Isaías 43:6 - Kashibo-Kakataibo Biblia

⁶ ꞌËn kana aín tsipumiu ꞌikë axa mitsumi nishkë unikama: mitsun menubi kuantëkëntanua mitsu xunun kati ꞌain. ꞌImainun kana aín rëbumiu ꞌikë axa mimi nishkë unikamaribi: ꞌanubi mitsu ꞌimixuma ꞌanun kati ꞌain. ꞌËn bakë bëchikë bëbukama ꞌianan, ꞌën ꞌini bëchikë kamina bëti ꞌain, uinu kara me kuainakëaxa anu ꞌaish ꞌura ꞌikëbi,

Isaías 43:6 ပူးပေါင်းရင်းမြစ်များ

Salmos 107:3

usa ꞌain ka atu bëtsi mekamanu ꞌiabia timëkin, aín tsipumia ꞌanan aín rëbumi ꞌikë akama ꞌianan, amiaxa bari urukë ꞌimainun, amia bari kuabúkë amiaxa timë́nun ꞌimiakëxa.

Isaías 45:22

Usa ꞌain kamina ꞌën mitsu ië́minun ꞌënu ukanti ꞌain, uinu kara me kuainakëakëxa anu ꞌikë unikamaxi ka ꞌuti ꞌikën, ꞌëx Dios ꞌain ka bëtsi ꞌësaribi ꞌaíma ꞌiti ꞌikën.

Isaías 49:12

¡Kamina iskanti ꞌain! Israel unikama mitsux kamina, ꞌurakëoxbi ukanti ꞌain: axa aín tsipúmiax uti axa amiax umainun ka amia bari kuabúkë amiaxribi uti ꞌikën, umainun ka Asuán kakë me amiaxribi aín patsan uti ꞌikën.

Isaías 49:22

Ësai ka Nukën ꞌIbu kiaxa: “ꞌËn kana bëtsi menu ꞌikë unikama kati ꞌain; ꞌimainun kana bëtsi ëmanu tsókë unikama achúshi ꞌinánti ꞌain, usakin ꞌakin ka min ꞌini bëchikë xanukama papixun bëkësa ꞌinun bëti ꞌikën.

Isaías 54:3

min rëbúnkikamax ka mëkeu kuanan, mëmiu kuani me tsitsirui ꞌuakamë ꞌëoti ꞌikën; usai ꞌikin ka min rëbúnki kaman mekama anu ëma ꞌikëbia ënkan, anu uni ꞌikëma ëmakama anu kuantëkënti ꞌikën.

Isaías 60:4

Jerusalénnu tsókë unikama mitsun kamina, chairui kuainakëkin usai ka bëtsi menu tsókë unikama mitsubë timë́ti ꞌaia isti ꞌain. Mitsun bakë bëchikëkamax ka ꞌurakëoxbi uti ꞌikën; ukin ka unikaman mitsun ꞌini bëchikë xanukama, bërúanxun aín pëñanu ꞌaruxun bëkësa obëtsinkin bëti ꞌikën.

Isaías 60:9

Tarsisnu ꞌikë manë nunti kama ax ka atu rëkuëonbiani manë nunti kama raíri abë biranan kuatsini kuankin, Jerusalénnu ikë unikama bëi ukin, mitsun bëchikëkama ꞌurakëo bëanan, kuri manë uxua akama bëti aka ax ꞌikën, a ñukamax ka min ꞌIbu Israel kaman Dios upíira a bëxunkë ꞌiti ꞌikën, an ka kushiira ꞌixun mitsu ꞌakiankëxa.

Jeremías 23:8

usai kima ka sinanátëkëntimoi ësai kiti ꞌikën: Nukën ꞌIbu axa tsókë an ka Israel rëbúnkikama aín tsipumia ꞌanan bëtsi mekamanua abisa ꞌikëbi chikíankëxa. A unikamax ka aín menubi tsótënkënti ꞌikën.”

Jeremías 31:8

Ka kuat, ꞌënbi kana aín tsipumia ꞌikë me anua bëanan, uinu kara me kuainakëakëxa anuabi timëbëtsinkin mitsu bëtëkënti ꞌain. Bëkëbë ka atubë bëxuñu uni, aín niti bëtsikë unikama, xanu ñuitsíkëkama ꞌimainun aín tuá bakënkëkama; ¡atux ka ꞌaisamaira uni ꞌaish amiribishi utëkënkanti ꞌikën!

Ezequiel 36:24

ꞌËn kana a menu ꞌikë ëmakamanua mitsu chikínti ꞌain, chikínxun kana mitsun menubi timë́nun bëtëkënti ꞌain.

Ezequiel 37:21

Usakin ꞌatankëxun kamina atu kati ꞌain: Ësai ka Dios kiaxa: ꞌËnbi kana Israel unikama anua ꞌikë ëma kamanuabi bëtëkënti ꞌain; bëkin kana me kamanuabi timëbëtsinkin atun menubi bëtëkënti ꞌain.

Joel 3:7

ꞌAínbi kana ꞌën mitsun marua ꞌaísha anu ꞌikaniabi atu chikínkin atux ꞌiásaribitimi mitsúxribi tëmëranun ꞌimiti ꞌain.

Deuteronomio 30:4

ꞌimainun ka ami nishkë unikaman uinu ꞌikë menubi kara uankëx amanu amanu kuankë ꞌikëbi anuabi Nukën ꞌIbu Diosan mitsun aintsikama ꞌain menubi unun ꞌimiti ꞌikën.