꞌain me ë́skiakëxa;

Miqueas 5:6

Usa ꞌain ka Asiria unikaman nun menu bëbaxun nu bibiankin atun menu ñatanbiankin buankësokin buánkë ꞌain, nun kushikama ꞌimainun aín suntárukaman anua ꞌakanankë ñukama anun atu ꞌaxun atunua nu chikínti ꞌikën. Usakin ꞌatankëx ka nun kushikama atux Asiria me anua Nimrod ꞌapu ꞌia anubi ꞌapu ꞌiti ꞌikën.

Mateo 5:45

Usaquin ꞌacë ꞌaish camina asérabi mitsun Papa Dios axa naínu ꞌicë an sináncësabi oquin sináncë ꞌain. An ca camabi uni, upí uni ꞌimainun upíma uni aribia pëcanun bari urumianan camabi unin ñu ꞌapácë chabónun ꞌuíribi ꞌibúmia. Usaribi oquin camina camabi uniribi nuibaquin ꞌaquinti ꞌain.

Deuteronomio 32:21

ꞌË kamina diosmabi bëtsi dios rabikin nishmian, usa ꞌain kana ꞌënribi mitsu nishmikin ꞌën uni ꞌikëmabi bëtsi uni ꞌën uni ꞌimiti ꞌain, ꞌimikëbë ka atux ꞌatima okin sinani nishti ꞌikën, ¡usa ꞌain kana ꞌën bana kuaisama tankë unikama ꞌën uni ꞌimiti ꞌain, ꞌimikëbë ka ꞌën unikama atumi nishti ꞌikën!