Isaías 55:7 - Kashibo-Kakataibo Biblia

⁷ Uni ꞌatimakama an ñu ꞌatima ꞌati sinánkin ꞌakë an ka ñu ꞌatima ꞌakë a ënti ꞌikën, ꞌimainun ka uni bana kuakëmakama atúnribi ꞌatimakian sinánkë akama ënti ꞌikën; ëni ami katamëtia ka Nukën ꞌIbun mitsu nuibati ꞌikën, ꞌimainun kamina Diosan nuibanankëira ꞌixun an mitsun ñu ꞌatima ꞌakëkama mëníoxunun ami sinánkin rabikanti ꞌain.’

Isaías 55:7 ပူးပေါင်းရင်းမြစ်များ

Génesis 6:5

Nukën ꞌIbu iskëxbi ka unin ꞌucha ꞌaisamaira ënë menu ꞌiakëxa, ꞌimainun a ꞌatima sinánñu ꞌixun ꞌatima ñuishi ꞌati sinánñuirabu ꞌiakëxa,

Salmos 130:4

ꞌAínbi kamina min nux ꞌuchakëkama nu mëníoxunin, usa ꞌixun kananuna nun mi rabiti kuëënin.

Salmos 130:7

usaribi okin kamina Israel unikama mitsun kaínti ꞌain, an ka asérabi nuibanankë ꞌixun nux uisaibi ꞌiti kuëënima.

Salmos 51:1

Mix nuibanairakë, Dios ꞌixun kamina ꞌë nuibati ꞌain; usa ꞌixun kamina ꞌë nuibakin ꞌën ꞌatimakin sinánxun ñu ꞌakëkama a ꞌë tërënxunti ꞌain.

Salmos 66:18

ꞌËx ꞌatima sinánñu uni ꞌikë ka Diosan ꞌën bana kuakë ꞌitsianma;

Isaías 1:19

Mitsun ꞌën bana kikësabiokin ꞌati kuëënkin ꞌën bana tankin, kamina menu ꞌapákëxua upíokin tuaia ꞌain bimi bixun piti ꞌain;

Isaías 31:6

Israel unikaman rëbúnki mitsux kamina ꞌatimairai banakin ñuikankë Dios ami sinanatëkënkanti ꞌain.

Isaías 32:7

ꞌImainun ka rabinkima an ñu ꞌashikë uni an uisakin ñu ꞌati kara ꞌunánkë ꞌixun; uisakin kara uni paránti ꞌikë kixun sinánkin, ꞌatimakin unin ñuiti ñuishi ꞌaia; ꞌanan ka uni ñuñumakama a këmëkin ñu ꞌatima inúnun paránia, ꞌanan an ñu kuëënkin bisatankë akamaribi ñu ꞌupiokin ꞌaxúnun kakëxunbi ꞌatima okin paránia.

Isaías 40:2

ꞌakianan kamina kuëëntanun nuibakin Jerusalénnu tsóa unikama a atúan tëmërakin bëtsi uni ñu mëëxuan a ka këñúaxa kixun kati ꞌain, kanan kamina atúxa usai ꞌikë anunbi ka ꞌën kakëxuan atun kuaisamatan a kupíoxa kixun kati ꞌain, ꞌënbi kana ꞌëmi ꞌitsaira ꞌuchaia rabë́ okin atu ꞌatima okën.”

Isaías 43:25

ꞌAínbi kana ꞌëx mitsun Dios ꞌixun, uni ꞌaimi ꞌuchakëkama a tërënxunkin uinsaranbi sinántëkëntima ꞌain.

Isaías 44:22

ꞌËn kana ꞌatima ñu ꞌaimi mitsux ꞌuchakëkama a nëtënxuan mitsun ꞌuchakama tërënxunkin naínu ꞌikë nëtë kuin ꞌikësaia nëtë́nun ꞌimian. Usa ꞌain kamina ꞌëmi sinanatëkënti ꞌain ꞌën kana mi ië́mian.”

Isaías 54:10

Aín bashikamax anua ꞌikë anuax amoki shaíkimainua, matá mekama tukibuti rëukubukëbëbi ka ꞌën mi nuibakë ax uisaibi ꞌi nëtë́tima ꞌikën, ꞌimainun ka ꞌën mibëtan ꞌa achúshi ñu anun upiti tsóti ax uisaibi ꞌi nëtë́tima ꞌikën.” Usai ka min ꞌIbu ax mixmi ꞌaisama ñu ꞌinutia isi mi nuibati kia.

Isaías 54:8

Uínsaran karana ꞌëx mimi nishakën anu kana, ꞌitsama nëtë́ishi mimi mëráma ꞌain, ꞌaínbi kana ꞌëx nuibanairakë ax nëtë́tima ꞌain mi nuibakën.” Usai ka min ꞌIbu an mi bitëkënti ax kiaxa.

Isaías 58:6

ꞌAínbi ka usakin ꞌakë ax ꞌën iskëx usama ꞌikën. ꞌËx a isi kuëëntisabi ꞌitánun piti mëti ax ka ësokin ꞌati ꞌikën, bëtsi unikamax ka upíokin nuibakë ꞌiti ꞌikën, usa ꞌaish ka anun uni ñu ꞌatima ꞌakëmabi tëkërëkakë manë risi të́kakë usa ꞌianan, vaca bënë tëatsimixun i anun tëkërëkakë risi churukë usaribi mitsunan ꞌiti ꞌikën; ꞌianan ka bëtsi unin tëmëramikë axribi ñankáishi ꞌitánun këñúkë ꞌiti ꞌikën, usakin ꞌakëx ka ꞌapukamaxa unimi an kuëënkësa okin ꞌakë ax këñúkë ꞌiti ꞌikën;

Ezequiel 33:11

Usa ꞌaínbi kana ꞌëx Dios ꞌaish atun tsóti ñui ësai kin, ꞌatima sinánñu unikama ñuti kana ꞌëx kuëëniman usa ꞌain ka atun ꞌakë ñu ëni upitax tsóti ꞌikën. Israel unikama ꞌatima ñu ꞌaimi tsókankë akamina ënti ꞌain. ¿Uisa ꞌaish kara usakin ñu ꞌai ñukanti ꞌik?

Daniel 4:27

Usa ꞌain kamina ꞌën mi kakësokinbi ꞌati ꞌain, ꞌai kamina amiribishi ꞌuchatëkënkinma ꞌupiokin ñu ꞌati ꞌain, ꞌakin kamina ꞌatima okinmi ñu ꞌakë ënkin uni ñuñumakama ꞌakinti ꞌain, usokin ꞌai kamina ꞌapu ꞌaish uínbi uisabi okëma kuëëni tsóti ꞌain kixun ka Danielnën ꞌapu kakëxa.

Jonás 3:10

Usakin atun ñu ꞌatima ꞌakë ënia a mi sinania iskin ka Diosan Nínivenu ꞌikë unikama, uisabi kana atu otima ꞌai kixun sinánkin an usakin ꞌakatsi kikë usakin uisabi oma ꞌikën.

Mateo 9:13

Usaribiti cana ꞌën an —ꞌëx cana asábi ꞌai —quixun sináncë unicama a ꞌëmia catamënun cai uáma ꞌain. Ama, an —ꞌën nuitu ꞌaisama ꞌaish cana ꞌëxbi upí ꞌitima ꞌai —quixun sináncë unicama a cuni upí ꞌinúxa ꞌëmi catamënun cai cana ꞌëx uacën. Usa cana ꞌëx ꞌai quixun sinánquin camina ꞌunánti ꞌain, uisai quicë cara Nucën Papa Diosan bana ënëx ꞌicë quixun: “Unían ꞌë rabianan aín ꞌucha tërë́ncë ꞌinuxun ꞌaracacë ñuina rëxun xaroia isi cuëëncësamaira oi cana atun uni itsi nuibaquin ꞌaquinsa ꞌicë ꞌaquinia isi cuëënin”.

Marcos 7:21

Aín nuitu mëu ca unin ꞌatima ñu ꞌati sinania, xanu cuaioti, uni itsin ñu mëcamati, uni ꞌati, aín xanuma ꞌaínbi xanubë ꞌiti,

Marcos 7:23

Aín nuitunën sinánquian a ñucama ꞌacë unicamax ca Nucën Papa Diosan iscëx upíma ꞌicën. Usaquin ca Jesusan unicama cacëxa.

Lucas 15:10

ꞌËn cana mitsu cain, usaribiti ca achúshi uníxa ꞌaisama ꞌaíshbi sinanati Nucën Papa Diosmi sináncëbë aín ángelcamax cuëënia.

Lucas 15:24

—Ca bamaxa —quixun ꞌën sináncëbëbi ca ꞌën bëchicë ënëx ꞌëmi bëbaxa. Usa ꞌaish ca nëtë́a ꞌaíshbi bërí nubë ꞌicën. Ësai quicëbëtan ca ꞌatancëxun cuëënquin picanxa.

Lucas 7:47

Usa ꞌain cana mi cain, an ꞌitsaira ꞌë nuibatia isquin camina ꞌunánti ꞌain, aín ꞌucha ꞌitsaira ꞌaíshbi ca tërë́ncë ꞌicë quixun. An, ꞌën ꞌucha ca ꞌitsamashi ꞌicë quixun sináncë uni, ax ca aín ꞌucha tërë́ncë ꞌaíshbi ꞌitsamashi ꞌë nuibatia.

Hechos 26:20

ꞌAquin, Jesús ñuiquin, Damasconu ꞌicë unicama ñuixuntancëxun cana Jerusalénu ꞌicë unicama ñuixuanan Judea menu ꞌicë ëmacamanuxunribi bana ñuixuan. Ñuixuanan cana judíosma unicamaribi ñuixunquin ësaquin can: ꞌAtimaquin sináncë ꞌaíshbi sinanati camina Nucën Papa Diosnan ꞌiti ꞌain. Usai ami sinánquin camina ñu ꞌaisama ꞌaquinma ax cuëëncësabi oquinshi ꞌati ꞌain, mix camina ainan ꞌai quixuan camabi unin ꞌunánun.

Hechos 3:19

Usa ꞌain camina ꞌatimaquin sinánxunbi sinanaquin mitsun ꞌuchacama tërë́ncë ꞌinun Nucën Papa Diosmi sinánti ꞌain. Ami sináncëxun ca Nucën ꞌIbu Diosan mitsun ꞌuchacama tërë́anan chuámarua ꞌinun mitsu cuëënmiti ꞌicën.

Santiago 1:15

Usaquian sináncë cupí ca unin ñu ꞌatima ꞌaia. Ñu ꞌatima ënquinma amiribi amiribi ꞌai ꞌuchacë cupí ca bamai Nucën Papa Diosbë ꞌitima ꞌicën.