Isaías 41:5 - Kashibo-Kakataibo Biblia

⁵ Axa parúmpapa nasínu ꞌikë ëmakamanu tsókë unikama ax ka a isi ꞌitsaira rakuë́kankëxa; usai ꞌimainun ka mekama shaíki kamabi mex shaíkiakëxa. Usai ꞌikëbë timë́xun ka ꞌaia kixun iskanti ꞌikën.”

Isaías 41:5 ပူးပေါင်းရင်းမြစ်များ

Génesis 10:5

Ënë unikamax ka Jafetnën rëbúnki ꞌiakëxa, ax ka achúshi Javán kakë ꞌiakëxa, aín rëbúnkinëx ka parúmpapa kuëbí tsóti ꞌuakamë ꞌëokëxa, usai ꞌika aín bananbi bananbi banai aín aintsibë timë́ax aín menu menubi tsóakëxa.

Salmos 65:8

usakin mi ꞌakëbë ka anua me sënënakëa anua tsókë unikama axribi, min ꞌá ñu upíbu isi rakuë́ti ꞌikën; usai ꞌibi ka munuma sharati kuënkëni, amiaxa bari urukë a ꞌimainun amia bari kuabúkë amiaxi kuëënti ꞌikën.

Salmos 65:9

Min kamina mekama bërúankin; ñu ꞌapákëkama kómiti ꞌuíribi ꞌibúnun ꞌimin; usakin ꞌakëxuan xëxatan ꞌëkin mapurukin chabókëxun ka ñu ꞌapákëkaman tuaia. ¡Usakin ꞌakin kamina me anu ñu ꞌapátisabi ꞌinua mëníokanun ꞌimin!

Salmos 66:3

Rabikin kamina Dios kati ꞌain: ¡Min unio ñukamax ka upíirabu ꞌikën. Mix kushiira ꞌixun kamina, axa mimi nishkë unikama rakuë́tia menu nipakëkësa ꞌitánun ꞌimin;

Éxodo 15:14

Usai nux kuania kuati ka bëtsi bëtsi menu ꞌikë unikama rakuëtan bamai bërëti ꞌikën, usai ꞌikëbë ka filisteo unikamaxribi aín sinan bëtsi sinani rakuë́ti ꞌikën,

Isaías 41:1

“Ësai ka Dios kiakëxa, axa parúmpapa nëbëtsi ꞌikë nasínu bukukë unikama an ka nëtë́xun ꞌëx kia kuati ꞌikën. Bëtsi bëtsi menu tsókë unikamax ka kushi mëníokati ꞌikën. Uisai kaina mitsux tsóti anu banakin mëníonun kamina timë́kanti ꞌain; bërí kananuna timë́xun uisakin karanuna mëníoti ꞌai kixun isti ꞌain.

Isaías 41:6

An ñu unioti ꞌunánkë an ka abëtan ñu ꞌakë a kuëëmikin uni ábia ënxuma ꞌanun kixun kati ꞌikën.

Josué 2:10

Nun kananuna ꞌunanin mitsux Egipto menuax chikíküatsini ukëbëtan ka Diosan anun sikarakënun parúmpapa xónsa kakë a aín nëbë́tsi ëski panárabënun ꞌimiakëxa. ꞌImainun kananuna ꞌunanin mitsun kamina Sihón ꞌimainun Og, amorreo kakë unibunën ꞌapu rabë́ axa Jordán kakë baka ꞌukëmanan bukukë a aín unikama këñunbi maërakatanun këñuakën.

Josué 5:1

Kamabi amorreo unibunën ꞌapukaman ka amia bari kuabúkë Jordán kakë baka a ꞌurama ꞌikë ꞌimainun kamabi cananeo unikaman ꞌapu axa parúmpapa Mediterráneo kakë a ꞌurama ꞌikë, akamanbi ka Nukën ꞌIbun Jordán kakë baka anúan Israelkama sikarakënun ëskinun ꞌimikë kuakëxa, kuati ka ꞌaisamaira israel unibumi rakuë́ti abë ꞌakánanti sinánma ꞌikën.