Jeremías 14:16 - Kashibo-Kakataibo Biblia

¹⁶ ꞌImainun ka unikama an atun bana kuakin atu nuikë akamaxribi ami nishkë unikaman ꞌakëx ñuti ꞌikën, ꞌimainun atún xanukama ꞌianan atun bakë bëchikë bëbukama ꞌimainun ꞌini bëchikë xanukamaribi ka numin bamati ꞌikën. Usa ꞌain ka aminishkë unikaman ꞌakëx uni ñukë Jerusalén ëma anun niti baikama anubi an maínti uni ꞌaíma ꞌain uni ñukë rakati ꞌikën. Usakin kana atun ñu ꞌatima ꞌai ꞌuchakë kupí ꞌati ꞌain.

Jeremías 14:16 ပူးပေါင်းရင်းမြစ်များ

Proverbios 1:31

¡Usaími ꞌikë anbi ka mitsu ꞌupitax ꞌisama okin tëmëramiti ꞌikën! ¡Usaími ꞌikankëbë ka mënioisama mitsúnbi sinánxun ꞌakë ꞌaisama ñukama ax ꞌiti ꞌikën!

Jeremías 18:21

ꞌAínbi kamina bërí atun ꞌini bëchikë xanu ꞌimainun bëbukama numin ꞌiananbi manë xëtokën ꞌakëx bamanun ꞌimiti ꞌan, usakin ꞌakëbë ka atun xanukama kasunamëti tuáñuma bërúkanti ꞌikën. ¡ꞌImainun ꞌinsinan atun bënëkamaribi këñuti ꞌikën, ꞌimainun uni bënábukama axribi ꞌakanankënuax manë xëtokën ꞌakëx bamati ꞌikën!

Jeremías 20:6

ꞌImainun ka Pashur miribi axa mimi nishkë unikaman Babilonianu min aintsikama këñunbi buánti ꞌikën. Anuax ñuia ka min ꞌunánkë unikama këñunbi anubi mi mainkanti ꞌikën, min kamina këmëkin asérabi ꞌikëmabi usai isa ñu ꞌiti ꞌikë kixun bana atu ñuixuankën.”

Jeremías 7:33

Usa ꞌain ka an ñu bamaia pikë ñuina pëchiñu ꞌimainun raëkëma ñuina pianankë akaman piti ñuia rakankë uni ꞌinuxun ꞌaia, usa ꞌaínbi ka uínbi a ñuinakama an ꞌibinti ꞌaíma ꞌiti ꞌikën.

Jeremías 9:20

Xanu kamanribi ka Nukën ꞌIbu Dios kikë bana kuati ꞌikën, kuakin ka ain bana upíokin ꞌati ꞌikën. ꞌAnan ka aín tuákamaribi usai kara inti ꞌikë aribi ꞌunámianan, usaía masá nuituti ini kiti ꞌunamiti ꞌikën:

Jeremías 9:22

Usai ika uni ñukëkama ñuinakan pui chë́ki bukukiankë ninua iskësa ꞌianan, ñu bimi unin bikin ënkëxa bikëxma chë́kibukuainkësa ꞌinun ꞌiakëxa. Ësai ka Nukën ꞌIbu asérabi kiakëxa.

Amós 7:17

ꞌAínbi ka ësai Dios kiaxa: Kamina kuati ꞌain min xanu ka ëma xabánubi rakanxun unin aín nami ꞌati ꞌikën, min bakë bëchikë bëbu ꞌimainun xanukamaxribi manë xëtokën ꞌakëx bamati ꞌikën; ꞌimainun ka min mekamaribi bëtsibë bëtsibë ꞌinánankë ꞌiti ꞌikën; ꞌimainun kamina mixribi an Dios rabikëma unikaman menuax bamakë ꞌiti ꞌain, ꞌimainun ka Israel unikamaribi ñatanbiankin aín me ꞌura uankë ꞌiti ꞌikën.

Mateo 15:14

Fariseo unicamaxa nishiabi camina isëshiti ꞌain. Atun Nucën Papa Diosan bana uni itsi ꞌunánmiti ꞌixunbi ca uisai cara quia quixun ꞌunanima. Ca bëxuñu unisa ꞌicën. Bëxuñu unin abë bëxuñu uni itsi buáncatsi quixun ꞌaíbi ca bëxuñu ꞌixun uin cuanti cara quixun ꞌunanima, a rabëtaxbi aman cuanx quininu nipacëti ꞌicën.

Apocalipsis 16:1

Usai ꞌicëbëtan cana anuxun Nucën Papa Dios rabiti xubu ꞌucë mëúcüax munuma banaquin a ángelcama caía ësai quia cuan: —Mitsun xanpa buani camina anu ꞌicë ñucama, anun Nucën Papa Diosan an ñu ꞌatima ꞌacë unicama castícanti, acama menu tutucai cuanti ꞌain.