Jeremías 14:18 - Kashibo-Kakataibo Biblia

¹⁸ ꞌImainun kana ninu kuankin, anuaribi ꞌakanania anuax uni ñuia isanan; ëmanu atsínkin anuaribi a piti ꞌaíma ꞌain numin bamaia uni isin. Usaia ꞌikankëbë ka an Dios kikë bana ñuikë unikama ꞌimainun sacerdotekamax an ꞌunánkëma bëtsi ëmakamanu kuani añu kara ꞌati ꞌikë kixun ꞌunánimabi nitsia.

Jeremías 14:18 ပူးပေါင်းရင်းမြစ်များ

Isaías 28:7

ꞌImainun ka raíri unikamaxribi uvas baka vino ꞌakë xëatankëx amá aman kuani nitsia, ꞌimainun ka sacerdote unikama ꞌianan an Dios kikë bana ñuikë unikama atúxribi paë bata kushi a xëatankëx amá aman kuani nitsi kushiñumasa ꞌaish sinanima ꞌatimati banaia; ꞌianan ka namákësokian Diosan ismikëxbi amá aman kuani nikësai ꞌia, ꞌianan ka paën irakë ꞌixun uisakin kara bana mëníoti ꞌikë kixunbi ꞌunanima.

Jeremías 2:8

ꞌImainun ka sacerdote kamanribi ꞌën ꞌakinun ꞌë bariti sinánma ꞌikën, ꞌimainun ka an ꞌën bana kuënëo ꞌunánkë unikamanbi ꞌë ꞌunántisamatankëxa, ꞌimainun ka ꞌapukamaribi ꞌëx kikësokin ꞌaisamatamainun, an Dios kikë bana ñuikë unikamaxribi ꞌëmi manutankëx unin rabikë Baal a ñuishi banakëxa, usai ꞌikian a ñukama rabikë ax ka ñankabia ꞌakë ꞌiakëxa.

Jeremías 23:21

“Ësai ka Nukën ꞌIbu kiakëxa. ꞌËn kana an këmëkinshi an ꞌën bana ñuikë unikama a xukëma ꞌain, ꞌianan kana uisa banabi ꞌën atu kakëma ꞌain, ꞌaínbi ka atúxbi usai ꞌiti kuëëanx ꞌën anë ñui banati sinanx bënëruxun ꞌaisatanxa.

Jeremías 6:25

¡Usa ꞌain ka uixi nitsima ꞌimainun bainubi nikantima ꞌikën! ¡Axa numi nishkë unikama ka mëníoka kuatsini aín manë xëtokë tuíanx uti ꞌikën; usa ꞌain ka unikama amanu amanua tsókë atúxribi rakuë́kania!

Amós 4:6

ꞌËn kana mitsun ëmakanuaxmi panani tsónun mitsu ꞌimiakën; ꞌimianan kana kamabi uníxa pitiñuma ꞌinun ꞌimiakën, ¡usa ꞌaínbi kamina mitsux ꞌëmi sinanatëkëinsama tankën!” Usai ka Dios kiaxa.

Miqueas 3:11

Axa Jerusalén ëmanu ꞌikë an bana mëníokë unikama an ka uin kara kupíoia a ëanan an kupíokë a ꞌatima oti sinania, ꞌimainun ka sacerdotekaman kupíokëxunshi uni ꞌunánmiti kuëënia, ꞌianan ka an Dios kikë bana ñuikë unikamanribi kuríki kupíshi abi sinántankëx ësai kia: Nukën ꞌIbu ka nubë ꞌikën usa ꞌixun ka ñu ꞌatima inútima rabanan Nukën ꞌIbun nu bërúaia.

2 Pedro 2:3

A unicaman ca mitsun curíqui biti cupíshi cëmëquin paránquin Nucën Papa Diosan banamabi, anbi sináncë bana mitsu ñuixunti ꞌicën. Usaquian ꞌacë cupí ca ië́tima cëñúti ꞌicën, usai atux ꞌitia Nucën Papa Diosan mëníosabi oi.