Isaías 65:2 - Kashibo-Kakataibo Biblia

² Kamabi nëtën kana ꞌën mëkënan mëshpakin ꞌënu unun kixun kana bana kuakëma ꞌikëbi atu kuëanken, mitsux kamina min kuëënkësa okin ñu ꞌatima ꞌai tsókën, usakin ꞌai kamina mitsun sinánkësa ꞌoíshi tsókën.

Isaías 65:2 ပူးပေါင်းရင်းမြစ်များ

Génesis 6:5

Nukën ꞌIbu iskëxbi ka unin ꞌucha ꞌaisamaira ënë menu ꞌiakëxa, ꞌimainun a ꞌatima sinánñu ꞌixun ꞌatima ñuishi ꞌati sinánñuirabu ꞌiakëxa,

Proverbios 1:24

Usa ꞌain kana ꞌën mitsu ënumi ukanun kan, ꞌaínbi kamina mitsun ꞌën kakëxunbi ꞌën bana kuaisamatan.

Isaías 1:2

Kamabi ñu axa naínu ꞌikë ꞌimainun menu ꞌikë an ka Nukën ꞌIbu Dios ax ka ësai kiaxa kuati ꞌikën: “ꞌËn kana ꞌën bakë bëchikë bëbukama ꞌimainun xanukama chatanun kanioruakën, ꞌaínbi ka atux ꞌën bana kuaisama tani ꞌëmi nishakëxa.

Isaías 1:23

Mitsun ꞌapukamax ka bana kuakëma ꞌianan, an unin ñu bainu bëaraxun mëkamakë unikamabë ꞌunánankë ꞌikën. Usa ꞌixun ka akaman kuríkinën kupíokëxun an ñu ꞌupima ꞌakëma unibi ꞌatima ñu isa ꞌaxa kixun kanan ñu ꞌinainshiti akamaribi baria. ꞌIanan ka papañuma ꞌimainun titañuma tuákamaribi uisakin kara ꞌakinti ꞌikë usakin ꞌakinima ꞌianan, xanu kasunamëkë akamaribi tëmërai tsótiabi ꞌakinima.

Isaías 30:1

Ësai ka Nukën ꞌIbu asérabi kiakëxa: “¡Uisai kara mitsun bakë bëchikë bëbu ꞌimainun ꞌini xanukama atun kakëxun ꞌën bana kuaisama tania, usa ꞌixun atun ꞌëbë banaxunmabi ñu ꞌakatsi kixun atúnbi sinania, sinánkin ka usakin kananuna ñu ꞌati ꞌai kixun ꞌën sinánmikëxunmabi atúnbi sinánxun ꞌaia, usakin ꞌai ka atúxbi amiribi amiribi ꞌuchakania!

Isaías 30:9

Ënë unikamax ka bana kuaisama tankë unibu ꞌikën, usa ꞌixun ka ꞌën bana kuaisama tania, usa ꞌain ka ꞌën ꞌunánmikë banakama kuaisama tani ꞌëmi sinanima.

Isaías 55:7

Uni ꞌatimakama an ñu ꞌatima ꞌati sinánkin ꞌakë an ka ñu ꞌatima ꞌakë a ënti ꞌikën, ꞌimainun ka uni bana kuakëmakama atúnribi ꞌatimakian sinánkë akama ënti ꞌikën; ëni ami katamëtia ka Nukën ꞌIbun mitsu nuibati ꞌikën, ꞌimainun kamina Diosan nuibanankëira ꞌixun an mitsun ñu ꞌatima ꞌakëkama mëníoxunun ami sinánkin rabikanti ꞌain.’

Isaías 55:8

ꞌËn sinánkë ax ka mitsun sinánkësara usama ꞌikën, ꞌimainun ka ꞌën usakin ñu ꞌaisatankë ax mitsun usakin ñu ꞌaisatankë usama ꞌikën. Usa ꞌaish ka naíkamë ꞌëo axa me manámi ꞌikë, usaribi ka ꞌën ꞌati sinánxun ꞌakë ñukama ꞌikën, usa ꞌain ka ꞌën ꞌati sinánxun ꞌakë ax mitsunmi a ꞌati sinánxun ꞌakë usama ꞌikën, kiax ka.” Nukën ꞌIbu asérabi kiakëxa.

Isaías 63:10

ꞌAínbi ka Nukën ꞌIbun kakëxun atun kuaisamatankëxa ꞌianan ka ꞌatimakin ñuikëx masá sinánkëxa; usakin ꞌakëxun ka axbi atumi nishkin atu ꞌakëxa.

Jeremías 18:12

ꞌAínbi ka atun mi kati ꞌikën: ¡Ñankáishi kamina usai ꞌitima ꞌain! Nukamax kananuna nun kuëënkësa ꞌoíshi tsókin, nun sinánkësa okinshi ñu ꞌati ꞌain.

Jeremías 7:24

ꞌAínbi ka ꞌëx kikësokin ꞌaisama tanan, ꞌën bana kuaisamatani, atun kuëënkësokinshi ñu ꞌatima ꞌatishi sinani ꞌikankëxa. Usakin ꞌakin ka ꞌëmi sinántëkënkinma, atun kuëënkë ñuishi rabiti ꞌakankëxa.

Mateo 15:19

Aín nuitu mëu ca unin ꞌatima ñu ꞌati sinania, uni ꞌati, aín xanuma ꞌaínbi xanubë ꞌiti, xanu cuaioti, uni itsin ñu mëcamati, cëmëi uni itsimi manánti, uni itsi ñui ꞌatimati banati.

Mateo 23:37

Jerusalenu ꞌicë unicama, cana mitsu cain, mitsux camina an Nucën Papa Dios quicë bana uni ñuixuncë unicama ꞌanan a an aín bana ñuixunun xucë unicamaribi maxaxan ꞌá, mitsun raracama axa ꞌiásaribi ꞌain. ¿Uitishi oquin carana mitsu nuibaquin bërúanquin ꞌaquinsa tan? ꞌAtapanëan aín tuácama cuëntancëxun aín pëchin mapuxun bërúancësaribi oquin cana mitsu bërúanquin ꞌaquinsa tan. ꞌAquinsa tancëxbi camina mitsux cuëëncëma ꞌain.

Lucas 13:34

Ësaquinribi ca Jesusan cacëxa: —Jerusalénu ꞌicë unicama, mitsu cana cain, mitsux camina an Nucën Papa Dios quicë bana uni ñuixuncë unicama ꞌanan a an aín bana ñuixunun xucë unicamaribi maxaxan ꞌá, mitsun raracama axa ꞌiásaribi ꞌain. ¿Uitishi oquin carana mitsu nuibaquin bërúanquin ꞌaquinsa tan? ꞌAtapanëan aín tuácama cuëntancëxun aín pëchin mapuxun bërúancësaribi oquin cana mitsu bërúanquin ꞌaquinsa tan. ꞌAquinsa tancëxbi camina mitsux cuëëncëma ꞌain.

Romanos 10:21

Usai judíosma unibu ñui quianan ca Isaías judíos unibu ñuiribi ësai quiacëxa, Nucën Papa Dios quicësabi oi: ꞌËn bana cuaisama tanan ꞌëmi sinántisama taniabi cana judíos unibu ënquinma —ꞌën mitsu ꞌaquinun camina ꞌëmi sinánti ꞌai —quixun can. Cacëxbi ca ꞌën bana cuaisama tani ꞌëmi sinántisama tanxa”.

Romanos 2:5

Usa ꞌaínbi camina min sinan ꞌaisama ꞌaish sinanaisama tan. Usai ꞌiquin camina ënquinma camabi nëtën ꞌatima ñuishi sinánquin usaquin ꞌain. A cupí camina anúan Nucën Papa Diosan ꞌuchañu unicama aín ꞌucha cupí castícanti, a nëtën ꞌaisamaira oquin castícancë ꞌinuxun ꞌain.

Deuteronomio 31:27

ꞌËnbi kana upíokin ꞌunan mitsux kamina bana kuati ꞌunánmaira ꞌain; usa ꞌaish kamina ꞌëx mitsubë aínbi Nukën ꞌIbumi ꞌuchakën, ¿Usa ꞌaish karamina ꞌëx ñukëbë uisaira ꞌikanti ꞌain?

Deuteronomio 9:7

Mitsun kamina uínsaranbi anu uni ꞌikëma menuxua Nukën ꞌIbu Diosan kakëxunbi kuaisama tan bana a manutima ꞌain. ꞌIanan kamina Egipto menuax chikíkin ꞌásabiokin ënë menu bëbakinbi, an kakësabiokin ꞌaisama tankanin.