Isaías 42:5 - Kashibo-Kakataibo Biblia

⁵ Dios Nukën ꞌIbu an naíkamë ꞌëo uniokin chaiira ꞌinun pënían, an ka me ꞌimainun anua kookë ñukama ꞌakëxa, ꞌanan ka unikamaribi anúan tsóti uin ꞌinan, ax aín uni kai ësai kia:

Isaías 42:5 ပူးပေါင်းရင်းမြစ်များ

Génesis 1:1

Uniotabakin ka Nukën ꞌIbu Diosan uniokëxa, naíkamë ꞌëo ꞌimainun me.

Génesis 2:7

Usa ꞌain ka Nukën ꞌIbu Diosan mebi unisa ꞌinun ꞌatankëxun aín rëkinu rëxúnkakëxa, rëxúnkakëxëshi ka uíni uni ꞌiakëxa. Usai ꞌika uni uniakëxa.

Salmos 33:6

Diosan ka aín banan ishi naíkamë ꞌëo uniokëxa, ꞌanan ka bari ꞌuxë ꞌispa akamaribi uniokëxa.

Salmos 96:5

Bëtsi ëmanu ꞌikë unikaman rabikë dioskama ax ka kushiñuma ꞌaish ñuumara ꞌikën, ꞌaínbi ka anu rabikë Nukën ibu an kuni naíkamë ꞌëokama uniokëxa.

Isaías 40:12

¿Uin kara parúmpapa kamakëñun ꞌumpax aín mëkënan tupúanan, aín mëkën rëbukaman uiti chaiira kara naíkamë ꞌëo ꞌikë kixun tupuax? ¿Uin kara me putu kamabi uiti kara kixun tupúnti ꞌikë, ꞌianan kara anun ñu ꞌië tupúnti ꞌakë anun matákama ꞌimainun bashikama tupúnti ꞌik?

Isaías 40:22

Dios ax ka an me bëararakë kuman batsisa naí meu ꞌikë a manámi tsótaxa, usa ꞌixun ka kamabi uni champura ꞌakësa okinshi isia. An ka chupa ꞌakësokinshi naíkamë ꞌëo pëokaia, ꞌanan ka anu ꞌiti chupa këxtú pëokakin pëninkësa okinshi ꞌaia.

Isaías 40:26

Manámi bësukin kamina naími okin iskanti ꞌain: ¿Uin kara kamabi ñu uniokëx? An ka kamabi uniotankëxun ꞌispakama aín anën anëkin nankëxa, usa ꞌixun ka achúshi achúshi usai kamina ꞌiti ꞌai kixun kakëxa. Aín kushi chaiira ꞌain ka uinu ꞌikë ꞌispaxbi nëtë́tima ꞌikën.

Isaías 40:28

¿Mitsun kaina ꞌunaniman? ¿Mitsun kaina a kuakëma ꞌain? Nukën ꞌIbu Dios ax ka uínsaranbi këñutima oi tsókë a ꞌikën, an ka kamabi me uniokin anu ꞌikë ñukamaribi uniokëxa, usa ꞌaish ka ax atsanx kana ꞌakasmati kiax kima; ꞌianan ka ax sinánñuira ꞌikë ax nëtë́tima ꞌikën.

Isaías 44:24

Ësai ka Nukën ꞌIbu an mi bitëkënkë ax kiaxa, an ka mitsu ënë menu min titan bakëntisa ꞌikëmabi ꞌakëxa: “ꞌËx kana an kamabi ñu unio Nukën ꞌIbu a ꞌain, ꞌanan kana ꞌën naíkamë ꞌëo chaiira ꞌinun pënimëtanun ꞌimiakën ꞌimianan kana meribi anubia rakati anu nankën usakin ꞌaia ka uínbi ꞌë ꞌakianma ꞌikën.

Isaías 45:12

ꞌËn kana mekama unionan anu ꞌikë unikama ꞌakën, ꞌanan kana naíkamë ꞌëo ꞌën mëkënan pëninkësa okin ꞌakën, ꞌanuxun kana anu ꞌikë ꞌispakama mëranun ꞌimiakën.

Isaías 45:18

Ësai ka an naíkamë ꞌëo unio, Nukën ꞌIbu Dios ax kia, an ka me ꞌatankëxun anubia ꞌitinu nankëxa, mex ka ñankáishi rakatima ꞌikë anu ka uni ꞌiti ꞌikën: ꞌËx kana Nukën ꞌIbu ꞌain, usa ꞌain ka bëtsi ꞌaíma ꞌikën.

Jeremías 38:16

ꞌAínbi ka uínbi kuanuma ꞌapu Sedequíasnën unëxun asérabi ësokin an bana ñuikë Jeremías kakëxa: —ꞌËn kana Nukën ꞌIbu an nu tsóti ꞌinánkë an ismainun asérabi mi kain, ꞌën kana mia ꞌanun uni ꞌinánan an mi ꞌaisatankë unikaman mia ꞌanun ꞌamitima ꞌain.

Ezequiel 18:4

Kamabi unix ka ꞌën bërúankë ꞌikën, usa ꞌain ka uni ꞌimainun aín bakë bëchikëkama ꞌën bërúankë ꞌikën. Usa ꞌain ka uix kara ꞌuchaia ax bamati ꞌikën.

Daniel 5:23

Usa ꞌain kamina mix ꞌapu ꞌaish Nukën ꞌIbu Dios naínu ꞌikë ami kuaikin mesanuxun ami xëakë xampakama anuxun Dios rabiti xubunua ꞌia akama bëan, bëxun kamina min kamikë unikamabëtan ami uvas baka paëokin vino ꞌakë xëakin min dioskama kuri, manë uxua, manë panshian, manë tunan, i ꞌakë ꞌimainun maxá ꞌakë mitsun dioskama rabikin ami xëan; akaman ka isima ꞌimainun kuatima ꞌianan ka añu ñubi ꞌunanima. Usa ꞌaínbi kamina Dios an mix ꞌapu ꞌikë bërúankin tsónun ꞌimikë a rabikëma ꞌain, an ka an kuëënkësa okin mi kamabi ñu min ꞌakë a ꞌanun mi ꞌamiaxa.

Amós 9:6

Diosan ka naíkamë ꞌëonu aín xubu ꞌakëxa ꞌanan ka an me tuinti kamaribi menu ꞌakëxa; an ka parúmpapa ꞌumpax timë́tankëxa me chabói ꞌibúnun ꞌimia. Ax ka Nukën ꞌIbu Dios, kamabi kushiñu kakë a ꞌikën.

Hechos 17:24

An ca me ꞌimainun anu ꞌicë ñucamaribi uniocëxa. Ax ca naí, me acaman ꞌIbu ꞌicën. Usa ꞌaish ca ax anuxun a rabiti unin ꞌacë xubunu ꞌima.

Hechos 17:25

Unin a ñu ꞌaxuncëxmabi ca ax usabi ꞌiá ꞌaish usabi ꞌia. An ca anun nux tsóti nëtë ꞌimainun suñu, piti, ꞌimainun camabi ñuribi nu ꞌinania.

Hebreos 1:2

Bëráma usaquin nucën raracama ꞌunánmia ꞌaínbi ca an xucëxun aín Bëchicë anbi aín Papan bana unicama ñuixuancëxa. Nucën Papa Diosan ca aín Bëchicë camabi ñu uniomiacëxa. Usa ꞌain ca an camabi ñu, naíu ꞌicë ángelcama ꞌimainun, ënë menu ꞌicë unicama ꞌimainun, camabi ñu unio ꞌicë aín Papan a ꞌibuamiacëxa.