Isaías 45:8 - Kashibo-Kakataibo Biblia

⁸ “ꞌËn kana manámixunbi ꞌën kushi xuti ꞌain, ax ka naínuax kuénkuru ꞌibúmainun kuin kamanuax ꞌuí ꞌibúkin me chabókë usaribi ꞌiti ꞌikën; ꞌimainun ka anun ië́ti ax ñu bimisa ꞌiti ꞌikën, ꞌianan ka ñu ꞌupi ꞌati ax ñu uábukësa ꞌiti ꞌikën.”

Isaías 45:8 ပူးပေါင်းရင်းမြစ်များ

2 Reyes 19:25

¿ꞌAínbi kaina Dios ꞌixun kana kamabi ñu ësokin ꞌimi kixun ꞌunánma ꞌain? Bërámabi kana nëtë ió ꞌain ꞌën usaía ꞌiti ñukama mëníokën. Usa ꞌain kamina min bërí ëma upíokin kënëkë abi tankinma rurupakin ꞌati ꞌain; usakinmi rurupakin ꞌakëx ka tsamaintsi tsamaintsi ꞌitánun aín tukibukë ax rurukubuti bukubuaxa.

Salmos 72:3

ꞌImainun kamina aín bashi kamakëñun, matá mekama atunan ꞌain uínbi ubíokëma upitax anu bukukanti ꞌikën.

Salmos 72:6

¡Usai ꞌi ka ꞌuñe ꞌimainun nibitan menu ñu ꞌapákë, chabónan pasto chabókë usaribi ꞌiti ꞌikën!

Isaías 11:1

Ësai ka Dios kiakëxa, Jesénën rëbúnki achúshinuax ka i mo kótëkëni kanikë usaribi ꞌitánun achúshi uni mërati ꞌikën, usa ꞌi ka aín tapunuaxi kookësa ꞌi mërati ka ax ꞌapu ꞌiti ꞌikën.

Isaías 32:15

ꞌAínbi ka Nukën ꞌIbu kamabi kushiñu an ñu unio an amiribishi nukama ꞌakintëkënti ꞌikën, usakin ꞌakin ka me ënkëxa anu ñu ꞌapátisama ꞌikëbi anu ñu ꞌapátisa ꞌimitëkënti ꞌikën, usakin ꞌakëx ka a me anu unin ñu ꞌapátisabi upíira ꞌiti ꞌikën.

Isaías 44:24

Ësai ka Nukën ꞌIbu an mi bitëkënkë ax kiaxa, an ka mitsu ënë menu min titan bakëntisa ꞌikëmabi ꞌakëxa: “ꞌËx kana an kamabi ñu unio Nukën ꞌIbu a ꞌain, ꞌanan kana ꞌën naíkamë ꞌëo chaiira ꞌinun pënimëtanun ꞌimiakën ꞌimianan kana meribi anubia rakati anu nankën usakin ꞌaia ka uínbi ꞌë ꞌakianma ꞌikën.

Isaías 44:3

ꞌën kana anu uni ꞌikëma menua ꞌumpax ꞌinun ꞌimiti ꞌain, ꞌimianan kana me ëskikë anuribia xëxákama rakanu ꞌimiti ꞌain. ꞌËn kana min rëbúnkikama amiribishi upiti tsókanun ꞌimianan, upíokin sinánxunkin ꞌakinti ꞌain.

Isaías 46:13

ꞌËn kana ꞌën ꞌati ñukama axa ꞌurama ꞌinun ꞌimiti ꞌain; usa ꞌain ka ꞌëx ië́mianankë ax ꞌuramara ꞌikën. ꞌËn kana Sión kakë ëmanu ꞌikë unikama ië́miti ꞌain, ꞌën kana Israel unikama ꞌë ꞌakësaribi okin uisakinbi kanunma ꞌimiti ꞌain.

Isaías 53:2

Nukën ꞌIbun ka kuëëankëxa, aín uni axa ñu ꞌapákëx bërí koi kani aín tapunkama me ëskikë ꞌukëmëu kuankë usairibi ꞌiti. Usa ꞌaínbi ka upíma ꞌianan, chabáchabákikë upima ꞌiakëxa, ain namix ka usa ka kixun unin ñachakin istisama ꞌiakëxa;

Isaías 60:21

Kamabi unikama mitsun ëmanu ꞌikë ax ka upí sinánñubu ꞌiti ꞌikën, usai tsótika atun menubi xënibuti tsóti ꞌikën, usai ꞌika ꞌënbi ꞌapákëxa ñu upiti kookë usaribi atux ꞌiti ꞌikën, ax ka ꞌën mëkënanbi usaka ꞌën kushi ꞌikë kixun ismikin ꞌën ꞌakë ꞌikën.

Isaías 61:11

Me tukabëtsianx chikiti koia naë chukúmanu ꞌapákëx ñu ꞌikësa, usaribi okin ka Nukën ꞌIbun an ꞌakë ñukama ismikin ꞌën, kamabi menu ꞌikë unikaman kantakin a rabinun ꞌimiti ꞌikën.

Isaías 61:3

axa bëtsi menuax uax Jerusalénnu tsókë unikamax ka chimaputan mataka kima mañuti, mañuax kuëënun mitsu ꞌimiti ꞌain, ꞌimianan kana ꞌiníntisa ro sanuira anúnmi ꞌinun ꞌinankësa okin masá nuituti inkë a ënia kuëënun ꞌimiti ꞌain, ꞌianan kana masánuituti nitë́xëkinma ꞌë rabi kantanun ꞌimiti ꞌain. Usa ꞌikë ka i upí kanan, an kanankë kakin mitsu unikaman anëti ꞌikën, usa ꞌixun ka Nukën ꞌIbun anbi ꞌapá ꞌixun aín kushi mitsu ismiti ꞌikën.

Jeremías 31:22

¿Uínsaran kaina ꞌën kakësabiokin ꞌaíma amami amami kuani, xanu tuá aín papan bana kuatima nikësaimi ꞌikankë a ënkanti ꞌain? ꞌËx mitsun ꞌIbu ꞌixun kana achúshi ñu ió okin ënë menu ꞌakën, xanúan ꞌain bënë ënxun bitëkënkë usaribi okin ka Israel unikaman ꞌëx kikësabiokin ꞌanuxun ꞌë mërati ꞌikën. Kiax ka kiakëxa.”

Ezequiel 34:26

ꞌËn kana ꞌën unikama ñuina ꞌarakakë ꞌikësa ꞌikë ꞌën bashi upí kakë anu bukunun ꞌimikin upíokin sinánxunti ꞌain, ꞌakin kana anun ꞌiti nëtë ꞌikëbëa ꞌuñe atunu ꞌibúnun upíokin sinánxunti ꞌain.

Joel 3:18

Usa ꞌain ka a nëtë ꞌikëbëtan Diosan ñukama sënë́onkë ꞌain, a menu piti ñu ꞌimainun a xëati ñukama ꞌitsaira ꞌaish aín bashikama ꞌimainun me sapankama anua ꞌumpax iskësaira ꞌiti ꞌikën. ꞌImainun ka Judá menu ꞌikë xëxákama ax ꞌitsaira ꞌumpaxñu ꞌiti ꞌikën. ꞌImainun ka anuxun ꞌë rabiti xubu anuax achúshi xëxá upíira chikíkin ka Sitim kakë me a chabóti ꞌikën.

Hechos 2:33

A ca Nucën Papa Diosan abë ꞌApu ꞌiti aín cushínbi baísquimiquin an cásabi oquin aín Bëru Ñumshin Upí ꞌinánxa. Usa ꞌain ca ami mitsun isanan cuacë ñucama, ënëx aín Bëru Ñumshin Upitan ꞌimicëx ësai ꞌia.

Efesios 2:10

Cristo Jesús nubë ꞌinúan an ꞌimicëxun ñu upíshi ꞌanan nun sinan bëtsi ꞌinun ca an mëníosabi oquin nu ꞌimiaxa.

Efesios 4:24

Bëtsi sinánñu ꞌimicëx camina an iscëx asérabi upí ꞌianan unínribia iscëx upí nuituñu ꞌiti ꞌain, Nucën Papa Dios cuëëncësabi oi.