Isaías 53:10 - Kashibo-Kakataibo Biblia

¹⁰ Nukën ꞌIbun ka ꞌitsaira a tëmëramisa tankëxa. Usai ax unin ꞌucha kupí ñukë ꞌixun ka ꞌitsaira baritia xënibua, ꞌaínbi tsókin aín rëbúnkikama isti ꞌikën; usa ꞌixun ka Nukën ꞌIbu kakësabiokin an sinánkësa okin ꞌati ꞌikën.

Isaías 53:10 ပူးပေါင်းရင်းမြစ်များ

Salmos 110:3

Min unikamax ka a nëtënmi ꞌakanankin kupitanuma ꞌakë a nëtën minu rikuatsinti ꞌikën. Diosan bashi upí kakë anu ka atuxi kuanti ꞌikën, usa ꞌain kamina nëtë upíira urukian barin nibí ëskakë, usaribi mix kamabi nëtën ꞌiti ꞌain.

Salmos 22:30

ꞌËn rëbúnkikamax ka Dios ashi rabianan, a ñui xënibua ꞌaínbi tsóti ꞌikën;

Salmos 22:31

ꞌimainun ka axa bërí bakënti tuákamax, kani min kamina ñu chaiirabu ꞌakë kiax kiti ꞌikën.

Salmos 69:26

Min kamina ꞌë atsánkë ꞌikëbi, ꞌitsaira tëmëramiakën, usa ꞌikëbi ka axa ꞌëmi nishkë unikaman paë tamikin ꞌë ñui ꞌënun kuaikania.

Salmos 72:17

¡Usa ꞌain ka ꞌapun anë ax manukima usabi okin sinánkë ꞌiti ꞌikën; usa ꞌain ka an ꞌakë ñukama kamaxunbi ꞌunánkë ꞌaish bari këñutisama pain ꞌain an ꞌakë ñukamaxribi këñutima ꞌikën! ¡ꞌIanan ka kamabi menu tsókë unikama a ꞌapu kupín upíokin sinánxunkë ꞌiti ꞌikën! ¡Usa ꞌain ka kamabi menu ꞌikë unikaman ax ka chuámarua tsotia kiax kiti ꞌikën!

Salmos 72:7

¡Usakin ꞌanan ka ax ꞌapu ꞌixun ñu upíokin ꞌakëbë, a nëtëkaman uni upitax bukuti ꞌikën, anúan ꞌuxë nëtë́ti nëtë ꞌitámainun!

Salmos 89:29

Usa ꞌain ka aín rëbúnkikama ax ꞌiásaribiti, me ꞌimainun naí kamë ꞌëo këñutisama pan ꞌain ꞌapu ꞌiti ꞌikën.

Salmos 89:36

usa ꞌain ka aín rëbúnkikama ax ꞌiásaribiti atúxribi ꞌapu ꞌiti ꞌikën, usai ꞌika bari ꞌianan ꞌuxë këñutisama aín ꞌapu ꞌiti ꞌikën.

Isaías 42:1

Ësai ka Nukën ꞌIbu kiakëxa. Ënu ka ꞌën kuëënkësabi okin ꞌati ꞌën kaískë uni ax ꞌikën, ënëx ka ꞌëx a isi ꞌitsaira kuëënkë a ꞌikën, usa ꞌain kana ꞌën bëru ñunshin a ꞌinan, usa ꞌixun ka kamabi menu ꞌikë unikama upíokian ñu ꞌanun ꞌamiti ꞌikën.

Isaías 46:10

ꞌËx kikë ënëx usai ka ñu ꞌinuxun ꞌaia ꞌëx kia ꞌikën; kianan kana axa ꞌiti ñuribi ñui bërámabi kiakën. Usa ꞌain kana ꞌëx kin: Usa ꞌain ka ꞌën sinánkë ñukama ax usaibi ꞌiti ꞌikën; ꞌën kana uisa ñu ꞌanux karana kia a kamabi ꞌati ꞌain.

Isaías 49:4

ꞌËn kana sinánkë ꞌian: “Ñankáishi kana ñu binuxumabi tëmërai tëkin ꞌën kushi këñuin.” ꞌAínbi ka asérabi ꞌën ꞌakë ñukama ax Nukën ꞌIbunu ꞌikën, ꞌën biti ñukama ax ka kushi ꞌixun Diosan ꞌë ꞌinánkë ꞌiti ꞌikën.

Isaías 53:12

Usa ꞌikë ka Diosan ñunuxa abi ꞌinamëa ꞌikë, anua uni chabu ꞌikë anu ꞌimia ꞌixun, anua uni kushiirabu kanantankëx ꞌikë anua atubë ꞌinun ꞌimiti ꞌikën, a ka unin axribi ka uni ꞌatima ꞌikë kixun unin sinánkëxa, usa ꞌixun ka kamabi unin ꞌucha ainansa ꞌikë papianan kamabi uni atun ꞌucha kupín ñukáxuankëxa.

Isaías 54:3

min rëbúnkikamax ka mëkeu kuanan, mëmiu kuani me tsitsirui ꞌuakamë ꞌëoti ꞌikën; usai ꞌikin ka min rëbúnki kaman mekama anu ëma ꞌikëbia ënkan, anu uni ꞌikëma ëmakama anu kuantëkënti ꞌikën.

Isaías 61:9

Usa ꞌain ka aín rëbúnkikamax bëtsi bëtsi menu ꞌikë unikaman upíokin ꞌunánkë ꞌiti ꞌikën; usokin ꞌunánkë ka an iskë unikaman, atux ka Nukën ꞌIbunbia aín uni ꞌikë upíokin sinánxukin ꞌakinkë ꞌikë kixun ꞌunánkanti ꞌikën.

Isaías 9:7

Ax ka anua David tsóa anubi tsóti ꞌikën; usa ꞌikë ka ax kushiira ꞌixuan ñu ꞌaia kamabi menuxun kuati ꞌikën ꞌimainun ka chuámarua uni tsóti ax këñutima ꞌikën; usa ꞌixun ka uínsaranbi axa ꞌapu ꞌia ax ënkëma anubi ꞌiti ꞌikën, usa ꞌain ka an ꞌakë ñukama ax upíokin ꞌakë ꞌianan, an bërí pëukin ñu ꞌakë ax uínsaranbi nëtë́tima usabi ꞌiti ꞌikën. Ësokin ka Dios kamabi kushiñuira an ꞌitsaira unikama nuibakin ꞌati ꞌikën.

Ezequiel 33:11

Usa ꞌaínbi kana ꞌëx Dios ꞌaish atun tsóti ñui ësai kin, ꞌatima sinánñu unikama ñuti kana ꞌëx kuëëniman usa ꞌain ka atun ꞌakë ñu ëni upitax tsóti ꞌikën. Israel unikama ꞌatima ñu ꞌaimi tsókankë akamina ënti ꞌain. ¿Uisa ꞌaish kara usakin ñu ꞌai ñukanti ꞌik?

Ezequiel 37:25

Usokin ꞌai ka ꞌën uni Jacob ꞌinan me anua aín chaitiokëkamaxribi anu tsóa me anuribi tsókanti ꞌikën. A menu ka xënibua ꞌaínbi atu ꞌimainun atun bakë bëchikëkamaribi ꞌimainun atun rëbúnkikamaribi tsóti ꞌikën; usai ꞌimainun ka ꞌën uni David aín rëbúnkinëx xënibua ꞌaínbi atun ꞌapu ꞌiti ꞌikën.

Daniel 9:24

Setenta semana ax ka (cuatrocientos noventa baritia inuti ñui kikë ꞌikën) min unikama ꞌimainun min ëma upí a inuti ꞌikën, inutankëxun ka ax bana kuaisama tani ꞌikëkama ꞌimainun aín ꞌuchakë kamaribi ënti ꞌikën. Usai ꞌia ka Diosan aín ꞌuchakëkama unikama tërënxunti ꞌikën, usakin ꞌakin ka uníxa bëtsibë bëtsibë xënibua ꞌaínbi nuibananti a nanti ꞌikën. Usai ka min namákësokin iskë ꞌimainun an bana ñuikë Jeremías ax kiásabi oi ꞌiti ꞌikën, ꞌianan ka upíira kakë anu ꞌikë ax upíira ꞌitánun mëníokë ꞌiti ꞌikën.

Miqueas 7:18

Misaribi bëtsi Dios ka ꞌaíma ꞌikën, min kamina nux kuëënkësa oí ꞌikë a mëníokin, nuxnu ꞌuchakëkama a manuin, nukamax kananuna min unikama ꞌitsamashi tikikë a ꞌain. Min kamina nukama nuibatin usa ꞌain kamina mix xënibua ꞌaish nishkëma a ꞌain.

Mateo 17:5

Usaquian Pedronën cacëbëtainshi ca acama cuin pëquicësanën tupë́oncëxa. Usocëxun ca Pedro, Jacobo, Juan acaman nëtë cuin mëucüaxa ësai banaia cuacëxa: —Ënëx ca ꞌëx amiira sinani cuëëncë, ꞌën bacë bëchicë ꞌicën. Aín bana ca cuacan.

Mateo 3:17

Usai ꞌicëbëtan ca Jesusan naínuaxa banaia cuacëxa, ësai qui: “Ënëx ca ꞌëx amiira sináncë bacë bëchicë ꞌicën. Ami sinani cana chuámarua tani cuëënin”.

Lucas 1:33

ꞌApu ꞌaish ca Israelnën rëbúnquinën ꞌapu nëtë́timoi ꞌiti ꞌicën. Ax ca cëñútimoi ꞌapu ꞌinuxun ꞌaia.

Juan 1:29

Usaquin unicama coónxun ca Juanën Jesús aia isacëxa. Aia isi ca quiacëxa: —Ca is, ënëx ca unin ꞌucha cupí carnero bamati ꞌaínbia ax bamacë cupí Nucën Papa Diosan camabi unin ꞌucha tërë́nti a ꞌicën.

Juan 12:24

Asérabi cana ꞌën mitsu cain, me ꞌucë mëu ꞌapácëma ꞌaish ca ñu bëru aín nami ax usabi ꞌimainun aín napu axribi nëtëtima usabi ꞌia. Me ꞌucë mëu ꞌapácëxun cuni ca aín nami nëtë́cëbëbi aín napu ax cotancëxun upí oquin tuaia.

Juan 13:32

Uisaira cushiñu cara ax ꞌicë quixun ꞌunánquian unin a rabinun ca Nucën Papa Diosan uni ꞌinux anuax uá ꞌicë, ꞌë baísquimiti ꞌicën. Usocëbëtan ca ꞌëx cana asérabi aín Bëchicë ꞌai quixun ꞌunánquin unin ꞌëribi rabiti ꞌicën. Bëríbi ca usai ꞌiti ꞌicën.

Romanos 8:32

An ca —ꞌën Bëchicë ca bamatima ꞌicë —quiquinma nun ꞌuchacama cupía bamanun ënë nëtënu aín Bëchicë xuacëxa. Usa ꞌixun ca aín Bëchicë cupínu nux upitax tsónun nu ꞌimianan anun nu upitax tsóti ñucamaribi nu ꞌinánti ꞌicën.

Romanos 8:8

Usa ꞌain ca axa ënë nëtënu ꞌicë ñuishi sinani atun cuëëncësa oíshi ꞌicë unicama an Nucën Papa Dios cuëëmima.

2 Corintios 5:21

Cristo axa añu ꞌuchañumabi ꞌicëbi ca nun ꞌuchacama tërë́ncë ꞌinúan, nun ꞌucha bitsi ꞌuchañuirasa ꞌinun Nucën Papa Diosan ꞌimiacëxa, nux an iscëx ꞌuchañuma ꞌinun. Nuxnu abë ꞌimainuan Cristo axribi nubë ꞌicëbëtanu ax cuëëncësabi oquin ꞌanun ca Nucën Papa Diosan nun ꞌuchacama a ꞌináncëxa.

Gálatas 3:13

A bana, usai ca judíos unicama ꞌiti ꞌicë quixun Moisésnën cuënëo, a banacamaxa quicësabi oquiinra ꞌacëma ꞌicë, nu uisa cara oti ꞌicë usoquin ꞌati ꞌixunbi ca Nucën Papa Diosan nu ꞌaquinma, Cristo, nun ꞌucha cupí tëmëramia cupí, nu ami catamëtia uisotima ꞌicën. Camabi unin ꞌucha cupí ca ꞌuchañuira uni ꞌicësari Cristo i curúsocënu bamacëxa, Nucën Papa Diosan bana cuënëo ësai quicësabi oi: “Ui unix cara i curúsocënu matáscë ꞌicë ax ca asérabi ꞌuchañuira ꞌaish Nucën Papa Diosan uisaira cara oti ꞌicë usoquin ꞌacë ꞌiti ꞌicën”.

Efesios 1:5

Axa cuëëncësabi oquin ca nu nuibaquin Jesucristo cupí aín bëchicë ꞌinun nu caísacëxa.

Efesios 1:9

Unin ꞌunánma ꞌicëbi ca nu ꞌunánmiaxa, uisa cupí cara ax cuëëansabi oquin Cristo ënë nëtënuaxa bamanun xuacëxa quixun.

Efesios 5:2

Nucën Papa Dios cuëëncësabi oquin judíos unin aín ꞌucha cupí rëcë́xa carnero ꞌiásaribiti ca bamatsianxmabi Cristo nu nuibati nun ꞌucha cupí bamacëxa, ami catamëtíshinu ië́nun. Cristonëan nu usoquin nuibacë ꞌain camina mitsúxribi usaribiti bëtsibë bëtsibë nuibananti ꞌain.

2 Tesalonicenses 1:11

Usai ꞌiti cupía ainan ꞌinun caíscë ꞌixun usai ca aín uni ꞌiti ꞌicë quixun an sináncësabi oi ꞌinun mitsu ꞌiminun cananuna Nucën Papa Dios mitsu nëtë camabi ñucáxunin. Ñucáxuanan cananuna ax cuëëncësabi oquinmi mitsun upí ñu ꞌaisa tancë acama ꞌanan ami catamëtia an mitsu sinánmicëxunmi upí oquin ꞌanun aín cushínbi mitsu cushionun quixun a ñucatin.

Hebreos 2:13

Ësaribitia Jesús quiá ca cuënëo bananu ꞌicën: ꞌËx cana ꞌën Papa Diosmi catamëtin. Ësaribi ca cuënëo bananu ꞌicën: ꞌËx cana ënu ꞌain, ꞌën Papa Diosan ꞌë ꞌináncë aín bëchicëcamabë.

Hebreos 7:27

Ax ca Levitan rëbúnqui ꞌicësai ꞌiáma ꞌicën. Atun ca camabi nëtën aín ꞌucha pain tërë́anan judíos unicaman ꞌuchacamaribi tërë́nun Nucën Papa Dios ñucáxunia, ñuina rëtancëxun xaroquin. Usama ca Jesús ꞌicën. Axbi ca camabi unin ꞌucha cupí ñuina rëxun xarocësa ꞌitánun bamatsianxmabi achúshitishi bamacëxa.

Hebreos 9:14

Ñuina rëcë aín imi cupí uni ꞌicësamaira oi cananuna Cristo bama cupí nun ꞌucha tërë́ncë ꞌaish upí ꞌiti ꞌain. Nucën Papa Diosan Bëru Ñunshin Upí, axa usabi ꞌiá ꞌaish usabi ꞌicë, ax abë ꞌain ca Cristo, ax ꞌuchañuma ꞌaíshbi bamatsianxmabi, nun ꞌuchacama tërë́ncë ꞌinun bamacëxa. Xënibua ꞌaínbi abë ꞌitimoinu bamati ꞌicëbi ca nun ꞌuchacama tërë́nquin, ax aín imi ꞌapati bama cupí, Nucën Papa Dios, axa bamatimoi tsócë, a rabinu ax cuëëncësabi oi ꞌinun nu ꞌimia.

1 Pedro 2:24

Nun ꞌuchacama cëñucë ꞌaíshnu amiribishi ñu ꞌatima ꞌatëcënima, ñu upíshi ꞌai tsónun ca Cristo nun ꞌuchacama bicë cupí i curúsocënu bamacëxa. Mitsúxmi ñu ꞌatima ꞌai ꞌinsíncësa ꞌaíshbi upí ꞌinun ca ax ꞌaisamaira oquin paë tënëi bamacëxa.

Apocalipsis 1:18

ꞌËx cana axa bamatimoi tsócë a ꞌain. Bamatancëx baísquia ꞌaish cana bamatëcëntimoi tsotin. Ui unicamax cara uiti nëtën tsóti ꞌicë, uisa nëtën cara bamati ꞌicë quixun cana ꞌën mëníoin. Bamatancëx cara aín ꞌucha cupí anuax uni tëmëracë anu cuanti ꞌicë, cara anua aín ꞌucha tërë́ncë uni ꞌicë anu cuanti ꞌicë quixun cana mëníoin.