Isaías 42:10 - Kashibo-Kakataibo Biblia

¹⁰ Anun kantakëma kanta ió anun kamina Nukën ꞌIbu rabi kantakanti ꞌain; rabikin ka uinu kara me kuainakëakëxa anu tsóa unikama atúnribi rabiti ꞌikën, ꞌamainun ka uikamax kara aín manë nuntin parúmpapan kuania akaman ꞌamainun, ka parúmpapanu ꞌikë ñuinakama anribi rabiti ꞌikën, ꞌamainun ka parúmpapa nasínu tsóa unikama atúnribi rabiti ꞌikën.

Isaías 42:10 ပူးပေါင်းရင်းမြစ်များ

Salmos 150:6

¡Kamabi ñuina axa suñun uinkë ꞌimainun unikama anbi ka rabiti ꞌikën! ¡Usa ꞌain kananuna ashi ësokin ax kuëënkësabi okin rabiti ꞌain!

Salmos 33:3

ꞌai kamina anun kantakëma kanta ió anúnribi, ¡kantai munuma banai kuëënkanti ꞌain!

Salmos 40:3

Usa ꞌikë ka anun a rabi kantanun ꞌë Diosan kanta ió achúshi ꞌunánmiakëxa. Usai ꞌëx ꞌia isi ka ꞌitsaira unix kuëëni chikirakëkin Nukën ꞌIbu rabiakëxa.

Salmos 65:5

Nukën ꞌIbu Dios an nu ëñëmikë, min kamina mi ꞌurama ꞌinuxa atux min xubunu ꞌinun ꞌimin, usa ꞌixun kamina ñu chabu ꞌimainun upíira ꞌaxunkin mishi rabinun nu ꞌimin; ënë menu tsókë kamabi unikama ꞌimainun, parúmpapa ꞌukëmanan tsókë unikama ax ka mimi katamëtia;

Salmos 72:10

¡ꞌImainun ka a ꞌinaínshiti ñukama bëanan ꞌapu ꞌinánti bikë akama Tarsisnu ꞌikë ꞌapukama ꞌimainun paru nasínu, ꞌikë akamanribi bëxun ꞌinámainun ka, Sabá ꞌimainun Sebá anu ꞌikë ꞌapukamanribi bëxun ꞌinánti ꞌikën!

Salmos 96:11

¡Me ꞌimainun naíkamë ꞌëo ax ka kuëënti ꞌikën! ¡ꞌImainun ka parúmpapa bëchuni anua ꞌikë ñukamabëbi banati ꞌikën!

Éxodo 15:1

Usa ꞌain ka Moisés ꞌimainun israel unibunën ain ꞌIbu Dios a rabi ami kantakin kakëxa: ꞌËn ꞌIbu Dios rabi kana ami kantati ꞌain, an ka ꞌën iskëma ñu ꞌakin parúmpapanu kamabi caballo ꞌimainun anu ꞌikë unikama nanë́miaxa.

Éxodo 20:11

ꞌËn kana mapai achúshi ꞌimainun achúshi nëtë ꞌimikin ꞌëx min ꞌIbu ꞌixun naí ꞌimainun me parúmpapa kamabi anu ꞌikë ñukama uniokën, usakin uniotankëx kia ꞌain ka siete nëtë ꞌikëbë anun uni tantiti ꞌikën, usai ꞌikin kana a upíokin sinánxuni a nëtëx ka bëtsi nëtësama upíira nëtë ꞌiti ꞌikë kiax kana kiakën.

Isaías 42:4

Usai ꞌika tantimabi ꞌianan kana ꞌaima kixunbi sinántima ꞌikën, kamabi menu ꞌikë unikamaxa ax kikësabiokin ꞌai sënë́ntamainun Axa parúmpapa nasíkamanu ꞌikë unikama atun ka an ꞌunánmikësabi okin ꞌati ꞌikën.”

Isaías 44:23

¡Naíkamë ꞌëo ax ka munuma kuëëni kuënkënti ꞌikën, usakian Nukën ꞌIbun ñu ꞌakë a isi! ¡Munuma kuënkëni ka me chaiira nankë́kë kamax unix ꞌikësaribiti ꞌiti ꞌikën! ¡Aín bashikama ꞌimainun ninu ꞌikë ikama axribi ka munuma unix ꞌikësai kuëënti ꞌikën, Nukën ꞌIbun ka aín kushi chaiira ismikin Israel unikama Jacobnën rëbúnkikama ië́miaxa usa ꞌain!

Isaías 49:13

¡Naíkamë ꞌëo! ¡ꞌImainun ka bashikaman kuëëni kushin kantakin upí tania! ¡Usai ka Nukën ꞌIbun aín unikama tëmërai masá nuitutiabi an nuibakin kuëënun ꞌimikëbë ꞌiti ꞌikën!

Isaías 49:6

ax ka ësai kia: ꞌËn uni ꞌixunmi min Jacobnën rëbúnki, Israel unikama axa ñuima ꞌiakama a aín ñakánubi utëkënun ꞌakinkë ax ka ꞌën iskëx sënë́nmara ꞌikën, ꞌën kana ꞌën tirísa ꞌixunmi bëtsi menu ꞌikë unikama bana ñuixuanan, uinu kara me kuainakëakëxa anubi kuankin bana ñuinun mi ꞌimiti ꞌain.

Isaías 60:6

Usa ꞌain kamina atúxa ꞌitsaira ꞌaish atun camellonën ëma tsitsibëtsini Madián ꞌimainun Efá amiax ꞌaia isti ꞌain; usai ukin ka Sabánu ꞌikë unikama an kuri ꞌimainun sanuira ñu aín camellonën bëi ukin an upíokin ñu ꞌaia kixun Dios a rabiti ꞌikën.

Isaías 60:9

Tarsisnu ꞌikë manë nunti kama ax ka atu rëkuëonbiani manë nunti kama raíri abë biranan kuatsini kuankin, Jerusalénnu ikë unikama bëi ukin, mitsun bëchikëkama ꞌurakëo bëanan, kuri manë uxua akama bëti aka ax ꞌikën, a ñukamax ka min ꞌIbu Israel kaman Dios upíira a bëxunkë ꞌiti ꞌikën, an ka kushiira ꞌixun mitsu ꞌakiankëxa.

Apocalipsis 14:3

Acama ciento cuarenta y cuatro mil unicamax ca anun cantacëma, canta iotan cantaxa. A cantax ca anu Nucën Papa Dios ꞌicë a bëmánon ꞌimainun axa bamatimoi tsócë ꞌitsa bëruñu rabë́ ꞌimainun rabë́ ñu, acama ꞌimainun anu ꞌicë caniacëcë unicama mëcën rabë́ ꞌimainun taë rabë́ ꞌimainun rabë́ ꞌimainun rabë́, acaman bëmánauncüaxa cantacë ꞌiaxa. Uinu ꞌicë unínbi ca a canta ꞌunántima ꞌicën, unicama ciento cuarenta y cuatro mil (144,000) a Nucën Papa Diosan ainan ꞌinun ië́micë, acaman cuni ca a canta ꞌunánxa.

Apocalipsis 5:9

Carnero ꞌicësaribitia unin ꞌucha cupí bama, ami bësuax ca cantati ió cantaxa, ësai qui: —Min camina bëtsibë sënë́nmaira ꞌixun a quirica anúan tacáshcacë pëóshxun bacati ꞌain. Mix bamax baísquia ꞌixun camina nucama bëtsi bëtsi unibu, bëtsi bëtsi banan banacë, ꞌimainun camabi nëtënuax ucë, ꞌimainun bëtsi bëtsi ꞌapuñu unicama, Nucën Papa Diosnan ꞌinun ië́mian.